Ulangan Uram 1

Horeb mutuk kon dam aryi Musa er kubde yanamwe to ati liliboka sekmou deyok

1:1-8

1Ura, Musa ab, sun Israel ninyi ab yini mutuk si Araba binmai. A binmai yini mutuk ara me Yordan kouboka kitingbantam Suf mutuk dam asi binmai. Ba, Araba mutuk dina-dina ara Paran atei ab, Tofel atei ab, Laban atei ab, Hazerot atei ab, Di-Zahab atei ab bukamwe noutam asi bindoka kuramnyi. 2Ba, Horeb mutuk kon ebok, Sinai mutuk kon ebok aryi kuboka Kadesh-Barnea atei baramnyi uki nungna ara koklombaryi binamnyi. A baramnyi bisik ara mutuk si Seir kon mutuk bisik kuboka baramnyi. 3Ura, Mesir mutuk aryi kuboka baramnyi uki kwalina nungna ara yubwa 40 baryi kwaliamnyi. Ba, tanggal 1 bulan 11 dobmou tum aryi, Musa biryi sun Israel ninyi asi, Er Iya Erebdobnyi biryi Musa deici asi, Israel ninyi sun deyok ati, “Ato ebkwandum,” ebdeiamwe to kuboka nukmouci ebmou. 4A uram ebmou tum ara Musa biryi weik sien nang si Sihon ab, Og ab asi obmouci ebmou. Ara, Sihon bira Hesybon atei kuramuryi Amori mutuk sienyi kuramwe. Ba, Og bira Asytarot atei bok, Edrei mutuk dinatam kuboka kuramuryi Basan mutuk sienyi kuramwe. 5A bitinyi sien nang sirya obmou ura, Yordan kouboka otam Moab mutuk binmai. Ura, Er Iya Erebdobnyi biryi, “Ukubdarur,” ebdeiamwe uram asi Musa biryi Israel nang asi eterebkalibmouci, ato ebmou.

6“Nun Nai Imtamnyi, Iya Erebdobnyi biryi mutuk si Horeb kon aryi ato ebdeibsou. A mutuk kon dam uki weik kubdau ati, 7anabdobmunyi ura, Amori yala nang mutuk ab, Amori mutuk nang sun kwit yabwe Yordan duman nang asi bindoka obmunyi ura, a mutuk arabdobdarur. Ara, Yordan duman dam weik mutuk kon ab, mitik mutuk kon ab, yini mutuk si Negeb dam ab, weik me kwan kubkub ara Kanaan mutuk kunung ninyi ab asi obkaboka arabdobdarur. Tonda, Libanon kon aryi kuboka ilila me si Efrat yibiu dam kunung ninyi ababyi oboka arabdobdarur. 8A mutuk ara Er Iya Erebdobnyi biryi nun abwe yabwe, Abraham ab, Ishak ab, Yakub ab asi sun mabwe ara, ‘A mutuk ara sun mutuk kibkwansir,’ eboka uram talak eanse to kunuboka kubkwandum ati, ‘Ur bindarur!’ ebdeibmasir,” ebmou.

Musa biryi sun Israel ninyi malyito dinyi kunubmangnyi ninyi deyok lilin nang tikeibmou deyok

1:9-18

(Kel. 18:13-27)

