Bilangan Uram 14

Israel ninyi aryi Musa dam ab, Harun dam ab asi malyi kibmai ba, Er Imtamnyi yu wekmou uram deyok

14:1-38

1Ura, mutuk meimbinmai nang aryi ilil tenen dinyi yandoka nukmai. Ura, Israel ninyi kekebmaici, a lukunda aryi sun Israel yala ninyi ara uram weikanun doboka ngwelengmaici, engenmai. 2Sun kanyitam ara, “Se,” tenebmaici Israel ninyi aryi Musa ab, Harun ab asi malyi kibmai. Ba, a ninyi yubwa aryi sunsi ato ebmai, “Mesir okiryi diantibyi, talya aryi yini mutuk a dibsekwayeb. 3Unatoa ati, Er Iya Erebdobnyi biryi a mutuk dam boyasou ba, nun ordana nang aryi nun ya sekoka obkwansing do? Ani, nun nerabwe mabwe sunsi deiblobibyi ba, sunci boboka sun atei bobinkwaming do? Nun tubto Mesir mutuk tamuboka bindobtibyi do?” ebmai. 4Ura, sun uram ebmurubdanin yibinmaci ato ebmai, “Ninyi tentok wibdobibyi ura, tikeibdobkwayeb. Ba, anyi biryi Mesir mutuk tamuboka bobinkwansir,” ebdanin yibinmai.

5Ura, Musa ab, Harun ab aryi sun a buluboka wekmai dam aryi kanyi luknubdongobmareici, kutam ikdongobmarei. 6Bok, ninyi si Nun mi Yosua ab, Yefune mi Kaleb ab ara sun tonkwa Kanaan mutuk dam asing meimbinamnyi nang bitinyi aryi “See, unatoa ati sun Israel ninyi nun nukmanim uram kum kekeboka Er Imtamnyi bisi dib kum tenebmang aryok see,” tenebmareici, sun ongon aling kwilikmarei. 7Ura, sun Israel ninyi asi ato ebmarei, “Nun binamuburyi, asing meimbinamoubwe atei ara iya telebto mutuk. 8Ati, Er Iya Erebdobnyi kanya deibokabsiriryi, Erci nunsi taleboka bomenekwansir. Ba, a mutuk ara nunsi karebkwansir. Akatei ara mutuk sul aryi, Erci nunsi to teleb yina ilinto karebkwansir. 9A deyok aryi Er Iya Erebdobnyi urasin dam asi, ‘Nun li,’ eboka watuna mem. Ani, Kanaan mutuk ninyi ati sun ilil kuna mem. Nunci a mutuk ninyi nirya kum dandeibkwayeb. Ara, sun kwemdeina aryi sunsi kalingna kum kururci, deiblobwe. Ba, nunda Er Iya Erebdobnyi biryi kalingsurur ati, sunci ilil kuna mem,” ebmarei. 10Uca, sun Israel ninyi aryi yu wekokaburyi, Yosua ab, Kaleb ab asi keil dobokabiryi, “Obkwayeb,” tenen kunmai. Asi, Er Iya Erebdobnyi milil ibarya asing kublabum aryok Er ab, ninyi ab erdan keis ol ai aruma dub tingyanmou.

11Ura, Er Iya Erebdobnyi biryi Musa bisi uram ato ebmou, “Niryi sun kankan dam asi ilil tenen dinyi kurdeirinun bok, Nisi dib kum tenenunung. Ato kunung dinyi ara uki unabaryi Israel yala ninyi aryi Nisi lebesengkwaning do? Ani, uki unabaryi Nisi, ‘Nun li,’ eboka dib kum tenebkwanking do? 12Ati, Niryi sunsi obkwaman ara bum lubna youn karebkwaman ba, sun kum dansekwaming. Bok, Niryi Musa kan deibdoba weik kibdeiboka mikib ilinto karebkwankin ba, sunda ato dinyi kum dobdobkwaming,” ebmou.

