Rut Uram 2
2
Rut biryi Boas gandum wa in dam bindoka gandum du bulubmou uram deyok
2:1-23
1Betlehem atei ara Naomi er akenyi yalanyi tentok ton kuramwe. Anyi si ara Boas. Anyi bira Elimelekh yalanyi bisi bona bonanyi kuramwe. 2Ura, uki tentok tum aryi a Moab mutuk ner si Rut biryi Naomi bisi ato ebmou, “Ni du ner o, nun kwaning kum danmasir. Ati, nira Betlehem nang gandum wa in dam bindoka weik dinyi yabla teleb dinyi boronmangiryi mitik-mitika tangdongonmangnyi asi bulurorbinkwansin. Wa damnyi biryi mundu loboka, ‘Ur bulurorandum,’ ebnici ura, gandum du bulubdobkwansin,” ebmou. Ba, Naomi biryi Rut bisi, “Yo, ni kaibwe ner, ur bulurorbisurum,” ebmou. 3Ebmou ura, Rut biryi wa in dam bindoka, “A wa ara anyi dinyi,” tenen bingna kum uca mangkau molobmou. Uca, Elimelekh yalanyi si Boas gandum du wa in dam asi molobmou. Molorbinmou ba, sun wa in nang kalingnanyi biryi, “Ur bulurandum,” ebmou. Ebmou uca, Rut biryi sun Boas wa in nang dongtam kuboka gandum du bulubdoro yibanmou. 4Bulubdoro yibanmou asi, Boas Betlehem atei aryi kuboka er wa in dam diryanmou. Diryanmou ba, erci sun gandum yabla sengna nang asi ato eboka kibmou, “Ni kwit yabwe, Er Iya Erebdobnyi bira sun ab tonkwa kuna teleb,” ebmou. Ba, sunbabyi ersi ato eboka uram dekeibmai, “Teleb, nun nai, kanbabyi Er Iya Erebdobnyi biryi kansi kisal dangkina teleb,” ebmai. 5Ura, Boas biryi diramwe uca, Rut bira gandum yabla tanglonmai dinyi asi bubdoro yibanmou eibmou. Ura, erci sun gandum yabla sengna nang kalingnanyi bisi asibdenmou, “A ner ara dan atei ner da?” eboka asibmou. 6Uca, gandum yabla sengna nang kalingnanyi biryi Boas bisi ato ebmou, “A ner ara Moab ner asi, Naomi ab tonkwa Moab mutuk aryi yarei ner asi yandoka kunmar. 7A ner ara belekuna aryi yandoka nisi, ‘Nai, nira gandum yabla sengna nang sun dongtam kuboka tikmaniryi, gandum tangdongonmangnyi dinyi buluronkwaman ara mem do, ur do?’ eboka molobmanir. Uca, niryi, ‘Ur, buluronmarum,’ ebman. Ba, erci belekuna aryi deyok kouboka iya a buluronmar asi ton dikdik semdena kum uca, ukubabyi tuba a bulubde kuronmar,” ebmou.
8Ato ebmou ba, sirya kekebmou ura, Boas biryi Rut bisi nabmouci, ersi ato ebmou, “A ner, kekerum. Kanda ni wa in dam akikwe ur buluronkwandum. Yuk nang wa in dam ara bulurbana mem. Kanda ni wa in nerabwe kunmangnyi ai asi tonkwa kunkwandarur. 9Kan a gandum yabla sengnaming wa in dam iya kuraminci, ni arungna nerabwe dongtam kuboka gandum du buluronkwandum. Kan ilil kukina mem. Niryi ni wa in nang asi sirya ebdeibman ati, sunci kansi kum dubdenkwamaking. Me utakici ura, ni wa in nang aryi sirya kwebdeibmangnyi ba, langkarikmaci moyok asi ur kweboka yinkwandum,” ebmou. 10Ebmou ba, Rut biryi Boas biti, “Ni nai,” tenebmou ura, erci kutam ikdongoboka, er urasin kanubdongobmou. Kanubdongobmou cok, erci Boas bisi ato ebmou, “Nai, kanda ninyi teleb kurum. Nira ninyi atei aryi tingyangan ner bok asi kanci nisi boukwe kibmanirim. Ati, kanda ninyi teleb kurum aryi kubmanirim,” ebmou. 11Uca, Boas biryi Rut bisi ato ebmou, “Kan kuramoumwe to a nirya ara ni dam liliboka nukmang ba, sirya kekebmakin. Ara, kan akenyi dibmou ba, kan yamalner bisi teleb kimnamoumwe to ab, kan kwin kan nai deibloboka yandobumwe dinyi ab ni sirya kekebkise. Ani, kan deiankei tukwe ab takloboka kan minob kum bingnamoumwe nang atei dam yandobumwe dinyi ara ni sirya kekebmakin. 