Nehemia Uram 3

Yerusalem atei lika daklobdob asi tubto dobmai nang si kerek sengna uram deyok

3:1-32

1Ura, Er Imtamnyi biti ninyi dama deirin sienyi si Elyasib ab, er weit yabwe ninyi dama deirin nang yuk nang ab aryi Yerusalem atei bisik wengbana bublan kalingna ai daklobdob asi tamuboka dobmai. Ara, atei wengbana bisik bublan kalingna ai si Bisam Domba Bowengbana Bublan eramnyi ai asi deyok kouboka dobkalibmaici, tamuboka dobmai. Sirya dobmai ura, sunci bublan tiringna weik dinyi kikniboka bublan botona dam deibmai. Ura, sunci, “Akatei wengbana bisik bublan kalingna ai ara Er Imtamnyi biti dobmab,” tenen kwalina kwalibmaici, bublan kukmai. Sirya bublan kukmai ura, sunci atei lika keil lika tamuboka dobde baramnyi. Ara, Bisam Domba Bowengbana Bublan eramnyi ai aryi kuboka lika dobdongobnin yibinmai ani, sunci erebdob ai bisik bublan kalingna ai si Kweitata Yan Yanina Seratus baryi Ai ereboka dobmai. A sirya ura, sunci erebdob ai atei wengbana bisik bublan kalingna ai si Hananeel Ereboka Ai tubto dobde baramnyi ani, sirya dobmai. 2Dobde baramnyi ba, sun doramyi dam dinatam asi ninyi ol yuk-yuk wa ibde baramnyi. A wa ibde baramnyi nang ara Yerikho atei nang aryi Yerusalem atei lika dobde baramnyi ani, dobdongobmai. Ba, sun Yerikho atei nang dam lingkwa tam ara Imri mi Zakur tam nang aryi keil lika dobde baramnyi ani, sirya dobdongobmai. 3Ba, sun lingkwa dam nang ara Senaa deibdoba nang aryi atei wengbana bisik bublan kalingna ai si Mekinaia Bowengbana Bublan Ai dobde baramnyi ani, dobmai. Ura, a kalingna ai sirya dobmai ura, sunci bublan abyokomna ikoka iknimanya demdongon co kiknibmai ura, bublan tiringna nong ab, bublan tiklim darardongon co ab deibdongobmai. 4Dobde baramnyi ba, sun lingkwa dam nang ara Hakos mi Uria biryi mi si Meremot tam nang aryi lika daklobdob asi unubdongoboka dakdongobnin yibinmai. Ba, a nang lingkwa dam nang ara Mesezabeel mi Berekhya biryi mi si Mesulam tam nang aryi keil dukoka atei lika dakdongobde baramnyi. Ba, a nang lingkwa dam ara Baana mi Zadok er tam nang aryi lika daklobdob asi unubdongobnin yibinmai. 5Ba, a nang dam lingkwa asi Tekoa atei nang aryi keil dukoka lika dakde baramnyi. Tekoa nang ara ur nang ara a wa iramnyi bok, sun sien nang ara tonkwa lika dangna kum kuramnyi eda, sun taruk mungkurungdoramnyi. 6Ba, atei wengbana bisik bublan kalingna ai si Minob Bublan Kalingna eramnyi ai ara Paseah mi Yoyada ab Besoja mi Mesulam ab aryi unubdongoboka dobmarei. A bitinyi nang ara bublan abyokomna ikoka iknimanya demdongon co kiknibmarei ura, bublan tiringna nong ab bublan tiklim darardongon co ab deibdongobmarei. 7Ba, a bitinyi nang lingkwa dam asi Gibeon ateinyi si Melaca ab, Meronot ateinyi si Yadon ab, aryi atei lika daklobdob asi unubdongoboka dakde yibinmarei. A nang atei ara Gibeon atei ab, Mizpa atei ab ara Efrat kouboka kitingbantam mutuk sienyi biryi kalingnamwe. 