9Musa biryi sun Israel ninyi asi ato ebmou, “Nun Sinai mutuk kon dam yandoka kunmoubwe dam aryi ato eanse, ‘Ni tentok aryi anda ninyi yubwa nirya asi kalikoka lilibdeibman kum,’ eanse. 10Ara, Nun Nai, Er Iya Erebdobnyi biryi sunsi ninyi ilinto kibdeibsouci, kurya nalirande to kibdeibsou. 11Ati, Er Iya Erebdobnyi, nun abwe yabwe aryi moloraminyi biryi tubto tabakdongoboka odei-odei 1.000 baryi karebkwansir. Karebsici ura, Er Imtamnyi biryi ebdeibwe to kunuboka, diblilibokabsiriryi kisal dangmurunkwansir. 12Bok, ni tentok aryi sun Israel ninyi nirya mambul kubmasici dinyi babyi, ikin bobmamunyi dinyi babyi asi liliboka kalikmasin kum. 13Ati, sunci yala yuk-yuk asi ninyi tentok-tentok wibdarur. A wibkwamamunyi nang ara etekdob kanyi borandiryi, kanya etekoka wa minob doboka irandinyi bisi wibkwandarur. Ba, niryi a nang asi wa kareboka tikeibnyi ba, sun liliboka kalingna sien nang kibkwansing. 14Ati, a ebmasin uram asi sunci telebto tenebmunyi ura, ‘Telebto ebmasirim,’ eryandarur. 15Ba, sunci a wibmamunyi nang ara ni dam boyamunyi ura, ‘Sun lilisin sien nang kibdeiboka tikeibkwan,’ eanse. ‘A karebkwan eanse wa ara 1.000 baryi nang sienyi kiboka talebkwandinyi ton, 100 baryi nang sienyi kiboka talebkwandinyi ton, 50 baryi nang sienyi kiboka talebkwandinyi ton, takubaryi nang lilisin sienyi kiboka talebkwandinyi ton kiboka tikeibnyi ba, sun yala yuk-yuk sien nang kiboka talebkwansing,’ eanse. 16Ara, niryi minob uca, a malyi deyok lilisin sien nang asi, ‘Ato kubkwandarur,’ eboka arukmase. Ara, Israel nang kum, yuk atei nang kum, sun dam aryi malyito dinyi kuramingnyi ura, diboka lilibdeibkwandarur! Lilibkwamamunyi ura, sun malyi kubmangnyi to kikliboka ikin karebkwandarur. 17Ba, malyi kubmangnyi ba, liliraming ai aryi lilinkwamangnyi ura, tonyi bira libdobmunci, tonyi bitikwe ikin karena mem! Ara, sun weik nang aryi kubmangnyi deyok babyi, mitik nang aryi kubmangnyi deyok babyi ara sun kubmangnyi to kikliboka ikin karebkwandarur! Ba, sunci ninyi mamun ati, sun uram sekwetebmamunyi dinyi asi ilil kuna mem! Ara, Imtamnyi biryi tenerur to kuboka uram sekwetebkwandarur. Ba, sunci uram minob sekwetebman kumci, ikin kubsici uram ara ni Musa dam boyankwandarur. Ba, niryi, ‘A uram sekwetebkwanun,’ ebdeianse,” ebmou. 18“Ato kuboka ni Musa biryi a wa kareboka uram erdeirinmasise tum aryi, ‘Sunci ibde binkwandum wa ara atiba,’ ebdeianse,” ebmou.

Kadesh-Barnea dam aryi mutuk meimbinmai deyok

1:19-33

19Musa biryi ato ebmou, “Ura, Er Iya Erebdobnyi, nun molonanyi biryi ebdeiansou to kuboka Horeb mutuk kon dam aryi anabdakoka asing einub ilila yini mutuk cang a nirya yangaramoubwe. Ani, Er Iya Erebdobnyi biryi ebdeibsou to kuboka Amori nang mutuk bisik yabwe. A yangaramoubwe ani, Kadesh-Barnea atei yanamoubwe. 20-21Yanmoubwe ura, niryi sunsi ato ebmasise, ‘Ukura, mutuk kon tam donung mutuk si Amori dam yanmab. A mutuk ara Er Iya Erebdobnyi nun molonanyi biryi karebkwansir mutuk dam yanmab. Ati sunci, “Ilil kuboka se!” tenen kanya bona mem! Eda, Er Iya Erebdobnyi biryi ebdeiansou to kuboka kunubkwayeb. Ara, nunci a mutuk asi wengbindoka arabdobibiryi iya nun mutuk kiboka kubdobkwayeb.