13Ura, Musa biryi Er Iya Erebdobnyi bisi uram ato dekeibmou, “Youn karebmar ba, nirya diblalabyi en dinyi ara sun Mesir mutuk ninyi kekebkwamang. Ba, sun Mesir ninyi aryi Kanaan mutuk kuramnyi ninyi asi nukwaming. Ba, sunci Kanti, ‘Erci mikib kum,’ tenebkwanking. Bok, Kanci sun Israel ninyi asi Mesir mutuk aryi kuboka Kan mikib aryi boboka menengdum. 14Sunci minob yuk nang aryi kekenung ara Kanda Iya Erebdobnyi akiryi, a mutuk ninyi sun noutumang tingdum. Ba, Kanda Er Iya Erebdobnyi, Kanci sun dam asi lak kibdandoka sun urasin dam tingbarum. Ani, Kan duwa bum sun dam tingdeiriryangarumci, minob boboka menengdum. Kitingtam ara duwa sirik kiboka bomenengdum ba, lukunda ara uk duwa kiboka bomenengdum. A kurum dinyi sun Kanaan mutuk ninyi sirya bingnung. 15Ati, Kanci Israel ninyi asi, ukuca oboka nirya kum dandeibokminyi ura, yuk atei ninyi aryi Kan deyok ati uram ebkwaming ara ato. 16‘Er Iya Erebdobnyi mikib kum akiryi, sun Israel ninyi boboka, Erci ebdeiamwe to kum kunubwe. Sunsi yini mutuk akiryi oboka uk dabwe,’ ebkwanking. 17Ati, deibloboka Kan mikib nun dam lak kibdeibsurum. Kanci nunsi Sinai mutuk kon dam aryi uram ebdeibsoumwe to ara ato erum, 18‘Nira Sun Nai, Iya Erebdobnyi ninyi boukwe kimnanyi kunun, bico tenenanyi kunun. Minob lukdandoka yu uram ena kumnyi kunun, busul asa aryi iya tuba-tuba boukwe kimnanyi kunun. Ani, malyi dinyi kubmangnyi nang asi lemdeirinunyi kunun. Bok, tuba-tuba malyi dinyi kubmangnyi nang ara wenena kum uca kum lordeirinunyi kunun. Ara, er nai malyi kun dinyi babyi, er mi malyi kun dinyi babyi, sun deibdoba babyi, ani odei-odei winiryi dumbaryi nirya liliboka wenenanyi kunun,’ ebumwe. 19Ati Nai, Israel yala ninyi malyi kunung dinyi kilibdum. Kanci sunsi busul kuboka boukwe kimnamoumwe to kuboka sun malyi kun dinyi kilibdum. Ara, Kanci akatei ninyi asi, Mesir mutuk aryi kuboka a mutuk dam wengyai ba, sun malyi kun dinyi kilibde yangarum to kuboka kilibdum,” eboka Musa biryi Er Iya Erebdobnyi bisi molobmou.

20Ura, Er Iya Erebdobnyi biryi Musa dam asi uram ato eboka dekeibmou, “Kan molobmarim to kuboka, Niryi sun malyi kun dinyi kiliboka lebdobkwaman. 21Bok, Nibiramnyi Iya Kam Kununyi si deici aryi ab, Ni Iya Erebdobnyi biryi tukwe dangna nirya talebse ibarya deici aryi sunsi ato wenen dinyi karebkwansin: 22Niryi ilil tenen dinyi Mesir mutuk dam ab, yini mutuk dam ab aryi, sun Israel yala ninyi ati kurdenun. Ani, Ni mikib ibarya ababyi eirinunung. Bok, sunci liki takubaryi malyi dinyi kubingiryi, Ni uram kum kekebingnyi ura, 23a nang ara dib ati, Niryi sun abwe yabwe ebdeianse mutuk kum eibkwaming. Ara, sun Israel ninyi aryi Nisi dib kum tenenungci, malyi kimnung nang nirya ara Kanaan mutuk ara sunda kum wengbinkwaming. 24Bok, Ni wa irmilinanyi Kaleb, er kanyi Nisi dib tenenururci, uram ebdeibmanyi to akwe kuboka kunurur. Ati, erci Ni ebdeibse mutuk wengbinkwande. Ba, er yaldangna akiryi a mutuk talebkwaming. 25Amalek mutuk ninyi ab, Kanaan mutuk ninyi ab ara Kaleb yaldangna talebkwaming mutuk tam tuba kunmang.

