Nehemia Uram 10

1Sun, “Er Imtamnyi uram kekeboka Ersi milibkwayeb,” tenen nang ara, “Sisa deibkwayeb,” tenen sun si kerek sekoka kerek sengna deici taruk dumwe yukdongobmai. Ara, akatei sienyi Nehemia bira ninyi si Hakhalya er mi kuramuryi, er si kerek sekoka taruk dumwe yukdongobmou. Tonda, Zedekia bibabyi er si kerek sekoka taruk dumwe yukdongobmou. 2Tonda, Seraya ab, Azarya ab, Yeremia ab taruk dumwe yukdongobmai. 3Ani, Pasyhur ab, Amarya ab, Malkia ab taruk dumwe yukdongobmai. 4Ura, tonda Hatus ab, Sebanya ab, Malukh ab aryi taruk dumwe yukdongobmai. 5Harim ab, Meremot ab, Obaja ab taruk dumwe yukdongobmai. 6Daniel ab, Gineton ab, Barukh ab taruk dumwe yukdongobmai. 7Mesulam ab, Abia ab, Miyamin ab taruk dumwe yukdongobmai. 8Maazya ab, Bilgai ab, Semaya ab aryi taruk dumwe yukdongobmai. A nang sun nirya ara Er Imtamnyi biti ninyi dama deirin nang kuramnyi aryi, “Er Imtamnyi uram kekeboka Ersi milibkwayeb,” tenen taruk dumwe yukdongobmai.

9Ba, sun Lewi yala nang yuk nang aryi kerek sengna deici sisa ato dinyi deibdongobmai nang si ara: Ninyi si Azanya mi Yesua ab, Henadad mi si Binui ab, Kadmiel ab taruk dumwe yukdongobmai. 10Tonda, sun du weit yabwe nang si Sebanya ab, Hodia ab, Kelita ab, Pelaya ab, Hanan ab aryi taruk dumwe yukdongobmai. 11Mikha ab, Rehob ab, Hasabya ab aryi taruk dumwe yukdongobmai. 12Zakur ab, Serebya ab, Sebanya ab aryi taruk dumwe yukdongobmai. 13Yuknyi bok neik si doaminyi si Hodia ab, Bani ab, Beninu ab aryi taruk dumwe yukdongobmai.

14Sun Yahudi nang bobde menengna nang aryi, “Er Imtamnyi uram kekeboka Ersi milibkwayeb,” tenen taruk dumwe yukdongobmai nang si ara: Paros ab, Pahat-Moab, ab, Elam ab, Zatu ab, Bani ab taruk dumwe yukdongobmai. 15Buni ab, Azgad ab, Bebai ab taruk dumwe yukdongobmai. 16Adonia ab, Bigwai ab, Adin ab taruk dumwe yukdongobmai. 17Ater ab, Hizkia ab, Azur ab taruk dumwe yukdongobmai. 18Hodia ab, Hasum ab, Bezai ab taruk dumwe yukdongobmai. 19Harif ab, Anatot ab, Nebai ab taruk dumwe yukdongobmai. 20Magpias ab, Mesulam ab, Hezir ab taruk dumwe yukdongobmai. 21Mesezabeel ab, Zadok ab, Yadua ab taruk dumwe yukdongobmai. 22Pelaca ab, Hanan ab, Anaya ab taruk dumwe yukdongobmai. 23Hosea ab, Hananya ab, Hasub ab taruk dumwe yukdongobmai. 24Halohesh ab, Pilha ab, Sobek ab taruk dumwe yukdongobmai. 25Rehum ab, Hasabna ab, Maaseya ab taruk dumwe yukdongobmai. 26Ahia ab, Hanan ab, Anan ab taruk dumwe yukdongobmai. 27Malukh ab, Harim ab, Baana ab aryi taruk dumwe yukdongobmai.