8Ba, a nang donmai lingkwa tam dam ara Harhaya mi si Uziel bira dengna weik keil si emas kikninanyi kuramuryi, Yerusalem atei lika unubdongobnin yibinmou. Ba, er lingkwa dam ara tong-tonga teleb dinyi kikninanyi si Hananya biryi dobdongobnin yibinmou. Hananya biryi ato kuboka Yerusalem atei lika unubdongobnin yibinmou ani, lingkwa tam kuamwe atei lika si ara Ila Weik Lika ababyi dakdongobmou. 9Ba, a nang donmai lingkwa tam asi sienyi si Hur mi si Refaya biryi doboka unubdongobnin yibindoka atei lika dakde baramwe. Anyi bira Yerusalem atei dinatam deici kuramnyi nang kalingnamunyi kuramwe. 10Ba, er lingkwa dam ara ninyi si Harumaf mi si Yedaya biryi er ai dam tam kalimna kuramwe atei lika asi unubdongobnin yibinmou. Ba, er lingkwa dam ara ninyi si Hasabneya mi si Hatus biryi atei lika asi unubdongoboka dakde yibinmou. 11Ba, ninyi si Harim mi si Malkia ab ninyi si Pahat-Moab mi si Hasub ab ara atei lika yuk tam lingkwa asi unubdongoboka dakde yibinmarei ani, Ereboka Ai si Roti Kiknina Uk Sengna Dam Ai unubdongoboka dobmarei. 12Ba, a bitinyi nang dam ara sienyi si Halohesh mi si Salum ab er nermabwe ab aryi atei lika unubdongoboka dakde yibinmai. Anyi Salum bira Yerusalem atei dinatam deici kuramnyi nang kalingnamunyi kuramwe. 13Ba, atei wengbana bisik bublan kalingna ai si Me Dala Dam Bublan Ai ara ninyi si Hanun ab er kwit yabwe atei si Zanoah nang ab aryi unubdongoboka dakdongobmai. Ura, a kalingna ai sirya dobmai ura, sunci bublan abyokomna ikoka iknimanya demdongon co kiknibmai ura, bublan tiringna nong ab bublan tiklim darardongon co ab deibdongobmai. A deici nang aryok atei lika cang ara 440 meter baryi asi kikliboka unubdongoboka dakde yibinmai. A dakmai lika ara atei wengbana bisik bublan kalingna ai si Kulonga Dam Bublan eramnyi ai linkwa dam dakdongobmai. 14Ba, ninyi si Rekhab mi si Malkia bira atei Bet-Kerem mutuk kalingnamunyi biryi atei wengbana bisik bublan kalingna ai si Kulonga Dam Bublan eramnyi ai asi unubdongoboka dobmou. Ura, Malkia er tam nang aryi a kalingna ai sirya dobmai ura, sunci bublan abyokomna ikoka iknimanya demdongon co kiknibmai ura, bublan tiringna nong ab bublan tiklim darardongon co ab deibdongobmai. 15Ba, ninyi si Kolhoze mi si Salum bira Mizpa mutuk kalingnamunyi biryi atei wengbana bisik bublan kalingna ai si Me Anamyangan Bisi Dam Bublan eramnyi ai dobmou. Ura, Salum er tam nang aryi a kalingna ai ab aruma ab sirya dobmai ura, sunci bublan abyokomna ikoka iknimanya demdongon co kiknibmai ura, bublan tiringna nong ab bublan tiklim darardongon co ab deibdongobmai. Tonda, Siloam me kwan dam tikamwe lika daklobdob asi sunci tamuboka dobdongobmai. A dobdongobmai lika ara kerketa koun waram minob Israel nang kalingnamnyi weik sien nang taleramnyi waram dam dobdongobmai. Tonda, a dobdongobmai lika lingkwa dam ara cang weik kweitata dam dongorbinmai. A kweitata ara minob weik sienyi Daud biryi doamwe atei aryi yuryandoka sangkweteramnyi kweitata dam asi doboka dangdongorbinmai.

