Nehemia Uram 2

Persia mutuk weik sienyi si Artahsasta biryi Nehemia bisi Yerusalem atei bokdonokmou uram deyok

2:1-10

1Kuramoubwe ani, wala dumbaryi kubmoubwe ura, Persia mutuk weik sienyi si Artahsasta er kalingnamwe talak ara kwalina 20 baryi kubmou ba, wala si ara Nisan wala dobmou ura, ni Nehemia biryi wa iranse to inmase. Ni wa iranse ara weik sienyi urasin dam anggur du yung me kikniboka bobananyi kuranse. Ani, wala Nisan wala asi uki tentok tum aryi weik sienyi anggur me kikniboka bobse ura, weik sienyi dam bobinmase. Ura, ni kanyatam ara Yerusalem dakamnyi deyok ati, niryi boukwe kanya bobmasiryok me kikniboka bobinmase. Ba, weik sienyi ni urasin diranou uca, ni urasin ara minob kum eiriranou to kubmanouci, engen kanya urasin bobmase asi asing eibmou. 2Ura, weik sienyi biryi ato eboka asibmanou, “Kanda u kum yinmakir bok, kan urasin ara unatoa ati engen urasin bobmarim do? Kanda engen kanya bobmarim tenebmakin,” eboka asibmanou. Ba, ni ilil mitik kum kubmanou. 3Bok, niryi weik sienyi bisi ato ebmase, “Nai weik sienyi, kan kuntam iya kam kubmurubde bana teleb. Nai weik sienyi, nunda Yahudi nang atei Yerusalem ara ni abwe yabwe diamnyi ba, tukwe dongoamnyi atei asi nun mar ordana nang minob talak aryi dalubsinibyi. Ura, sunci nun atei lika ab, atei wengban bisik lika bublan ab akoka uk dabyi deyok akiryi ni engen kanya bonun,” ebmase. 4Ba, weik sienyi biryi nisi ato eboka asibdenmanou, “Ura, kanci nisi una kubnute tenebmarim do?” eboka asibmanou. Ura, niryi, “Una ebkwan do?” tenen ni kanyatam aryi im ab tukwe ab kikniamunyi Er Imtamnyi bisi molobmase. Ara, “Nai Imtamnyi, Kanci nisi, ‘Weik sienyi bisi ato-ato eboka molobdum,’ eboka eterebnurum,” eboka molobmase. 5Sirya molobse ura, niryi Persia mutuk weik sienyi bisi ato ebmase, “Nai weik sienyi, kanci ni kan wa irmilikinanyi biti teleb teneboka, ‘Er molobmar to kunubdeibkwan,’ tenebminyi ura, kanci nisi Yehuda mutuk bokdonoknurum. Ba, niryi tamubindoka ni abwe yabwe doramnyi atei Yerusalem atei yumkuna tamuboka dobkwan ati, ‘Ur birum,’ eboka mundu lobdeibnutum do?” eboka molobmase. 6Uca, weik sienyi biryi tamuboka nisi tubto asibmanou. Ara, weik sienyi er ner er dam bukwe bok, asibmanou, “Bisik noutam binkwandim aryi kuboka otam bindoka kubkwandim uki unabaryi do? Ba, tubto tamuryankwandim ara una talak tamuryankwandim do?” eboka asibdenmanou. Ba, niryi ni tamuryangan uki er dam asi, “A talak yankwan,” eboka talak likeibmase ba, erci nisi kanya lobdob asa aryi, “Ur birum,” eboka bokeibmanou. 7Ura, niryi weik sienyi bisi ato eboka molobmase, “Nai weik sienyi, kanci teleb tenebminyi ura, me Efrat kouboka kitingbantam mutuk sien nang ara kan amwetam bun nang kunung ati kerek sengna lak amubnin yibana kerek sengna ton sekdeibnurum. Ara, ‘Ni weik sienyi biryi bokdonokman ati, ni arungnanyi Nehemia biryi Yerusalem atei binkwande ara, sunci ersi, “Nun mutuk ur yibarandum,” ebdarur,’ eboka lordeirin kerek sengna sekeibnurum. Ara, ni bisik ai binkwana nirya ara teleb kuboka baranyi ani, Yehuda mutuk dam wengbinkwan ati kerek ton sekoka karebnurum ati molobkin. 8Ba, tonda weik sienyi, co tukwe deyoknyi si Asaf bisi bindoka karebkwan kerek sengna ton sekdeibnurum. Ba, anyi biryi nisi Er Imtamnyi ai bisik bublan dam maibkwan co ab, tikdeibkwan co ab, lika ingwelen co ab, ni bindoka kubkwan ai dobkwan co ab karebkwaniranyi bisi bindoka karebkwan kerek sengna ton sekdeibnurum!” eboka molobmase. Ato eboka molobmase ura, Er Imtamnyi taruk mikib aryi nisi milibmanou deyok aryi Persia mutuk weik sienyi biryi ni ebmase uram kekeboka kunubdeibmanou.

