Zefanya Uram 2

“Sun malyi kuramunyi dinyi takloboka Er Imtamnyi tam urasin deibdarur,” ebmou uram deyok

2:1-3

1Er Iya Erebdobnyi biryi ton ato ebmou, “We, sun Ni Imtamnyi urasintam aryi alyi dinyi kundarur nang a, sun kanya mikib yabdobmunci buluboka neik ai wekdobdarur. 2Niryi sunsi weneboka gandum kala lokdoba camdonongnaming to kabul kum kubmasinyi talak aryi minob sun kanya mikib yabdobmandarur. Ara, Ni Iya Erebdobnyi yu weik dinyi ara uk buk ato kuranir dinyi aryi orminingna uki tum kabul kum berekmaci bok, sun kanya danguboka Ni Imtamnyi bisi diba tenebdobdarur. Ba, a dinyi nirya ara sun dam kum yankwansir. 3Ara, sun a mutuk dam kundarur nang luknubdob kanya bondarur nang ara Ni Iya Erebdobnyi bisi ingkirikdobnindarur. Tonda, Ni Imtamnyi biryi, ‘Ato kubdarur-ato kuna mem,’ ebdeibmase uram asi kunundarur mutuk nang ara Ni Iya Erebdobnyi bisi ingkirikdobnindarur. Tonda, Er Imtamnyi urasintam aryi teleb kun dinyi asi ingkirikoka kunubdobdarur. Tonda, Ni urasin dam kanya luknubdongoboka kuron dinyi asi ingkirikdobdarur. Sunci ato kubmunyi ura, Ni Imtamnyi biryi wenebkwan uki tum ara sunda kum wenebkwansin,” ebmou.

