Hakim-hakim Uram 21
21
Benyamin yala kam tuba kuramnyi nang aryi ner wiboka dobdobmai deyok
21:1-25
1Sun Israel nang minob ordanmai talak uca, Mizpa dam aryi uram sirya minob ato eamnyi, “Nun Israel yala nang ninyi tentok aryi Benyamin yala nang asi nun nermabwe ton kum kabdeibkwande,” eamnyi. 2Ba, sun Israel nang Betel dam yanmai ura, Er Iya Erebdobnyi urasin dam yandoka molonmaici, ngolokoka engenmai tok asi inibmou. 3Ara, ato eboka engenmai, “Israel nang nun Nai Iya Erebdobnyi, nun molokunubnyi. Una deyok ati ato dinyi kubdeibmasirim ba, arub aryi nun Israel nang kankan aryi yala tentok kum dandeibdab aryok se!” ebde engenmai. 4Ani, mabmai berekoka belekuna ara a nang aryi Er Iya Erebdobnyi biti dama deirin keil lamna labmai. Ara, sun malyi kun dinyi ati, bisam sapi kum domba kum oboka sun nong nirya oboka dama deiboka uk dan dinyi ab, sun lemdaron dinyi dama deirin dinyi uk dabkwabmai dinyi ab dama deibkwamai keil dungna ab ati kiknibmai.
5Ba, Israel nang aryi ato ebmai, “Israel nang kununga nirya kankan aryi dantam nang asi tonkwa Iya Erebdobnyi urasin dam kum buluryanmang do?” eboka lilibde yibinmai. Ara, sunci sirya minob eamiryi, “Dantam atei nang aryi a uki tum asi Mizpa atei Imtamnyi urasin dam kum buluryanmangnyi atei nang ara aminda weneboka obkwaming,” eamnyi. A deyok aryi ato eboka asibdenmai. 6Ura, Israel nang aryi sun kwit yabwe Benyamin yala nang obkiribmai nang asi boukwe kubmou ura, sunci ato ebmai, “Arub aryi Israel nang kankan aryi yala tentok asi kum dandobde. 7Ato kuboka kum dandobde deyok aryi, Benyamin yala nang kablobmab ba, kam tuba kunmang nang asi ner una kuboka ingkirikwayeb do? Nun nermabwe kamdeirina ara nunci minob uca Iya Erebdobnyi si deici aryi, ‘Nun nermabwe a nang asi kum kabdeibkwayeb,’ eboubwe ati, una kubkwayeb da?” ebmai. 8Ura, sunci ato ebmai, “Nun Israel nang kankan dam aryi dan atei nang asi Iya Erebdobnyi urasintam Mizpa dam kum yanmang do?” ebmai. Uca, kum yanmai atei lak kibmou ara Yabesh-Gilead nang asi kum yanmai. 9A talak ara sunci ninyi yanmai atei nang kerek sengna deici aryi dirderamnyi uca, Yabesh-Gilead nang asi tentok sirik ababyi ton kum yanmou. 10Ura, a bulubmai nang ninyi yubwa 12.000 baryi ara ninyi dabdob mikib deici akwe wiboka, “Yabesh-Gilead kunung ninyi nirya ab, sun nerabwe ab, nermabwe mabwe ab nirya asi ninyi on ya aryi orkarbindarur. 11Bok, ninyi doamingiryi, ton yoramingnyi nerabwe ara nirya ur onkwamandarur. Ba, sal ara nirya obkwandarur. Eda, kam nerabwe ninyi ton yordena kum kubmangnyi nerabwe ara ona mem,” ebmai. 12Ba, sunci Yabesh-Gilead dam bindoka ninyi nirya obkiribmai. Ura, kam nerabwe ninyi ton yordena kum nerabwe akwe yubwa 400 baryi doboka Kanaan mutuk Silo dam keis ol ai dobmai ai dam boyanmai.
