Nehemia Uram 12

Er Imtamnyi biti ninyi dama deirin nang si kerek sengna ab, Lewi yala nang yuk nang si kerek sengna ab uram deyok

12:1-26

1A kerek sekwamab nang si yuk-yuk ara Er Imtamnyi biti ninyi dama deirin nang si sekwamab. Tonda, Lewi yala nang yuk nang sun si yuk-yuk kerek sekwamab. A nang nirya ara Yehuda mutuk tamuryanmai. Ara, Sealtiel mi Zerubabel ab, Yesua ab asi miliboka tamuryanmai nang sun si kerek sekwamab. A nang si yuk-yuk ara ato: Seraya ab, Yeremia ab, Ezra ab tamuryanmai. 2Amarya ab, Malukh ab, Hatus ab tamuryanmai. 3Sekhanya ab, Rehum ab, Meremot ab tamuryanmai. 4Ido ab, Ginetoi ab, Abia ab tamuryanmai. 5Miyamin ab, Maaja ab, Bilga ab tamuryanmai. 6Semaya ab, Yoyarib ab, Yedaya ab tamuryanmai. 7Salu ab, Amok ab, Hilkia ab, ton yuk Yedaya ab tamuryanmai. A nang ara ninyi dama deirin nang deyoknyi si Yesua kuramwe talak aryi, tabangdongon sien nang kuramnyi. Sunci ninyi dama deirin nang ab, sun wa irmilin nang ab asi kalingnamnyi.

8Ba, sun Lewi yala nang kankan aryi tamuryanmai nang sun si yuk-yuk ara ato: Yesua ab, Binui ab, Kadmiel ab tamuryanmai. Tonda, Serebya ab, Yehuda ab, Matanya ab tamuryanmai. Matanya bira Er Imtamnyi bisi kiron mot wimna deyoknyi kuramwe. Tonda, er du weit yabwe ababyi er ab tonkwa neik wa iramnyi. 9Ba, Bakbukya ab, Uni ab tamuryanmarei. A bitinyi nang ababyi mot wimna deyok nang kurandei. Ura, Er Imtamnyi bisi mot sebkun ura, Matanya er ol ara yuk ai tikoka mot sebde binmai ba, Bakbukya ab Uni ab sun ol ara yuk ai tikoka mot sebde binmai. Ato kuboka sun ol yuk-yuk ara urasintam deibdandoka unubdandoka mot sebde baramnyi. 10Ura, Er Imtamnyi bisi dama deirina deyoknyi si Yesua er deibdoba nang si kerek sekwamab. Yesua biryi Yoyakim deiamwe. Yoyakim biryi Elyasib deiamwe. Elyasib biryi Yoyada deiamwe. 11Ba, Yoyada biryi Yonatan deiamwe. Ba, Yonatan biryi Yadua deiamwe.

12Ba, Yoyakim bira ninyi dama deirina deyoknyi kuramwe talak aryi sun ninyi dama deirin nang kankan aryi sun ai ninyi yuk-yuk si sekwamab ara ato. Seraya ai ninyi deibdoba ara Meraya dunyi kibmou. Ba, Yeremia ai ninyi deibdoba ara Hananya dunyi kibmou. 13Ba, Ezra ai ninyi deibdoba ara Mesulam dunyi kibmou. Ba, Amarya ai ninyi deibdoba ara Yohanan dunyi kibmou. 14Ba, Melikhu ai ninyi deibdoba ara Yonatan dunyi kibmou. Ba, Sebanya ai ninyi deibdoba ara Yusuf dunyi kibmou. 15Ba, Harim ai ninyi deibdoba ara Adna dunyi kibmou. Ba, Merayot ai ninyi deibdoba ara Helkai dunyi kibmou. 16Ba, Ido ai ninyi deibdoba ara Zakharia dunyi kibmou. Ba, Gineton ai ninyi deibdoba ara Mesulam dunyi kibmou. 17Ba, Abia ai ninyi deibdoba ara Zikhri dunyi kibmou. Ba, Minyamin ai ninyi ab Moaja ai ninyi ab deibdoba ara Piltai dunyi kibmou. 18Ba, Bilga ai ninyi deibdoba ara Samua dunyi kibmou. Ba, Semaya ai ninyi deibdoba ara Yonatan dunyi kibmou. 19Ba, Yoyarib ai ninyi deibdoba ara Matnai dunyi kibmou. Ba, Yedaya ai ninyi deibdoba ara Uzi dunyi kibmou. 20Ba, Salai ai ninyi deibdoba ara Kalai dunyi kibmou. Ba, Amok ai ninyi kalingnamunyi bira Heber kuramwe. 21Ba, Hilkia ai ninyi deibdoba ara Hasabya dunyi kibmou. Ba, ton yuk Yedaya ai ninyi deibdoba ara Netaneel dunyi kibmou.

