Bilangan Uram 34
34
Kanaan mutuk wiliba uram deyok
34:1-12
1Ura, Er Iya Erebdobnyi biryi Musa bisi ato ebmou. 2“Israel nang asi ato kuboka arukminci, uram ebdum, ‘Sun Israel nang uki weik kum uca Kanaan mutuk wengbinkundum. A mutuk ara Ni Iya Erebdobnyi biryi sunti karebsise mutuk wengbindoka sun dinyi kibkwande. Ati, sun mutuk wiliba ara anda mutuk aryi wilibkwande. 3Ara, me youkwetam mutuk wiliba ara yini mutuk Zin aryi kuboka Edom mutuk wilibkwande. Ba, kitingyangantam kuboka me youkwetam mutuk wiliba ara lulungna kum uca diblobwe me dingibwe Laut Asin aryi wilibwe. 4Ba, kanibokdiryi Akrabim mutuk kon banung bisik dandanya aryi kuboka yini mutuk Zin ab, Kadesh-Barnea mutuk ab wilibwe. Akiryi kaniboka Hazar-Adar mutuk banung bisik dandanya aryi Azmon mutuk bindoka wilibwe. 5Ani, sun mutuk me youkwetam mutuk wiliba ara Azmon mutuk aryi Mesir mutuk lu ban bisik wiliba dam aryi kuboka Laut Tengah noutumang dingibwe dam wilibkwande. 6Ba, sun mutuk kitingbantam mutuk wiliba ara weik me kwan Laut Tengah dingibwe dam aryi kuboka a me kwan kubkub dingibwe dam aryi wilibwe. 7Ba, me utam wiliba ara Laut Tengah me dingibwe dam aryi kuboka Hor mutuk kon dam bindoka wilibwe. 8Ani, Hamat atei banung bisik dam aryi kuboka Zedad mutuk bindoka wilibwe. 9Tonda, a mutuk aryi kuboka Zifron mutuk banung bisik aryi kuboka Hazar-Enan mutuk sirya wilibwe. 10Ba, sun mutuk kitingyangantam mutuk wiliba ara Hazar-Enan mutuk aryi kuboka Sefam mutuk dam wilibwe. 11Ba, Sefam mutuk aryi yourbiu tok ani, atei Ain kiting anamyangarur tam dam Ribla mutuk wilibwe. Ani, a mutuk wiliba tam yourbiu tok ani kiting anamna tam me kwan si Kineret dingibwe mutuk wilibwe. 12Ani, a mutuk wiliba aryi kuboka me Yordan banung bisik yibiu mutuk aryi kuboka Laut Asin me dingibwe mutuk wilibwe. Anda nukman mutuk nirya ara sun Israel nang mutuk wiliba ati nukman,’ ebdum,” ebmou. Ara, Er Iya Erebdobnyi biryi Musa dam ebmou to kuboka Israel nang asi nukarebmou.
Kanaan mutuk bokmai uram deyok
34:13-29
13Ura, Musa biryi Israel nang asi ato eboka arukmou, “A mutuk tukwe ara sun Israel nang aryi si sekdongoboka im sukmunyi ba, si laki kibci yala asi nukwandum mutuk bukwe. Ara, Er Iya Erebdobnyi biryi, ‘Toubnibaryi yala nang ab, Manasye dinatam yala nang ab asi karebkwandarur,’ ebdeibwe to karebkwandarur. 14Sun Ruben yala ab, Gad yala ab, Manasye yala dinatam nang ab ara tukwe sirya dobdobyi. Ba, a tukwe ara sun ai nang nirya bokdoro yibei. 15Sun mutuk tukwe si ara Kanaan mutuk yaletam bok, weik atei si Yerikho me Yordan kouboka mutuk ara sun dinyi kibwe,” ebmou.
16Ura, Er Iya Erebdobnyi biryi Musa bisi ato ebmou, 17“Kanaan mutuk tukwe bokeibkwanding nang si ara imam Eleazar ab, Nun mi Yosua ab aryi Israel nang ati bokdeibkwanding. 18Ani, Israel nang yala yuk-yuk weik sien nang ab ara imam Eleazar ab, Yosua ab milibdobkwanung,” ebmou. 19“A milibkwaming nang si ara Yehuda yalanyi Yefune mi Kaleb sunsi milibkwande. 20Ba, Simeon yala nang sienyi Amihud mi Samuel ab, 21Benyamin yalanyi Kislon mi Elidad ab, 22Dan yalanyi Yogli mi Buki ab sunsi milibkwaming. 23Ba, Yusuf mabwe bok, Manasye yala nang sienyi Efod mi Haniel ab, 24Efraim yalanyi Siftan mi Kemuel ab, 25Zebulon yalanyi Parnah mi Elisafan ab sunsi milibkwaming. 26Ba, Isakhar yala nang sienyi Azan mi Paltiel ab, 27Asyer yala nang sienyi Selomi mi Ahihud ab, 28Naftali yalanyi Amihud mi Pedael ab sunsi milibkwaming,” ebmou. 29Anda nang ara Er Iya Erebdobnyi biryi, “A nang ara Kanaan mutuk asi Harun ab, Eleazar ab tonkwa tukwe bokwaming nang eboka wiburyi, arukdeibwe,” ebmou.
Currently Selected:
Bilangan Uram 34: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
