Bilangan Uram 19
19
Malyi kun dinyi kilina ati me kiknibmou uram deyok
19:1-22
1Er Iya Erebdobnyi biryi Musa ab Harun ab asi ato ebmou, 2“A yan memen uram ara Israel nang asi ebdurum. Ara, ato, ‘Ining bol bisam sapi ner tentok bol tungdena kum kuanci bisam sapi ab, ikin dinyi bordena kum kuranci bisam sapi boyankwanung. 3A bisam sapi boyangnyi ura, dama deirinanyi imam Eleazar bisi boyankwanung. Ura, a bisam sapi Israel nang keis ol ai doboka kuramingnyi atei dam aryi baitam bobingnyi ura, imam nang dam aryi ngang sekwanung. 4Ura, imam Eleazar biryi a bisam ining mitikanun taruk du aryi doboka liki tabaryi Er Iya Erebdobnyi ai dam tam asi akdeibkwandur. 5Sirya ukubci ura, a bisam sapi tub ab, kala ab, ining ab, a bisam deisu ab tonkwa nirya ara imam Eleazar din ai dam uk dabkwanung. 6Ani, imam Eleazar biryi co si mek ab, co si hisop bisila ab, ining bol kaluna ab doboka bisam sapi uk dabmangnyi alib dongobkwandur. 7Ura, imam bira er ongobmaci ongon aling me ilikoka er nong ababyi me kekwandur. Ura, a imam bira atei wengyankwandur. Bok, kiting wengna kum kubmaci ura, imam Eleazar bira tuba betebdongobdanmarur. Bok, kiting wengbici ura, a betebdongobdanmaci dinyi kum dankwande. 8Ani, yuk nang a bisam sapi uk dabmangnyi nang ababyi ongon aling me ilikoka sun nong ababyi me kekwanung. Bok, kiting wengna kum kubmaci ura, a nang aryi tuba betebdongobdanmanung. 9Ba, sun beterdongordana kum kubmangnyi nang aryi a bisam uk dongobmangnyi uk sici ara doboka yuk wiboka teleb ai deibkwanung. A deiamingnyi ba, aminda aryi Israel ninyi aryi betebdongobdanamnyi dinyi kilin me kibkwande. 10Ba, a bisam sapi uk dongobmangnyi uk sici dobmarinyi bira er nong ab, ongon aling ab ara me ilikoka kekdobkwandur. Bok, kiting wengbana kum kubmaci ura, anyi bira tuba betebdongobdanmarur. Ani, kiting wengbici ura, a betebdongobdanmaci dinyi sirya kum dankwande. A yan memen uram ara iya ukubmurubde binkwandum. Ara, Israel nang babyi, yuk atei nang babyi ati ukubkwandum.
11Ba, ninyi tukwi talebmarinyi bira uki tabaryi nirya ara betebdongobdankwande. 12Bok, uki winiryi tum ab, uki tabaryi tum ab aryi a betebdongobdanmaci dinyi ara a kiknibdeiamingnyi uk sici ab, me ab tabtabukmangnyi dinyi aryi kilibdandobkwandur. Bok, uki winiryi tum ab, uki tabaryi tum ab aryi kum kilibdanmaci ura, anyi bira iya betebdongobdankwande. 13Ninyi tukwi talebmarinyi bira betebdongobmangnyi nang kilin me aryi me kengna kum kubmaci ura, anyi bira tuba betebdongobdanmarur. Ani, anyi bira a me aryi kengna kum kubmaci ura, beterdongordan dinyi er dam iya kubkwande. Tonda, Kemah Suci ai ababyi betebdongobmaci deyok aryi Er Imtamnyi mabwe ab kuna mem, eda bai yakwandarur. Ba, baitam kubkwandur kubkwande.
14Ba, ninyi sun kuramingyi ai umbura dibmaci ura, a kuramingnyi nang kum, akai umbura wengbinmarinyi kum ara uki tabaryi nirya betebdongobdankwande. 15Ani, me kweboka dein meyok bublan tiringna kum meyok ababyi betebkwande. 16Ba, ninyi aryi obmangnyi ba, dibmarinyi kum, bai kunmaci ba, dibmaci kum, a dibmangnyi dam binmarinyi bira uki tabaryi betebdongobdankwande. Ato akwe ninyi tukwe umbura dongoamingnyi ninyi dam binmarinyi babyi, ninyi yok talebmarinyi babyi neiktoto betebdongobdankwande.
17A betebdongobdananci dinyi nirya kilibdankwamaci ura, ner bisam sapi ining bol uk dabmangnyi uk sici dobkwandur. Ura, a uk sici ara yiban me kweboka uk sici deirin yangamna bisik dikdongobkwandur. 18Ani, ninyi ai dibmangnyi dam binmarinyi bira beterdongordana kum kubmarinyi biryi hisop co bisila doboka betebdongobdanmangnyi nang kilin me dikdongobkwandur. Ura, keis ol ai ab, akai umbura a deiramingnyi dinyi nirya ab me likdongobnin yibinkwandur. Ani, ai umbura dam a bukmangnyi nang ababyi nirya me likdeibkwandur. Tonda, ninyi tukwe dongon dam binmarinyi ab, diamingnyi nang yok talebmangnyi nang ab ara beterdongordana kum kubmarinyi biryi hisop bisila aryi betebdongobdanmangnyi nang kilin me aryi akdeibkwandur. 19A me akdeibkwamaci ura, uki winiryi tum ab, uki tabaryi tum ab aryi me akdeibkwandur. Ba, uki tabaryi tum ara a betebdongobdanmarinyi bira sirya kum dankwande. Ani, anyi bira er ongon aling ab, er nong ab ara me ilikoka kekdobkwandur. Sirya ura, kiting wengbici talak ara a betebdongobdanmaci dinyi ara lek kibkwande. 20Bok, betebdongobdanmarinyi biryi me akdeibdandoka beterdongon dinyi kilina kum ura, anyi bira iya betebdongobdankwande. Akiryi anyi bira Israel nang kankan dam aryi obkabkwanung. Ara, anyi biryi Er Iya Erebdobnyi ai malyi kubdongobmaci deyok ati Israel nang kankan dam aryi obkwanung. 21A yan memen uram ara iya ukubmurubde binkwaming. Ba, betebdongobdanmangnyi ati me lingdeinmarinyi bibabyi er ongon aling ab, er nong ab ara me ilikoka kekdobkwandur. Ba, a me bolibmarinyi bira betebdongobdanmaci tok ani, kiting wengbaci ura a betebdongobdanmaci dinyi ara lek kibkwande. 22Ani, betebdongobdanmarinyi biryi ai umbura dam deiamingnyi dinyi bolibmaci ura, a dinyi ara betebdongobmarur. Ani, yuk nang aryi a bona bolibmangnyi ura, a bolibmarinyi bira betebdongobdankwande. Ani, kiting wengbaci ura lek kibkwande,’ ebdurum.” Ato eboka Er Iya Erebdobnyi biryi Musa dam ab, Harun dam ab asi a yan memen uram ebdeibmou to kuboka Israel nang dam ebmarei.
Currently Selected:
Bilangan Uram 19: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