22Ura, sun Lewi yala nang ab imam nang ab sun kankan aryi dunyi kibmai nang sun si ara minob kerek sekaliamnyi. Ara, Er Imtamnyi biti dama deirina deyok nang Elyasib ab, Yoyada ab, Yohanan ab, Yadua ab unubdandoka kuramnyi talak aryi sengdamnyi ani, Persia mutuk weik sienyi Darius biryi kalingnamwe talak aryi sirya sengsungbinmai. 23Ba, Lewi yala nang kankan aryi sun ai ninyi du nang kibmai nang sun si yuk-yuk ara minob kubde yangaramoubwe nungdeirin kerek sengna umbura aryi kerek sengdongoramnyi. Ara, minob kubde yangaramnyi talak aryi kuboka ani, Yohanan mi Elyasib ninyi dama deirina deyoknyi kuramwe talak aryi sirya sengsungyanmai. 24Sun Lewi yala nang kankan aryi dunyi kibmai nang ara Hasabya ab, Serebya ab, Kadmiel mi Yesua ab aryi du nang kibmai. Tonda, sun du weit yabwe ababyi du nang kimdamnyi. A nang ara Er Imtamnyi si weik eboka mot semna nang bomenengna nang kuramnyi. Ati, sunci Er Imtamnyi bisi si weik en mot semkwamnyi ba, ton deici nang ara atam tikoka yuk deici nang ara otam tikna ura, sunci unubdandoka Er Imtamnyi si weik en mot ereramnyi. Ara, minob kalikamwe weik sienyi Daud bira Er Imtamnyi bisi miliramunyi kuramuryi, erci, “Ato-ato kuboka Er Imtamnyi bisi si weik en mot sebdarur,” eamwe to, sunci ukuramnyi. 25Tonda, Lewi yala nang si Matanya ab, Bakbukya ab, Obaja ab, Mesulam ab, Talmon ab, Akub ab sunbabyi sien nang kuramnyi. A nang ara Er Imtamnyi ai wengban bisik bublan dam ninyi dama karen dinyi deirin ai kalingni nang kuramnyi. 26Ara, Yoyakim ninyi dama deirina deyoknyi kuramwe talak aryi a nang ara ninyi dama deirin miningna ai kalingnamnyi. Ara, Yozadak mi Yesua biryi mi Yoyakim biti ato ebmab. Tonda, Nehemia bira Persia mutuk weik sienyi amwetam bunanyi kuramuryi, Yehuda mutuk kalingnamwe ba, a nang aryi Er Imtamnyi ai wa iramnyi. Tonda, ninyi dama deirinanyi Ezra bira Musa kerek sengna diboka liliboka bikamunyi kuramwe ba, a nang nirya aryi Er Imtamnyi ai wa ibde baramnyi.

