Nehemia Uram 9
9
Sun Israel nang aryi sun malyi kun dinyi lak eboka molobmai uram deyok
9:1-37
1Ura, kunmoubwe ani, a wala aryok, tanggal 24 ara Israel nang buluboka Er Imtamnyi urasin dam asi, “Nun malyi kuramoubwe dinyi ara sirya taklobmab,” eboka lak kimna dinyi ara yina si teboka bukmaici sun nong aling kolo kalubdobmai ura, ngang dakdongobmai ara tukwe asi sun kisok bol linmou. 2Ara, sun Israel yala nang kobdob ara, “Yuk yala nang ab tonkwa tuba kum kubkwayeb,” tenen yuk ai tingdorbinmai ura, sunci sun malyi kun dinyi ab, sun abwe yabwe malyi kuramnyi dinyi ab asi lak eboka molobmai. 3Ukuboka tikmaici molonmai bok, sun Lewi yala nang aryi sunsi sun Nai Iya Erebdobnyi biryi, “Ukubdarur-ato kuna mem!” ebdeiamwe uram deyok yuk-yuk nukarebmai. A nungkarenmai ba, kekenmai kiting ara kiting yakna winiryi kekebmai. Ura, ton kiting yakna winiryi ara sunci sun malyi kun dinyi ati lak ebmai. A sirya lak ebmai ura, sunci kutam ikdongoboka Er Iya Erebdobnyi sun Nai biti si weik ebmai. 4Ba, sun Lewi yala nang ara co lamna labdeiamnyi deici asi tikmai. Ara, ninyi si Yesua ab, Bani ab, Kadmiel ab, Sebanya ab, Buni ab, Serebya ab, yuk Bani ab, Kenani ab co lamna deici tikmai. Ba, sun tikmai ai aryok uram weikanun iboka sunci sun Nai Iya Erebdobnyi bisi uram doboka molobmai. 5Ura, tonda Lewi yala nang si Yesua ab, Bani ab, Kadmiel ab, Bani ab, Hasabneya ab, Serebya ab, Hodia ab, Sebanya ab, Petahya ab aryi ato ebmai, “Nun kwit yabwe, akatei ner sal e, se tikokdarur e! Tikokmunyi ura, Er Imtam Kururnyi bira minob uca kuramwe ani aminda ababyi iya kubkwandanyi nun Nai bisi si weik ebdarur! Nai Kansi iya erebdob asi ererdeikina teleb, yuk si weik en dinyi ab kisal dangna dinyi ab ara outam kibkweteboka Kansi ererdeikina teleb!” eboka molobmai.
6Ato ebmai ura, sun Israel nang nirya aryi ato ebmai, “Nai, Kan tentok asi Iya Erebdobnyi kurum! Kanci im ab tukwe ab kiknibmoumnyi kurum. Kanci imtam ai iya erebdob ai ton, imtam kurur dinyi ara kiting ab, wala ab, kurya ab nirya kiknibmoumwe. Ura, tonda tukwe ab, tukwe deici kurur dinyi ab kiknibmoumnyi. Tonda, Kanci weik me kwan ab, me kwan umbura kurande dinyi ab kiknibmoumnyi. Sirya kiknibdeibmoumwe ura, Kanci kiknibmoumwe dinyi nirya asi isin nebneb en dinyi karerum ba, imtam yin doun nang aryi Kansi kutam ikdongoboka si weik erebdeiboka kisal dangkunung. 7Kanda Iya Erebdobnyi biryi yuk nang kankan aryi nun abwe kisok Abram bisi wibmoumwe ura, er atei Ur-Kasdim aryi boyibinmoumci, er si Abram eramnyi bok, ukuryok si Abraham eboka dobkarebmoumnyi. 8Kanci diramoumwe uca, nun abwe kisok er kanyatam ara Kan uram er kanyatam bonanyi kuramwe eibmoumwe ura, Kanci ersi katabum en uram ebdeibmoumwe. Ura, ‘A mutuk Kanaan ara kan deibdoba nang asi iya karebkwan,’ eboka ebdeibmoumwe. Ara, ‘Kanaan nang mutuk tukwe ab, Het nang mutuk tukwe ab, Amori nang mutuk tukwe ab, Feris nang mutuk tukwe ab, Yebus nang mutuk tukwe ab, Girgasi nang mutuk tukwe ab asi kan deibdoba ati karebkwan,’ ebdeiamoumwe. Ani, Kanda Imtamnyi bira diba uram enanyi kurum deyok aryi, Kanci eamoumwe uram ara dangbisina kum kubmou. Eda, diba ati kunubdeibmoumwe. 