13Ura, Israel nang aryi Benyamin nang Rimon kon dam kuramnyi nang asi, antanibdankwayeb ati, “Inirbindarur,” eboka ninyi ton bokdonokmai ba, inirbinmai. 14Ba, Benyamin yala nang iniboka yanmai ura, nerabwe Yabesh-Gilead aryi doboka yanmai nerabwe sunsi kabdeibmai. Bok, Benyamin yala nang asi a doyanmai nerabwe nirya, anirdenmai uca, ninyi weik deyok aryi ton nang ara suktalebmai. 15Ba, sun Israel nang ara Er Iya Erebdobnyi biryi sun Israel ninyi yala tentok kibdeiamwe bok, Benyamin yala ninyi ara kum dandeibmai deyok aryi sun boukwe mitik kum kubmou.
16Ura, sun Israel sien nang aryi ato ebmai, “Benyamin yala ninyi ara nirya obkiriboubwe ati, oramoubwe ani kabloboubwe nang sun dobkwaming nerabwe ara una kuboka ingkirikwayeb da?” ebmai. 17Tonda ato ebmai, “Sun Benyamin yala nang oramoubwe ani, takloboubwe ninyi ara a yala kum dacei ati ner doboka mi deibde binkwaming,” ebmai. 18Bok, Israel nang ara, “Benyamin yala nang asi nun nermabwe kamdeina ton kum kubkwayeb. Unanyi biryi ner kabdeibmarinyi bira anyi bisi obkwayeb,” eboka iya dib en uram eamnyi. 19Ati, sun Israel nang aryi Benyamin yala takdongoamnyi nang asi ato ebmai, “Kwalina tentok kwalibingnyi tok ara Silo dam Er Iya Erebdobnyi biti si weik ererbaramib. A Silo mutuk ara Betel mutuk asi eitam kuboka asi bukwe mutuk. Ba, yaletam kuboka ara weik bisik Betel aryi kuboka Sikhem banung. Ba, outam tam ara mutuk Lebona bukwe asi bindarur,” ebmai. 20Ura, Israel sien nang aryi Benyamin yala nang ner kum dobmai nang asi ato ebdeibmai, “Imtamnyi biti si weik erenub mutuk Silo dam asi, co anggur wa dam asi bindoka kuronkwamandarur. 21A kuramunci diramunyi ba, Silo atei aryi kam nerabwe sakweteboka mot semingnyi ura, sunci anggur wa dam aryi anaboka, ninyi yuk-yuk aryi Silo kam nerabwe asi sun kanyi kubsici to talebdobdarur. Taleboka sun ner kibdobmunyi ura, cukoka Benyamin mutuk doboka bindobkwandarur. 22Ba, a nerabwe sun nai yabwe ab, sun du yabwe ab aryi nunsi, ‘Deksindarur,’ ebsingnyi ababyi, nunci ato ebkwayeb, ‘Nunci ordanmoubwa dam aryi nerabwe ton doboka a nang asi akiboka yuk-yuk kum kabdeiboubwe. Ati, sunci kanya teleb kiboka mundu lobsindarur,’ ebkwayeb. Sunci, sun nermabwe asi a nang ati, mundu loboka kabdeibmandate ura, nunci dib en uram eboka, ‘Ner kum kabdeibkwayeb,’ eboubwe uram dakbisibmandaute. Ba, ikin dinyi sun dam yankwansute atikwe yabdongobdanmandaturyi,” ebmai. 23Ura, Benyamin yala nang aryi sun ebmai to kunubmai. Ara, sun ninyi yubwa binmai to kuboka nerabwe yubwa ababyi sakweteboka mot semai asi sun kanyi kubwe to kuboka wibdobmaici, talebdobmai. Ura, sun minob Benyamin yala nang doramnyi atei bobde bindobmai. Ura, Benyamin yala nang sun mutuk bindobmaici, minob kuroramnyi to tubto bindoka ai dobde kuroramnyi.
24Ura, Israel nang ababyi bokdanmaici, sun mutuk yuk-yuk kuramnyi to bindobmai.
25A talak ara Israel nang aryi sienyi kiboka ton kum taleamnyi, eda sun teleb tenebdobni to akwe talyi kuroramnyi.
Currently Selected:
Hakim-hakim Uram 21: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