Yerusalem atei lika dobdoboka bublan kukmai uram deyok

12:27-43

27Yerusalem atei lika bublan kukeibkwamai tum ara sun Yerusalem atei kuramnyi nang aryi Lewi yala nang sun atei yuk-yuk da kuramnyi nang nirya naboka Yerusalem atei bulubdeibmai. Ara, “Atei lika bublan kungna tum ara kilkil asa bobibyi ba, sun Lewi nang aryi Er Imtamnyi bisi, ‘Ei nun Nai,’ en mot amuma-amuma sebting,” tenen sunci sun Lewi yala nang nabmai. Ara, kongkong ena oboka bilul kwemna dinyi si gambus ab, kecapi ab oboka sebkwamai ati, sunci sun Lewi yala nang naboka bulubdeibmai. 28Ba, sun Lewi yala nang kankan mot semna nang ara sun atei yuk-yuk aryi anaboka Yerusalem atei buluryanmai. Ton nang ara Yerusalem atei dam kuramnyi atei mitik-mitik atei kuramnyi nang anaboka yanmai. Ba, yuk nang ara Netofa atei dam mitik-mitik atei kuramnyi nang asi anaboka yanmai. 29Ba, ton mot semna nang yuk nang ara Bet-Gilgal atei kuramnyi aryi anaboka yanmai. Ba, yuk nang ara atei Geba mutuk ab, atei Asmawet mutuk ab kuramnyi aryi, sunbabyi anaboka Yerusalem atei buluryanmai. Akatei yuk-yuk ara Yerusalem atei dam-dam doramnyi atei kuramnyi aryi yanmai. 30Ura, Yerusalem atei lika bublan kungna kabul talak aryi sun Er Imtamnyi bisi ninyi dama deirin nang aryi, “Yerusalem atei lika bublan kukwayeb ati, Er Imtamnyi biryi teleb tenebkwansurur,” tenen sun damnyi kikniboka me ilikdanmai. Tonda, sun Lewi yala nang ababyi sun damnyi kiknibminikoka me ilikdanmai. Ura, sun ninyi dama deirin nang aryi sun buluryanmai nang ur Israel nang ati, “Er Imtamnyi biryi teleb tenebkwandur,” tenen me dobtaleboka sunsi me ilikeibnin yibinmai. A sirya ura, sunci Yerusalem atei lika ab, atei wengyangan bisik lika bublan nirya ab me dobtaleboka ilikeibnin yibinmai.

31Ura, ni Nehemia biryi sun Yehuda nang bobde menengna nang asi, “Atei lika dub ai dam weleboka tingbindarur,” eboka arukmase. Sirya ebmase ura, niryi sun mot sebkwamai nang deici bitinyi bokoka, “Er Imtamnyi bisi, ‘Ei nun Nai,’ eboka mot sebde bindarur,” ebdeibmase. Ura, ton wibmase deici nang ara leleboka atei lika dub ai weleboka sun urasin siriktam deiboka banmai ani, Kulonga Dongon Bisik Bublan dam binmai. 32Ba, a leleboka dakdobmai nang dongtam banmai nang ara sienyi si Hosaya ab, ton yuk Yehuda nang bobde menengna nang meici tentok ab dongtam tikdongoboka binmai. 33Ara, Azarya ab, Ezra ab, Mesulam ab dongtam tikdongoboka binmai. 34Tonda, Yehuda ab, Benyamin ab, Semaya ab, Yeremia ab dongtam tikdongoboka binmai. 35Tonda, ninyi dama deirin nang ton nang ababyi dongtam tikdongoboka banmai. A nang ara buu ena douboka onmaici, banmai. Ura, sun buu ena douboka onmai nang kankan aryi ninyi si Zakharia bibabyi douboka onmou. Anyi bira Asaf deibdobanyi kuramwe. Asaf biryi Zakur deiamwe. Zakur biryi Mikha deiamwe. Mikha biryi Matanya deiamwe. Matanya biryi Semaya deiamwe. Semaya biryi Yonatan deiamwe. Yonatan biryi Zakharia deiamwe. Ura, Zakharia bira buu ena douboka onmouci, erbabyi sun mot semna nang dongtam tikdongoboka banmou. 36Tonda, Zakharia er du weit yabwe ababyi dongtam kuboka tikdongobmaici, bilul ab bungum-bungum en dinyi yuk-yuk douboka onmai. A nang sun si ara Semaya ab, Azareel ab, Milalai ab, Gilalai ab, Maai ab, Netaneel ab, Yehuda ab, Hanani ab dongtam kuboka milibmai. Ara, minob weik sienyi Daud bira Er Imtamnyi wa irmiliramunyi kuramuryi, arukamwe to, sunci bilul ab bungum-bungum en dinyi yuk-yuk douboka onmaici, Er Imtamnyi bisi mot sebde binmai. Ba, a nang nirya ara tabakoka bun dika nang ato kubmai bok, Ezra bira Musa kerek sengna uram diboka bukdob bingnamunyi bira sunsi menekoka mot kisoka bobananyi bitonyi kuboka kisok bomenekmou. 37Ura, mot sebde banmai ani, sunci yuryandoka atei lika wengyangan bisik bublan si Me U dam bublan dam binmai. Sirya binmai ura, sunci kweitata weleban bisik welebindoka minob weik sienyi Daud biryi doamwe atei binmai. Ura, akiryi kuboka ani, sunci Daud kuramwe atei keta aryi kuboka sunci welebindoka Yerusalem atei lika alou dam ai tubto binmai. Ara, minob weik sienyi Daud biryi doamwe ai asi eitam bindoka mot sebde banmai ani, sunci Yerusalem atei lika bublan dam si Yiban Me bisik bublan dam tingyanmai.

