Nehemia Uram 8

Weik kwalina si, “Co Bok aryi Durubdeibkwayeb Ai umbura Tiya Kubkwayeb,” tenen kwalina tum kubmou ba, Ezra biryi sun Yahudi nang urasintam aryi Musa kerek sengna nukmou uram deyok

8:1-19

1-2Ura, Yehuda mutuk sirya wengyanmai ura, sun Israel nang ara sun atei yuk-yuk yanmaici, kuramnyi ani, wala tabaryi wala dobmou ura, ninyi nirya ara Yerusalem atei buluryanmai. Ura, atei keta tam Me U dam ban bisik bublan dam keta asi buluboka wengyanmai. Ura, sunci Musa uram liliboka bingnamunyi Ezra bisi ato eboka molobmai, “Musa kerek sengna ara nun kekebtibyi. A kerek sengna ara Er Iya Erebdobnyi biryi nunda Israel nang asi wenerdeirisin uram kurur ati, kanci a kerek sengna amubdeiboka nukeibsurum,” Ato eboka sunci molobmai. 3Ara, tabaryi wala tanggal 1 berekmou ura, Er Imtamnyi biti ninyi dama deirinanyi si Ezra biryi Musa kerek sengna boboka sun Israel nang urasintam aryi nukarebmou. Ara, sal babyi, nerabwe babyi ninyi wise ner sal nirya kekenmai ba, Ezra biryi Musa uram kerek sengna nirya nukeibmou. 4Ara, Ezra biryi Musa kerek sengna nirya nukeibmou ara belekuna aryi deyok kouboka nungmou ani, kiting dukduk kibmou. Ara, Me U dam ban bisik bublan keta tikmouci, erci sun buluboka wekmai nang urasintam aryi Musa uram nirya nukeibmou. Erci sun ninyi wise ner sal kekeboka bikdobmanto ner sal buluboka wekmaia urasintam asi nukmou. 5Musa uram liliboka bingnanyi si Ezra bira ato uki tum tikoka uram ena ati labdeiamnyi co lamna dub tikmouci, Musa uram nukeibmou. Ba, er tikmoua siriktam kuboka ara ninyi si Matica ab, Sema ab, Anaya ab, Uria ab, Hilkia ab, Maaseya ab tikmai. Ba, er kwanimtam kuboka asi ninyi si Pedaya ab, Misael ab, Malkia ab, Hasum ab, Hasbadana ab, Zakharia ab, Mesulam ab tikmai. 6Ura, Ezra bira a co lamna deici erebdob ai tikmouci, Musa kerek sengna tengebtalebmoua asi a wekmai nang nirya aryi asing eibmai. Ba, erci a kerek sengna tengertaliu ura, a wekmai nang sun nirya tikokmai. 7Sirya nukeibmou ura, Ezra biryi Er Imtamnyi bira iya weiknyi bisi si weik eboka kisal dakmou. Ba, sun bulubmai nang nirya aryi taruk lakokmaici, uram dobmuruboka, “Amin, amin,” ena ara, “Yo diba, yo diba,” ebmai. Ani, sunci, “Er Imtamnyi bira iya weiknyi,” tenen sun kutam ikdongoboka kisok tukwe ai deibdongoboka Er Iya Erebdobnyi bisi molobmai. 8Ura, a buluboka wekmai nang neik ai tuba tikmai talak aryi sun Lewi yala nang aryi sunsi Musa uram deyok yuk-yuk liliboka eterebkarebmai. Ara, Lewi yala nang sun si Yesua ab, Bani ab, Serebya ab, Yamin ab, Akub ab, Sabetai ab, Hodia ab, Maaseya ab, Kelita ab, Azarya ab, Yozabad ab, Hanan ab, Pelaya ab aryi Musa kerek sengna asi a wekmai nang ati liliboka eterebkarebmai. 9A kerek sengna ara Er Iya Erebdobnyi biryi wenerdeirin uram deyok yuk-yuk asi lak diboka liliboka nukmai ura, lak kiboka eterebmai ba, a nukmai to ara nirya diboka bikmai.