9Ura, Kanci diramoumwe uca, nun abwe yabwe Mesir mutuk mambul doramnyi dinyi asi eibmoumci, lebdeibmoumwe. Tonda, nun abwe yabwe Mesir mutuk aryi anaboka yangaronmai asi Mesir nang aryi domkiringmai ba, sunci Me Kwan si Teberau dam yanmaici, ‘Nai, lebdeibsurum,’ eboka molobmai ura, Kanci lebdeibmoumwe. 10Kanci Mesir weik sienyi si Firaun urasin dam ab, er amwetam bun nang urasin dam ab, er kalingdamwe atei kuramnyi nang urasin dam ab asi ilil tenen dinyi amuma-amuma kikniramoumwe. Ara, Firaun ab, er milin nang ab aryi nun abwe yabwe asi malyi kiboka wingdaramnyi ara Kanci sirya bingdamoumwe. A deyok aryi Kanci ilil tenen dinyi kikniboka sunsi weneramoumwe. Ato kubmoumwe deyok aryi ninyi nirya aryi Kanti, ‘Er Imtamnyi bira iya mikibnyi kurur,’ tenen bingnankei ani, ukuryok ababyi bingkunung. 11Imtamnyi, Kanci sun Mesir nang urasintam asi me kwan der seksinibmoumwe ba, nun abwe yabwe me dala keil dem taklobmou asi koubkaboka tukwe kib ai tingdoryanmai. Ba, sun domyanganmai nang ara Kanci ilila me kwan umbura dam asi cabdongobmoumwe. Ara, ninyi aryi keil doboka ilila me kwan umbura donongnaming to, Kanci sun Mesir nang asi me kwan umbura akwe donokmoumwe. 12Ura, Kanci nun abwe yabwe Israel nang ara Mesir mutuk aryi anabmai nang asi bobde menengnamoumwe. Ara, kitingtam ara duwa bum biriman aryi bomenekyangaramoumwe. Ba, lukunda ara Kan uk ubna milil biriman aryi boyangaramoumwe. 13Ani, mutuk kon Sinai yanmai ura, Kanda Imtamnyi biryi, ‘Ni damnyi lak kibdeibdankwan,’ tenen Sinai mutuk kon dam asi yuryanmoumwe. Ura, Kanci imtam ai aryi kuboka nun abwe yabwe asi Kan uram ebdeibmoumwe. Ara, ‘Ato kubdarur-ato kuna mem,’ en uram yuk-yuk eboka ebdeibmoumwe. Tonda, ‘A dinyi nirya lilibde bindarur,’ en uram nirya karebmoumwe. A ebdeibmoumwe uram yuk-yuk ara kikib uram akwe kurur, tonda teleb uram akwe kurur. 14Ura, tonda Kanci sunsi, ‘Uki tabaryi tum si Sabat tum ara wau louboka diblilibde bindarur,’ ebkarebmoumci, Kanci sunsi arungdeirin uram yuk-yuk ab, erdeirin uram yuk-yuk ab, diboka liliboka wenen uram yuk-yuk ab asi karebmoumwe. Ara, Kan wa irmilirankounyi Musa biriman aryi Kanci a uram yuk-yuk nirya sun Israel nang asi karebmoumwe. 15Ura, nun abwe yabwe kwaning atanman ura, Kanci sunsi imtam aryi kuboka kwaning roti si Manna kareramoumwe. Ba, me atanman ura, Kanci mutuk kon keil ai aryi me anardeiramoumwe. Ani, Kanaan mutuk wiliba dam yanmai ba, Kanci nun abwe yabwe asi, ‘A mutuk wengbindoka iya kubkwandarur,’ ebdeibmoumwe. Ura, Kanci si dareiboka, ‘A mutuk sunti karebkwansin,’ ebdeiamoumwe mutuk dam wengyandoka kuramnyi.