12Ati, kanci telebto akwe kunurum dinyi ara, Er Iya Erebdobnyi sun Israel nang molonungnyi biryi boukwe dam dongobkwankir. Ani, Er Imtamnyi Er ol amwetam lemdaroryamwe ati kansi dengna langkarikeiboka dekwankir,” ebmou. 13Ebmou ura, Rut biryi Boas bisi ato ebmou, “Yo, nai, kanci ni kanya teleb kubdeibnirim. Nira malyi ner kunun asi, kanci nisi diboka boukwe kibnirim. Nira kan wa in nerabwe ato ner kum kunun asi, kanci ni kanya teleb kubdeibnirim,” ebmou. 14Ura, tubto buluronmou ani, sirya kwaning yin talak kibmou. Ura, Boas biryi Rut bisi naboka, “A ner, kanbabyi a buryandoka roti a dobdobminyi ura, roti karya ara ato en dinyi aryi likdongoboka yibdobkwandum,” ebmou. Ba, Rut yandoka sun gandum yabla sengna nang kankan dam bukmou. Ura, Boas biryi ersi gandum du yubmai dinyi asi dobkarebmou. Ura, yinmou ani, sirya boubmou ba, kablobmou dinyi ara suwa kitiboka deibdobmou. 15Sirya yibdobmou ura, Rut bira tikalaboka gandum du tubto bulurorbau uca, Boas biryi er wa in nang asi ato ebmou. “A ner ara sun koubde miningmarum gandum kankan ababyi ur buluronmarur. A ner asi, ‘Mem,’ eboka dubdemunyei. 16Sunci gandum yabla sekde bonmamunyi ababyi ton teneboka mitik-mitik ton dorkwetenkwamandarur. Ba, erda sunci teneboka lelengkwetenmamunyi asi buluronkwamarur ati, sunci ersi kerebmunyei,” ebmou. 17Ba, Rut a wa in dam a bulubde kunmou asi sirya inibkwamouci, yiroblobmou. Ura, a buluronmou gandum yalyi kweboka gandum du kin aling asi kirdongonmou ba, langkarikmou ura, ikin kiklirderamwe uca, ikin takubaryi ato kibmou.
18Kibdongoboka bobdobmou ura, Rut anabdobmouci, atei binmou. Ai bobinmouci, kut yangabdeiboka a bulubmou gandum ara er yamalner bisi amubdeibmou. Ba, er yinmou uca, boubmou ati, kablobmou yina bobmou ara er yamalner Naomi biti karebmou. 19Ba, er yamalner biryi Rut bisi asibdenmou, “Ni kaibwe ner o, kanda arub ara dantam asi wa ironmasirimci, bulurorbinmasirim do? Kansi teleb kibmakiranyi bira Er Imtamnyi biryi ersi kisal dangna teleb,” ebmou. Ura, Rut biryi er yamalner dam asi, “Nira anyi wa in dam asi bulurorbinmasin,” eboka nukmou. Ara, ato eboka nukmou, “Ni wa inman wa damnyi si ara Boas, er wa in dam asi buluronmasin,” eboka nukmou. 20Ebmou ura, Naomi biryi Rut bisi ato ebmou, “Er Iya Erebdobnyi biryi kansi teleb kubdeibmakiranyi bisi kisal dangna teleb. Anyi Boas bira ni akenyi yalanyi kurur ati, erda nun lebdobmasintonyi kurur,” ebmou. Ato ebmou cok, Naomi biryi ton ato ebmurubmou, “Er Iya Erebdobnyi bira tanglosina kum uca, Erci ebdeiansou uram Kunurdeirirsururnyi kurur. Erci kisal dangna dinyi karesurur ara nun akenyi yabwe dibyi nang babyi nun kam tuba kununum nerabwe babyi nirya doronub,” ebmou. 21Ato ebmou ura, a Moab atei ner Rut biryi Naomi bisi ebtabakoka, “Tonda, Boas biryi nisi ato ebmanir, ‘Gandum yabla tuba sengkwaming talak ara kanda ni wa in nang asi iya miliboka ur buluroryangankwandum,’ ebmanir,” ebmou. 22Ura, Naomi biryi Rut bisi ato ebmou, “Yo teleb, ni kaibwe ner, kanda Boas er wa in nerabwe asi ur milinkwandum. Ninyi yuk nang aryi kansi dubdekingnyei. Ati, kanda yuk nang wa in dam ara gandum du bulurbana mem,” ebmou. 23Ba, Rut biryi er naiyong Naomi eamwe to kuboka gandum du yabla buluroramwe. Ara, Boas er wa in nerabwe dongtam tikdongoboka gandum du buluroramwe. Ani, gandum du sengna talak sirya bisibmou. A ukuramwe talak ara Rut bira er naiyong ab tonkwa kurandei.
Currently Selected:
Rut Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)