9Sirya molobmase ura, niryi anaboka me Efrat kouboka kitingbantam mutuk sien nang dam bindoka sunsi sun nai Persia mutuk weik sienyi biryi sekdeibmou kerek sengna amubdeibnin yibinmase. Ba, a kerek sengna bobanmase ura, weik sienyi tam nang yin doun sien nang ab, bisam kuda deici bukdongoboka yin doun nang ab asi arukamwe ba, miliboka kalikmanei ba, binmase. 10Ura, Yerusalem atei dam-dam ara Horon ateinyi si Sanbalat ab, er wa irmilinanyi Amon mutuknyi si Tobia ab kurandei. A nang ara yuk yala nang kurandeici, sun Yahudi nang ordana nang kurandei. Ati, sunci, “Persia mutuk weik sienyi biryi Nehemia bokdonokmar ba, yanmarci, sun Israel nang asi teleb kubdeiboka milibkwande,” en uram kekebmarei ura, sun kanya teleb kum kubmou.

Nehemia biryi, “Yerusalem atei lika tubto tamuboka dobkwan,” tenebmouci, atei lika daksiniamnyi lika asi dibkirikde yibinmou uram deyok

2:11-20

11-12Ura, ni ab ni miliryanmanei nang ab era mutuk baramoubwe ani, Yerusalem atei wengbinmoubwe. Ura, uki winiryi a bindoka kunmoubwe ani, dumwe tum berekwamou tum lukunda ara mabmoubwe ani, kum berekabwe bok, bukokmoubwe. Ura, “Yuk nang aryi asing eibsingnyei,” tenen, “Nunda iniboka Yerusalem atei lika dirkiringbinkwayeb,” tenen anabdobmoubwe. Ati, niryi, “Nun ordana nang aryi minola biksingnyei,” tenen, Er Imtamnyi biryi ni kanya dam asi aruknou ba, niryi yuk nang dam babyi, nun kwit yabwe Yahudi nang dam babyi asi, “Yerusalem atei tamuboka dobkwan ati yanman,” eboka lak kum eanse. Ati, lukunda tuba kubmou bok, nunci ninyi bukingi ba, boyibarande bisam kuda ababyi bona kum uca anabmoubwe ura, Yerusalem atei dirkiringmoubwe. Bok, ni kuda deici bukmase kuda akwe boboka baronmoubwe 13Niryi ato kubokabsiryi, a tum lukunda aryok atei tam aryi anabdobmase. Ura, atei lika bublan si Me Dala eramnyi bublan dam kuboka, me si Kwatima Naga eramnyi anamyangan dam ban bisik tam binmase. Ani, lika bisik bublan si Kulongna Donongban dam eramnyi bublan dam bisik kuboka binmase. Ato kuboka baranse uca, Yerusalem atei lika linglona dirkiringbinmase ba, bisik ara me si Kwatima Naga eramnyi anamyangan dam ban bisik tam baranse. Tonda, atei lika bisik bublan si Kulongna Donongban dam eramnyi bublan dam bisik kuboka binmase. Ato kuboka binmase ura, Yerusalem atei lika doboka aknabdongoamnyi asi daksiniamnyi dinyi ab, atei wengban bisik lika bublan akoka uk daamnyi ba, yiamwe dinyi ab ati dirkiringbinmase. 14Ura, dibde yibinmase ani, atei lika bublan si Me U Anamyangan dam eramnyi bublan dam bisik tingbinmase. Ani, me kwan si Weik Sienyi Me Kengna dam eramnyi me kwan ban bisik tingbinmase. Ura, a dikum aryi binmanto bisik ara ai dakdoba aryi liamwe ba, ni weleboka bukmase ba, boyibarkiringmanou bisam ara a bisik binman kum kubmou. 15Ukuboka dibdenin yibanmase ani, me dala dam tam kuboka atei lika daklobdob dinyi sirya dirsung binmase. Ukuboka sirya dibkirikdesi ura, tubto tamuboka atei lika bisik bublan si Me Dala eramnyi bublan bisik kuboka Yerusalem atei wengbinmase. 16Ba, Yerusalem atei kalingni nang ara ni yibarkiringbase ai ara kum bikmanei. Ani, ni kunmase dinyi ababyi, “Nehemia bira ato kunmar,” tenen bingna kum kubmanei. A talak ara niryi sun Yahudi nang asi, “Ato-ato kubkwan ati yase,” eboka sun dam lak kum eanse. Tonda, Er Imtamnyi biti ninyi dama deirin nang dam babyi, sun Israel nang sien nang dam babyi, sun akatei kalingna nang dam babyi, ton yuk wa irmilin nang dam babyi, ton lak kum eanse deyok aryi kum bingnanei.

