Zakharia Uram 3

Zakharia biryi liki dumbaryi dinyi eibmou kunumna ara Er Imtamnyi biti ninyi dama deirin sienyi si Yosua bisi eibmou uram deyok

3:1-10

1Zakharia biryi kunumna liki dumbaryi dinyi eibmouci, nukmou ara ato eboka nukmou, “Ura, Er Iya Erebdobnyi biryi ni urasintam asi ninyi dama deirin sienyi imam besar si Yosua bisi lak kibdeibmar.#3:1 Yosua bira Er Imtamnyi biti dama deirin sienyi imam besar kuramunyi. Anyi bira minob talak Musa unubmouci, Israel nang Kanaan mutuk dam bowengbinmounyi kuma. Anyi bira Zakharia kuramwe talak aryi ninyi dama deirin sienyi kuramwe. Asi, Zakharia biryi kunumna deib aryi eibmou ati si sibmou. Ara, Yosua bira Er Iya Erebdobnyi uram eryuryangananyi si Malaikat Tuhan urasin dam tikmar asi eibman. Ba, ersi uram tatabdongobkwamounyi isa sienyi Iblis bira er siriktam kuboka tikmar asi eibman. 2Ura, a Malaikat biryi isa sienyi Iblis bisi ato ebmar, ‘We, isa sienyi Iblis a. Kanda, Er Iya Erebdobnyi biryi Kansi yangdonongkina teleb. Er Iya Erebdobnyi bira Yerusalem atei wibdobunyi biryi kansi yangdonongkina teleb. Anyi bira Er Imtamnyi biryi uk angmaca kankan aryi uk sirika kilibtaleboka dordeiraming to yuk dobdeibunyi bisi tikmar,’ ebmar asi kekebman. 3Ba, ninyi dama deirin sienyi imam besar Yosua bira Malaikat Tuhan dam tikmar ura, nining ilinto kurur aling asi ongobdaki tikmar asi eibman. 4Ba, a Malaikat biryi imtam wa irmilin nang asi ato eboka arukmar. ‘Anyi ongobdobmar aling nining kurur dinyi ara er nong bol ai aryi kwiribdonokdarur,’ eboka arukde. Ura, anyi biryi tubto Yosua bisi ato ebmar, ‘Ato kubkin dinyi aryi kan malyi kun dinyi ara kan dam aryi dobkabokin. Ura, Niryi kansi ukuryok ongon aling teleb aling asi unuboka ongobdeibkin,’ ebmar. 5Ura, tubto er wa irmilin nang asi, ‘Yosua kisok ai asi malyi dinyi akarkarongona me aling lilibdeibdarur,’ ebmar. Ba, Malaikat Tuhan bira a kaliki tikmar. Ura, sunci er kisok ai asi malyi dinyi akarkarongona me aling lilibdeibmang. 6Sirya ukubdeibing ura, a Er Iya Erebdobnyi bokwetebmou uram eryuryangananyi biryi Yosua bisi uram ato ebkarebmar. 7‘Yosua a, Er Iya Erebdobnyi, imtam yin doun nang sienyi bira kanti ato ebdeibmar, “Kanda, Niryi nungdeirin bisik akwe dibniliboka yibaraminyi ab, Niryi nukdeiankinyi wa ab akwe diboka iraminyi ura, Ni ai wa in nang arungnanyi kubkwandim. Ani, kanda Ni ai dam keta wa in nang kalingnanyi kubkwandim. Ba, Niryi kansi mundu lobdeibkinyi ura, kanda akai dam kuboka wa iraming nang kankan yukminci tonkwa wa ibkwandum. 8We, ninyi dama deirin sienyi Yosua a, kan kekerandum. Kan ab kan kwit yabwe ab tonkwa wa irandum nang ab ara diba kobdob ati, sunda kiklirdeirin nang kubkwandum. Ba, diba kobdob dinyi kunubkwande ati, kiklibdeibkwandum. Dib dinyi ara ato kuboka kunubkwande. Niryi Diba ati, Niryi Ni wa irmilinanyi ukuryok kaibwa asi ninyi tentok anabdeibkwan. 9Diba kobdob ati, Niryi Yosua biti karebse dengna weik keil, ara keil tentok asi asing du lotongdona tabaryi kubdob dinyi asi er dam karebse. Ara, Niryi ersi dama deirin sienyi wibmase ati, lak kimna ati, keil deici kerek sekdongoboka karebmase. Ba, uki tentok tum aryok a mutuk dam malyi kunung dinyi nirya ara kum daneibkwan. 10A uki tum berekci ara kan dam aryi ninyi nirya sun yuk-yuk sun kwit yabwe nabdobingnyi ura yankwaming. Sirya yanmangnyi ura, sun kwit yabwe ab tonkwa mangkau asa aryi co anggur deyok dam ab co si ara deyok dam ab kubdobkwaming,” ebdeibmakir,’ eboka Er Imtamnyi, imtam yin doun nang sienyi uram eryuryangananyi biryi Yosua bisi eibkarebmar asi kekebman,” ato eboka Zakharia biryi nukmou.

Currently Selected:

Zakharia Uram 3: MTG

Highlight

Copy

Compare