22Bok, ato kuna kabul talak ara nunci ato kubibiryok. Ara, “Nunci sun ninyi ukubaryi nang asi wiboka a arabkwayeb atei minob dirbindarur,” eboka arukwayeb. Ba, sunci dirbindoka tamuryangiryi akatei ara, “A bisik kuboka wengbinkwayeb,” ebsingnyi ba, binkwayeb. Ani, nun bisibnin binkwayeb weik-weik atei ababyi nirya dibdeboka yangnyi ura, binkwayeb,’ ebdanmai.”

23Ba, Musa biryi sun Israel ninyi asi ato ebmou. “A ebmarum to ara telebto ebmarum deyok aryi niryi a mutuk minob asing meimbinkwaming nang wibman. Ara, sun Israel nang ninyi yala amolbaryi kundarur to kuboka tentok-tentok wibmasin. 24Ura, a wibmou nang ara mutuk kon tam mutuk bisik kuboka Eskol bakan binmaici, asing obmai. 25Sirya asing obmaici, a mutuk kuramwe co du boboka tamuryanmaici, ato ebmai. ‘Er Iya Erebdobnyi nun molonanyi biryi karebkwansir mutuk ara sul mutuk bukwe asi eibmab,’ ebmai. 26Bok, sunci Er Iya Erebdobnyi nun molonanyi biryi ebdeibsou dinyi asi diboka kum kunundarur deyok aryi a mutuk kum wengbinkwandum. 27Sun Israel ninyi aryi ato erandau. ‘Er Iya Erebdobnyi biryi, “Li,” tenesurur aryi Mesir mutuk dam aryi boboka obsekwansir. Ara, Amori nang taruk dam dobkarebsou ba, kum dansekwayeb. 28A deyok aryi unato ati a dirbinmarum mutuk bitibyi do?’ A mutuk minob dirbindarur ebmoubwe nang aryi dirbindoka tamuryanmangci, ato eboka nukmang. ‘A dirbinmab mutuk kunung nang ara mikib weik nang akwe kunungci, nong cang weik nang akwe kunung. Ba, nunda nong mitik-mitik nang akwe kunubci, nong mitang nang akwe kunub. Ani, sun a donung atei-atei ara weik-weik atei akwe dordanungci, weik lika ara doboka aknabdongobyi ba, im si tobwe. Ani, tonda sun nong weik Enak yala ninyi ababyi a mutuk kunung asi eibmab,’ ebmai.” 29Bok, Musa biryi sun Israel ninyi asi ato ebmou. “Sun anda nong weik nang ati ilil kuna mem! 30Er Iya Erebdobnyi, nun molonubnyi biryi Mesir mutuk aryi bobdakde yanansou talak aryi nun mar ordan nang asi mar boamwe to kuboka, a mutuk wengbinkwandum ababyi nun mar bon nang asi Erci mar boboka menekwansir. 31Ani, yini mutuk dam aryi boyangaransou to kuboka bowengbinkwansir. Er Iya Erebdobnyi nun molonanyi biryi, ‘Ni nermabwe mabwe,’ eboka boukwe kimsurur. Akiryi nun yanganuba nirya kalikoka boyangasurur tok asi a mutuk dam boyasou. Ara, er nai biryi er mi ki diringdorande to kuboka boyangaransou. 32Ato kusurur bok, sun Israel ninyi aryi Er Iya Erebdobnyi nun molonanyi bisi diba kum tenendarur. 33Sun kuboka man dikum ati bomenekoka ingkiringdeisururnyi kurur. Ani, kiting ara Er duwa aryi bobde menengdansou. Ba, lukunda ara Er uk akiryi bobde menengnansounyi kurur ara sunci sirya bingdarur.” Musa biryi sun Israel ninyi asi, “Er Imtamnyi bira ato kurdeisururnyi kurur,” ebmou.