16Ba, Salum lika dakde baramwe ba, er lingkwa dam ara ninyi si Azbuk mi si Nehemia biryi atei lika tamuboka dobde baramwe. Anyi Nehemia bira atei si Bet-Zur dinatam deici nang kalingdamunyi kuramwe. Nehemia er tam nang aryi atei lika dobdongobmai ara minob weik sienyi Daud tukwe dongoamnyi dam dakdongobmai. Tonda, dobde baramnyi ani, ninyi aryi longna me kwan dam dangdongorbinmai. Tonda, yin douna dabub weik nang kuramnyi atei dam asi dangdongorbinmai. 17Ba, Nehemia lika dakde baramwe ba, er lingkwa dam ara Lewi yala nang aryi atei lika daklobdob asi unubdongobnin yibinmai. A nang sun si ara Bani mi si Rehum ab er dam dakdongobnin yibinmounyi si ara Hasabya. Anyi Hasabya bira atei si Kehila dinatam deici nang kalingnamunyi biryi atei lika doboka dakdongobmou. 18Ba, Hasabya lika dakde baramwe ba, er lingkwa dam ara er kwit yabwe Lewi yala nang yuk nang aryi atei lika dakde baramnyi. Ara, ninyi si Henadad mi si Binui ab er tam nang ab aryi unubdongoboka lika dakdongobmai. Anyi Binui bira Kehila mutuk dinatam deici taleamunyi kuramwe. 19Ba, anyi dam lingkwa asi ninyi si Yesua mi si Ezer Mizpa atei kuramnyi nang kalingnamunyi biryi Binui doboka sungbinmou atam kuboka lika dakdongobnin yibinmou. Ara, yin mar deirin ai welen ai dam aryi lika dakdongobde binmou ani, lumuntam dordongorbinmou. 20Ba, anyi lika dakde baramwe ba, er lingkwa dam ara ninyi si Zabai mi si Barukh biryi unubdongoboka lika dakdongobmou. Ara, lumuntam aryi kuboka ani ninyi dama deirin sienyi si Elyasib atei bisik wengbana dam lika dangdongorbinmou. 21Ba, anyi lika dakde baramwe ba, er lingkwa dam ara ninyi si Hakos mi si Uria biryi mi si Meremot unubdongoboka lika dakmou. Ara, ninyi dama deirin sienyi Elyasib er atei bisik bublan dam aryi kuboka lika dakde baramwe ani, Elyasib atei wiliba dam dakde yibinmou. 22Ba, anyi lika dakde baramwe ba, er lingkwa dam ara ninyi dama deirin nang Yerusalem atei dam kuramnyi nang aryi Yerusalem atei lika unubdongoboka dakde yibinmai. 23Ba, sun lingkwa dam ara ninyi si Benyamin ab Hasub ab aryi unubdongoboka lika dakmarei. Ara, atei lika ara sun ai dam lika daklobdob kuramwe asi sunci dakdongobmarei. Ba, sun lingkwa dam ara ninyi si Ananya mi si Maaseya biryi mi si Azarya biryi Yerusalem atei lika dakdongobmou. Ara, atei lika ara er ai dam kuramwe lika daklobdob asi erci dakdongobnin yibinmou. 24Ba, er lingkwa dam ara ninyi si Henadad mi si Binui bira unubdongoboka lika dakdongobmou. Ara, ninyi si Azarya er ai dam aryi kuboka lika dakde baramwe ani, lumuntam wiliba dam doboka dangdongorbinmou. 25Ba, ninyi si Uzai mi si Palal bira unubdongoboka Yerusalem atei lika dakde baramwe. Ara, wiliba dam aryi kuboka dakde baramwe ani, ereboka don ai dam aryi lika dakdongobmou. A ereboka don ai ara minob weik sienyi kuramwe ai dam kuramwe. Tonda, yin doun nang weik sienyi kalingnamnyi nang minob kuramnyi ai dam kuramwe. Ba, er lingkwa dam ara ninyi si Paros mi si Pedaya biryi atei lika dakde baramwe. 26Ba, er lingkwa dam ara Er Imtamnyi ai keta dam mambul wa iramnyi nang aryi wa iboka Yerusalem atei lika dakde baramnyi. A nang kuramnyi wilimna atei si ara Ofel atei. A nang ara atei lika dakde baramnyi ani, yaletam kuboka atei wengban bisik bublan kalingna ai si Me Kweten dam Bublan eramnyi ai dam dakdongobmai. Tonda, erebdeiboka don ai dam aryi lika dakdongobnin baramnyi. 27Ba, a nang lingkwa dam ara atei si Tekoa nang aryi Yerusalem atei lika dakdongobnin yibinmai. Ara, erebdeiboka dukoka don ai dam aryi kuboka lika dakmai ura, wilina ai Ofel ai wilimna lika ab dakdongobnin yibinmai. 28Ba, Er Imtamnyi biti ninyi dama deirin nang aryi sun ai dam yuk-yuk aryi Yerusalem atei lika daklobdob asi unubdongobnin yibinmai. Ara, atei wengbana bisik bublan kalingna ai si Kuda Bowengbana ai dam aryi lika dakdongobmai. 29Ba, a nang lingkwa dam ara ninyi si Imer mi si Zadok biryi er ai dam tam aryi kuramwe atei lika daklobdob asi unubdongobnin yibinmou. Ba, er lingkwa dam ara ninyi si Sekhanya mi si Semaya biryi atei lika daklobdob asi unubdongoboka dakde yibinmou. Anyi Semaya bira atei wengbana bisik bublan kalingna ai si Yaletam Bublan Kalingna ai kalingnamunyi kuramwe. 30Ba, anyi lingkwa dam ara ninyi si Selemya mi si Hananya biryi atei lika dakdongobmou. Tonda, ninyi si Zalaf mi nabinoutam mi nabnyi si Hanun bibabyi ersi miliboka atei lika dakdongobmou. Ba, a bitinyi nang lingkwa dam ara ninyi si Berekhya mi si Mesulam bira er ai wiliba dam aryi kuboka atei lika unubdongoboka dakde yibinmou. 31Ba, anyi lingkwa dam ara dengna weik si emas kikninanyi si Malkia biryi atei lika dakdongobnin yibinmou. Dakdongobnin yibinmou ani, Er Imtamnyi ai dam keta mambul wa irmilin nang kuramnyi ai dam aryi lika dakmou. Tonda, sun bona bon dinyi dengdana nang bukoka dengnamnyi ai dam aryi erci atei lika daklobdob asi dakdongobmou. A lika dakdongobmou ara atei wengban bisik bublan kalingna ai si Yin Doun nang Kerek Sengdongon Ai dam aryi lika dakdongobmou. Ura, tonda erci lika dakde yibinmou ara eikai alib ai dam aryi dakdongobmou. 32Ba, anyi lingkwa dam ara dengna weik keil si emas kiknin nang deici ab, dengdana ai bukoka dengna nang deici ab aryi Yerusalem atei lika daklobdob asi unubdongobnin yibinmai. A nang ara eikai alib ai lumuntam aryi kuboka lika dakde yibinmai ani, atei wengban bisik bublan kalingna ai si Domba Bowengbana Bublan eramnyi ai dam asi lika doboka dangdongorbinmai.

Currently Selected:

Nehemia Uram 3: MTG

Highlight

Copy

Compare