Bilangan Uram 35

Lewi yala nang weik atei uram deyok

35:1-8

1Ura, Moab mutuk lu bok, Yerikho atei dam me Yordan yibinamwe dikum Er Iya Erebdobnyi biryi Musa bisi ato ebmou. 2“Israel nang asi ato ebdum, ‘Tukwe yala yuk-yuk dobyi dinyi ab, weik atei yuk-yuk dobyi dinyi ab ara Lewi yala nang ati kun atei ab, sun kun atei dam bisam winin tukwe ababyi ebkwanung. Ba, a nukamingnyi atei ab, bisam winin mutuk ab Lewi yang nang dinyi kubkwaming. 3Ba, akatei ara Lewi yala nang atei kibingiryi, sun a kubkwaming. Ba, sungsunga kuranci mutuk ara sun bisam yabwe kaibkwaming mutuk kibkwande. 4Ba, sungsunga kuranci mutuk cang nungna ara 450 meter baryi weik atei wilimna aryi kuboka eitam-outam nirya nukanung. 5Akiryi Lewi yala nang mutuk ara taruk in kukab kiknibkwandur. A mutuk kubkub nirya nungna ara 900 meter baryi kiknibkwandur. Ara, a bisam winin mutuk ara sun kun weik atei aknabdongoboka kiknibkwandarur. 6Ba, Lewi yala nang ati ninyi obnaryi inirorban weik atei ababyi nukwandum. Ara, weik atei nabaryi karebkwandum ba, yuk nang aryi, “Obkwayeb,” tenen kunmangnyi ababyi bindobkwamingnyi to ati karebkwandum. Ani, Lewi yala nang ati weik atei 42 baryi tabakoka karebkwandum. 7Ba, sun Lewi yala nang ati karebkwandim atei nungna nirya ara 48 baryi ab, sungsunga teleb bisam winin mutuk ab karebkwandum. 8Ba, sun Lewi yala nang ati karebkwaminyi tukwe ara Israel yala nang tukwe kianci bok, dobnin yibinkwandum. Ura, sun Lewi yala nang ati a dobnin yibinmaminyi tukwe ara karebkwandum,’ ebdum,” ebmou.

Kalingdaron weik atei uram deyok

35:9-34

9Er Iya Erebdobnyi biryi Musa bisi ato ebmou. 10“Israel nang asi ato ebdum, ‘Yordan me kouboka Kanaan mutuk wengbimunyi ura, 11sun inirdaron atei mikbaryi wibkwandarur. Ba, a wiamunyi atei ara yuk nang aryi ninyi obmarinyi bisi, “Obkub,” tenen kungnyi ura, a ninyi obmarinyi bira a wiamunyi atei wengbinmaci deyok aryi kum obkwaming. 12“Erbabyi obkwayeb,” tenen kunmangnyi bok, a weik atei wengdorbici ura, kum obkwanung. Ara, malyi kun dinyi lilin nang uram sisingna kum kubmangnyi ura, ninyi obmangnyi bok, dina kum kubkwande. 13A wengdorban atei ara nabaryi wibkwandarur. 14Ara, me Yordan yaletam atei winiryi wibkwandarur. Ba, Kanaan atei nong ara atei winiryi wibkwandarur. 15A nabaryi atei wiamunyi ara sun Israel nang kalingdaron weik atei wibkwandum. Ani, yuk atei nang ab, tingyangan nang ab, sun ab tonkwa kuramunyi nang ababyi akatei wengdorbinkwandum. Ba, a wibdeiamunyi atei ara, “Teneboka obkub,” tenen kusinyi ura, akatei umbura inirorbindobkwandarur.