16Kanci ato kuboka lilirdeiriramoumwe bok, nun abwe yabwe aryi sun kanya wingdan kanya boramnyi. Tonda, kanya kat biribsinibdandoka Kan arungdeirin uram ara kununa kum kuramnyi. 17Sunci Kan erdeirin uram kum kunuramnyi. Tonda, Kanci ilil tenen dinyi sun kankan dam kunurdeiramoumwe dinyi ara kanya teneirdena kum kuramnyi. Eda, sunci, ‘Er Imtamnyi uram kununa ara nun li,’ tenen, ‘Mesir mutuk ara mambul dinyi doramoubwe mutuk tamurbinkwayeb,’ teneramnyi. Ato teneramiryi, sunci, ‘Nun bomenengkwansiranyi bisi wibdeibkwayeb,’ tenen sun bomenekwamwe sienyi bisi tikeibmai. Nun abwe yabwe aryi ato kuboka malyi kuramnyi bok, Imtamnyi Kanda malyi kun dinyi kilirumnyi kurum. Tonda, ninyi kanya teleb kimdeirirumnyi kurum. Tonda, ninyi bico tenerumyi kurum. Tonda, yu ola wengkina kumnyi kurum. Kanda langdiboka boukwe weik kimnanyi kurum. A deyok aryi nun abwe yabwe malyi kuramnyi bok, Iya Erebdobnyi Kanci tanglona kum kubmoumwe. 18Nun abwe yabwe aryi Kan uram dakbisiboka iya malyi kun dinyi kubmai. Ara sunci, emas keil doboka kwemdeina bisam sapi mi kiknibmaici, ato ebmai, ‘nun molon dinyi ara atiba. A bisam mikib aryi nunsi Mesir mutuk aryi kuboka boyangasurur,’ ebmai. Ato kuboka sunci Iya Erebdobnyi Kansi ina ngilikoka iya malyi kun dinyi ukubmai. 19Ato kubmai bok, Kanda Iya Erebdobnyi biryi boukwe weik kuramoumwe deyok aryi sun yini mutuk dam yangaramnyi asi tanglona kum uca Kanci sunsi dibniliboka bomenengdamoumwe. Ara, kitingtam bomenengdamwe dinyi ara duwa bum aryi sunsi tuba bomenengdamwe. Ba, lukunda talak bomengdamwe dinyi ara Kan uk buk milil aryi sun binkwaman bisik milil arabdeibmana asi dibniliboka yangaramnyi. 20Kanda Iya Erebdobnyi biryi sunti, ‘Eterebkwan,’ tenen Kan Kanya Roh Kudus iya teleb dinyi sunsi karebmoumwe. Ura, tonda Kanci sunsi tanglona kum uca, tuba-tuba kwaning si Manna kareramoumwe. Ba, sun me atanman ura, Kanci sunsi me karebde yangaramoumwe. 21Nun abwe yabwe ara ato kuboka kwalina 40 baryi asi ninyi kuna kum mutuk dam kubde yangaramnyi asi Kanci sunsi dibniliboka yina yirkareramoumwe deyok aryi, sun yina sungna ton kum kuramwe. Tonda, Kanci sunsi kalingdamoumwe deyok aryi, sun ongon aling ababyi kwilingna ton kum kuramwe. Ba, mutuk weik bisik yangaramnyi bok, sun u yiboka keil ababyi ton kum neramwe. 