Nehemia Uram 6

Yerusalem atei lika doramnyi sirya dobdongobmai ba, sun ordana nang aryi Nehemia bisi, “Obkwayeb,” tenen bisik ingkiringmai uram deyok

6:1-19

1Nun mar ordana nang Sanbalat ab, Tobia ab, Arab ateinyi si Gesyem ab yuk nang ab aryi kekenmai uca, “Nehemia ab, sun Yahudi nang yuk nang ab aryi Yerusalem atei sirya dobmangci, mitik karin babyi mitik kinkin babyi ton kum loubmang,” en uram kekebmai. Ato uram deyok kekebmai bok, a talak ara atei wengban bisik bublan co ara kum dakdongobmoubwe. 2Ura, Sanbalat ab, Gesyem ab aryi ninyi bokeiboka nisi uram ebdeibmarei. A uram ara ato eboka bokeibmarei, “A mi a, kan ab, nun ab tonkwa Ono mutuk bakan dam atei si Kefirim asi ebdandoka uram sisikwayeb,” eboka bokeibmarei ba, eryanmai. Ara, “Nehemia ab ebdandoka obkwayeb,” tenebmaici, sunci nisi, “Uram sisikwayeb ati nun ab tonkwa ebdankwayeb,” eboka nabmanirei. 3Ura, nibabyi a bitinyi nang asi ninyi bokdeiboka uram ebdeibmase, “Nira weik wa nun asi inman bok, ebdeibmarurum aryi ni wa deibloboka yanman kum. Ba, niryi a wa asi deibloboka sun ebmarurum to sun dam yanyi ura, ni inman wa ara diboka kum ibnun ati ni kum yankwan!” ebdeibmase. 4Uca, a bitinyi nang aryi tatabkaboka nisi neik uram akwe ebdeiboka bongdeirandei asi liki dumbaryi ebdeibmanirei bok, nibabyi tubto tamuboka uram dengdeiranse ababyi neik uram yuma eanse to akwe erdeiriranse. 5Ani, liki amubaryi dinyi ara Sanbalat biryi er yan dam bunanyi bisi bokdeibmou ba, anyi biryi neik ai bongdeirandei to akwe kuboka asi ebmanou. Tonda, Sanbalat biryi kerek sengna ton kerek sekeibmou ara er yan dam bunanyi deib aryi ni taruk dam karebmou. Sanbalat biryi, “A kerek sengna deyok ara yuk nang ababyi biknung,” tenen kitina kum kubmou asi ni taruk dam karebmou. 6Ba, ni Nehemia biryi dinmase uca, a kerek sengna si konga ara ato eboka sekmou, “Ni Sanbalat biryi kekenman uca, Nehemia kan ab, kan kwit yabwe Yahudi nang ab ara, ‘Persia mutuk weik sienyi er uram ara tuba kum kekebkwayeb,’ tenerandum ati, sunci Yerusalem atei lika dorondarur ara sirya kekebmasin. Tonda, kan Nehemia bira sun Yahudi nang weik sienyi kibkwandim ara kekebmakin. A enmang uram ara sun yuk atei yuk atei nang aryi enmang uram kekebmakin bok, sienyi si Gesyem biryi, ‘Dib ati ato enung,’ ebmar asi kekebman. 7Ba, yuk dinyi kekebmakin ara kanci Er Imtamnyi uram ermurun nang wibmarimci, a nang dam asi, ‘Yehuda mutuk weik sienyi bira nitiba,’ ebdanmarim asi kekebmakin. Ati, kan ebmarim uram ara Persia mutuk weik sienyi biryi kekebkicei ati, ni ab tonkwa uram sisikwanim ati ni dam a yarum,” ato eboka Sanbalat biryi kerek sekeibmou. 8Asi niryi ersi uram ebdeiboka ninyi bokeibmase, “Kanci a ebmarim uram ara iya ni ton kum kunubse bok asi ebmarim. Kanci ebmarim uram ara, kancok-kancok tola ati si maka buluboka ebmarim,” eboka dekeibmase. 9Sanbalat ab, er kwit yabwe ab sun kanya tenebmai ara ato tenebmai, “Sun Yahudi nang asi bisik sekoka ilil kibdeibibyi ba, sunci Yerusalem atei lika mikib asa ibde banung to yumkuna kum kubkwaming,” tenebmai. Ato tenen ukurderansei bok, niryi mikib yaboka Er Imtamnyi bisi molobmase. Ara, “Nai Imtamnyi, Kanci nunsi mikib karebtabaksiminyi ba, mikib asa aryi Yerusalem atei nirya doboka aknabdongobkwayeb,” eboka molobmase.

