Bilangan Uram 11

Er Imtamnyi biryi uk buk dobkwetebmou uram

11:1-3

1Uki tentok tum ara sun Israel yala nang aryi Er Iya Erebdobnyi bisi kanyi suluboka malyito kusurur. “Nun mambul weik donub,” enmai asi, Er Iya Erebdobnyi biryi kekebwe ura, yu wekwe. Ura, Er Iya Erebdobnyi biryi uk buk sun kankan dam dobkwetebokaburyi, a dobmai keis ol atei dinatam nirya yibkabokmou. 2Ura, sunci Musa bisi uram dobmaici, ato ebmai, “Nun lebdobsurum,” ebmai. Ba, Musa biryi Er Iya Erebdobnyi bisi molobwe ura, a uk tangabmou. 3Akiryi sunci a mutuk si ara, “Tabera,” eboka dobmai. Ara, Er Iya Erebdobnyi biryi uk buk sun dam dobkwetebmou ati si dobmai.

Er Imtamnyi biryi, “Yina tub karebkwansin,” eamwe uram deyok

11:4-23

4Sun Israel yala ninyi baramnyi kankan aryi talyi yiban nang ton miliamnyi. Ba, a miliamnyi nang ara, “Nun yina tub ton yibtibyi,” tenebmai. A tenebmai karin akiryok, sun Israel yala ninyi ababyi engebokabiryi, ato ebmai, “Unanyi biryi nunsi yina tub karebsute ba, nun yibtibyi do? 5Nun kanyi teneibdenub, Mesir mutuk ara dengna kum uca mekinaia yiramoubwe. Tonda sumnyi ab, semangka ab, kisok bawang ab, ining bawang ab, kurun bawang ab dengna kum uca yiramoubwe. 6Bok ura, nun yok nyeleboka tub kum dasiraryi, ukutotoa ton kum, eda kwaning Manna a dem yibde banub,” ebdanmai. 7Ba, a kwaning Manna ara mitik-mitik co si ketumbar du atoanun. Ba, a kwaning Manna er bol ara kurun kiboka kumasan bol deiriramwe. 8Lukunda tum aryi Er Imtamnyi biryi kwaning Manna ab, mo doum-douma ab dobkwetebmou ba, sunci yibinkirikoka bulubmai. A bulubmai dinyi ara roti kwaning inin keil umbura dongobyi ura, inibokabiryi belanga umbura yubmai. Sirya yubmai ani, obwe ura, dobtaleboka inibdeiboka ila kwaning roti kiknibyi ura, dabmai. A dabmai kwaning roti to ara zaitun du yung aryi tiltil eboka yubmangnyi kue to ato kubmou. 9Ba, keis ol ai doamnyi atei asi lukunda aryi mo doum-douma dobkwetebmaci ura, kwaning Manna ababyi dorkweteramwe.

10Ura, Musa biryi sun Israel yala ninyi nirya aryi, sun ai bisik bublan dam tikoka kanyi suluboka engenmai asi bikmou. Ura, Er Iya Erebdobnyi yu wekwande tenebmouci, Musa, “Se,” tenebmou. 11A tenebmou kanyi aryok Musa biryi Er Iya Erebdobnyi bisi ato ebmou, “Unatoa ati ato dinyi kubmanirim da? Nira kan wa irmilikununyi bok, kanci malyi dinyi kareronmanirim. Unatoa ati ni kisal dangni dinyi Kan urasin dam aryi kum doronun. Ba, Kanci nisi ikin weik dinyi bobdeiboknoumwe. Ara, ‘A yala ninyi ilinto asi, kan sienyi kibminci, bobirum,’ ebnoumwe do? 12Niryi a yala ninyi nirya mundu boboka deibse do? Ati Kanci, nisi, ‘Musa, kanci sun nai kibminci bomenekdum. Ara, sun nai yabwe aryi mitik mabwe amangnaming to kubdum,’ ebnoumwe do? Tonda, Kanci, ‘Sunsi bobinaminyi ani, Niryi sun abwe yabwe asi, “Sul mutuk asi bindoka kubkwandumci, sun dinyi kibkwandum,” minob ebdeianse ati ato ukubdum,’ ebnoumwe do? 13Sunci ni dam asi engenmangci, ato enmang, ‘Kanci nunsi yina tub ton karebsurum ba, nun yibkwayeb,’ enmang. Ara, dantam aryi niryi sunsi yina tub dobniryi, a mutuk ninyi ilinto asi yibkarebkwaman do? 14Ikin weik ni dam takubdeibnoumwe. Bok, ni ninyi tentok aryi a ikin ab, akatei ninyi ab takubman kum. 15Bok, Imtamnyi, Kanci boukwe kimdaniminyi ura, Kanci nisi obkaboknurum. Ba, ni ikin dinyi tuba bobde binyei,” ebmou.