Er Iya Erebdobnyi biryi sun Israel ninyi asi ikin dinyi karebmou deyok

1:34-40

(Bil. 14:20-35)

34“Ura, Er Iya Erebdobnyi bira sun malyi uram enmamunyi dinyi kekeransir. Kekebsici ura, Er kanya yu wekokabdiryi diba uram aryi ato eransir. 35‘Ni Imtamnyi biryi sun abwe yabwe asi, “Karebkwansin,” ebsise mutuk ara sun nirya kum wengbinkwandum. 36Eda, Er Iya Erebdobnyi biryi ebdeibsou dinyi asi talebnuruboka diboka kunururnyi si Yefune mi Kaleb ab, er mabwe ab ati karebnyi ba, wengbinkwaming. Ani, Kaleb erci sirya dibdeboka yanibde yau mutuk si Kanaan karebkwan.

37Ani, sun malyi kun deyok aryi Er Iya Erebdobnyi biryi yu bobnouci ato ebnou. “Musa kanbabyi Kanaan mutuk dam kum wengbinkwandim,” ebnou. 38Eda, ninyi si Nun mi Yosua, kan wa irmilikinanyi bisi, “Karebkwansin,” ebdeibsou mutuk si Kanaan wengbinkwande. Erci sun Israel ninyi sienyi kiboka talebdiryi Kanaan mutuk bowengbiriba, sun mutuk kibdobingiryi iya kubdobkwaming. Ati, Musa kanci Yosua bisi, “Ato-ato kuboka talebkwandum,” eboka katabum ebdeibdum. 39Ani, sunci, “Nun mitik mabwe asi doboka akdanin yibinkwaming,” ebdau mabwe ab, teleb dinyi babyi, malyi dinyi babyi bingna kum mabwe ab asi Kanaan mutuk wengbinkwaming. Ani, anda mabwe asi Ni Imtamnyi biryi sunsi Kanaan mutuk karebkwan. Ba, sunci sun mutuk kibdobingiryi iya kubdobkwaming. 40Bok, sunda yini mutuk dam tubto tamurorbindarur. Ara, weik me si Laut Teberau deibwe tam bindobdarur,’ Er Iya Erebdobnyi eransir,” ebmou.

“Yordan me youkwa mutuk asi mar bobkwayeb,” eboka moun yiamiryok taklobmai deyok

1:41-46

41“Ura, sun Israel nang aryi ato eandau, ‘Nunci Er Iya Erebdobnyi urasintam malyi dinyi kununub. Bok, ukura nunci Er Iya Erebdobnyi nun molonanyi biryi ebdeiansou to kuboka sun Kanaan mutuk minob a kunung nang asi mar bobkwayeb,’ ebmandau. Ura, mutuk kon bisik kuboka mar bobana ara, ‘Ukubmanto,’ tenebmandauci yin mar anabminikmandau. 42Bok, Er Iya Erebdobnyi biryi sun Israel nang asi ato ebdum. ‘Ni Imtamnyi biryi sun Israel nang asi kum milibkwaman. Sun Kanaan minob a kunung nang aryi sun Israel nang asi muna kibdongobingyei ati taklobkwanung,’ ebdeiansou. 43Ba, niryi sunsi Er Iya Erebdobnyi biryi ebdeiansou to kuboka sun dam eansise. Bok, sunci Er Iya Erebdobnyi biryi ebdeiansou uram asi yan yaniandau. Yan yaniboka, ‘Nun yuk ukubmanto,’ tenebdau ura, mar boboka mutuk kon mutuk bisik kuboka ibinandau.

44Ura, sun a mutuk kon tam kuramnyi nang si Amori nang aryi sun Israel nang asi mar bobmasei. Mar bobmasici, sun akatei yin doun nang ara weik aryi limbum kuramingto kuboka obminikansei. Ara, Seir mutuk aryi mar boboka dobde binansei asi Horma mutuk bindoka obminikansei. 45Ba, tamuryandau ura, Er Iya Erebdobnyi urasin dam yandoka engeandau. Bok, Er Iya Erebdobnyi biryi sun engena babyi, sun molona babyi kum kekeansou. 46Ato kuansei ba, Kadesh mutuk dam a yandoka iya kurandau.” Musa biryi sun Israel ninyi asi, “Ato kurandau,” ebkarebmou.

Currently Selected:

Ulangan Uram 1: MTG

Highlight

Copy

Compare