Nehemia Uram 13

Nehemia biryi, “Ukubdarur-ukuna mem,” en uram asi diboka kunuramwe uram deyok

13:1-31

1A talak aryi Musa kerek sengna asi sun Israel nang nirya keken ai nukarebde banmai ba, kekebmai. Ba, a uram umbura aryi ato eboka kerek sekdeiamwe asi ton kekebmai, “Sun Amon yala nang ab, Moab yala nang ab ara Er Imtamnyi wibmou nang Israel nang kankan asi ninyi tentok sirik ababyi ton kum mangyankwanung,” eboka sekdeiamwe asi kekebmai. 2Ara, minob talak aryi sun Israel nang Mesir mutuk aryi kuboka yangaramnyi ani, Kanaan mutuk dam wengyangana kum kubmai talak ara, sun kwaning atanmou bok, sun Amon yala nang ab, Moab yala nang ab aryi sunsi kwaning ab, me ab kiknibdeiboka du dongorona kum kuamnyi. Eda, sunci ninyi sumna deyoknyi si Bileam bisi naboka, “Sun Israel nang asi subminyi ba, Israel nang nirya kum danseknung,” eboka molobmaici, sumna dengna karebmai. Ba, Bileam biryi, “Subkwan,” tenen ukubdenmou bok, Er Imtamnyi biryi bisik sekminikmou uca, sun Israel nang ara kisal dangna dinyi akwe dobdobmai. Ati, sun Amon yala nang ab, Moab yala nang ab aryi ato kuboka malyi kuamnyi deyok aryi Musa biryi, “A nang ara Israel nang ab tonkwa antaniboka kum kubkwaming,” eboka ebdeiamwe. 3Sun Israel nang aryi kekenmai uca, Musa kerek sengna aryi ato eboka sekeiamwe asi kekebmai ura, sunci yuk yala nang ab deibdandanyi nang yakdonokmai.

4Ato kuna kabul talak ara, ninyi dama deirinanyi si Elyasib bira Amon yalanyi si Tobia ab tonkwa bukdandoka erti Er Imtamnyi ai wilimna ai ton lobdeiamwe. Elyasib bira Er Imtamnyi ai dam wilimna ai-wilimna ai kalingdamunyi kuramuryi, Amon yalanyi Tobia ab ninyi bun dakdanandeici, kurandei. 5Ato kuboka kurandei deyok aryi, Elyasib biryi Er Imtamnyi ai wilimna ai tentok Tobia biti lobdeiamwe. A wilimna ai weik ai ara Er Imtamnyi bisi dama deirin dinyi deirirban ai asi Elyasib biryi Amon yalanyi bisi kareamwe. A lobdeibmou wilimna ai ara sun Israel nang aryi Er Imtamnyi biti dama deirin dinyi gandum du deiriramnyi ai. Tonda, tong teleb dinyi si kemenyan ton deiriramnyi ai. Tonda, dama deirin dinyi dongordeirin moyok totoa ton, ya totoa ton asi a wilimna ai bura deiriramnyi ai. Tonda, kwaning yongon dinyi ab, co du dangna dinyi ab asi ol takubaryi bokoka ol tentok asi Er Imtamnyi biti kareramnyi dinyi boboka deirirbaramnyi ai asi lobdeibmou. Ara, gandum du ab, co anggur du yung ab, zaitun du yung ton akai umbura deiriramnyi. A deiriramnyi dinyi utotoa ara sun Israel nang aryi sun Er Imtamnyi ai wa in nang asi kareramnyi. Ara, ninyi dama deirin nang ab, Lewi yala nang ab, Er Imtamnyi si weik eboka mot semna nang ab, sun Er Imtamnyi ai bisik bublan dam kalingna nang asi deiriramnyi. Deiriramnyi bok, Elyasib biryi a wilimna ai weik ai Tobia biti nukamwe. 6Tobia bira Er Imtamnyi ai wilimna ai kuramwe talak ara ni Nehemia Yerusalem atei kum kuranse aryi ni kum bikanse. A talak ara nira Babel mutuk tamurbindoka weik sienyi si Artahsasta ebdanmanoumwe talak aryi ukuamwe. A kwalina ara Artahsasta weik sienyi kiamwe ani, er kalingdamwe talak ara kwalina 32 baryi kwalina kalingdamwe. Ura, Babel mutuk kuranse ani, niryi, “Yerusalem atei tamuboka bitinyi,” eboka weik sienyi bisi molobmase ura, Yerusalem atei tamuboka yanmase. 7Ura, yangaranse ani, Yerusalem atei yandoka kekeranse uca, Elyasib biryi malyi kuamwe deyok asi kekebmase. Ara, erci Amon yalanyi si Tobia biti wilimna ai lobdeiboka Er Imtamnyi ai keta dam asi ai sokon kareamwe. 8Ura, ni Nehemia biryi ni kanya dam aryi, “Se, unato ati erci yuk yalanyi bisi Er Imtamnyi ai wilimna ai lobdeibwe do?” tenen aryi yu mitik kum kubmanou. Ura, akai umbura wengbindoka Tobia biryi deiriramwe dinyi nirya tomoboka baitam dobkwetebmase. 9Sirya dobkwetebmase ura, niryi, “A dama deirin dinyi miningna ai ara Er Imtamnyi dinyi akwe kurur,” tenebmase. Ura, niryi sunsi ato ebmase, “Akai ara me ilikeiboka Er Imtamnyi bisi tamuboka karebkwayeb,” eboka arukmase. Ba, sirya me ilikoka mentebmoubwe ura, Er Imtamnyi ai deirin dinyi tubto tamuboka deiriryanmoubwe. Ara gandum du ab tong teleb en co yung si kemenyan ab boboka deiriryanmoubwe.