10Ura, uki tentok tum aryi nira ninyi si Mehetabeel mi si Delaya biryi mi si Semaya er ai binmase. Erci nisi yanman kum deyok aryi niryi ersi binmase. Ura, erci nisi ato ebmanou, “Nun ordana nang aryi kansi, ‘Obkwayeb,’ tenekunung nang arub lukunda aryi oryankwamaking. Ati, kan ab ni ab ara Er Imtamnyi molon ai asi wengbindoka ebdanamiryi, bublan darabdongoboka uram sisikwanim,” ebmanou. 11Uca, niryi ersi ato ebmase, “Nira ilil kumnyi kum kunun ati, ni damnyi kum inibdeibdankwaman. Tonda, nira Er Imtamnyi dama deirinanyi kum kunun ati, Er Imtamnyi ai kobdob asi wengbana kum kubkwaman. Ninyi aryi nisi obningnyi ababyi, niryi Er Imtamnyi ai kobdob asi kum wengbinkwaman,” ebmase. 12Niryi ebmase ara ni sirya diboka ati ebmase, “Anyi bira Er Imtamnyi biryi kum bokdonokmar. Eda, erci nisi ato eboka kunubdeibmanou ara ninyi si Tobia ab, Sanbalat ab aryi dengna kareboka yana kibdongobmarei deyok aryi eryanmanir,” tenen bikokmase. 13Ara, Tobia ab Sanbalat ab aryi anyi Semaya bisi minob bindoka ato eandei, “Kanci ato-ato eboka Nehemia er kanya ilil kibdeibkwandim,” eandei. “Tonda, kanci, ‘Er Imtamnyi ai wengbinkwinim,’ ebminyi uca, Nehemia biryi Er Imtamnyi ai talyi wengbici ba, Er Imtamnyi urasintam aryi malyi dinyi kubte. Ba, yuk Yahudi nang aryi kekebting ura, sunci, ‘Nehemia bira Er Imtamnyi ai talyi wengbinmar ati, nunci ersi tuba kum milinkwayeb,’ ebting. Ato tenen kanci Nehemia bisi, ‘Er Imtamnyi ai wengbinkwanim,’ ebkwandum. Kanci ato ebminyi ura, nunci kansi dengna weik dinyi karebkwankinim,” eandei. Ato tenen mar moun yibmai bok, niryi sun teneandei to kum kunubmase. 14Asi niryi ni Nai Imtamnyi bisi uram sisikoka ato eboka molobmase, “Nai Imtamnyi, Kanda a bitinyi nang Tobia ab, Sanbalat ab aryi nisi mar moun yisururung ara bikmarim! Ati, Kanci a nang asi tamuboka wenebdum! Tonda, ‘Nira Er Imtamnyi uram lak ermurusunun,’ erdarur ner si Noaja biryi Kan uram diboka kum ermururansir bok, erda nun Yahudi nang yuk nang ati, ‘Ilil kibdeibkwan,’ tenen malyi uram eransou ati, Kanda Imtamnyi biryi wenebdum. Tonda, yuk nang ababyi, ‘Nunda Er Imtamnyi uram lak ermurusunub,’ erdaramiryok, nunsi malyi uram akwe eransei ati Kanci wenebdum ati molobmakin,” ato eboka molobmase.

15Ura, Yerusalem atei lika doramoubwe ani, uki 52 baryi dobmoubwe ura, wala si Elul wala tanggal 25 ara, nunci Yerusalem atei lika sirya dakdongobmoubwe. 16Ba, Yerusalem atei lika sirya dobdongobmoubwe asi nun mar ordana nang nun Yahudi nang dina-dina kuramnyi nang aryi kekebmasei ura, sun kanya ara ilil weik kibmou. Ara, “Er Imtamnyi biryi sun Yahudi nang asi milirur deyok aryi sunci Yerusalem atei lika sirya dobdongobmang,” tenen bikmai ura, sun kanya ilil weik kubmou.

17Ba, a talak ara Yehuda atei sien nang ton meici nang ara Tobia er tam nang kuramiryi, sunci Tobia bisi kerek sengna ilinto deiriramnyi. Ba, Tobia erbabyi sunsi tamuboka kerek sengna ilinto sengdeiriramwe. 18Ara, Tobia bira Yahudi nang si Arah mi Sekhanya er nebnyi doamwe deyok aryi, Yahudi nang ilinto Tobia bisi miliramnyi. Tonda, Tobia er mi si Yohanan bira Yahudi nang si Berekhya mi Mesulam er nebnyi doamwe deyok aryi, Yehuda nang ninyi ilinto aryi Tobia ab uram eboka, “Nunci kansi iya milinkwankib,” eboka si darei ebmaici, Tobia bisi miliramnyi 19Ura, Tobia ab ninyi bun urubdanamnyi nang aryi ni dam yandoka, “Tobia bira telebnyi kururci, er ukurur to ara teleb dinyi akwe ukurur,” eboka kisal dangnamnyi. Ura, niryi eranse uram ara Tobia dam asi minirdongorbaramnyi. Ba, Tobia bira, “Nehemia bisi ilil kibdeibkwan,” teneboka nisi kerek sengna mitik kum sengdeiriramwe.

Currently Selected:

Nehemia Uram 6: MTG

Highlight

Copy

Compare