28Tonda, Yahudi nang yuk nang ababyi, “Er Imtamnyi uram kekeboka Ersi milibkwayeb,” eboka si darei lak ebmai. Ara, Er Imtamnyi biti ninyi dama deirin nang ab, Lewi yala nang yuk nang ab, atei wengban bisik bublan dam kalingna nang ab, Er Imtamnyi ai mot semna nang ab, Er Imtamnyi ai wa irmilin nang ab aryi, “Er Imtamnyi bisi milibkwayeb,” ebmai. Tonda, sun Yahudi yala nang kuma bok, “Er Imtamnyi wenesina uram kekebkwayeb,” tenen nang ababyi, “Er Imtamnyi uram kekebkwayeb,” ebmai. A nang nirya ara wisi nang sal babyi nerabwe babyi, sun kanya wisibdob mabwe nermabwe nirya ababyi milibmai. 29A nang nirya ara sun sien nang asi miliboka, “Nun Nai Iya Erebdobnyi biryi er wa irmiliramunyi Musa deib aryi wenesina uram deibmasou asi nun diboka kekebkwayeb,” eboka si darei ebmai. Tonda, sunci si darabdeiboka ato ebmai, “Nunci Er Imtamnyi biryi arungsin uram asi diboka kununa kum kuramibyi ura, Er Imtamnyi biryi nunsi weneboka obsici ababyi ur ukubsurura,” ebmai. Ara, Er Iya Erebdobnyi biryi arungdeirin uram yuk-yuk asi diboka kunubkwamnyi ati katabum en uram ebmai. 30Ura, sunci ato ebmai, “Sun Kanaan mutuk kuboka yuk yala nang ara Er Imtamnyi bisi kum milinung ati, nunci Er Imtamnyi uram kunubdeibibiryi, nun nermabwe sunsi kum kamdeirinkwayeb. Ba, nun mabwe neiktoto ara yuk yala nang sun nermabwe dobingnyei,” ebmai. 31Ton ato ebmai, “Sun a mutuk Kanaan mutuk nang aryi Er Imtamnyi uki tum taruk louboka bun tum aryi nun dam yandoka, ‘Bona bon dinyi ton, gandum du ton boyanmab ati deksindarur,’ enmasingnyi bok, nunci kum dengkwayeb. Eda, sunci sunsi, ‘Arub ara uki tum si Sabat tum ara nun Nai Imtamnyi biryi uki tum enub,’ eboka bona bon dinyi kum, yina dinyi kum, dengdana kum kubkwayeb. Tonda, yuk uki tum ababyi ara, ‘Er Imtamnyi bisi nun kanya deibkwayeb,’ tenen kwalina kwalibkwayeb tum berekci ababyi, nunci utotoa dinyi kum dengnikwayeb. Tonda, nunci kwalina nabaryi kubingiryi, nun kwaning wa nirya wa iramibyi ani, kwalina tabaryi kwalina yankwande ba, nunci, ‘Wa sul tubto obdur,’ tenen taruk louboka nun wa kum ibkwayeb. Tonda, nunci yuk nang asi co bok kum yuk dinyi kum tiya karebibyi ani, a nang bona bon kum nang aryi bobloamingnyi dinyi tamuboka kum karebsiting ba, nunci, ‘Kilibokwayeb,’ tenen ‘Tamuboka karebnurum,’ ena ara takwayeb. Kwalina tabaryi kwalina donkwande nirya ara nunci ato kunkwayeb.