16Ebmou ura, Er Iya Erebdobnyi biryi Musa bisi ato ebmou, “Sun Israel yala ninyi kankan aryi ninyi 70 baryi wiboka bulubdeibdum. Ara, sun minob uca, wis yoka ninyi kalingna nang ab, wa doamiryi ninyi talen nang ab, sien nang kiamnyi nang asi wibdum. A nang asi ni urasin dam bulubdeibminyi ura, Ni ai Kemah Suci ai bobirum. Bobiminyi ura, kan ab, sun ab tonkwa tikwandarur. 17Ba, Ni yuryandokabniryi, kan ab uram sisikwamanim. Ba, Niryi kansi ninyi kalingna mikib karebkise ba, kalingdum. A mikib ton dobokabniryi, sun dam deibdongobkwaman. Ati, kan ab, sun ab tonkwa, a ikin wa takubkwandum. Akiryi kan tentok kiboka a ikin bona kum takubkwandim. 18Bok, kanci Israel ninyi asi ato ebkwamarum, ‘Sun malyi kanya deiblobmunci, teleb kanya akwe bobkwamandarur. Ani, sun ongon aling ababyi nirya ilikdobkwamandarur. Ambutum ara sun yina tub yibkwamarum. Ara, sunci Er Iya Erebdobnyi urasin dam engeboka, uram ato enmandau, “Unanyi biryi nun yina tub ton kareboksute do? Nunda Mesir mutuk ara teleb asa kuramoubwe,” enmandau. Akiryi Er Iya Erebdobnyi biryi sunsi yina tub karebkwamasir. 19Ara, liki tentok karebsiriba, yina kum, uki bitinyi karesina kum, uki amubaryi kum karebkwansir, uki takubaryi kum karebkwansir, uki 20 baryi kum karebkwansir, 20Eda uki wala tentok karebkwansir, akiryi sun u bisik langkibokabsiriryi, dukde yibinkwandum. Ara, sunci Er Iya Erebdobnyi bisi, “Nun li,” erandau, sun dam a kuramwe bok engeboka Er urasin dam asi ato erandum. “Unatoa ati nun Mesir dam aryi takloboka yabwe do?” endarur,’ ebmou.” 21Ura, Musa biryi Er Iya Erebdobnyi bisi ato ebmou, “A mutuk nang ni ab a kunub nungna ara 600.000 baryi tukwe bisik yanganub. Bok, Kanci uram ebdeibnoumwe, ‘Yina tub Niryi sunsi karebkwan. Ara, wala tentok karebnyi ba, sun yibkwaming!’ ebdeibnoumwe. 22Dantam yubwa kunung bisam sapi ab, domba ab asi oboka sunsi yibkarebkwan ba, sun mundu bukwande do? Mekinaia weik me kwan dam aryi doboka sunsi karebni ba, sun yiboka mundu bukwande do?” 23Ebmou bok, Er Iya Erebdobnyi biryi Musa bisi ato ebmou, “Er Iya Erebdobnyi mikib aryi karen dinyi ara mitikanun do? Ukura kan asing aryi eibkwamarimca. Ni uram ena ara kan dam asi kunubkwande kum. Kum kunubkwande kum!” ebmou.