22Kanci sunsi miliboka muna kimdongon dinyi kareramoumwe ba, sunci weik sien nang kalingnamnyi mutuk yuk-yuk ab, ninyi yala weik mutuk ab wengyandoka araroramnyi. Ura, Kanci sunsi Kanaan mutuk weik mutuk karebmoumwe ba, sunci yuk atei wiliba kuramnyi atei ababyi nirya arabdobmai. Ara, Hesbon atei weik sienyi si Sihon biryi taleramwe mutuk atei nirya ababyi arabdobmai. Tonda, Basan mutuk weik sienyi si Og kalingnamwe mutuk atei ababyi nirya arabdobmai. 23Ba, Kanci mi yaldangni dinyi kareramoumwe ba, nun abwe yabwe aryi yaldakoka mabwe nermabwe ilinto deiriramnyi. Uca, a nang deibdoba nang ara mitik kum kuramnyi. Ara, kurya imtam torande ara nukmanto kum kurur to, nun abwe yabwe sun deibdoba nang ara nukmanto kum kuramnyi. Ura, Kanci sunsi bomenekoka Kanaan mutuk boyanmoumwe. Ara, ‘A mutuk ara sunsi iya karebkwan,’ eamoumwe mutuk dam boyanmoumwe. 24Ura, nun abwe yabwe sun deibdoba nang aryi Kanaan mutuk wengyandoka arabdobmai ura, a mutuk dam iya kuramnyi. Kanci sunsi muna kimdongon dinyi kareboka sun Kanaan nang asi sun taruk dam kareramoumwe. Ara, sun Kanaan mutuk kuboka weik sien nang ab, sun Kanaan mutuk atei kuramnyi nang yuk-yuk ababyi Kanci sun taruk dam kareramoumwe. Ara, nun abwe yabwe aryi teneramnyi to a nang asi obkwamnyi kum, mambul kibkwamnyi kum ati, Kanci sunsi sun taruk dam kareramoumwe. 25Nun abwe yabwe aryi wengyandoka sun ordana nang aryi lika daraboka doramnyi atei arabdobmai. Tonda, sun tukwe teleb mutuk ababyi arabdobmai. Ura, tonda sunci sun ordana nang ai babyi arabdobmai. Tonda, akai bona talena teleb langkibde deiriramnyi dinyi nirya ababyi sunci aluboka dobdobmai. Tonda, sun Kanaan nang aryi keil asi teleboka ungnamnyi me longna asi nun abwe yabwe aryi arabdobmai. Tonda, co anggur wa in tukwe ab, co zaitun wa in tukwe ab, ton yuk co-yuk co wa in tukwe yubwa-yubwa ab sunci aluboka dobdobmai. Ura, sunci yina yiramnyi ara boun yina akwe yiramnyi aryi sun nong ababyi teleb kuboka neroramnyi. Ura, Kanci sunsi kisal dangnamoumwe deyok aryi sun teleb kuboka kuramnyi.
