Zefanya Uram 1
1
Deyok
1:1
1Amon mi Yosia bira Yehuda mutuk weik sienyi kuramwe talak aryi Er Iya Erebdobnyi biryi Er uram ermurunanyi nabi Zefanya bisi uram ebdeibmou. Zefanya er abwe yabwe si ara ato: Er abwe kisok ara ninyi si Hizkia biryi Amarya deiamwe. Ba, Amarya biryi er mi ara Gedalya deiamwe. Ba, Gedalya biryi er mi ara Kusyi deiamwe. Ba, Kusyi biryi er mi ara Zefanya deiamwe.
Er Iya Erebdobnyi uki berekwande tum aryi wenebkwande to ati ebdeibmou uram deyok
1:2-18
2Er Iya Erebdobnyi biryi ato eboka kunubdeibmou, “Ni Imtamnyi biryi utotoa tukwetam kurur dinyi nirya, ‘Sungsunga ato dinyi,’ tenen bai kum daneibkwan. 3Ara, Ni Imtamnyi biryi ninyi ab, ninyi winin dinyi ab, bai kurande dinyi ab nirya bai kum daneibkwan. Ani, maka im karin yibarande dinyi ab, mekinaia weik me kwan umbura kurande dinyi ab nirya kum daneibkwan. Ani, yu dinyi kunuramingnyi nang ara oboka kum daneibkwan. Ba, ninyi im dangna nang tukwe dangna nang nirya tukwetam akiryi kum daneibkwan. 4Sun Yehuda mutuk nang dam ab, Yerusalem atei nang dam ab asi Niryi taruk lakoka kum daneibkwan. A mutuk dam asi kwemdeina si Baal moloramingnyi dinyi mitik-mitika tuba kuranci dinyi nirya ara Niryi kum daneibkwan. Ani, kwemdeina molona deyok nang sun si ababyi Niryi kum daneibkwan. 5Ani, sun ai aruma dub weletingbindoka kiting ab, wala ab, kurya ab moloramingnyi nang ababyi nirya kum daneibkwan. Ani, tonda sunci Nisi moloboka Ni si deici aryi uram eboka katardeiramingiryok, tubto danguboka dinatam ara kwemdeina si Milkom ababyi moloramingnyi nang ara Niryi kum daneibkwan. 6Ani, sun urasin Ni tam deiamingnyi ani, tubto danguboka yuk tam deiamingiryi, Nisi ingkiringnina kum kuramingnyi nang ara Niryi kum daneibkwan. Ara, sunci Nisi, ‘Bisik u dikum eterebsurum,’ eboka molona kum nang asi Niryi diboka wenebkwan.
7Er Imtamnyi Iya Erebdobnyi uki berekwande talak dam kubmar ati, sunci uram kilikoka Er urasin dam yandoka dibde bukdarur. Diba ati, Er Iya Erebdobnyi biryi bisam dama deiboka oboka uk daraming to weik kwalina kwalibkwande ati, sirya kiknibdeibmar. Ati, Erci sun Yehuda nang ordana nang asi naboka du dongobmarci, ‘Sun Yehuda nang asi weneboka obkwayeb,’ ebmou.
