Bilangan Uram 36
36
Sal doamingnyi nerabwe aryi mutuk talena uram deyok
36:1-13
1Ura, Gilead ai ninyi, anabdobmaici, Musa ab, Israel weik nang ab, Israel yala nang sien nang ab asi uram eryanmai. Ba, sun deibdoba ara Gilead er nai bira Makhir. Ba, Makhir er nai bira Yusuf mi Manasye biryi deiamwe. 2Ura, ato ebmai, “Er Iya Erebdobnyi biryi nai Musa kansi ato ebdeibmou. Ara, nai kanci a mutuk tukwe asi ninyi si sekdongoboka im sukdemumba, si lak kibdinyi tukwe Israel ninyi asi iya sun dinyi ati ebdeibsou. Ani, Er Iya Erebdobnyi biryi nun yalanyi Zelafehad tukwe asi er nermabwe ati karebwe. 3Bok, sunsi yuk yala nang dobingnyi ura, a tukwe ara sun doamingnyi yala nang tukwe kibkwande. Akiryi nun Manasye yala nang tukwe ara mitik kimyibinkwande. 4Akiryi yuk nang dekamingnyi tukwe ababyi er dam nang doron kwalina si kwalina Yobel uki berekci ura, sun bidam nang tamuboka dobdobkwaming ebwe. Ati, Zelafehad nebnyi yuk yala nang doamingnyi ababyi a kwalina uki berekci ura, sun akenyi yabwe tukwe kibkwande. Ba, nun Manasye yala nang tukwe kum dankwansir,” ebmai.
5Ura, Er Iya Erebdobnyi biryi Musa bisi ebdeibmou to kuboka Israel nang asi ato ebmou, “Yusuf deibdoba Manasye yala nang aryi ebmang dinyi ara dib ati ebmang. 6Ara, Er Iya Erebdobnyi biryi Zelafehad nermabwe ati ato ebdeibwe. ‘Sun Zelafehad nermabwe aryi yuk yala nang dona ara malyi. Bok, sun doaminyi yala nang ara Manasye yala nang akwe ab kibkwanung. 7Ba, Israel yala nang kankan dam aryi ton yala nang aryi, yuk yala nang kimdana mem! Eda, Israel ninyi sun yala yuk-yuk tukwe kibkwandur. 8Ura, Israel yala nerabwe aryi tukwe taleanci ura, a ner ara sun yala nang dobkwanung. Bok, yuk ai nang asi dobkwandur. Ato kuboka dobdanin binamingnyi aryi sun abwe yabwe taleamingnyi tukwe talebkwaming. 9Ba, a tukwe ara yuk yala-yuk yala bana kum uca, sun yala a iya ibde yinkwaming.’ Ato kuboka Er Imtamnyi biryi ebdeibwe,” ebmou.
10Ato kuboka Er Iya Erebdobnyi biryi Musa dam ebdeibmou to kuboka Zelafehad nermabwe aryi kunubmai. 11Ara, Zelafehad nermabwe Mahla ab, Tirza ab, Hogla ab, Milka ab, Noa ab aryi sun nai er du weit yabwe deibdoba dobmai. 12A dobmai yala nang ara Yusuf mi Manasye biryi deiamwe mabwe dobmai. A deyok aryi sun tukwe ara sun nai yala nang tukwe iya kibmou.
13A uram nirya ara arungna uram ab, yan memen uram ab ara Er Iya Erebdobnyi biryi Musa dam ebdeibmou ba, ebkarebmou. A uram ara Israel nang Moab mutuk lu bok, me Yordan yibinamwe dam weik ati Yerikho mutuk bindoka kunmai talak aryi yan memen uram ebdeiamwe.
Currently Selected:
Bilangan Uram 36: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