26Kanci ato kuboka kisal dangnamoumwe bok, nun abwe yabwe aryi, ‘Er Imtamnyi uram kunubde bana nun li,’ tenen Kansi tanglorankei. Ati, Kanci, ‘Ato kubdarur-ato kuna mem,’ en uram kareamoumwe asi sunci dongtam deiboka kunubde kum baramnyi. Tonda, Kanci wiboka bokdonokamoumwe nang Kan uram ermururamnyi nang nabi nang asi nun abwe yabwe aryi oramnyi. A nang ara, ‘Er Imtamnyi dam tamurbindoka Er uram kunubde bindarur,’ eramnyi asi sunci dobkirikoka oramnyi. Ati, nun abwe yabwe ara Kanda Imtamnyi urasintam aryi iya malyi kun dinyi kunuramnyi. 27Ura, Kanci, ‘Sunsi wenebkwan,’ tenen nun abwe yabwe asi sun ordana nang taruk dam karebmoumwe. Uca, sun ordana nang aryi sunsi mambul weik kimdeiriramnyi. Ura, nun abwe yabwe mambul doramnyi talak aryi sunci, ‘Nai Imtamnyi lebdobsurum,’ eboka Kansi uram dorankei ura, Kanci sunsi lebdeibmoumwe. Ara, Kanda imtam aryi kekebmoumwe ura, Kan boukwe weik deyok aryi sunsi lebdeibkwamnyi nang kareramoumwe uca, a nang aryi sun mar ordana nang asi muna kibdongoboka nun abwe yabwe asi lemdoramnyi. 28Ato kuboka lemnamoumwe bok, sun teleb kun talak ara tubto tamuboka Kan urasin dam aryi malyi kun dinyi ukuramnyi. Ba, Kanci sunsi dobtaleboka sun mar ordana nang taruk dam kareramoumwe ba, sunci nun abwe yabwe asi muna kibdongoboka sun amwetam kun nang kimdeiriramnyi. Ani, tubto mambul dinyi doramnyi ba, sunci, ‘Nai, lebdobsurum,’ eboka Kansi uram dorankei. Ba, Kanda, imtam aryi kekeramoumwe ura, Kan boukwe weik deyok aryi sunsi sun mar ordana nang taruk dam aryi tuba-tuba lebdeibde yangaramoumwe. 29Ura, Kanci nun abwe yabwe asi, ‘Sunci tamuboka Ni ebdeiansise uram diboka liliboka wenen uram asi kunubde bindarur,’ eboka yan memerdeirderamoumwe. Bok, sun wingdan kanya akwe boramnyi. Ura, sunci Kan arungdeirin uram asi kununa kum kuramnyi. Tonda, Kanci lilirdeirin uram erdeiriramoumwe dinyi ara dakbisiboka malyi kun dinyi akwe kuramnyi. Ati, Kanci, ‘Ni uram lilirdeirin uram kunubde bimunyi nang ara kam kun dinyi dobdobkwande,’ eaminyi bok, sunci Kan uram kum kekeramnyi. Eda, sun kanya kat biribsinibdandobni ura, Imtamnyi Kan uram ara sun kekena li kimsinirdaramnyi. 30Kwalina yubwe ara o kwali-o kwali yangaramnyi talak nirya ara malyi dinyi kuramnyi bok, Kanci, ‘Minola wenebkwan,’ kum teneramoumwe. Eda, Kanci Kan Kanya Roh Kudus biriman aryi nun abwe yabwe asi yan memerderamoumwe. Ara. Roh Kudus aryi Kan uram ermurun nang nabi nang biriman aryi sunsi, ‘Er Imtamnyi dam tamubindoka Er uram kekebde bindarur,’ eboka etereramnyi. Ato eboka etereramnyi bok, sunci kum kekeana ato kuramnyi ba, Kanci sunsi sun mar ordana nang taruk dam dobkarebnin yibinmoumwe. 31Ato kuboka dobkarebokmanaryok Kan iya boukwe weik kurum deyok aryi nun abwe yabwe asi iya kum tangloramoumwe. Kanda Imtamnyi biryi ninyi kanya teleb kimdeirirumnyi ton bico tenerurumyi ton kurum aryi, Kanci nun abwe yabwe asi tanglona kum kuramoumwe.
