Nehemia Uram 4

Sun Yahudi nang Yerusalem atei lika dobde baramnyi asi sun mar ordana nang aryi, “Seksinibkwayeb,” tenebmai uram deyok

4:1-23

1Nun Yahudi nang ordananyi si Sanbalat biryi kekenmou uca, nun Yerusalem atei lika unubdongoboka dakde baramoubwe en uram kekebmou ura, er kanya yu weik kuboka nun Yahudi nang asi ina ngilikoka kerebmasou. 2Durukoka derenmasouci, Sanbalat biryi er kwit yabwe dam ab, er atei si Samaria nang yin doun nang dam ab asi nun Yahudi nang ati ato ebmou, “Bahai. A Yahudi nang ara mitang nang kunung aryi unatoa kubdobkwamingci, kunung da? A nang aryi sun kubkwaming atei lika ati tamuboka dakdobkwaming do? Ato tenen kum. A nang ara Er Imtamnyi aitam uboka dobingnyi ura, ninyi dama deirin dinyi tubto deibkwaming do? Ato tenen kum. Yerusalem atei ara daluboka uk dongobyi atei, daklobdob atei tuba kurur bok, sun Yahudi nang aryi akatei asi tamuboka dobkwaming do? Ato tenen kum. Uki tentok bitinyi kum wa iboka akatei asi tamuboka dobkwaming do? Ato tenen kum,” ato eboka erci nunti dereboka talakdonmasou. 3Ba, Sanbalat er dam tikmounyi Amon ateinyi si Tobia biryi ato ebmasou, “Yerusalem atei lika dobde banung bok, a lika ara mikib kum ati bai kam yandoka a keil lika dub weleboka bol lirderanci ura, a keil nirya dalubsakte,” eboka durukmasou.

4Ato enmasirei en uram kekebmase ura, ni Nehemia biryi Er Imtamnyi bisi ato eboka molobmase, “Nai Imtamnyi, Kanci nunsi ina ngilikoka kerenmasing dinyi kekebsurum. A nang aryi nunsi talakdoransing to, kanci weneboka neik dinyi sun damnyi tamubkarebdum. Ara, kanci arukminyi uca, yuk mutuk nang aryi yandoka nun kerenmasing nang asi muna kibdongoboka sun bona bon dinyi dalubdobingyi ura, sun atei nang nirya era mutuk bobindoka tanglorbinung. 5Nai Imtamnyi, a bitinyi nang aryi nun Kan mabwe Yerusalem atei lika dakde banub nang asi malyi kimsururungci, Kanda nun Nai urasintam ababyi malyi kimdurung. Kan kanya asi u yirminingdankiring deyok ati, Nai, Kanci wenebminci, a bitinyi nang sun malyi kun dinyi ara Kan urasin dam aryi kilibminyei, eda iya a kubkwandur,” eboka molobmase.

6Ato eboka molobmase ura, nunci busul weik kuboka atei lika dobde baramoubwe. A deyok aryi nunci, “Atei lika dobde welena ara lingdona bitinyok kum winiryok kum dobmanyi ani,” tenen atei lika nirya minola doboka aknabdongobmoubwe.

7Ato kubmoubwe asi ninyi si Sanbalat ab, er kwit Tobia ab, Arab yala nang ab, Amon yala nang ab, Asdod atei nang ab aryi kekebmai. Sunci kekenmai uca, nunci Yerusalem atei lika dobde baramoubwe dinyi asi, “Uki kum uca ola nun donungci, atei lika karin ababyi sirya iboka libdongobmang,” en uram kekebmai. Ura, sun kanya yu mitik kum kubmou. 8Ura, sun kanya aryi, “Yerusalem atei donmang dinyi dalubkaboka sun Yahudi nang asi bokwalwalabsinibkwayeb,” tenebmai ura, sun tonkwa uram sisikoka doboka deibmai. 9Nun ordana nang aryi ato kubmai bok, nunci Nun Nai Imtamnyi bisi uram sisikoka molobmoubwe. Tonda, nunci, “Nun mar iransei nang iyangasin deyok aryi lukunda kitingtam nirya kalingmurunkwayeb,” tenen atei kalingna nang arukmoubwe ura, sunci atei lika ab atei wengban bisik bublan ab tuba-tuba kalingnamnyi.

