Rut Uram 3
3
Rut ab Boas gandum yalyi kwen dam aryi ebdanmarei uram deyok
3:1-18
1Kunmai ani, uki tentok tum aryi Naomi biryi Rut bisi ato ebmou, “A nebnyi a, kan teleb kubkwandim ati, niryi kan bukdareibkwandim sokon ingkirikwankin. 2Ati, kan kekerum. Kan ab tonkwa wa indarur nerabwe asi, ‘Ni wa ibnindarur,’ eboka arungdurnyi Boas bira ni doanounyi Elimelekh yalanyi kurur. Bok, ‘Arub lukunda ara er gandum yalyi kwen dam kwebde mabkwamar,’ ena kekebman. 3Ati, kanda me kekdobminyi ura, ongon aling teleb asi ongobloboka tong-tonga donoklobokminci, Boas gandum yalyi kwen dam bindoka er ab ebdarurum. Mining dam binmaminyi ababyi, er kwaning me kum yibmaci ura, erci kan yanmaminyi bikicei. Eda, er sirya yibde bok asi ebdankwandururum. 4Ara, ato kubkwandum. Dinmaminyi ba, Boas wi mabci ura, kanda er mabmaci sokon diblilibdeboka er dam burbinkwandum. Er dam burdongorbiminyi ura, er kalumabmaci amsuna dangabtalebokabminci er yan deibmaci asi mabdongobkwandum. Ato kubkwamarim ara, ‘Boas biryi nisi lebdobnurur,’ teneboka ato kubkwandum. Ba, Boas bukokci ura, erci kansi, kan ukubkwamaminyi to ebkwamakir,” Naomi biryi ebmou. 5Ebmou ura, Rut biryi Naomi bisi, “Yo, du ner teleb, kan ebmanirim to ukubkwan,” ebmou.
6A sirya ebdeibmou ura, lukunda ara Rut bira anabdobmouci, gandum yalyi kwen dam binmou ura, er naiyong Naomi biryi ersi ebmou to kuboka kunubmou. 7Boas bira kwaning me yinmou ani, sirya boubmou ati, er kanya kilkil kubmou. Ura, “Wi mabkwan,” tenen gandum deiamnyi ai linkwa dam asi maryanmou. Asi, Rut bira kebum eryanmou ani, Boas mabmou dam tingyanmou. Ura, Boas amsuna kalubmou asi dangabtaleboka er yan donokmou ai asi mabmou. Ato kubmou ara, “Boas biryi nisi dukdobkwanurur,” teneboka kubmou.
8Bindoka mabmou asi, lukunda dukduk en ara Boas lukdandoka bukokmou. Ura, er mabmou ai nirya taruk talerbisiramwe uca, er yan deibmou ai asi ner ton yandoka mabmou asi talebmou. 9Ura, Boas bukoka kanya wisibdobmou ura, Rut bisi, “Kanda una ner do?” eboka asibdenmou. Uca, Rut biryi Boas bisi, “Nai, nira kan wa arungna ner si Rut yandoka mabman. Nai, kanda nunsi lebdobmasintonyi kan tentok a kunum kurum ati, ni kan dam yandobman,” ebmou. 10Ba, Boas biryi ersi ato ebmou, “Yo teleb, a ner, kan ilil kun kum. Kanda kanya teleb bobumwe ner kurum ara ura ni sirya bikmakin. Ara, kanci kabir nang asi bona talena ilinto talen nang kum utotoa kum nang kum asi wimna kum kubmarimci nira Elimelekh yalanyi bisi ingkirikde yanmanirim ara iya teleb dinyi ukubmarim. Kanci kan yamalner bisi kanya teleb dinyi lak kimdarum. Bok, arub ukuryok ni dam lemdaroryanmarim dinyi ara diba ati, iya teleb dinyi ukubmarim ba, ni bikmakin. Ati, Er Iya Erebdobnyi biryi kansi kisal dangkina teleb. 11A deyok aryi, a ner, kan kanya ilil kukin kum. Kanda kanya teleb bon ner kurum ara nun atei nang nirya sirya bingkunung. Ati, kan molobmarim to, niryi kunubdeibkwamakin. 12Diba, nibabyi sunsi lebdobmasintonyi kunun bok, eda ton yuknyi bisi ara Elimelekh yalanyi kobdobanyi ton a kurur. Ati, anyi biryi sunsi dukwamasute ara diba. 13Ati, arub lukunda ara ur a mabmarum. Ba, ambutum belekuna aryi niryi sunsi lebdobmasintonyi kobdoba asi bindoka uram ebdenyi ba, erci ‘Ni kum lebkwan,’ ebci ura, niryi kan yamalner Naomi ab kan ab lebdobkwansin. Tola kuma. Diba ati, niryi Er Iya Erebdobnyi urasin dam aryi dib ebni. Ur a dikum a maabminyi ba, berekwande,” ebmou. 14Ato ebmou ba, Rut bira Boas yan cakmoua dam asi mabmou ani, “Ninyi bikningnyei ati, minob atei bindobkwan,” teneboka berekwamouci, im tongtong lingmou ura, minob bukokmou. Ara, Boas biryi ersi ato ebmou, “Kan lukunda gandum yalyi kwen dam a yanmarim asi yuk nang biksingnyei. Ati, belekuna kobdob ara minob anabdobkwandum,” ebmou to ati, minob bukokmou. 15Ura, atei bindobkouci anarou uca, Boas biryi Rut bisi ato ebmou, “Kan kalubmarim kut ara a yangabdeibminyi ba, gandum du ton dikdongobkwankin,” ebmou. Ba, er kalubdobmou kut yangabdeibmou deici asi wamlibtaleboka dikdongobmou. A dikdongobmou ikin kiklina ara ikin 20 kilogram baryi ato dikdongobmou. Ura, Boas bira atei binmou.
16Ura, Rut bibabyi er yuk bisik kuboka atei yanmou. Ura, er naiyong Naomi biryi ato eboka asibdenmou, “A nebnyi, dara una kubmakir do?” eboka asibmou. Uca, Rut biryi anyi ukubmou to nirya er naiyong dam asi nirya liliboka nukmou. 17Ara, ato eboka nukmou, “A gandum du kiklina ikin 20 kilogram baryi ara Boas erci kibdongobmanir. Ara, ato eboka dikeibmanir, Erci nisi, ‘Kan naiyong bisi nong dem bana ara malyito,’ ebokabdaryi walubtaleboka dikeibmasir asi bobde yanansin,” ebmou. 18Ura, Naomi biryi Rut bisi ebmou, “A nebnyi, nun lebmasin to nang aryi nun deyok ati uram sisingkwaming ati, kan dibde bukdum. Boas bira nun deyok ara arub aryok ola uram sisikoka lilibdeibkur, tenebman,” ebmou.
Currently Selected:
Rut Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)