8Er Iya Erebdobnyi biryi weik kwalina kwaliboka bisam dama deiboka oboka uk daraming to kubkwande uki berekwande. A uki tum aryi Ni Imtamnyi biryi sun Yehuda nang kalingna nang ab, sun weik sien nang mabwe nermabwe ab asi wenebkwan. Tonda, sun yuk atei nang malyi kuramingnyi dinyi kunuramingnyi nang ara Niryi wenebkwan. 9A uki tum aryi Niryi sun kwemdeina dinyi molon nang asi wenebkwan. Ara, sun, ‘Ai bisik bublan sangkurya dam asi yan yanina mem, nun molon dinyi obsicei,’ tenen kuramingnyi nang asi Niryi obkwan. Tonda, sun yuk nang asi kulab-kulab eboka sun bona talena araboka dororamingnyi nang ara Niryi wenebkwan. A nang ara sunci araboka don dinyi doboka sun molon dinyi ati dama deirinung, se. 10Ba, a uki berekwande tum aryi Niryi Yerusalem nang obkwan. Obkwan ba, ai lika bublan botorkweten bisik si Mekinaia bisik bublan sangkurya dam ara engeboka ngolongna dobwelebkwaming. Ani, ukuryok debde donmangnyi atei tam aryi engena dobwelebkwaming. Tonda, mutuk konkon tam aryi mutuk dalubde sangna kururu ena kekebkwandum. 11A uki tum aryi bona-bona dengtamurdan nang nirya ab, dengna weik keil si perak dekwamangnyi nang ab ara Niryi kum daneibkwan. Ati, sun me youkwetam doboka kundarur nang nirya isin dakeiboka-dakeiboka engeronmandarur. 12A uki tum aryi, ‘Malyi deyok diboka lilibkwan,’ tenen uk ubna doubtaleboka Yerusalem atei yibinkirikwan. Ara, Niryi sun kat kanya boboka Ni uram asi kum kekerana ato kun nang asi wenebkwan. A nang ara co anggur du yung diksakanca iya durande to kuramingnyi nang asi wenebkwan. Ani, sun kanyatam aryi Ni Imtamnyi biti ato teneraning, ‘Erci, nun kunub dinyi ati dibdeboka telebto kurdeirisin dinyi ara ton kum kurdeirisurur. Ani, nun kunub dinyi ati, Erci dibdeboka malyito ukurdeirisin dinyi ababyi ton kum kurdeirisurur.’ Sun ato teneraning nang ara Niryi wenebkwan. 13Ba, sun ordana nang iyandoka sun bona talena nirya araboka dobsekdobkwaming ani, sun ai nirya daldaluboka donokingnyi ba, ninyi ton kum kubkwaming. Sunci ai dobdobmangnyi ababyi, akai umbura ara kum kubdobkwaming. Ba, co anggur du wa ibdobmangnyi ababyi, sunci a co du dakoka yung urubde yirona kum kubdobkwaming.
14Er Iya Erebdobnyi uki berekwande tum ara dam sirya kubmar. Yo, sirya berekwamar ati, iya dam kobdob kubmar. Ani, a uki tum weik tum ara ola berekwamar dam nong kobdob kubmar. Ati, kekerandarur. A uki tum ara u sik mitik kum kubkwansir uki tum berekwande. Yin doun nang ababyi engebdobkwaming uki berekwande. 15A uki tum ara yu aia uki tum berekwande. A uki tum ara mambul dobkwaming uki tum kubkwande. Tonda, yuk dinyi-yuk dinyi ukubdobman kum kubkwande uki tum kubkwande. Tonda, daldaluboka kum danardeirin uki tum kubkwande. Tonda, mutuk kunuk dakwande uki tum kubkwande. Tonda, mo deneboka duwa ibtambum ebkwande uki tum kubkwande. 16A berekwande uki tum ara buu ena lilim en tum berekwande. Ara, ordana nang iyandoka lika aryi doboka aknabdongoboka kuraming atei ab ninyi mar iyangana ati dibde bun ai doramingnyi atei asi mar boyankwaming. Mar boyanmangnyi ba, ordanmangiryi luna mumuboka obdankwaming. 17Sunci Ni Iya Erebdobnyi urasintam asi malyi dinyi kuramingnyi deyok aryi, Ni Imtamnyi biryi ninyi asi mambul don dinyi karebkwan. Ba, sunda asing kun nang ato kuboka bisik ai talebisibde yibinkwaming. Sun ining debsakwande ara me lum sangnande to sakwande. Ba, sun deisu ara talyi sakde binkwande. 18Ilil dinyi mitik kum kunubkwande uki berekwande tum aryi Er Iya Erebdobnyi biryi Er matan aryi yu kurande dinyi lak kibkwande. Erci, a wenebkwande uki tum ara dengna weik keil si emas ab, perak ab, sun taleramingnyi bona ab aryi sunsi kum lebdeibkwande. A uki tum ara tukwetam nang nirya asi Er yu aryi uk buk kuna yaliboka yibkabokwande. A berekwande uki tum ara tukwetam kururci, isin nebneb erur dinyi nirya ilil tenen wenen dinyi aryi obminikwande,” Er Imtamnyi biryi ebmou.
Currently Selected:
Zefanya Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
