Zakharia Uram 1

NINYI SI ZAKHARIA BIRYI KUNUMNA EIBDE BINMOU DINYI

PASAL 1–8

Er Iya Erebdobnyi biryi sun Yehuda mutuk nang ati, “Sun malyi kun dinyi taklobdarur,” ebmou uram deyok

1:1-6

1Ninyi si Darius bira Persia mutuk weik sienyi kibmou. Ba, a weik sienyi kibmou talak ara kwalina bitinyi kimbinmou ura, wala inbaryi wala aryi Er Iya Erebdobnyi biryi Er uram ermurunanyi nabi Zakharia bisi uram ebmou. Zakharia er nai si ara Berekhya. Ba, er abwe si ara Ido. Er Iya Erebdobnyi biryi Zakharia dam asi uram ara ato ebdeibmou. 2“Ni Iya Erebdobnyi bira minob talak ara sun abwe yabwe asi yu mitik kum boranse. 3Ati, kanci sun Yehuda mutuk nang asi uram ato ebdum. Ara, ‘Er Iya Erebdobnyi, imtam yin doun nang sienyi biryi ato ebmar,’ ebdum. ‘Sunda tamuboka Ni dam yandobdarur. Ba, Nibabyi tamuboka sun dam yankwan. 4Sunbabyi sun abwe yabwe minob kuramnyi to ukuna mem. Minob ara Ni uram ermurun nang aryi sun abwe yabwe asi uram ato eramnyi, “Er Iya Erebdobnyi, imtam yin doun nang sienyi biryi uram ara ato ebmasir. ‘Sunda, malyi kundarur dinyi ab, sun yu kundarur dinyi ab ara taklobmunyi ura, tamuboka Ni dam yandobdarur,’ ebdeibmasir,” eramnyi. Bok, sun abwe yabwe aryi kum kekeramnyi. Ani, sunci Ni uram erdeiranse dinyi ara kunurongna kum kuramnyi. 5Ukuryok ara sun abwe yabwe ara dantam kunung do? Ani, Ni uram ermururamnyi nang nabi nang ara iya kam tuba kuboka Ni uram tuba ermurunung do? Kum, sun nirya ara kum dansekyi. 6Bok, Niryi Ni wa irmilinin nang, Ni uram ermurun nang deici asi uram erdeiriranse. Ara, Niryi sun abwe yabwe ati, yan memen uram ab, arungdeirin uram ab erdeiriranse to kuboka, Niryi sunsi weneranse. Ba, sunci kekeboka, “Nai e, nun malyito kunub,” tenebne ura, ato eramnyi. “Kum, Er Iya Erebdobnyi, imtam yin doun nang sienyi biryi nunsi wenebmasir. Ara, nun kunub to dinyi ab, nun manmalinub to dinyi ab ati dibdeboka kikliboka wenebmasir,” eramnyi. “Ati, sunbabyi sun abwe yabwe kuramnyi to malyi kun dinyi ukuna mem,’’ ebmasir,’ ebdum,” ebmou.

Zakharia biryi yuma kobdob eibmou kunumna ara bi otong deiamwe bisam kuda deici bukmaici yibanmai nang asi eibmou uram deyok

