Hagai Uram 1

Er Iya Erebdobnyi biryi, “Mar ordana nang aryi minob iyandoka Ni dama deirin ai dakminikamnyi asi sunda Yehuda yala nang aryi tamuboka dobdarur!” eboka arukmou uram deyok

1:1-15

1Ninyi si Darius bira Persia mutuk nang weik sienyi kibmou ani, kwalina bitinyi dinyi asi kibmou ba, Er Iya Erebdobnyi biryi Er uram ermururamunyi nabi si Hagai deici asi uram ton ebdeibmou. Ara, wala nabaryi wala kubmou ba, yuma uki tum berekmou ura, Er Imtamnyi biryi nabi Hagai deici uram ton ebdeibmou. Ati, Persia mutuk weik sienyi amwetam bukoka Yehuda mutuk kalingnamunyi si Zerubabel ab, ninyi dama deirin nang sienyi si Yosua ab ati Erci ato ebmou, “Er Imtamnyi biti dama deirin ai Bait Allah dakminikamnyi asi tamuboka dobdarur,” ebdeibmou. Ara, Sealtiel mi Zerubabel ab, Yozadak mi Yosua ab asi erci ato ebmou.

2Ara, Er Iya Erebdobnyi imtam yin doun nang sienyi biryi Hagai deici aryi ato ebmou, “Akatei nang Yerusalem atei tamuryanmandau nang ara ato endarur, ‘Er Iya Erebdobnyi biti dama deirin ai Bait Allah ai tubto dona ara uku talak aryi dona asi kikiman kum,’ endarur, se,” ebmou.

3Ura, Er Iya Erebdobnyi biryi Er uram ermurunanyi nabi Hagai deici asi ato ebdeibmou, 4“Uku talak ara sunci co abilinga teleb dinyi kikniboka sun kurandum ai yuk-yuk asi sirya dobmarum. Bok, Nira Imtamnyi biti dama deirin ai dakminikamnyi asi tamuboka kum dobmandau, se. Ni Imtamnyi biti dama deirin ai ara daklobdoba ol dem asi iya a kubkwandur darib?”

5Ati, Er Iya Erebdobnyi imtam yin doun nang sienyi biryi ato ebmou, “Sunci, ‘Er Imtamnyi dama deirin ai ara tamuboka kum dobmoubwe ara malyito kubmoubwe,’ tenen sun malyi kundarur dinyi asi kanya teneibdandemunci, bitabdeibdarur! 6Sunci Niti dama deirin ai asi tamuboka kum dobmandau deyok aryi, Niryi sunsi kisal dangna dinyi karesina kum kusunun. Sun wa in dam ara yala ilinto kouamunyi bok, aboka nong kuna ara mitik akwe kurur. Ba, sun atei kibobde yangarandum tam ara mitikanun kimsurur. Ba, yina ara kikiman kum kusurur aryi, sunci yiramunyi ababyi, bouna ara kum kusurur. Me ababyi yinmamunyi bok, me tuba ataransir. Ongon aling ton ongobdobmamunyi bok, sun nong ara tin ton kum bumsurur. Ba, sun dengna wa inung ara weik inung bok, dengna ara mitiktoanun.”

7Ati, Er Iya Erebdobnyi, imtam yin doun nang sienyi biryi sunsi ato esurur, “Ato kusurur dinyi ara sunda unatoa ati ton bita kanya teneirdena kum kundarur do? 8Ati, sunci, ‘Er Imtamnyi biti dama deirin aitam uboka dobkwayeb,’ tenen mutuk kon dub welebindoka co abilinga yekokabmunci boyamunyi ura, Ni Imtamnyi biti dama deirin ai dakminikamnyi asi tamuboka dobnindarur. Ba, Niryi, ‘Akai asi teleb,’ tenebokabniryi, Nira iya Mikibnyi kunun ati akai dam asi lak kibdankwan. 9Ba, sunci sun kanya aryi, ‘E, a kouamib keica ara nong weikto kibdobkwayeb,’ tenerandum bok, nong mabci ba, yongoboka kirandum tam ara mitikanun bobde yangarandum. Atei bobde yanganmamunyi dinyi ababyi sunsi kanya teleb kum kusurur. Ni Imtamnyi biryi urkarongnan ba, kumwe aryi sun kirandum dinyi ababyi bobde barsengdorande. Nira Imtamnyi biryi ato kusunun ara unatoa ati kusunun tenebmarum do? Ara, ato deyok aryi kusunun, Ni dama deirin ai ara dakwe bok asi sunci tamuboka kum dobdau. Tamuboka kum dobdau bok, sunci mambul kirikoka sun kurandum ai yuk-yuk asi sirya dororandum. 10A deyok aryi Niryi im bublan tirikdongobse ba, mo kum cemdur. Ani, mo doun ababyi kum sangdur aryi, sun koubdoba ara abman kum kurur ba, kwaning ataransir. 11Ani, Niryi dou berekdeibse ba, a mutuk dam nirya doua berengdur. Mutuk kon ai babyi, gandum koun tukwe dikum babyi, co anggur koun tukwe dikum babyi, co zaitun koun tukwe dikum babyi, ukutotoa koun tukwe dam babyi nirya doua berengdur. Ani, ninyi kuron tukwe ai babyi, ‘Il doboka yibdobkwayeb,’ tenen wa iron tukwe ai ababyi a nirya doua berengdur, uca ninyi nirya ab bisam nirya ab ara yina atan weik ataransir ba, sun il don dinyi nirya ara du mouna ab nong mana ab kum kusurur,” ebmou.

12Ato ebmou ba, Persia mutuk weik sienyi amwetam bunanyi Sealtiel mi Zerubabel ab, ninyi dama deirin sienyi imam Yozadak mi Yosua ab aryi Er Imtamnyi uram kekebmareici, Er Imtamnyi biti dama deirin ai asi tamuboka dobkalibmarei. Tonda, sun Babel mutuk kuboka Israel nang kankan aryi tamuboka sun atei Yerusalem yandobmai nang yuk nang ababyi sun Nai Er Iya Erebdobnyi uram kekebmaici, kunubde binmai. Ara, Er Imtamnyi uram ermurunanyi nabi Hagai biryi sun dam asi sun Nai Er Iya Erebdobnyi biryi ebdeibmou to ebmou ba, sun akatei nang ara sun kanya dam aryi Er Iya Erebdobnyi bisi ilil kubmou.

13Ba, Er Iya Erebdobnyi biryi arukoka bokeibmounyi Hagai biryi sun Israel nang ati uram ebdeibmou to ebkarebmou. Ara, erci sunsi, “Er Iya Erebdobnyi biryi sunsi ato ebmasir: Niryi sun ab tonkwa kuramibiryi, kisal dakoka kalikmurubkwansin,” ebmou. 14Ura, Er Iya Erebdobnyi biryi Yehuda mutuk taleamunyi si Zerubabel ab, ninyi dama deirin sienyi si Yosua ab sun kanya dam asi Er Imtamnyi ai dona ati ibarya kibkarebmou. Ani, Israel nang sun kanya ababyi ibarya ilinto tikarebmou. Ba, a talak ara sunci yandoka sun Nai Iya Erebdobnyi, imtam yin doun nang sienyi biti dama deirin ai dobkalibmai. 15Er Imtamnyi ai dobkalibmai uki tum ara Darius weik sienyi kiamwe kwalina bitinyi dinyi, wala nabaryi wala kubmou ba, dobkalibmai. Ara, tanggal 24 baryi berekmou ura, sunci yuma deyok kouboka dobkalibmai.

Currently Selected:

Hagai Uram 1: MTG

Highlight

Copy

Compare