Nehemia Uram 5

Yahudi nang kankan aryi ton nang ara kwaning ataramwe ba, Nehemia biryi sunsi dibliliboka milibmou uram deyok

5:1-13

1Wa iramoubwe noutam talak aryi kekeramoubwe uca, Yahudi nang ton nang ab sun nerabwe ab aryi, sun kwit yabwe Yahudi nang yuk nang asi kwaning atan deyok aryi mambul kirikmai asi kekebmoubwe. 2Ara, ton nang aryi ato eboka uram dobmai, “Nun mabwe nermabwe ilinto bok, nun tulik du kwaning si gandum kum danasurur ati, sunci dibniliboka nunsi ton karebsindarur. Ba, nun yibokibiryi, kam kubdobkwayeb ati ton milibdobsindarur,” ato ebmai. 3Ura, ton deici nang aryi uram dobmai ara ato ebmai, “Kwaning atasurur deyok aryi, nunci, ‘Tulik du kwaning si gandum dekdobkwayeb,’ tenen nun wa in dam ab, nun co anggur waram ab, nun kuron ai ababyi yuk nang asi dekoka sirya karebmoubwe,” eboka uram dobmai. 4Ba, ton yuk deici nang ara ato eboka uram dobmai, “Persia mutuk weik sienyi biryi nun gandum wa in tukwe talen nang ab anggur wa in tukwe talen nang ab asi ato eboka molosurur, ‘Du moun dinyi dobdobmarum to, ni weik sienyi bisi pajak dengna karebnindarur.’ Ato eboka molosurur bok, co bok ara nun taruk kum kuransir deyok aryi, nunci yuk nang asi bindoka, ‘Co bok tiya karebsumunyi ura, nunci weik sienyi bisi pajak dengna karebkwayeb. Ba, aminda aryi nunci nun taruk dam kubmaci dinyi tamubkarebkwansib,’ eboka moloboka ikin bordongordanub aryok se,” ebmai. 5Ebmai cok, sunci, “Kwaning ataransir deyok aryi nun mabwe nermabwe ara, ‘Kwaning yibtibyi,’ tenen yuk nang asi wa ibmiliboka mambul wa iraming. Ara, Yahudi nang yuk nang aryi bico tenena kum uca nun mabwe nermabwe asi mambul wa takurdeirinung. Nun nirya ara neik yala nang Israel nang kunubci, nun mabwe sun mabwe neik kikib nang kunung bok, nun kwit yabwe yuk Yahudi nang aryi nun mabwe asi ikin wa takurdeirinung se. Ba, nun nermabwe ababyi mambul wa takurdeirinung. Nunsi ato kusunung bok, nunci, ‘Ukubkwayeb,’ tenen dinyi ababyi ukubman kum kusurur. Ara, yuk nang aryi nun gandum wa in tukwe ababyi co anggur wa in tukwe ababyi sirya dekdobyi deyok aryi nun lulukdobman kum aryi ur burlonub,” ato eboka uram dobmai.