32Tonda, nun kunkwayeb kwalina nirya Er Imtamnyi ai umbura dam deirin dinyi ara tuba-tuba karenkwayeb. Ara, nun ninyi yuk-yuk aryi dengna weik keil si perak ikin dinyi 5 gram kikliboka karebkwayeb. 33A dengna weik dinyi bulubdeibibyi ura, sun Er Imtamnyi ai wa in nang aryi roti kwaning dobingiryi, sunci Er Imtamnyi ai wengbindoka roti kwaning amurdeirin co lamna deici asi deiboka Er Imtamnyi urasintam aryi deinkwaming. Tonda, uki-uki nirya aryi gandum du deiboka Er Imtamnyi bisi dama deinkwaming ati, nunci a dengna weik dinyi karenkwayeb. Tonda, uki-uki nirya aryi domba mi asi obingiryi uk daboka Er Iya Erebdobnyi bisi dama deinkwaming ati, nunci a dengna weik dinyi karenkwayeb. Tonda, Er Imtamnyi uki tum taruk louboka bun tum kubci ura, Er Iya Erebdobnyi bisi dama deinkwaming ati, nunci a dengna weik dinyi karenkwayeb. Tonda, dama deirin dinyi yuk dinyi deinkwaming ababyi, nunci a dengna weik dinyi karenkwayeb. Ara, ukuryok wala dama deirin dinyi ab, weik kwalina yuk uki tum dama deirin dinyi ab ati ato ebmab. Tonda, ‘Er Imtamnyi biryi nun malyi kun dinyi kilibsute,’ tenen dama deirin dinyi ab, Er Imtamnyi bisi dama deirin dinyi yuk dinyi karenkwayeb. Tonda, Er Imtamnyi ai wa nirya wa inkwaming ati, nunci a dengna weik dinyi karenkwayeb. 34Ura, tonda nunda Er Iya Erebdobnyi bisi ninyi dama deirin nang ab, Lewi yala nang yuk nang ab, Israel nang yuk nang ab nirya aryi uk dan co boyankwayeb. Ara, ‘Er Imtamnyi ai dam aryi nun Nai bisi dama deirin dinyi uk dabkwaming,’ tenen nunci uk dan co boyankwayeb. Ati, nunci, ‘Uk dan co tuba-tuba boyankwayeb,’ tenen ninyi ol yuk-yuk wa takubdeibmoubwe. Ara, nun atei nang kunub yala nang nirya aryi unubdandoka, ton yala nang ara ton uki tum boyanmang ani, ton uki tum ara yuk yala nang boyankwanung. Ati, nunci, ‘Ninyi yala yuk-yuk ara una wala aryi uk co boyankwayeb do?’ tenen wibkwamoubwe ati, keil du im sukmoubwe biriman aryi wibmoubwe. Ara, Musa uram umbura aryi sekamwe to sirya kunubmoubwe. 35Ura, tonda wa in dam aryi yuma yuboka kinkwayeb dinyi ara Er Iya Erebdobnyi bisi karenkwayeb. Tonda, co du mourande dinyi yuma dangkwayeb dinyi ara boboka Er Iya Erebdobnyi ai dam deinkwayeb. 36Ura, a dinyi akwa kuma. Nun mabwe yuma ko deirin mabwe ara nunci Er Imtamnyi ai dam bobindoka Er Imtamnyi taruk dam karenkwayeb. Ani, tonda bisam sapi yuma deibmaci bisam ab, bisam domba yuma deibmaci bisam ab, bisam kambing yuma deibmaci bisam ababyi nunci Er Imtamnyi ai dam bobindoka Er Imtamnyi ai wa in nang taruk dam karebibyi ura, Er Iya Erebdobnyi bisi dama deinkwaming. 37Ura, tonda gandum du moubci ura, gandum du yuma dinyi dakoka teikibyi ura, nunci tepung yuma dinyi asi boboka Er Imtamnyi ai dam bobankwayeb. Tonda, gandum du yuma kin dinyi ab, co du yin dinyi yala yuk-yuk yuma dangna dinyi ab, co anggur du yuma urun dinyi ab, co zaitun du yung yuma urun dinyi ab Er Imtamnyi ai dam deirin ai bobankwayeb. Tonda, nun kwaning yongon dinyi ab, co du dangna dinyi ab nirya asi ol takubaryi bokibyi ura, nunci ol tentok asi wiboka Er Iya Erebdobnyi bisi karenkwayeb. A karen dinyi nirya ara Lewi yala nang aryi nun kun atei dam nirya yibinkirikoka nun wa in dinyi nun dama deirin dinyi bulurkiringkwaming. 38Ba, sun Lewi yala nang aryi yibinkirikoka yuma dinyi bulurkiringkwamingnyi ura, Er Imtamnyi bisi dama deirinanyi Harun deibdobanyi tentok ara miliboka kalikde bok, bulubkirikwanung. Sun Lewi yala nang aryi buluboka bobingnyi ura, yandoka dinyi nirya boboka Er Imtamnyi ai umbura deinkwanung. 39Nun Israel nang nirya ara Lewi yala nang ababyi, yuk yala nang ababyi Er Imtamnyi ai wa ina ati tuba-tuba karenkwayeb. Ara, gandum du ab, co anggur du ab, co zaitun du yung ab wiboka deibmabyi dinyi nirya boboka Er Imtamnyi ai dam deirin ai bobankwayeb. A dama deirin dinyi ara sun Er Imtamnyi bisi dama deirin nang kun ai dam yina kiboka deirin ai umbura deiriryangankwaming. Tonda, sun Er Imtamnyi ai kalingna nang kun ai dam deiriryangankwaming. Tonda, sun Er Imtamnyi mot semna nang kun ai dam deiriryangankwaming. Ati, nun Israel nang ara tanglona kum uca, Er Iya Erebdobnyi ai wa in dinyi ati deibmurubde bankwayeb,” ebmai.

Currently Selected:

Nehemia Uram 10: MTG

Highlight

Copy

Compare