10Ura, ninyi nirya aryi Musa kerek sengna yakna yuk-yuk nukmai dinyi kekebmai ura, sun nirya engeronmai. Ura, akatei sienyi si Nehemia ab, Musa kerek sengna diboka liliboka bingnanyi si Ezra ab, Lewi yala nang ab aryi sun a buluboka wekmai nang engenmai asi ato ebmai, “Arub berekmar uki tum ara nun Nai Iya Erebdobnyi biti wibdeibmab uki tum berekmar. Ati sunci mambul kanya boboka engena mem!” ebmai. 11Ba, akatei sienyi Nehemia biryi sunsi ton ato ebmou, “Ura, sun atei yuk-yuk ur bindobdarur. Bindobmunyi ura, yina to teleb-teleb dinyi ab, me minmin erande dinyi ab ur yibdobkwandarur. Ura, ton meici kukoka sun yina kum nang ati deibkwandarur. Arub tum ara nun Nai Imtamnyi uki tum berekmar deyok ati mambul kanya bona mem! Er Iya Erebdobnyi bira sun kalingsinanyi kurur deyok ati sun kanya kilkil kusina teleb!” ebmou. 12Ba, neiktoto Lewi yala nang a wekmai nang aryi, “Engenmang dinyi ara kilikting,” tenebmai ura, sunbabyi ato ebmai, “Sun mambul kanya boboka engena mem se! Arub tum ara iya teleb uki tum aca. Sun engena ara kilikdarur!” ebmai. Ato ebmai ba, a buluboka wekmai nang aryi engenmai ara kilikmai. 13Ba, sun a buluboka wekmai nang nirya ara a uram kekebmai ura, “Kwaning ab, me ab kwaliboka yirbinkwayeb,” tenen sun atei yuk-yuk binsekmai. Tonda, sunci yina kiknibminikmaici, sun yina kum nang ababyi yina deibkarebmai ati binmai. Ati, sunci, “Musa uram lak eterebmasing deyok aryi nun ukuryok diboka bikmab,” tenen kilkil kanya bobmaici, kwalina weik kwalibmai.

14Mabmai ani, berekwe ura, sun Yahudi ninyi yala deyok nang nirya ab, Er Imtamnyi biti ninyi dama deirin nang ab, sun Lewi yala nang ab buluboka Musa kerek sengna diboka liliboka bingnanyi Ezra dam yanmai. Ara, “Musa uram deyok yuk-yuk diboka lilibdeibkwayeb,” tenen Ezra dam yanmai. 15A ukuboka lilinmai uca, Er Iya Erebdobnyi biryi Musa deici asi wenerdeirin uram ton kerek sekdeiamwe asi asing eibmai. Ara ato eboka kerek sekamwe, “Wala tabaryi wala kibdiryi, weik uki tum berekci ura, sun Israel nang ara tiya kun ai co bok aryok durubdeiboka kubkwandarur,” eboka sekamwe asi eibmai. 16Ba, tonda ato eboka sekamwe, “Sun Israel nang kuramingnyi atei ab, Yerusalem atei kuramingnyi nang ab asi ato eboka ebdanin yibinkwandarur, ‘Mutuk dub welebokabmunci, co bok amuma dakoka boyankwandarur. Ara, co zaitun bok ab, zaitun yim co bok ab, co murad bok ab, tambum ato co kurma bok ab, yuk co-yuk co bok ilinto kuranci bok ab dakoka bobmunyi ura, tiya ai durubkwamamunyi ati boyankwandarur.’ Ara, Musa uram kerek sengna sekdeianci to diblilibdeboka co bok ai dobkwandarur!” eboka sekeiamwe asi asing eibmai. 17Ura, sun Israel nang Babel mutuk aryi kuboka tamuryanamnyi nang aryi mutuk dub welebinmaici, a kerek sekeiamwe co bok yala nirya boyanmai. Ura, ninyi yuk-yuk sun atei aruma dub ai co bok aryi tiya durubdeiboka kunkwamnyi ai dobnin yibinmai. Atei keta dam ab, Er Imtamnyi ai dam keta ab, Me U dam ban bisik bublan dam likamwe keta dam ab, Efraim ban bisik bublan dam keta ab nirya a boyanmai co bok aryi dobnin yibinmai. 18Sun Babel mutuk aryi kuboka tamuryanamnyi nang nirya co bok aryi durubdeiboka tiya kun ai donmai ani, sirya dobdongobmai ura, a dobmai ai kuramnyi. Minob talak, ninyi si Nun mi si Yosua Israel weik sienyi kuramwe talak ara sun Israel nang aryi ato ton kum kuramnyi. Bok, a talak aryi sunci yuma kobdob ato kubmai deyok aryi sun kanya kilkil weik bobmaici, iya weik kwalina kwalibmai. 19Ura, a kwalina uki tum berekamwe talak uki tabaryi aryi co bok aryi dururdeirin ai akwe kuboka kwaliramnyi. Ba, a tabaryi uki tum nirya ara Ezra biryi Er Iya Erebdobnyi biryi Musa deici wenerdeirin uram ebdeiamwe deyok asi nungkareramwe. Yuma uki tum aryi kuboka ani, sirya kobdob uki tum tabaryi tum ara a kwalina sirya kwalibmai. Ani, uki inbaryi tum berekmou ura sun nirya buluboka wekmaici weik uram sisingna ati Er Imtamnyi biryi lilirdeirin uram umbura aryi ebdeiamwe to kunuboka buluboka wekmai.

Currently Selected:

Nehemia Uram 8: MTG

Highlight

Copy

Compare