Bilangan Uram 13
13
Ninyi amolbaryi minob asing meimban nang wibmou uram deyok
13:1-33
(Ul. 1:19-33)
1Yini mutuk si Paran dam sirya bindoka keis ol ai dobmai ura, Er Iya Erebdobnyi biryi Musa bisi ato ebmou. 2#Luk. 2:23“Ninyi amolbaryi nang asi arukmimba, Kanaan mutuk minob meimbinkwaming. Ara, Niryi Israel nang ati karebkwan mutuk asi sun meimbinkwamang. Ati, ninyi ara yala yuk-yuk sun abwe yabwe kuramnyi to kunung ninyi tentok-tentok dobkwandum. Ara, sun Israel yala ninyi du nang kiboka talebyi nang asi dobkwandum,” ebmou. 3Ura, yini mutuk si Paran dam aryi Musa biryi Er Iya Erebdobnyi uram ebmou to kuboka sunsi, “Meimbindarur,” eboka bokdonokmou. 4A binmai nang sun si ara:
Ruben yalanyi bira Zakur mi Syamua wibmou.
5Simeon yalanyi bira Hori mi Safat wibmou.
6Yehuda yalanyi bira Yefune mi Kaleb wibmou.
7Isakhar yalanyi bira Yusuf mi Yigal wibmou.
8Efraim yalanyi bira Nun mi Hosea wibmou.
9Benyamin yalanyi bira Rafu mi Palti wibmou.
10Zebulon yalanyi bira Sodi mi Gadiel wibmou.
11Yusuf yalanyi ab, Manasye yalanyi ab ara Susi mi Gadi wibmou.
12Dan yalanyi bira Gemali mi Amiel wibmou.
13Asyer yalanyi bira Mikhael mi Setur wibmou.
14Naftali yalanyi bira Wofsi mi Nahbi wibmou.
15Gad yalanyi bira Makhi mi Guel wibmou.
16A wibmou nang ara Musa biryi, “Kanaan mutuk minob meimbindarur,” eboka bokdonokmou. Ba, Musa biryi Nun mi Hosea bisi, “Yosua,” eboka si dobmou.
17Ura, Musa biryi a wibmou nang asi Kanaan mutuk meimbinkwamai ati bokdonokmouci, uram ato ebmou, “Sun akiryi anabdobmunci, Negeb tukwe dam me utam kuboka mutuk konkon bukdanin biu bisik welebkwandarur. 18Ani, a mutuk bindoka diboka asing obdenin yibinmunci, meiboka a mutuk dam kuramingnya nirya dibdenin yibinkwandarur. Ura, ‘A mutuk ninyi ara mikib weik nang kunung kum? Mitang nang kunung kum? Ninyi ilinto kunung kum? Mitika nun kunung kum?’ tenen dibdenin yibinkwandarur. 19Ani, ‘A mutuk ara unato mutuk nun kunung do? Telebto mutuk kunung do? Malyito mutuk kunung do? Ani, weik atei donungci lika doboka aknardongonung kum? Ani, mitikto atei dobde kunungci lak kunung kum?’ tenen ati bindoka diblilibdenkwandarur. 20Tonda, ‘A mutuk tukwe ara sul kiboka yina-yina telebto kurur kum? Sul kum mutuk aryi ukutotoa diboka sul kimna kum kurur kum. Ani, a mutuk ara du yin co ab, ai don co ab ton kurur kum? Co ton kum kurur kum?’ tenen dibdenin yibinkwandarur. Ani, sun luba kimna mem a mutuk kuranci yin co du ton bobkwandarur!” A talak ara co anggur du yin li doamwe talak berekamwe ati, ato eboka Musa biryi ebdeibmou.