1:7-17

7Ninyi si Darius bira Persia mutuk weik sienyi kibmou ura, kunmai ani, kwalina bitinyi kibmou. Ura, wala si Syebat ara koklom wala asi tanggal 24 berekmou ura, Er Iya Erebdobnyi biryi Zakharia bisi uram ebmou. Nabi Zakharia er nai si ara Berekhya. Ba, er abwe si ara Ido. Asi, Er Iya Erebdobnyi biryi er dam asi kunumna deib aryi uram ara ato ebdeibmou. 8Zakharia biryi kunumna eibmou to asi ato eboka nukmou, “Arub lukunda kunumna ara ato kubmar asi eibman. Ninyi tentok ara bi otong deirirur bisam kuda deici asi bukmar eibman. Ura, anyi bira yanganmar ani, kot dam asi co si murad kankan yandoka tiklobde. Ba, er dongtam kuboka ara iya bi otong deirirur bisam kuda yubwa ton, bi otong bok amimi otong deirirur bisam kuda yubwa ton ani, kait otong deirirur bisam kuda yubwa ton aminda yanmang asi eibman.#Why. 6:2,4 9Ura, niryi Er Imtamnyi uram eryuryangananyi si Malaikat Tuhan ni dam tikmarnyi bisi ato eboka asibdenman, “Nai a, a nirya eibman ara unato ati, kunubdeibmarim asi eibman do?’ eboka asibdenman. Uca, ni ab uram sisingmanim Malaikat biryi nisi ato ebmar. ‘A eibmarim kunumna nirya ara Niryi kansi ato ati eibmarim eboka lak kibdeibkwamakinca,’ ebmanir. 10Ura, co murad kankan yandoka tikmarnyi biryi uram dobdobde ura, ato ebmar. ‘Sun a bisam kuda mer nirya ara Er Iya Erebdobnyi biryi bokwetebmar. Ara, sunci tukwetam a nirya dibkirikde yibinkwaming ati, bokwetebmar,’ ebmar. 11Ura, sunci co murad kankan yandoka tikmarnyi, Er Iya Erebdobnyi uram eryuryangananyi Malaikat Tuhan bisi ato ebmang. ‘Nunda tukwetam a nirya dibkirikde yibanub uca, tukwetam a nirya ara mangkau dinyi ab teleb dinyi ab akwe kunung asi eirinub,’ ebmang. 12Ba, a Malaikat biryi uram dobdobmar ura, ato ebmar. ‘Nai Iya Erebdobnyi, imtam yin doun nang sienyi, Kanci Yerusalem atei asi boukwe kum kimnaminyi ara uki unabaryi kubkwandim do? Ani, Yehuda mutuk atei nang asi uki kwalina 70 baryi Kanci a yu borum tok ara iya bobmurubkwandim do?’ ebmar. 13Ura, Er Iya Erebdobnyi biryi ni ab tonkwa uram sisingmanim malaikat bisi uram dekeibmar. Ara, uram bouna nun yukdongoboka ninyi kanya onon uram asi ebmar asi kekebman. 14Ba, ni ab tonkwa uram sisingmanim Malaikat biryi nisi uram ebkarebmanir. ‘A uram asi eboka dobkwetebkwandum. Er Iya Erebdobnyi, imtam yin doun nang sienyi bira ato ebmar, “Niryi Yerusalem atei ab mutuk Sion dub ai ati, boukwe kiboka mambul mitik kum kiringdonun. 15Bok, sun yuk mutuk-yuk mutuk nang aryi, ‘Nunda teleb mangkau akwe kuronub,’ tenerdanung mutuk nang asi Niryi sunsi yu mitik kum bonun. Ara, ato deyok aryi kunun. Niryi Ni uram keken atei nang asi yu bobmanyi bok, sun yuk mutuk nang aryi Ni uram keken nang asi tabakdongoboka mambul kimdeirinung deyok aryi sunsi yu mitik kum bonun. 16Ati, Ni Iya Erebdobnyi biryi boukwe kanya boboka Yerusalem atei dam tubto tamuryankwan. Tamuryanyi ura, Niti dama deiriryangan ai Bait Allah ai dakabokyi ara tubto tamuboka dobkwaming. Ani, Yerusalem atei ababyi tubto tamubdeibkwan,’’ eboka Er Iya Erebdobnyi, imtam yin doun nang sienyi biryi ebdeibmar,’ ebkarebmanir. 17Ato ebmar cok tubto ton ato ebmurubmar, ‘Er Iya Erebdobnyi, imtam yin doun nang sienyi biryi ato kubkwande. Er atei dam nirya ara teleb dinyi asi langkarikeibkwande. Ba, Sion mutuk dub ai ara mambul kuranci asi Er Iya Erebdobnyi biryi miliboka kanya teleb kubdeibkwande. Ani, Yerusalem atei ara wiboka Er dinyi kibkwande,’ ebkarebmanir,” eboka Zakharia biryi kunumna eibmou to nukmou.

Zakharia biryi kunumna bitinyi eibmou ara, sapi kisok ai belerande yang ato dinyi dumbaryi ab, besi kiknin nang ninyi dumbaryi ab eibmou uram deyok

1:18-21

18Ura, Zakharia biryi kunumna liki bitinyi dinyi eibmou to asi ato eboka nukmou. “Niryi asing donokoka dinman uca, sapi kisok dub ai asi ilila yang belerande ato dinyi asi dumbaryi belebwelebmang asi eibman. 19Ura, niryi kuboka ni ab tonkwa uram sisingmanim Malaikat Tuhan bisi ato eboka asibdenman. ‘A nirya ara unatoa ati, kunubdeibmarim ba, asing eibman do?’ eboka asibdenman. Uca, erci nisi uram ato eboka dekeibmanir. ‘A eibmarim kisok yang mer ara iya mikib weik kurur weik sien kiklibmar ati eibmarim. A kisok yang dumbaryi aryi sun Yehuda mutuk nang ab, Israel mutuk nang ab, Yerusalem atei nang ab asi muna obdongobyi ba, bokwalwalabdandoka yuk mutuk inirdarorbinsekyi ati kiklibmar asi asing eibmarim,’ eboka nukarebmanir. 20Ura, Er Iya Erebdobnyi biryi nisi yuk kunumna ton lak kibdeibmanir. Ara, besi kiknin nang ninyi dumbaryi aryi keil tingna dinyi doubmangci yanganmang asi lak kibdeibmar ba, asing eibman. 21Ura, niryi asibdenman. ‘A dumbaryi nang mikib weik nang yanganmang ara una kubkwamang ati, yanganmang do?’ eboka asibdenman. Uca, erci nisi ato ebkarebmanir. ‘A eibmarim dumbaryi nang ara Yehuda mutuk nang mar ordana nang asi mar bobkwaming ati yanganmang asi asing eibmarim. Sunci Yehuda mutuk nang asi dobtaleboka yuk mutuk bobei nang asi du kanya yakoka mar ibkwamang ati yanganmang asi eibmarim,’ ebmar asi kekebman,” ato eboka Zakharia biryi kunumna eibmou to nukmou.

Currently Selected:

Zakharia Uram 1: MTG

Highlight

Copy

Compare