16Bok, anyi besi kama aryi ninyi obmangnyi ba, dibci ura, anyi bira ninyi on nang kurur. Akiryi a obmarinyi bira obkabkwandarur. 17Ani, keil aryi obmariba, dibci ura, a obmarinyi bira ninyi onanyi biti erbabyi obkwandarur. 18Ani, co aryi obmaci ba, dibci ura, a obmarinyi bira ninyi onanyi biti erbabyi obkwandarur. 19A obkwamarinyi bira er ab tonkwa kurandinginyi biryi a obmarinyi er ai nang asi obkwandur. Ara, erbabyi obmaci to kuboka ebdarinyi ura, obkwandur. 20Ani, uram malyi ebdiryi tomoboka oublobci ba, dibmaci kum; teneboka obmaci ba, dibmaci kum; 21yu borandiryi taruk aryi donokoka obmaci ba, dibmarur kum; ura anyi bira ninyi onanyi biti erbabyi obkwandarur. Bok, a obmarinyi erbabyi obkwamarinyi bira er yalanyi kum, er kwit kum aryi obkwandur.

22Bok, er yu bona kum uca teneboka kum obmaci ba, dibmaci kum; keil aryi kum co aryi kum donokoka obmaci ba, dibmaci kum; 23asing eirina kum cok keil donokoka obci ba, dibkwande kum; “Anyi obkwan,” tenena kum bok taruk donokde ba, dibci kum; 24ura, Israel nang neika buluboka anyi bisi uram sisikwandarur. Ura, a obmarinyi bira, “Erbabyi obkwayeb,” enmangnyi ababyi lebkwandarur. 25A uram sisikmunyi ura, a teneboka kum obmarinyi bisi lebdobkwandarur. Ba, anyi bira lemdarorban atei dongobdeibkwandarur. Akatei cukoka bindobmaci ura, a binmaci atei a kunkwandur. Akatei kuranci ani, me likeiboka tikanci imam besar dibci ura, er atei tubto tamuboka bindobkwandur. 26Bok, sangkuna ninyi onanyi lemdaron atei umbura aryi sakweteboka baitam kunmaci ura, 27erbabyi obmangnyi ura, ining sakmaci dinyi aryi, er obmangnyi ninyi a ining aryi yana kirdongona kum kubkwande. 28Ara, ninyi onanyi bira iya lemdaron atei kuranci ani, er me likeiboka tikanci imam besar dibci ura, er atei tamuboka binkwandur. 29A yan memen uram ara sun Israel nang dantam-dantam bindoka kubkwanduma nirya ati yan memebdeibsou. Ani, sun mabwe odei-odei binkwandum nirya ati yan memebdeibsou.

30Ura, ninyi on dinyi ara sal bitinyi aryi asing eibmaringnyi ura, “Dib ati anyi bira ninyi obmar,” ebkwandarur. Ato ebmunyi ura, erbabyi tamuboka obkwandarur. Bok, sal tentok aryi asing eibmaci ura, “Anyi bira ninyi obmar,” eboka tatab-tatab ebmunci, ona mem! Ani, asing tentok eibmamunyi dinyi ara dib kum kimyibinkwande. 31Ba, ninyi obmarinyi biryi uang deksici dinyi ara dorona mem! Eda, a obmarinyi bisi erbabyi obkwandarur. 32Ani, a ninyi obmarinyi bira lemdaron atei umbura wengdorbinmaci ati, “Uang deksurum,” ena mem! Ani, anyi bira a lemdaron atei kuranci tok ani, er me likeiboka tikanci imam besar sirya dibci ura, er atei tamuboka bindobkwandur. 33Sun Israel nang aryi ato kubmunyi ura, sun kuramunyi mutuk ara iya malyi kibdeibkwandum. Ara, ninyi obdanmamunyi ining aryi a mutuk iya malyi kibkwande. Ani, yukto aryi a mutuk malyi kibdongoamunyi dinyi kilina kum kubkwande. Eda, er a ninyi obmarinyi bisi erbabyi tamuboka obmunyi ura, a mutuk malyi kun dinyi kilibkwandum. 34Nira sun Israel nang molonindarurnyi kununci, Iya Erebdobnyi sun kankan dam kunun. Ati sunci, sun kun mutuk asi malyi kimdongona mem!’ ebdum,” ebmou. Ara, Er Iya Erebdobnyi biryi Musa dam ebdeibmou to kuboka Israel nang dam ebkarebmou.

Currently Selected:

Bilangan Uram 35: MTG

Highlight

Copy

Compare