10Bok, sun Yehuda mutuk nang ara atei lika dakde baramnyi nang ara ato ebmai, “Nunda wa il weik aryi mikib kum danmasir. Atei lika daklobdoba ara mitik kum tuba kurur tok asi borkiringna nang ara mitang yukmasir. A deyok aryi atei lika dobman kum kubsir ati taklobkwayeb,” ebmai. 11Ba, nun mar ordana nang aryi uram sisikoka mar moun yibmaseici, ato ebdanmai, “Nunci lukdandoka Yerusalem atei wengbindoka ninyi obkaboka atei lika daksinibkwayeb. Ara, sun Yahudi nang aryi nunsi kum eiboka bikwamasing,” ebdanmai. 12Ato kuboka mar moun yinmasei ba, sun ordana nang atei dam kuramnyi Yahudi nang aryi kekebmai ura, nunda Yerusalem atei kuramoubwe nang dam asi minob eryanmasei. Liki tentok kekeboka kum eryanmasei. Eda, liki takubaryi kekeboka nun dam eryangaransei. Ara ato eryangaransei, “Nun mar ordana nang dina-dina kunung mutuk nang aryi Yerusalem atei nang asi iyankwansing ati kalingdaronkwandarur,” ebmasei. 13Ato ebmasei deyok aryi, ni Nehemia biryi, “Nun ordana nang aryi iyasingnyei,” tenen ninyi ton nang asi wibdeiboka, “Atei lika kalikdarur,” eboka arukmase. Ara, “Atei lika diboka dangdongon kum dam asi tikeibmunci, kalikdarur,” ebmase. Ato kuboka niryi sun ai ninyi yuk-yuk asi wa karebmase ba, sunci ninyi on ya douboka yin mar douboka te balang douboka Yerusalem atei lika kalingnamnyi. 14Ura, niryi, “Diboka kalingnung do?” tenen dirkiringmase uca, Yerusalem atei diboka kalingnamnyi ura, niryi tikoka nun Yahudi nang sien nang ab, sun wa irmilin nang ab, Yahudi nang yuk nang ab asi uram ton ebmase. “Nun mar ordana nang ati ilil kusina mem! Er Imtamnyi bira iya mikibnyi kurur. Erda ilil tenen dinyi ukururnyi kurur. Er Imtamnyi bira, ‘Ni milin nang lebdeibkwan,’ tenen nun mar donanyi kurur ati sun kanya katabum eboka bukdarur. Ati, sunci a dinyi sun kanya dam ara, ‘Nun ordana nang aryi wengyandoka nun du weit yabwe ab, nun mabwe nermabwe ab, nun nerabwe ab asi obsingnyei,’ tenen kalikmunci, nun ordana nang bisik sekdarur,” ebmase.

15Ura, nun mar ordana nang aryi kekeransei uca, sun mar moun yibmasei dinyi nunci sirya bikmoubwe ab, Er Imtamnyi biryi sun mar moun yibmasei dinyi ara bisik seksinibmou ba, kum iyanmasei. Ura, nunci atei tam tamuryandoka nun wa yuk-yuk iramoubwe to lika tubto dakoka ibmurubde binmoubwe. 16Ba, a tum aryi kuboka ni ab tonkwa kuramoubwe nang ara bokeibmase ba, ton deici nang ara atei lika dobkalibmai. Ba, ton deici nang ara ting kinikdobmai ura, yin mar douboka te balang douboka mar dei limna co lase douboka tikoka kalingnamnyi. Ba, sun Yehuda nang kalingna nang ara Yahudi nang lika dobkalibmai nang asi dongtam kuboka tikoka kalingdamnyi. 17Ba, sunci atei lika don keil ab co ab borkiringdamnyi ura, dinatam taruk aryi keil ab co ab douboka bobne ura, dinatam taruk ara ninyi mar ordan dinyi doubmanaryok wa ibde baramnyi. 18Ba, sun atei lika dobde baramnyi nang ara ninyi on ya sabya umbura kikibmanaryok wa iramnyi. Ba, buu ena dounanyi bira ni tingnanse dinatam kuboka asi tingyangaramwe. 19Ura, ni Nehemia biryi sun Israel nang sien nang ab, sun wa irmilin nang ab, ton Israel nang yuk nang ab asi ato ebmase, “Weik wa asi inkwayeb. Ani, temda ilinto wa asi inkwayeb. Ati, nun nirya neik dam-dam tikoka kum inkwayeb, eda ol yuk-yuk kuboka inkwayeb. 20Sunci da wa inmamunci, kekenmamunyi ba, buu ena lilim kekebmunyi ura, ‘Nun mar ordana nang a dikum sirya yanmang,’ tenen nun dam buluryandoka mar bobmilibkwansindarur. Ara, nun dam neik ai buluryandoka mar bobmilibkwandarur. Nun Nai Imtamnyi biryi, ‘Ni mabwe lebdeibkwan,’ tenen nunti mar bosinanyi kurur ati teneibdarur!” ebmase.

21Ato ebmase ura, nunci tanglona kum uca lika dakmurubde baramoubwe. Ara, belerukna kobdob aryi kuboka wa ibde banmantok kunuk dakman ababyi ibde baramoubwe. Ton deici nang ara wa ibde baramoubwe ba, dinatam deici nang aryi te balang douboka iya kalingmururansei. 22A talak aryok niryi sun Yahudi nang nirya asi ato eboka arukmase, “Sun Yahudi nang nirya ab, sun wa irmilin nang nirya ab ara yuk atei yuk atei kuna mem. Eda, Yerusalem atei akwe kubkwandarur. Ato kuboka milibsumunyi ura, kitingtam ara atei lika dakwayeb ba, lukunda ara kalikdankwayeb,” ebmase. 23A talak ara nunci lukunda wi man talak ababyi ongon aling ongobman tok maramoubwe. Tonda, me kwebkuna ababyi yin mar bobnaryok, kweramoubwe. Ati, ni Nehemia ab, ni du weit yabwe ab, nun atei kalingna nang ab aryi, “Nun ordana nang aryi lukdandoka iyanmasingiryi obsingnyei,” tenen ato kuramoubwe.

Currently Selected:

Nehemia Uram 4: MTG

Highlight

Copy

Compare