6Ato eboka ngalukoka uram doramnyi dinyi asi kekebmase ura, ni Nehemia kanya yu kubmanou. 7Ba, ni kanya bita teneinmase ani, niryi sun Israel nang sien nang ab, sun wa irmilin nang ab asi uram elekmase. Ati, niryi sunsi ato ebmase, “Sun kwit yabwe Israel nang ara kwaning atarande bok, sunci sun ining urubde yindarur se. Sunci ato kuna mem,” eboka erekdobmase. Ura, niryi, “A deyok lilibkwayeb ati, sun nirya aryi bulubmunyi ba, uram sisikwayeb,” ebmase. 8Ura, sun Israel nang sirya bulubmai ura, ni Nehemia biryi sunsi ato ebmase, “Ni kwit yabwe, kekebdarur. Yuk mutuk nang aryi nun kwit yabwe yuk Yahudi nang asi arung-arung eboka mambul wa takurdeiriramnyi bok, nunci, ‘Nun kwit yabwe bico,’ tenen co bok ilinto kareboka lebdeibmoubwe. Ato kububuryok sunci, ‘Co bok ilinto dobdobtibyi,’ tenen sun kwit yabwe neik yala nang ati bico tenena kum uca arung-arung eboka mambul wa takurdeirin nang taruk dam karendarur aryok se. Ato dinyi ara ukubman kum dinyi kubmar se,” ebmase. Ato eboka niryi tatab-tatab ebmase ba, sunci uram doboka ebman kum kubmou aryi uram kilikoka bukmai. 9Ura, niryi tubto ato ebmase, “Sun ukundarur dinyi ara ukubman kum dinyi asi ukundarur se! Sunci ilil kanya boboka, ‘Er Imtamnyi uram kunubde binkwayeb,’ tenen sun kwit yabwe Israel nang ati bico tenen yina kareboka lebdeibmanto bok, ato kum kundarur se. Tonda, sunci, ‘Nunda nun mining yala nang asi dirnilina kum kunub deyok aryi nun ordana nang yuk yala nang aryi nunsi ina ngilikoka akwi tubsingnyei,’ tenena kum kundarur se. Sunci ato kuboka malyi kundarur dinyi ara taklobdarur,” ebmase. 10Ura, niryi, “Ni Nehemia ab, ni du weit yabwe ab, ni ab tonkwa kuramib nang ababyi nun kwit yabwe kwaning atarande nang asi co bok ab, gandum du ab karenub bok, nunci sunsi, ‘Tiya karebmoubwe dinyi unubdongoboka tamubkarebsindarur,’ eboka kum molonub. Eda, nunci sunti karenub dinyi ara, ‘Luba kibkwankin,’ enub. 11Ati, sunda arub tum aryi sun wa asi dekoka dobdau dinyi ara sun dam nang asi tamubkarebdarur! Ara, gandum wa in tukwe babyi, co anggur wa in tukwe babyi, co zaitun wa in tukwe babyi, sun kuron atei babyi sun dam nang asi tamubkarebdarur! Sirya tamubkarebmunyi ura, sunci, ‘Ni dinyi yiboka boblobnoumwe dinyi tamubkarebnurum,’ ena mem. Ara, co bok yibloansingnya babyi, gandum du yibloansingnya babyi, co anggur du yung me yibloansingnya babyi, co zaitun du yung me yibloansingnya babyi ara tamubkarebsindarur ena mem e. Eda, luba kibminikdarur!” ato ebmase. 12Ura, sun Israel nang kankan aryi bona bon nang aryi ato ebmai, “A dinyi nirya ara sirya dekoka dobdobmoubwe bok, nun kwit yabwe kwaning atarande nang asi tubto tamubkarebkwamab! Tamubkarebibyi ura, nunci sunsi ukutotoa ababyi ton kum molobkwamab. Eda, Nehemia kanci nunsi arukmasirim to kunubkwamab,” ebmai. Ato ebmai ura, niryi sunsi, “Sunci, ‘Nun ebmoubwe to diboka kunubkwayeb,’ eboka Er Imtamnyi urasintam aryi si dareiboka ebkwandarur,” ebmase. Ura, niryi ninyi dama deirin nang asi nabmase ba, nun dam yanmai ura, sun Israel nang sien nang ab, sun wa irmilin nang ab aryi, “Nun kwit yabwe Israel nang asi diboka dibnilibkwayeb,” eboka Er Imtamnyi urasintam aryi si darei ebmai. 13Ura, niryi ni ongon aling munmun kirdongon dinyi nirya yamurkarongmasiryi, sun Israel nang asi ato ebmase, “Er Imtamnyi biryi sun a si darei ebmarum uram kum kunubingnyi nang asi ato kuboka wenebkwande. Ara, sun ebdeiamingnyi tok kununa kum kuramingnyi nang ara Er Imtamnyi biryi yamubkaboka bona bon kum nang kibdeibkwande. Erci a nang asi nong dem nang kibdeibkwande,” ebmase, Sirya ebmase ura, sun Israel nang nirya aryi, “Diba,” ebmaici, Er Iya Erebdobnyi si weik ebmai. Ura, sun Israel nang aryi sun a uram ebdeiamnyi to diboka kunuramiryi, sun kwit yabwe kwaning ataramwe nang asi dirniliramnyi.