17Bok, niryi Yerusalem atei lika daklobdob dinyi asi dirkiringmase ura, niryi sun Israel nang asi ato eboka lak ebmase, “Ni kwit yabwe, Yerusalem atei ara minob ura daksiniamnyi ba, atei lika bublan yuk-yuk ara uk yiamwe ani, ukuryok ababyi daklobdob atei kurur. A dinyi ara mambul weik don dinyi doboka kubde kuronub. Ati, ni kwit yabwe, nunci, ‘Ninyi yuk nang aryi nunsi tuba, “Ahai,” eboka derebsingnyei,’ tenen Yerusalem atei lika yumkuna tamuboka dobkwayeb,” ebmase. 18Niryi ato ebmasiryok, tubto ton ato ebmase, “Er Imtamnyi taruk mikib aryi nisi milibmanou to, Persia mutuk weik sienyi biryi nisi, ‘Yerusalem atei lika tamuboka dobdarur,’ ebkarebnou,” ato eboka niryi sun dam nukarebmase. Uca, sun Israel nang aryi nisi ato ebmanei, “Yo nai, ura teleb, nunci atei lika dobkalibkwayeb,” ebmai. Ato ebmai ura, sunci mikib yabdobmaici, a wa teleb wa ati deyok kouboka ibkalibmai. 19Atei lika dobkalibmoubwe bok, nun ordana nang aryi, “Yerusalem atei lika ukuboka dobkalibmang,” en uram asi kekebmai. Ara, Horon ateinyi si Sanbalat ab, er kwit wa irmilinanyi Amon mutuknyi si Tobia ab, tonda sun kwit Arab mutuknyi Gesyem ab aryi kekebmasei. A nang aryi a uram kekebmai ura, sunci nunsi durukoka ina ngilikoka kerebmasei. Kereronmasei ura, ato enmai, “Sunda una kubkwamarum ati ukuronmarum do? Nun nai Persia mutuk weik sienyi bisi mar bobkwandum ati atei tubto doronmarum do?” ato eboka derebmasei. 20Derebmasei bok, ni Nehemia biryi sunsi ato ebmase, “Nunda Er Imtamnyi wa irmilin nang aryi Yerusalem atei lika tamuboka dobkalibmab ani, nun Nai im ton tukwe ton kiknibmounyi biryi mikib kuboka milibsici ura, akatei lika nirya dobdongobkwayeb. Minob akiryi kuboka ukuryok ababyi Yerusalem atei ara sun dinyi ton kum kurur. Ati, nunda Israel nang yuk aryi nun atei dobkwayeb ara sun ab milibdandoka kum dobkwayeb,” ebkarebmase.

Currently Selected:

Nehemia Uram 2: MTG

Highlight

Copy

Compare