Nehemia Uram 1

Nehemia biryi Israel nang tamubindamnyi nang ati Er Imtamnyi bisi molobliknibmou uram deyok

1:1-11

1A kerek sekwan uram ara ni Nehemia kubde baranse to liliboka kerek sekeibkwan. Ninyi si Artahsasta weik sienyi kiamwe ba, kuramoubwe ani, kwalina 20 baryi kimbinmou. Ura, wala ara Kislew wala dobmou talak aryi nira Nehemia bira Persia mutuk weik sienyi kun atei si Susan kuranse. 2Kuranse asi, ni kwit si Hanani ab, yuk Yehuda nang ninyi mikbaryi ab ara Yehuda mutuk tamurbinamnyi ani, tubto tamuboka Persia mutuk yanmaici, ni dam yanmai. Ura, niryi sunsi sun Babel mutuk aryi anaboka Yerusalem atei tamurbinamnyi nang deyok ati asibdenmase. Ara, “Nun kwit yabwe Yehuda mutuk tamurbei nang ara teleb akwe kunung do?” tenen asibdenmase. Tonda, “Yerusalem atei sirya deyok kouboka tamuboka dobkalibyi do?” tenen asibdenmase. 3Uca, sunci nisi ato eboka lak ebmanei, “Sun Babel mutuk aryi anaboka Yerusalem atei tamurbinamnyi nang ara mambul dinyi mitik kum donung bok, sun mar ordana nang aryi sunsi ina ngilingnung. Ura, Yerusalem atei ara daksiniboka atei lika ab atei wengban bisik bublan ara akoka uk dabsekamnyi asi tamuboka kum dobmai,” ato eboka nukmai asi kekebmase.

4Ato uram kekebmase ura, niryi tukwe ai buryuryibindoka engeboka boukwe kanya boburanse ara uki bitinyi kum winiryi kum kubmase. A talak ara niryi, “Er Imtamnyi biryi nunda Yahudi nang asi boukwe kiboka kalikdeibsute,” tenen yina si teboka buransiryi, Er Imtamnyi, im ab tukwe ab kikniamunyi bisi uram sisikoka moloranse. 5Ara niryi ato eboka molobmase, “Nai Imtamnyi, Kanda im ab tukwe ab kiknibmoumnyi kurum. Kanda Iya weik Erebdobnyi kurumci, ilil tenekinanyi kurum. Kanda Kan ebdeiaminyi tok talebnuruboka diboka kunurdeirirumnyi kurum. Ara, Kansi boukwe kiboka Kan uram kekeboka kunuramingnyi nang asi Kanci boukwe kimdumnyi kurum. 6Ati, Nai Imtamnyi, Kan amol kekebmanirimci, Kan asing elekeiboka ni Kan wa irmilikinanyi biryi ukuryok kitingtam lukunda nirya moloronman molona asi kekebnurum. Nunda Israel nang ara Kan wa irmilinub nang kunub ati, niryi ni kwit yabwe Israel nang ati molorlikninman. Nunda Kan wa irmilikin nang kunub cok, nunci Kan urasintam aryi malyi kunub dinyi ara Kan dam asi, ‘Nunci diba ati malyi dinyi kunub,’ lak ebman. Ara, ni ab, ni nermabwe ab, ni mabwe silib ab, nunda Israel nang nirya ab ara malyi dinyi kuramoubwe ani, ukuryok ababyi malyi dinyi tuba kurtabangdongordanub ati Kan dam asi lak ebman. 7Nunda Kan urasin dam iya malyi kunubci, Kanci Kan wa irmilikinanyi Musa deici aryi, ‘Ato kubdarur-ato kuna mem,’ en uram ab, yan memen uram ab, tonda Kan erdeirin uram yuk-yuk ab ara nunci dakbisiboka diba ati malyi kunub. 8Nai Imtamnyi, Kanci Kan wa irmilikinanyi Musa deici aryi ebdeiamoumwe uram asi kanya tubto teneibderum. Ara ato ebdeiamounwe, ‘Sunci Nira Imtamnyi bisi takloboka yuk dinyi dobdobmunyi ura, Niryi daluboka bokwalwalabsinibkwansin ba, yuk nang mutuk atei binsekwandum. 9Bok, sunci tamuboka Ni tam urasin deiboka Ni erdeirin uram akwe miliboka kunuramunyi ura, yuk atei nang sun mar ordana nang aryi boboka im dangna nang mutuk tukwe dangna mutuk tanglorbinamingnyi ababyi Niryi tubto boboka bulubdeibkwan. Sirya boboka bulubdeibnyi ura, boboka, “Nisi si erebdeibkwaning,” tenen wibdeianse atei dam kamdeirirbinkwan,’ ebdeiamoumwe. 10Ati, Nai Imtamnyi, nun a kunub nang ara Kan wa irmilikin nang ab, Kan uram kekekin nang ab ara Kanci Kan mikib ab, Kan taruk ab aryi lebdeibsoumwe nang kunub. 11Ati, Nai Imtamnyi, Kanci Ni Kan wa irmilikinanyi molona diboka kekebnurum. Tonda, Kan wa irmilikin nang yuk nang Kan si asi ilil tenekin nang molona ab kekebdum. Ba, arub tum aryi nira ni nai Persia mutuk weik sienyi dam bindoka, ‘Nun Yahudi nang asi kalikdeibsurum,’ eboka molobkwan ati, Kanda Imtamnyi biryi kanya teleb karebminyi ba, weik sienyi biryi ni molona kunubdeibkwanir ati molobmakin,” ato eboka molobmase. Ba, nira a talak ara Persia mutuk weik sienyi urasin dam anggur du yung me kikniboka bobananyi kuranse.

Currently Selected:

Nehemia Uram 1: MTG

Highlight

Copy

Compare