Rut Uram 1
1
Moab ner si Rut ab Naomi ab Betlehem atei tamurbinmarei uram deyok
1:1-22
1-2Minob ura, malyi deyok liliboka kalingna nang aryi sun Israel nang asi taleamnyi. A taleamnyi talak aryi Israel mutuk ara kwaning atana li dobmou. Ba, Efrata mutuk Betlehem atei ara ninyi tentok kuramwe. Anyi er si ara Elimelekh. Elimelekh ner si ara Naomi. Ba, sun mabwe bitinyi si ara Mahlon ab Kilyon ab ukuboka kuramnyi. Kuramnyi ani, uki tentok tum aryi Israel mutuk asi kwaning atana dobmou. Kwaning atana dobmurubmou ba, Elimelekh biryi, “Kwaning atana aryi dibibyei,” teneboka er mabwe silib ab tonkwa Betlehem atei aryi anaboka Moab mutuk asi lemdarorbinmaici, tingdorbinamnyi. Elimelekh mabwe silib ara Yehuda mutuk Betlehem nang kuramnyi bok, Moab mutuk asi tingbindoka kuramnyi. 3Moab mutuk bindoka kuramnyi talak aryi Naomi er akenyi Elimelekh dibmou. Ba, a ner Naomi ab, er mabwe bitinyi ab akwe takdongobmou ba, kuroramnyi. 4-5Uku kuramnyi ani, Naomi mabwe bitinyi ara Moab nerabwe dobmarei. Ara, du mi Mahlon bira Moab ner si Rut kaibmai ba, Kilyon bira Moab ner si Orpa kaibmai. Ura, Naomi mabwe silib Moab mutuk kuramnyi ara kwalina takubaryi kwalibmai. Ura, er mabwe bitinyi Maklon ab Kilyon ab ababyi dibmarei. Ba, Naomi er akenyi waningni er mabwe waningni kibmou ura, erda sulyi ner kuramwe. 6Naomi er yuk kuramwe asi, uki tentok tum aryi Moab mutuk dam akiryi ato ebmai, “Er Iya Erebdobnyi biryi sun Israel nang asi dibniliboka tubto kisal dangnande ba, kwaning yiraming,” ebmai asi kekebmou. Ura, Naomi ab, er kaibwa nerabwe bitinyi ab kuboka Moab mutuk aryi Yehuda mutuk tubto tamubindobkwamaici, anabdobmai.
7Ara, Naomi biryi, “Er Iya Erebdobnyi biryi ni atei nang Israel nang asi kisal dakmar ati, Betlehem atei tamubindobkwan,” teneboka anabdobmou. Anabdobmou ura, er mabwe doandei nerabwe ababyi anabdobmareici, Naomi bisi milibmarei. Ura, sun Moab mutuk kuramnyi atei aryi kuboka Yehuda mutuk banmai. 8Tonkwa baronmai cok, sun naiyong Naomi biryi er kaibwa nerabwe Orpa ab Rut ab asi, “Ni boukwe kusunun kaibwa nerabwe, sunci tamuboka sun atei bindobdururum,” ebmou. Ato ebmou cok, sunsi tubto ebmou, “Sun nai yabwe, sun kwin yabwe asi bindobdururum. Ba, sun atei kubdobmunyi ura, Er Iya Erebdobnyi biryi miliboka sunsi kisal dangsina teleb. Ni akenyi ab, nun mabwe silib tuba kuramoubwe talak aryi, sunci nunsi tanglosina kum uca teleb kurdeiriransururumwe. Ato kuboka Er Iya Erebdobnyi biryi sunsi neiktoto tanglosina kum uca iya teleb kurdeirisina teleb. 9Kurandururumnyi ba, Er Iya Erebdobnyi biryi kisal daksici ba, aminda ninyi yuk nang aryi tubto dobdobsiringnyi nang aryi sunsi kalikdobkwansururung,” ebmou. Ura, erci, “Bokdankwayeb,” tenen sunsi tomoboka iribdobmouci, u kunkunubdobmou. Uca, Orpa ab Rut ab aryi, “We, naiyong e, we naiyong e, nun tanglosin kum e,” eboka ngalukoka engenmarei. 10Engenmareici, sunci Naomi bisi ato ebmarei, “Nong, nun takloboka basina nun li se. Nunda kan ab tonkwa kan atei bindobkwayeb,” ebmarei. 11Ato ebmarei bok, Naomi biryi sunsi ebmou, “A nermabwe, sunda nisi kum milibkwanururum. Eda, tamubdururum. Nira sirya wisi dase ati, aminda sun dobmasin to nang ton kum deibkwan ba, dobkwansing ati, sun atei tamubindobdururum. 