Im dangna nang tukwe dangna nang nirya wenebkwande uram deyok

2:4-15

4“Ba, sun Filistin nang atei Gaza atei kuraming nang ara kum daneibkwan ba, ninyi ton tangdongona kum kubkwande. Ba, Askelon atei ninyi ara kum danabsinibnyi ba, ninyi singsing kum dansekwaming. Ba, Asdod atei ara bingna kum kubmangnyi karen aryi sun mar ordan nang kiting dukduk en iyanmangnyi ninyi nirya kum daneibkwaming. Ba, Ekron atei kunung nang ara sun mar ordana nang aryi, ‘Bindobdarur,’ eboka yakdonokingnyi ba, bokwalwalabdankwaming. 5Sun Filistin mutuk me kwan katum dam dondarur atei nang, Kreti yala nang sunda Ni Imtamnyi biryi wenebkwansin. Sunti Er Iya Erebdobnyi uram ara ato ebdeibsou: We, sun Kanaan nang a. Sun Filistin nang mutuk tukwe kundarur atei nang ara Niryi sun nirya obkiribkwansin. Ba, a mutuk dam ara sun atei nang ton kum kubkwaming. 6Ba, me kwan katum dam atei tuba kum kubkwande ba, bisam domba kalingna nang yandoka kuramingiryi, a mutuk asi bisam mol kwamna dam mutuk kibkwaming. Tonda, sunci a mutuk ara bisam domba dongon ai doboka lika doboka aknabdongobkwaming. 7Ura, me kwan katum dam mutuk ara sun Yehuda nang kankan aryi lebdobdankwamangnyi nang sun mutuk kibkwande. Ba, a mutuk dam asi sun bisam domba mol kwabdongoboka kalikde kunmangnyi ani, lukunda ara Askelon nang atei minob kuamwe ai marorbinkwaming. Sun Yehuda nang ara ato kubkwaming. Ara, Er Iya Erebdobnyi, sun Molonanyi biryi sunsi tuba kalingdur deyok aryi ato kubkwaming. Ani, Er Iya Erebdobnyi biryi sunsi minob mangkau kuramnyi to dinyi tamubdeibkwande deyok aryi ato kubkwaming,” ebmou. 8Tonda, Er Iya Erebdobnyi biryi ato ebmou, “Niryi kekenun uca, Moab mutuk nang ab Amon mutuk nang ab aryi Ni uram keken nang asi, ‘Ye, ye, bita,’ eboka ina ngilikoka durungnung asi kekenun. Ara, sunci, sun dam nang erebdandobingiryi, Yehuda nang urasintam aryi wingdana uram sisingnung asi kekenun. 9A deyok aryi, Ni Iya Erebdobnyi bira Iya Mikibnyi bisi sun Israel nang aryi moloninanyi deyok ati, Niryi Moab nang asi minob talak aryi Niryi Sodom asi kubdeianse to kubdeibkwan. Ba, Amon yaldangna nang asi minob talak aryi neiktoto Gomora kubdeianse to kubdeibkwan. Ba, atei doramingnyi mutuk lu asi kirikna tiling dinyi dem abkwande mutuk bakan kibkwande. Tonda, a mutuk ara ilim tukwe kubde ba, uwa minmin ena garam ilinto anabkwande mutuk kubkwande. Tonda, a mutuk dam ara ninyi iya ton kum kubdenkwaming. Ba, Ni uram keken atei nang kankan aryi lemdordanmangnyi nang ara sun Moab nang taleraming mutuk ton sun Amon nang taleraming mutuk asi arabdobingnyi ura, sun mutuk iya kubkwande. 10Ato kuboka wenen dinyi dobdobkwaming. Ara, sun Moab nang Amon nang ab aryi Er Iya Erebdobnyi Iya Mikibnyi uram keken atei nang asi durukamingnyi deyok aryi wenebkwande. Ani, tonda sunci Er uram keken atei nang urasintam asi wingdaramingnyi deyok aryi ukubkwande. 11Er Iya Erebdobnyi biryi ilil tenen dinyi kikniboka sun yuk atei nang asi wenebkwande. Ara, Erci a mutuk dam kwemdeina moloramingnyi dinyi nirya kum daneibkwande. Ba, im dangna tukwe dangna nang nirya sun kuramingnyi mutuk dam akiryi kutam ikdongoboka Er Imtamnyi bisi si eboka kisal dakwaming. 12We, Etiopia atei kundarur nang sunbabyi Er Iya Erebdobnyi biryi ninyi on ya aryi lukoka obkwansir. 13Er taruk lakokabdiryi sun me utam atei, Asyur nang ababyi oboka kum daneibkwande. Ba, Niniwe atei ara ninyi kun kum mutuk kibdeiboka yina mutuk buta dem burlorande ato mutuk kibdeibkwande. 14Ba, Niniwe atei minob kuamwe dam ara bisam domba mer kalikwaming mutuk kubkwande. Tonda, baitam kuboka isin nebneb en dinyi nirya yandoka akatei minob kuamwe dam asi sun ai kibkwaming. Tonda, akatei abyokomna ingwelena co daksakamwe nirya ara maka ai kubkwande. Ara, maka nimtai ab maka okbayol ab aryi mi dein ai kibkwande. Ba, maka si solman ara akatei im dub ai asi burandiryi uram ebde bunkwande. Ba, maka tulumburunyi ara bisik bublan sangkurya dam asi bunkwande. Ai abilinga co si aras aryi doamingnyi ara nirya dalubminikwaming ati, maka ai dam kubkwande. 15Akatei Niniwe atei ara minob ura sun kanya kilkil asa kuramwe atei kuramwe. Akatei nang ara minob ura mangkau kuramiryi sun mining kanya asi erdaramnyi asi, Er Imtamnyi biryi sun atei dalubsinibkwande. ‘Yuk atei ara weik atei da ton kum kunung, eda nun Niniwe atei nang asi weik atei donub,’ erdaramnyi. Asi iya me kum ai ato mutuk kibci ba, a mutuk dam ara bai kurande dinyi yala kun mutuk kibkwande. Ba, ato kuamwe atei dam asi ninyi bisik yibanmangnyi nang aryi dibdengnyi ura, ‘Ye, ye, bita,’ eboka taruk ukdeiboka dokdonokwaming,” ebmou.

Currently Selected:

Zefanya Uram 2: MTG

Highlight

Copy

Compare