21Ura, sun anaboka meimbinmai ura, yini mutuk si Zin dam me youkwetam aryi mutuk meibnin binmai. Ani, Hamat atei baramnyi bisik me utam kuboka Rehob atei binmai. 22Sun baramnyi bisik ara Negeb tukwe aryi kuboka baramnyi ani, Hebron atei dam wengbinmai. Ba, akatei kuramnyi yala nang ara Ahiman yala ab, Sesai yala ab, Talmai yala ab kuramnyi. Ba, sun kwemdeina si ara Enak. Ba, Soan atei Mesir ara minob doamnyi ara kwalina tabaryi kuamwe bok, Hebron atei doamwe. 23Ura, sun sirya Eskol mutuk lu dam binmaici, co anggur du mouamwe eibmaici, ya sekoka bobmai. Ara, a co anggur du ilinto yalikamwe aryi ninyi bitinyi-bitinyi kiboka co malouwa cabmai. Ba, tonda co delima du ab, kwarang du ab ton dakoka bobmai. 24A mutuk sunci si dobmai ara, “Eskol mutuk lu,” ebmai. Ara, sun Israel nang aryi anggur du ilinto yalikamwe asi dakoka bobmai deyok aryi ato eboka si dobmai.
25Ba, sun a mutuk dibmeibde kuramnyi ani, uki 40 baryi sirya kubmou ura, tubto tamuryanmai. 26Ba, Musa ab, Harun ab, sun Israel ninyi ab ara yini mutuk si Paran bok isin semnamnyi ai si Kadesh dam buluboka wekmai. A wekmai dam yandoka nukmai. Nukmaici, co du totoa bobmaia amuboka, “A mutuk ara anda co ukubde mourdarur asi meimbinmab ani, yanamib,” ebmai. 27Sunci Musa dam asi ato ebmai, “Nun sirya kan ebumwe to kuboka Kanaan mutuk bindokabuburyi, a mutuk meibdenmab ara sul ilinto mutuk asi asing eibmab.#13:27 A mutuk ara susu ab, madu ab ilinto ebmai ara yina yala amuma kuramwe ati ebmai. Ani, yina-yina nirya ara sulsul eboka ilinto kubde aramuryi, lubanbanabdei yibaramwe ati ebmai. A mutuk kurur dinyi ara yina-yina luboka banbanarur. Tola tenena ati, co du ara a bobmab anun e. 28Bok, ninyi ara mikib ilila ninyi akwe kunung. Ba, sun atei ababyi lika doboka weik atei akwe donung. Tonda, Enak yala ninyi, cang weik ninyi a kunung asi ton asing eibmab. 29Ba, Amalek yala ninyi ara Negeb mutuk kunung. Ani, Het yala ninyi ab, Yebus yala ninyi ab, Amori yala ninyi ab ara mutuk kon dam kunung. Ani, Kanaan ninyi ara weik me kwan dingibwe kubkub asi kunung. Ba, tonda me Yordan yurbiu kubkub dam kunung asi eibmab,” ebmai. 30Ura, Kaleb biryi Israel mutuk ninyi a wekmai tok sun kanya asi lamabdeibmouci, Musa bisi ato ebmou, “A mutuk ara nun arabdobkwayeb ati, mar bobkwayeb. Nunda mikib weik ati, a mutuk ninyi nirya obkaboka sun mutuk arabdobkwayeb,” ebmou. 31Bok, sun tonkwa binmai nang aryi ersi ato ebmai, “Nun mikib ara mitik, sun mikib ara weik ati, nunci a mutuk ninyi asi ibana kum kubkwamab,” ebmai. 32Tonda, sun meimbinmai nang aryi Israel ninyi asi tola ati ato ebmai, “Nun yibinkirikokabuburyi, asing meimbibwe mutuk ara ninyi mambul donung mutuk. Ba, ninyi a kunung nirya ara ilila koukwe nebokabingiryi, yok cang akwe nenung asi asing eibmab. 33Ba, sun nenung ara bol bukam kiboka weik ilila koukwe nun nenung. Ba, sunci, nun nong dirdesina ara kwising ato, tenebkwansunung,” ebmai.
Currently Selected:
Bilangan Uram 13: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