12We, nai weit yabwa, sunda tamubokdururum. Nira iya wisi dase ati, ninyi dobmaning kum kubnou. Arub aryi ninyi aryi dobkwaning do? Da kum dobkwaning. A lukunda aryi ninyi tonkwa ton mabkwamanim do? Ukubman kum. Ni wisi ner aryi mi ton deibkwan do? Mi da kum deibkwaman. Niryi sun dobmasin to nang ton kum deibkwan. 13Sunci, ‘Naomi biryi aminda mabwe ton deibte asi kurantinimnyi ba, a mabwe nebtiringiryi, nun dobkwansitiring,’ tenen kum. Ati, sunci ato teneboka nisi milibnururumunyei. Sunda nisi milibnururumnyi ura, youak nerabwe iya kubdumunyei ati, ni milining kum. Sunbabyi mambul kanya borurum bok, nisi ara iya mambul kanya weiktoto bonun. Ara, Er Iya Erebdobnyi biryi nisi mambul weik kubdeibnou uca, ni kanya mambul weik kuranir. Ati, sunda tamubdururum,” ebmou. 14Ato ebmou ba, Orpa ab Rut ab aryi tubto, “Se nong e,” eboka ilinto ngolokoka engebmarei. Ura, Orpa bira er naiyong Naomi bisi iribdobmouci, u kunkunubdobmou ura, er atei tamuboka bindobmou. Bok, Rut bira, “Ni naiyong Naomi bisi iya milibkwan,” teneboka iya kwanikmou.
15Asi, Naomi biryi Rut bisi ato ebmou, “Kan ka bira sun Moab yala nang ab, sun kwemdeina molon dinyi ab asi tamuboka bindobmar ati, kanbabyi kan ka bindobmar to tamuboka bindobdum,” ebmou. 16Uca, Rut biryi ersi ato ebmou, “Kanci nisi, ‘Tamubirum,’ eboka arung-arung enina mem. Niryi kansi kum deiblobinkwankin. Ati, kan binkwandim atei ara nibabyi binkwan. Kan mabkwandim ai ara nibabyi mabkwan. Kan atei nang ara ni atei nang kibkwande. Sun Israel nang aryi Molondarurnyi bira nibabyi Molonanyi kibkwande. 17Ati, nira kansi iya kum takdongobkwankin. Er Imtamnyi urasintam aryi sirya lak ebman. Ati, niryi kansi takdongobkinyi ura, Er Iya Erebdobnyi biryi nisi ur wenebnurur. Nun kam tuba kuranimnyi ura, yuk-yuk kum bokdankwanim. Eda din dinyi aryi yuk-yuk bokeibkwansir. Bok, kan dibkwandim atei ara nibabyi akatei dibkwan. Ba, kan tukwe dongobkwanking tukwe ara nibabyi neik tukwe dongobkwansing,” ebmou. 18Ato ebmou ba, Naomi biryi diramwe uca, “Rut bira nisi taklobinmanin kum,” tenebmou ura, erci, “Tamubirum,” eboka arung-arung ena takmou. 19Takmou ura, barandei ani, Betlehem atei binmarei. Ba, sun bitinyi nerabwe Betlehem atei yanmarei deyok ati, akatei nang nirya ebdongobdanin yibinmaici buluboka ngalungyanmai. Ba, nerabwe mer aryi Naomi biti ato ebdanmai, “O ner ara Naomi a kunum do?” eboka asibdanmai. 20Asirdanmai bok, Naomi biryi sunsi ato ebmou, “Sunci, nisi, ‘Naomi,’ eboka namnina mem. Eda ni si ara, ‘Mara,’ ara, ‘Mambul kanya bon ner,’ ebkwanindarur. Er Iya Mikibnyi biryi nisi mambul dinyi mitik kum bobdeibnou ati, nisi ara, ‘Mara,’ ‘Mambul kanya bon ner,’ ebkwanindarur. 21Minob akatei aryi ni mabwe silib anaboka binamoubwe talak aryi telebto kuboka bona talena ab utotoa ab ilinto boboka binamoubwe. Bok, ukuryok Er Iya Erebdobnyi biryi tamubdeibnir ba, yandobne tam ara taruk banang dem yanman. Ati, sunci ni si ara, ‘Naomi,’ enina mem. Er Iya Erebdobnyi bira Er Iya Mikibnyi biryi nisi weneboka utotoa kum daneibnou ba, ni nong dem yandobman,” ebmou. 22Ato kuboka Naomi ab er kaibwa ner, Moab mutuk ner si Rut ab Moab mutuk aryi kuboka Betlehem atei yanmarei. A yandobmarei talak ara gandum si jelai sirya wisinmou ba, sun wa in nang aryi bulurkalinmai talak asi yandobmarei.
Currently Selected:
Rut Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)