Sun Israel yala nang asi Musa milibkwamnyi ati ninyi 70 baryi wibmou uram deyok

11:24-30

24Ura, Musa biryi Er Imtamnyi ai Kemah Suci ai dam sakweteboka Er Iya Erebdobnyi uram ebdeibmou to kuboka Israel yala wis yoka nang kankan aryi ninyi 70 baryi wiboka bulubdeibmou. Bulubdeibmouci, sunsi keis ol ai dam tikeibmou. 25A talak aryi Er Iya Erebdobnyi duwa kankan yuryandoka Musa bisi ebdeiamwe to kunubmou. Ara, Musa dam Er Imtamnyi kanya kuramwe ara ton doboka sun 70 baryi nang wis yoka nang ati karebmou. Kareboka Er Imtamnyi kanya sun dam wengbiu ura, sunda mikib kuboka Er Imtamnyi uram ermurun nang nabi nang ato kibmou. Bok, sun uram enmai dinyi ara iya kuna kum, erda a talak dem atikwe kuabwe.

26A wibmou nang 70 baryi kankan aryi ninyi bitinyi atei tuba bukmarei. A nang si ara Eldad ab Medad ab. Sunda si sirya sekdob bok, sun kwit yabwe ninyi talen nang ab Er Iya Erebdobnyi keis ol ai neika kum binmai. Eda, sun bitinyi nang ara tuba bukmarei bok, Er Imtamnyi kanya sun dam wengbinmou. Ba, sunbabyi mikib kuboka Er Imtamnyi uram ermurun nang ato kibmarei. 27Ura, kabirnyi tentok sakwetebokaburyi, cungbindoka Musa dam erbinmou. Ara, ato ebmou, “Eldad ab, Medad ab aryi atei bukmaring bok, sun kanyitam ara minob wa dobdob nang ato kibdanmaring,” ebmou. 28Uca, Nun mi Yosua bira Musa kabir ob aryi wa irmiliramwe. Anyi biryi ato ebmou, “Nai, weiknyi Musa, sunsi, ‘Uram kilikdurum,’ ebdum,” ebmou. 29Bok, Musa biryi uram dekeibmou, “Unatoa ati nisi kanya teneiboka ebmanirim do? Er Imtamnyi kanya ninyi dam takubdeibkwamar aryi ninyi nirya ara Er Imtamnyi uram ermurun nang kimna teleb,” ebmou. 30Ura, Musa ab, sun Israel ninyi talen nang kibdeibmou nang ab sun keis ol aitam uboka yuk-yuk bindobmai.

Er Imtamnyi biryi maka si puyuh karebmouci, u yiboka dibmai uram deyok

11:31-35

31Ura, Er Iya Erebdobnyi biryi ilila kumwe tentok karebmou talak aryi, weik me kwan tam aryi, maka si puyuh mer boyanmou. Ba, sun keis ol ai doamnyi dam ara a maka puyuh yubwa ilinto kisok alib yibardanmai. 32Ura, uki tentok belekuna aryi kuboka lukunda a nirya ab, ambutum uki nirya ab ara anda maka yubwa asi oboka bulunmai. Ara, ninyi tentok ikin nungna ara seribu kilogram bulubmou. Ba, a maka mer asi sun ai dam deiboka kiting ai donokmai. 33A maka tub sun si bambul dam deirirbarabyi, kum langdongnabyi bok, Er Iya Erebdobnyi akatei ninyi asi yu wekmou. Ura, Er Iya Erebdobnyi biryi sun akatei ninyi ilila youn din dinyi kareboka obmou. 34Akiryi a atei si dobmai ara Kibrot-Taawa eboka dobmai. Ara, sun tula-tula eboka yin nang dibyi ba, tukwe dongobyi mutuk. 35Ura, sun Israel ninyi Kibrot-Taawa atei aryi anabdobiryi Hazerot mutuk dam bindoka kuramnyi.

Currently Selected:

Bilangan Uram 11: MTG

Highlight

Copy

Compare