10Ura, tonda niryi dinmase uca, sun Lewi yala nang ati karen dinyi bok, sunsi ton kum kareryangaramnyi asi eibmase. Ba, sun Lewi yala nang ab, Er Imtamnyi ai mot semna nang ab ara, “Nun yuk aryi wa iboka yibdobkwayeb,” tenen Er Imtamnyi ai dam wa in dinyi ara takloboka sun wa tukwe dam yuk-yuk irbaramnyi asi eibmase. 11Ura, niryi sun Er Imtamnyi ai wa ina deyok nang nabmase ura, sunsi ato eboka erekdobmase, “We, sunda unatoa ati, Er Imtamnyi ai wa in dinyi ara taklobdau do?” eboka erekdobmase. Ato sirya obura, niryi sun Lewi yala nang ab sun mot semna nang ab asi naboka bulubdeibmase nang asi sun wa yuk-yuk minob iramnyi to karebmase. 12Ba, sun wa iramnyi to ibkalibmai ura, sun Yehuda mutuk nang nirya aryi sun yongobmai kwaning ab, sun dakmai co du ab asi ol takubaryi bokeiboka nukmai ura, ol tentok asi boboka yumkuna Er Imtamnyi biti deibkalibmai. Ara, gandum du ab, co anggur du yung ab, zaitun du yung ab boboka Er Imtamnyi ai ukutotoa deirin ai dam tamuboka boyangaramnyi. 13Ura, ni Nehemia biryi, “Er Imtamnyi ai ukutotoa deirin ai kalingna nang tikeibkwan,” tenen ninyi dumbaryi wiboka tikeibmase. Ara, ninyi dama deirinanyi si Selemya ab, Musa kerek sengna bingnanyi Zadok ab asi tikeibmase. Tonda, Lewi yalanyi Pedaya ab tikeibmase. Tonda, sun dam tingdongonanyi bira Hanan bisi tikeibmase. Hanan bira Matanya mi Zakur biryi mi asi tikdeibmase. Sun Israel nang nirya aryi a dumbaryi nang ati, “Busul kun nang, nun kanya deirinub nang kunung,” teneramnyi deyok aryi, niryi a nang asi, “Er Imtamnyi biti dama deirin dinyi asi kalikdarur,” eboka tikeibmase.

14Ura, ni Nehemia biryi Er Imtamnyi bisi molobmase ara ato eboka molobmase, “Nai Imtam kurumnyi, niryi busul kuboka Kan ai deyok ab, Kan ai wa in dinyi ab asi kalingnun ati, Kanci luba kibniminyei. Eda, Kanci tuba kanya teneinkwanurum!” eboka molobmase.

15Ura, a talak aryi niryi dinmase uca, taruk louboka bun tum si Sabat tum asi sirya berekmou bok, ninyi Yehuda mutuk nang ton nang aryi co anggur du yung urunmai asi asing eibmase. Ura, tonda yuk nang ara gandum du doboka bisam keledai deici asi boboka dongoryanganmai asi ton eibmase. Ura, ton nang ara co anggur du kiboka boyanganmai asi eibmase. Ton, yuk nang ara co si ara du kiboka boyanganmai asi asing eibmase. Ara, taruk louboka bun tum si Sabat tum sirya berekmou bok, sunci ato kuboka wa il weik doboka kina ilinto boboka Yerusalem atei bowengyanganmai asi asing eibmase. Ura, niryi sunsi erekoka, “Er Imtamnyi uki tum si Sabat tum dengdana mem,” eboka yan memen uram ebkarebmase. 16Ba, yuk mutuk nang Tirus atei nang ara Yerusalem atei tingyangaramnyi nang aryi mekinaia babyi, yuk bona talena dengdan dinyi ababyi boboka, “Sun Israel nang aryi deksiting,” tenen boyangaramnyi. Ara, Er Imtamnyi uki tum si Sabat tum berekmou bok, sunci sun Yehuda nang asi dengna dinyi Yerusalem atei bowengyandoka dengdeiriramnyi asi asing eibmase. 17Ura, niryi sun Yehuda nang kalingnamnyi sien nang asi erekdobmasiryi, sunsi ato ebmase, “Sunda taruk louboka bun tum uki si Sabat tum asi wa ibde bandarur ara Er Imtamnyi urasintam aryi malyi dinyi kundarur e,” eboka erekdobmase. 18Ura, tubto ton ato ebmase, “Sun abwe yabwe Israel nang minob kuramnyi nang aryi ato kuboka Er Imtamnyi uram dangbisiramnyi deyok aryi, Er Imtamnyi biryi sunsi weneboka mambul don dinyi ilinto kareamwe ba, nun sun deibdoba nang ababyi mambul don dinyi ilinto donub. Tonda, sun malyi dinyi kuramnyi deyok aryi Er Imtamnyi biryi sunsi wenebmou ba, sun ordana nang aryi yandoka Yerusalem atei dakamnyi. Ati, ukuryok ara sunci Er Imtamnyi uki tum si Sabat tum berekmaribok, wa indarur ara Er Imtamnyi biryi yu weik kuboka nun Israel nang nirya asi obminiksicei ati takdarur,” eboka erekdobmase.