Nehemia bira “Bona talena karebniting,” tenen kanya kum boramwe uram deyok

5:14-19

14Ura, a kubde baranse talak ara nira Persia mutuk weik sienyi si Artahsasta er amwetam bunanyi kuransiryi, Yehuda mutuk kalingnanse. Ara, Persia mutuk weik sienyi kalingnamwe talak kwalina 20 baryi aryi erci nisi tikeianou ba, niryi deyok kouboka Yehuda mutuk kalikalianse. Ura, kwalina amolbaryi Yehuda mutuk kalingnanse ani, Persia mutuk weik sienyi kalingnamwe talak ara kwalina 32 baryi kimbinmou ura, sirya kalingbinmase. Ba, ni kalingnanse talak nirya ara niryi ni kalingnanse nang Yahudi nang asi, “Niti karebmaninto yina yin dinyi karebnindarur,” eboka kum moloranse. Ara, weik sienyi amwetam nang aryi, “Niti karebmaninto yina yin dinyi karebnindarur,” eboka moloraming bok, niryi ato eboka kum moloranse. Tonda, ni ab tonkwa kuramoubwe nang ababyi ato eboka kum moloramnyi. 15Ato kuranse bok, ni sienyi tingdeirinina kabul talak aryi minob kuramnyi sien nang ara sun kalingnamnyi nang asi ikin mitik kum bordeiriramnyi. A nang weik sienyi amwetam bun nang kuramiryi, sunci kalingnamnyi nang asi, “Yina yin dinyi karebnindarur,” eboka, “Anggur du yung karebdarur,” eboka, “Dengna weik keil si perak 40 baryi karebdarur,” ebmai ba, dororamnyi. Ato kuboka dororamiryok, sun amwetam bun nang wa irmilin nang aryi yibinkirikoka sun Yehuda mutuk nang asi “Karebsindarur,” eboka ining urubde yiramnyi. Sun minob Yehuda mutuk kuboka amwetam bun nang ato kuramnyi bok, ni Nehemia bira Er Imtamnyi bisi ilil kuranou deyok aryi ato kum kuranse. 16Nira, “Du moun dinyi ilinto dobdobtinyi,” tenena kum kuransiryi, gandum wa in tukwe ara kum dengnanse. Eda, niryi, “Yerusalem atei lika dakdongobde binkwayeb,” tenena kanya akwe boranse. Ba, ni wa irmilin nang ababyi neiktoto, “Bona bon dinyi dobdobtibyi,” tenen kanya kum boramnyi. Eda, Yerusalem atei lika dangdongona kanya akwe boramnyi. 17Ni yina yin dinyi kum moloranse. Eda, niryi yuk nang asi du dongoboka yina tuba-tuba kareranse. Ara. Yehuda nang sien nang ab, ur Yahudi nang ab nukoka ara ninyi 150 baryi asi niryi tuba-tuba du dongoboka yina kareranse. Tonda, yuk mutuk aryi kuboka diryanmai nang ababyi niryi du dongoboka yina kareranse. 18Uki-uki nirya ara niryi a nang nirya asi yina teleb dinyi kareranse. Ara, uki-uki nirya aryi ni wa irmilin nang aryi sapi tentok ton, domba nabaryi ton oboka yubde baramnyi. Ara, tub teleb domba akwe wiboka yubde baramnyi. Tonda, kirim yala yuk-yuk ababyi oboka yubde baramnyi ura, yiramoubwe. Ba, uki takubaryi tum berekni ura, nunci co anggur du yung langdiboka yiramoubwe. Niryi ato kuboka a nang nirya asi teleb yina kareranse bok, niryi sun Yehuda nang asi, “Yina yin dinyi karebsindarur,” eboka kum moloranse. Nira Persia mutuk weik sienyi amwetam bunanyi kuranse bok, niryi ato eboka kum moloranse. Ara, niryi bico tenen deyok aryi sun Yahudi nang asi ukutotoa moloboka ikin dinyi kum takurdeirina kum kuranse. 19Ati, “Nai Imtamnyi. Nira sun Yahudi nang asi dibnilibde yanganun dinyi asi Kanci asing eirinurum ati iya teneibniminci, Kanci nisi kisal daknurum tenen ati molobmakin,” eboka molobmase.

Currently Selected:

Nehemia Uram 5: MTG

Highlight

Copy

Compare