Ati, ambutum ara anabdobmunci, tamuboka yini mutuk bindarur. Ilila me sungyangarur tam Laut Teberau mutuk tam kuboka asi bindarur,” ebmou. 26Tubto, Er Iya Erebdobnyi biryi Musa ab, Harun ab asi ato ebmou. 27“Liki unabaryi sun Israel ninyi aryi yu boboka Ni dam asi tuba watubkwaning do? Sunci ukutotoa nirya watunung dinyi ara Ni kekebmase. 28Sun Israel ninyi dam asi ato ebdurum, ‘Ni Iya Erebdobnyi biryi ato sun dam asi Ni Iya Kam Kununyi si deici aryi ato ebdeibkun: Sunci Ni dam asi ebmamunyi tok ukubdeibkwansin. 29A yini mutuk dam aryi sunci Ni talak donindarur ati, sun nirya obkaboksinyi ura, dibkwamarum. Ara, ton deirlosina kum kubkwansin ba, sun kwalina uki 20 baryi sekdongoboka eitam ninyi nirya obkwansin. Sun tub ab, yok ab ara a yini mutuk dam iya kubkwande. 30Niryi minob sun abwe yabwe dam asi, “Kanaan mutuk boboka wengbinkwansin,” eanse dinyi ara sun nirya kum wengbinkwandum. Bok, Yefune mi Kaleb ab, Nun mi Yosua ab akwe Ni ebdeianse mutuk wengbinkwanding. 31Sun mabwe nermabwe ati sunci ato endarur, “Nun mabwe nermabwe asi taleboka sun yuk mutuk ninyi sun wa irmilin mabwe kimdorbinkwaming,” endarur. Anda mabwe nermabwe asi Niryi boboka Kanaan mutuk wengbinkwan. Ba, sunci sun nai yabwe ina ngilingdarur mutuk eibingiryi, sun mutuk kibkwaming. 32Ba, sunda yini mutuk a dibsekwandum. 33Ba, sun mabwe nermabwe ara sun deyok aryi mambul weik dobkwaming. Ara, bisam domba winin nang aryi sun bisam domba boboka yibarkiringnaming to yini mutuk yibaramingnyi asi kwalina 40 baryi yibinkirikwaming. Ba, sunci Er Imtamnyi dib tenena kum ninyi ara yini mutuk dam yibaramingnyi uca, dibsekwaming. 34Sunci Kanaan mutuk dam uki 40 baryi asing meimbinandau. Akiryi uki tentok ara kwalina tentok kibkwande ati, kwalina 40 baryi sun malyi kun dinyi ati ikin weik takubkwandum. Ba, Niryi sunsi mar bobsinyi ura, sunbabyi sun malyi kun dinyi bikmunci, “Nai e, Er Iya Erebdobnyi bisi malyi kimnub” tenebkwandumca. 35Ni Iya Erebdobnyi biryi ebkun, a dinyi nirya ukubkwan. Sun yu kanya boraming ninyi antaniboka Nisi talak donunungci, dib kum tenenung ati, a yini mutuk dam akiryi nirya dibsekwaming,’ sun Israel ninyi asi ebdurum.” Ato eboka Er Iya Erebdobnyi biryi Musa ab, Harun ab asi ebmou.

36Ura, Musa biryi ninyi amolbaryi asi “Minob asing meimbindarur,” ebmou nang akiryi tamuryanmaci, Israel ninyi asi tola ati Kanaan mutuk kum kuramnyi to nukmai. Ba, sun Israel yala ninyi kanyi malyi boboka Musa bisi talak donmai. 37A takubaryi nang nirya ara lubne youn taleboka Er Iya Erebdobnyi urasintam dibsekmai. 38Bok, sun a mutuk asing minob meimbinamnyi ninyi bitinyi nang si Nun mi Yosua ab, Yefune mi Kaleb ab talak aryi dina kum kubmarei.

Israel nang aryi Amalek nang ab, Kanaan nang ab ibinmai uram deyok

14:39-45

(Ul. 1:41-44)

39Ura, Musa biryi Er Iya Erebdobnyi ebdeibmou to kuboka Israel nang asi ebdeibmou. Ura, Israel nang kekebmaici, kanya suluboka engenmaici, anabminikmai. 40Mabmai ani, berekwe ura, belekuna kobdob bukoka, “Kanaan mutuk kon dam bitibyi,” tenebmai. Ura, ato ebmai, “Diba nun iya malyi kunub! Bok, ukura nunsi Er Iya Erebdobnyi biryi ebdeibsou mutuk wengbinkwamab,” ebmai. 41Bok, Musa biryi ato ebmou, “Sun unatoa ati Er Iya Erebdobnyi uram ebdeibmar to asi yan yanibmarum do? Sun tenebmarum to ara kum kunubkwamarum! 42Ara, Er Iya Erebdobnyi bira sun kankan dam tingyandoka kum milibkwamasir. Ati, sunci ibana mem! Sunsi muna kibdongobsingnyob. 43Ara, Amalek nang ab, Kanaan nang ab ara dam yandoka ibmasing. Ati, sun mar boboka bimunyi ura, sunsi nirya obkwamasing. Ara, sunci Er Iya Erebdobnyi bisi dongtam kibmarum deyok aryi Er Iya Erebdobnyi kum milibkwamasir,” ebmou. 44Bok, sun Israel nang Musa ebmou uram kekena kum kubmaici, mutuk kon dam welebinmai. Ba, Musa ab, “Ukubdarur-ukuna mem,” en uram deirin co sangkol ab ara sun atei doboka kuramnyi dam tuba kunmarei. 45Ura, Amalek nang ab, Kanaan nang ab aryi Israel nang iyanmai. Ba, Israel nang ara Horma mutuk binmai bok, Amalek nang ab, Kanaan nang ab aryi Israel nang asi dombinmaici, muna kibdongobmai.

Currently Selected:

Bilangan Uram 14: MTG

Highlight

Copy

Compare