Bilangan Uram 12

Miryam ab, Harun ab aryi Musa bisi lebesekmarei uram deyok

12:1-16

1Musa bira Miryam ab, Harun ab sun weit kuramwe. Sun weit Musa bira Kush mutuk ner doamwe deyok aryi Harun ab, Miryam ab akiryi Musa bisi talak doboka mar ibdeibmarei. 2Ura, sunci ato ebmarei, “Er Iya Erebdobnyi bira Musa bikwe uram erdeirirur darib? Ba, Er Iya Erebdobnyi uram ara nunda ton kum erdeirirur do?” ebmarei asi Er Iya Erebdobnyi kekebmou. 3Ba, Musa bira erebdob kanya kum kuramwe. Bok, iya luknubdob kanya boramwe. Er bobwe kanya ara tukwetam kunung ninyi nirya ato luknubdob kanya kum bobyi. 4Ura, Er Iya Erebdobnyi asing kublabumto aryi Musa dam uram ebmou, “Kan ab, Harun ab, Miryam ab sun winiryi nirya atei dam sakwetebokabmunci, Ni ai Kemah Suci ai o bindarur.” Ato ebmou ura, sun winiryi atei da sakwetebmai. 5Ura, Er Iya Erebdobnyi duwa dub aryi yuryanmouci, uram sisingni ai bisik bublan dam yandoka tikmouci, Miryam ab, Harun ab asi nabmou. Ba, sun bitinyi Er dam tingbinmarei. 6Sirya tingbinmarei ura, Er Iya Erebdobnyi biryi uram ato ebmou, “Ni uram asi diboka kekebdurum! Sun kankan aryi ninyi tentok Er Imtamnyi uram ermurunanyi kianci ura, Ni Iya Erebdobnyi biryi er dam lak kiboka, kunumna deici tingyankwanun. Tonda, lengdera sirik ababyi er dam uram ebkarebkwanun. 7Musa bira Ni wa irmilinururci, Nisi busul kanya boboka Ni nermabwe mabwe asi kalingdur. 8Ni ab urasin dibdandoka uram sisingnunum. Ara, inina dongna kum, kebdeiboka sisingna kum kununum. Ba, Musa bikwe Ni urasin eirinurur. Bok, unatoa ati sunci Ni wa irmilininanyi Musa bisi ilil kum kubmasou do?” ebmou. 9A deyok aryi Er Iya Erebdobnyi yu wekmouci, bindobmou. 10Ura, duwa bum uram sisingni ai dub aryi imtam welebdobmou ura, Miryam susa talebmou. Er bol ara lumtaia kurun ato kubmou. Ba, Harun biryi Miryam dam tamurbindokaburyi, dirderamwe uca, Miryam bira susa talen youn dobmou asi eibmou.

11Ura, Harun biryi Musa bisi uram ato ebmou, “Nai Musa, nun malyi kuboka luba kimnunum dinyi ati u weik yin dinyi karesina mem. Ara, nun luba kanyi aryi kununum. 12Miryam bisi mi mundu umbura boamingnyi bok, dianci ura, dinatam kalimna luranci ba, deiboka bai donongnaming to kuna mem,” ebmou. 13Ba, Musa biryi, “Ni du ner Miryam susa weik dobcei,” tenebmouci, Er Iya Erebdobnyi bisi uram ato eboka molobmou, “Nai Imtamnyi, Kanci ni du ner kwetebdum,” eboka molobmou. 14Ura, Er Iya Erebdobnyi biryi Musa molona kekebmouci, uram ato ebmou, “Kan du ner sirya lobdobmar, bok Er nai biryi si maka urasintam tulubdur, uki tabaryi er alyi kubkwande do? Ura, ersi keis ol atei dam aryi bai yakdonokmimba, uki tabaryi kunmaci ani, tubto tamuryarur,” ebmou. 15Ura, Miryam keis ol ai doramnyi atei dam aryi kuboka baitam yakdonokmai talak aryi sun akatei ninyi barona kum kubmai. Ara, Miryam uki tabaryi baitam tuba kuramwe deyok aryi kum anaboka bindobmai. 16Ura, sun Israel ninyi Hazerot atei aryi deibloboka anabdobmaici, yini mutuk si Paran dam bindoka keis ol ai dobmai. Ara, Miryam sirya baitam kuramwe ani, atei tamuryanmou ura, anabdobmai.

Currently Selected:

Bilangan Uram 12: MTG

Highlight

Copy

Compare