38Ba, mot semna nang ton deici nang ara leleboka atei lika dub ai kwanimtam bisik kuboka mot sebde banmai. Ura, ni Nehemia bira a mot sebde banmai nang sun dongtam tingbindoka milibmase. Tonda, yuk sien nang ab, ur nang dinatam deici nang ab aryi dongtam milibmaici, mot sebde banmoubwe. Mot sebde banmoubwe ani, atei kalikde bun ai erebdob ai si ara Roti Kikniboka Dan Ai dam bindoka yuryibinmoubwe. Akiryi kuboka mot sebde baramoubwe ani, nunci welebindoka atei lika si Ila Weik Lika dub ai bisik yibinmoubwe. 39Ato kuboka mot sebde banmoubwe ara atei lika alou dam bisik bindoka mot sebde banmoubwe. Ara, bisik bublan kalingna ai si Efraim ai ton bisibmoubwe. Ura, bisik bublan kalingna ai si Minob ai ton bisibmoubwe. Ura, bisik bublan kalingna ai si Mekinaia Bowengban ai ton bisibmoubwe. Tonda, atei lika kalikde bun ai dukoka dobde welen ai si Hananeel ton bisibmoubwe. Tonda, ai dukoka dobde welen ai si Yin doun nang 100 baryi ai ton bisibmoubwe. Ura, bisik bublan kalingna ai si Domba bowengban ai ton bisibmoubwe. Ani, sirya kobdob ara bisik bublan kalingna ai si Kalingna Nang ai dam tingyanmoubwe. 40Ani, a deici bitinyi mot semna nang nirya ara antaniboka Er Imtamnyi ai keta dam yandoka tikmai. Ura, ni Nehemia ab, sun ni ab tonkwa miliboka ninyi bomenengna nang ab, ninyi dama deirin nang ab, nunbabyi yandoka tikmoubwe. 41A yandoka ni ab tonkwa tikmoubwe nang Er Imtamnyi bisi dama deirin nang si ara: Elyakim ab, Maaseya ab, Minyamin ab, Mikha ab, Elyoenai ab, Zakharia ab, Hananya ab tikmoubwe. A nang ara buu ena doubmaici, tikmai. 42Tonda, yuk Maaseya ab, Semaya ab, Eleazar ab, Uzi ab, Yohanan ab, Malkia ab, Elam ab, Ezer ab sunbabyi buu ena douboka tikmai. Ba, sun mot semna nang ara mot semai ba, ninyi si Yizrahya bira mot wimna deyoknyi kuramuryi, “A mot sebkwayeb, a mot sebkwayeb,” eboka deyok kouboka mot wibmou. 43A uki tum ara Yerusalem atei lika ab atei wengyangan bisik bublan kalingna ai kungni tum kubmou ati, sun ninyi dama deirin nang ara bisam ilinto oboka uk dabmaici, Er Imtamnyi bisi deibmai. A uki tum ara Er Imtamnyi biryi sun kanya kilkil dinyi karebmou ba sun kanya kilkil mitik kum kubmou. Ara sal nang yoka akwe kilkil kum kubmou. Eda, nerabwe mer babyi, mitik mabwe nermabwe babyi nirya sun kanya kilkil kubmou. Ba, Yerusalem atei aryi mot semai ara yuk mutuk ababyi kekenmai.

