Zakharia Uram 2

Zakharia biryi liki winiryi dinyi eibmou kunumna ara ninyi sal tentok aryi ai kiklin tabwe douboka tikmou asi eibmou uram deyok

2:1-5

1Zakharia biryi kunumna liki winiryi dinyi eibmouci, nukmou ara ato eboka nukmou, “Niryi asing donokoka dinman uca, ninyi sal tentok aryi kiklin tabwe douboka tikmar asi eibman. 2Ura, niryi ato eboka asibdenman, “Anyi bira kanda dantam banmarimci, yandoka tikandim do?” eboka asibdenman. Uca, erci nisi ato eboka uram dekeibmanir, “Nira Yerusalem atei donung asi kiklibdenkwan ati, baranci yandoka tikan. Ura, kiklibdenyi ura, a akatei donung tukwe cang kiklina ara ukubaryi kubwe tenen bikwan. Ani, akatei donung mutuk temda ara ukubaryi aryi donung tenen bikwan ati, kiklirbaran,” ebmar. 3Ba, ni ab sisingmanim Malaikat ukuboka kisibdakde ou baror ura, ton yuk malaikat biryi er dam yanmar. 4Asi, minob ni ab uram sisingmanimnyi biryi ukuryok yaranyi bisi ato eboka arukde, ‘‘Cungbiminyi ani, o tikmar kamnyi bisi bindoka ato ebdum, ‘Er Iya Erebdobnyi biryi ato ebdeibwe, ‘Yerusalem atei umbura dam ninyi babyi ninyi winin dinyi babyi ara ilinto kubkwaming deyok aryi akatei lika ara tubto tamuboka dona kum kubkwaming. 5Eda, Ni Imtamnyi bira atei lika doboka aknardongoraming atonyi kubkwan. Ura, Niryi Yerusalem atei asi aknabdongoboka kalikwan ara uk buk ilinto aryi lika doboka aknardongorande to kuboka akatei kalikwan. Ba, akatei kuramingnyi nang aryi Ni Imtamnyi si asi weik erebkwaning,” ebwe,’ ebkwandum,’ eboka arukmar asi eibman,” eboka nukmou.

Ninyi atei yuk mutuk boboka deirirlorbinamnyi nang asi tubto tamuboka yankwamnyi ati nabmou uram deyok

2:6-13

6-7Nabi Zakharia ato eboka nukmou, “Er Iya Erebdobnyi biryi Erci wiamwe atei nang ati ato eboka nabmou, ‘Niryi sunsi dina-dina me utam ab, me youkwetam ab, yaletam ab, kitingbantam ab bokwalwalabdeibsise. Bok, Babel mutuk boboka tanglorbisei ba, kundarur nang ara ukura me utam kuboka cungdoryandoka Sion mutuk dub ai lemdaroryandarur,’ eboka nabmou. 8Ba, Er Iya Erebdobnyi, imtam yin doun nang sienyi biryi nisi uram ebdeiboka sun dam bokeibmanir. Ara, ato deyok ati, sun dam bokeibmanir. Sunda Er asing du ato nang kundarur asi, unanyi biryi sunsi talebdenkwansing ara Er asing du a kunum talebdenkwaming. Ato tenen bok asi, sun yuk atei nang-yuk atei nang aryi sunsi dalubdobsei ati, bokeibmanir. 9Ura, ato ebdeibmar, ‘Diba ati, Niryi taruk lakoka sun dumyangaransing nang asi mar bobkwan. Ba, sun yuk atei nang aryi sun wa irmilin nang kimdeiransingnyi atei nang aryi tamuboka sunbabyi araboka dobsekdobkwandum,’ eboka bokeibmanir. Ati, sun dam eanyi tok kunubci asi eibmunyi ura, niti, ‘Diba anyi bira Er Imtamnyi biryi bokdonokwe,’ tenen bikwanurum. 10Ura, Er Iya Erebdobnyi ton ato ebdeibwe, ‘We, Sion mutuk dub atei nang e. Nira diba ati, sun dam yandokabniryi sun kankan dan kubkwan. Ati, sun kanya kilkil kuboka mot sebdarur.

11Ba, a talak ara im dangna tukwe dangna mutuk nang ninyi ilinto Er Iya Erebdobnyi dam makdobkwaming. Ba, sunda Ni uram keken nang kibingnyi ura, Nira sun kankan dam iya kubkwan,’ ebmou. Ato ebdeibwe eanyi tok kunubci asi eibmunyi ura, niti, ‘Diba anyi bira Er Imtamnyi biryi bokdonokwe,’ tenen bikwanurum. 12Ba, Er Iya Erebdobnyi biryi Yehuda mutuk ara doboka Er mutuk iya teleb mutuk kibdobkwande. Ani, Yerusalem atei ababyi Erci wimna atei kibkwande. 13Erci Er kurur ai aryi tikokmar ati, sunda Er Iya Erebdobnyi urasintam kuboka lulungdarur dinyi nirya ara Er urasintam aryi ur bukoka dungdung ebokdarur,” ebmou.

Currently Selected:

Zakharia Uram 2: MTG

Highlight

Copy

Compare