32Ati, Nai Imtam Kurumnyi, Kanda Iya Erebdobnyi kurum. Tonda, Iya Mikibnyi kurum. Tonda, iya ilil tenen dinyi kikninanyi kurum. Kanda boukwe weik kuboka Kan ebdeiaminyi uram akwe kunuboka iya talernururumnyi kurum. Ati, Nai, Kanci nun mambul donub dinyi nirya asing eisurum. Tonda, nun nai yabwe weik sien nang mambul donung dinyi ab, nun bobde menengsin nang mambul donung dinyi ab asing eibdum. Tonda, nun dama deirisin nang imam nang mambul donung dinyi ab, Kan uram ermururansing nang nabi nang mambul donung dinyi ab asing eibdum. Tonda, nun abwe yabwe mambul doramnyi dinyi ab, nunda Kansi molokunub nang nirya aryi mambul doramib dinyi asi Kanci asing eibsurum. Ara, Asyur mutuk weik sien nang aryi nunsi muna kibdongobmasei talak aryi kuboka ukuryok ababyi nun mambul dinyi tuba donub. Ati, Nai Kanci, ‘Malyi, sun yuk mambul a donmanunga,’ tenen Kanci eiboka tanglosina mem. 33Nunda mambul dinyi doramoubwe bok, Kancok kikib dinyi akwe kunurdeirisurum. Kanci Kan eamoumwe uram diboka kunuramoumwe bok, nunda malyi kun dinyi akwe kuramoubwe. 34Tonda, nun weik sien nang babyi, nun bobde menengsin nang babyi ara Kan erdeirisin uram kununa kum kuramnyi. Tonda, nun dama deirisin nang babyi, nun abwe yabwe yuk nang ababyi ara Kan erdeirisin uram kum kekeramnyi. Kanci sunsi, ‘Ato kubdarur-ato kuna mem,’ ebdeiamoumci, sunsi yan memen uram erkareramoumwe bok, sunci Kan uram kanya dam kum boramnyi. 35Nai, Kanci nun weik sien nang asi tikeibmoumwe bok, sunci Kan si weik kum ererdeirirankei. Tonda, Kanci sunsi kisal dakoka tukwe temda yana dinyi ab, tukwe sul teleb dinyi ab kareramoumwe bok, sunci, ‘Nun malyi kun dinyi takloboka Er Imtamnyi uram tamuboka kunubde binkwayeb,’ tenen kum kuramnyi. 36Ati Nai, Kanci nun a mambul donub dinyi asi asing dibdesurum. Nun a kunub nang ara yuk mutuk weik sienyi biryi talebsou ba, nunda yuk mutuk nang amwetam kun nang kunub. Ba, yuk mutuk sien nang aryi nunsi, ‘Co bok dengna weik dinyi karebsindarur,’ eboka arungsunung. A mutuk tukwe Kanaan mutuk ara Kanci nun abwe yabwe asi minob kareamoumci, sunsi ato eamoumwe, ‘Sunci kwaning kouboka wa ibmamunyi ura, kwaning yibkwandum. Tonda, sun mutuk kuboka co du moun dinyi ababyi sunci yibkwandum,’ eamoumwe. Ato eamoumwe bok, ukuryok ara nun ordana nang aryi nun kwaning ababyi du moun dinyi yuk dinyi ababyi yinung. 37Nunbiramnyi malyi dinyi kunub deyok aryi Kanci, ‘Wenebkwan,’ teneransirim uca, yuk mutuk sien nang aryi nunsi talesunungci, nun wa il doron dinyi kwaning yongon dinyi nirya dobde yironung. Ani, sunci nun nong babyi nun winin dinyi babyi ara sun tenebdobmangnyi to ukusunung. Ba, nunda mambul mitik kum danub aryok se,” eboka molobmai.
Sun Israel nang aryi si dareiboka, “Er Imtamnyi erdeirisin uram diboka kunubde binkwayeb,” ebmaici, kerek sengna deib aryi kerek sekmai uram deyok
9:38–10:39
38“A nirya ebdeibmab to deyok aryi nunci lulungna kum uram eboka kerek sengna deici asi taruk du yukwayeb. Ara, nunbabyi, nun bomenengsin nang babyi, Lewi yala nang babyi, nun dama deirin nang babyi ara, ‘Er Imtamnyi bisi tamuboka milibkwayeb,’ tenen taruk du yukwayeb,” ebmai.
Currently Selected:
Nehemia Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