Sun Israel nang aryi sun ninyi dama deirin nang ab, Lewi yala nang ab ati yina kareramnyi uram deyok

12:44-47

44A talak ara sun sien nang aryi ninyi mikbaryi wiboka ukutoto deirin dinyi deirirban ai kalingkwamnyi ati tikeibmai. A nang asi wa takubdeibmaici, ato ebmai, “Sun Israel nang wa in dam bimunyi ura, sunci Er Imtamnyi biti dama karen dinyi buluboka bobmunyi ura, Er Imtamnyi ai dam dongordeiriryandarur,” ebmai. Ara, “Sun Israel nang aryi kwaning wa iramingnyi dinyi yuma yongon dinyi asi sunci buluboka Er Imtamnyi ai dam bowengyandoka kalingkwandarur,” eboka arukmai. Tonda, “Kwaning yongon dinyi ab, co du dangna dinyi nirya ab ol takubaryi asi bokoka, ol tentok asi Er Imtamnyi bisi dama deirin asi sunci buluboka deirirban ai bowengyangankwandarur,” eboka wa takubdeibmai. Ara, Musa biryi minob ura, “Ato-ato kubdarur,” en uram umbura aryi ebdeiamwe to, sun Israel nang aryi sun ninyi dama deirin nang ab, sun Lewi yala nang yuk nang ab asi yina kareramnyi. Ura, sun Yehuda nang aryi, “Er Imtamnyi bisi ninyi dama deirin nang ab, Lewi yala nang ab ara nunti likniboka Er Imtamnyi ai dam wa inung,” tenen kilkil kanya boramnyi deyok aryi, sunci yina kareramnyi. 45A deici bitinyi nang aryi sun Nai Imtamnyi ai dam busul kuboka wa iramiryi, utotoa me ilingdeiriramnyi. A neiktoto kuboka Er Imtamnyi ai umbura dam mot semna nang ab, atei bisik wengban bublan dam kalingna nang aryi weik sienyi si Daud ab er mi Salomo ab aryi ebdeiandei to busul kuboka kunuramnyi. 46Ara, minob talak weik sienyi Daud ab mot wimna deyoknyi Asaf ab kurandei talak aryi mot wimna deyok nang ababyi Er Imtamnyi biti mot wimnamnyi. Ani, aminda talak kubde yangaramnyi talak ababyi mot wimna deyok nang tuba kuramnyi. A nang aryi deyok kouboka mot wibna ba, Er Imtamnyi bisi si weik en mot ton, Er Imtamnyi bisi, “Nai, nun Nai, nun babya,” eboka kisal dangna mot ton sebde yangaramnyi. 47Sienyi si Zerubabel biryi kalingnamwe talak ab, ni Nehemia biryi kalingnanse talak ababyi sun Israel nang nirya ara Er Imtamnyi ai mot semna nang ab, Er Imtamnyi ai bisik bublan dam kalingna nang ab asi sun yina tuba-tuba kareramnyi. Ura, tonda sunci sun Lewi yala nang yuk nang ababyi yina yuk wiboka deibdongoboka kareramnyi. Ba, sun Lewi yala nang aryi a yina nirya dobni ura, sunci wiboka ton dinyi ara sun dama deirin nang Harun deibdoba nang ati kareramnyi.

Currently Selected:

Nehemia Uram 12: MTG

Highlight

Copy

Compare