19Ura, ni Nehemia biryi sun Yerusalem atei wengyangan bisik bublan dam kalingna nang asi ato eboka arukmase, “Uki si Sabat tum ambutum toa berekwamaci ura, arub toa sintam talak ara kunuk kum dakabde bok, sunci Yerusalem atei wengyangan bisik bublan nirya tiringdongonkwandarur. Tirikdongobmamunyi ani, uki si Sabat tum uki berekmaci ani, kunuk daci ura, bisik bublan ara tamuboka ur kungdeirinkwandurur!” ebmase. Ura, niryi, “Uki si Sabat tum ara bona bon dinyi dengdana dinyi boyandoka Yerusalem atei bowengyangnyei,” tenen ni yan dam bun nang kankan aryi ninyi mikbaryi asi, “Atei wengyangan bisik bublan dam kalingnikwandum,” eboka tikeibmase. 20Ba, uki si Sabat tum asi sun bona talena amuma ilinto dengdana nang aryi yandoka Yerusalem atei lika baitam asi dengdan ai kibmai. Ato kubmaici, lukunda tentok kum bitinyi kum aryi dengdanmai. 21Asi, niryi sunsi ato eboka erekdobmase, “Sunda akatei lika baitam yandoka kunmarum ara unatoa ati kunmarum do? Sunci aminda ato kubmunyi ura, niryi sunsi taleboka mambul dinyi bobdeibkwansin,” ebmase. Ba, a talak aryi kuboka a nang aryi taruk louboka bun tum si Sabat tum ara ton kum yangaramnyi. 22Ura, niryi sun Lewi yala nang asi, “Uki si Sabat tum berekci ura, ‘Imtamnyi biryi teleb tenebkwansurur,’ tenen me ilikdamunyi ura, Yerusalem atei wengyangan bisik bublan dam kalingyandarur,” eboka arukmase. Ura, niryi Er Imtamnyi bisi ato eboka molobmase, “Nai Imtam kurumnyi, Niryi Kan uki tum si Sabat diboka kalingnanse ati Kanci luba kibniminyei. Eda, Kanci busul kuboka boukwe kimnansirim to nisi iya busul kiboka boukwe kibnurum,” eboka molobmase.

23Ura, tonda a talak aryi dinmase uca, Yahudi nang ninyi mikbaryi aryi yuk mutuk yala nerabwe doramnyi asi eibmase. Ara, Asdod atei nerabwe ab, Amon mutuk nerabwe ab, Moab mutuk nerabwe ab doramnyi asi eibmase. 24Ba, sun deiriramnyi mabwe nermabwe dinatam ara nun Yehuda nang uram kum bingdamnyi. Eda, Asdod uram akwe eramnyi. Tonda, yuk yala-yuk yala nang uram akwe eramnyi. 25Ura, niryi sun yuk yala nerabwe doamnyi nang asi erekdobmasiryi, sunsi submase. Ura, ton ni dam kobdob tikmai nang ara kulabloboka sun kisok otong kwinibtalebmase. Ura, niryi sun Yehuda nang asi Er Imtamnyi si deici aryi uram eboka arukmase. Uram ara ato eboka arukmase, “Sunci sun nermabwe ara, ‘Yuk atei nang mabwe ati kaibkwayeb,’ tenerdena mem! Tonda, sunci, ‘Yuk atei nang nermabwe asi doboka nun mabwe ati kaibkwayeb,’ tenena mem. Tonda, sunci, ‘Nun ninyi wise nang ababyi yuk atei nerabwe dobdobkwayeb,’ tenerdana mem!” ebmase. 26Ura, ton ato ebmurubmase, “Minob talak Israel weik sienyi si Salomo biryi yuk yala nerabwe doramwe ara Er Imtamnyi urasintam asi malyi kuramwe. Salomo bira yuk mutuk atei kalingnamnyi weik sien nang nirya outam kibkweteboka iya teleb weik sienyi kuramwe bok, erda yuk yala nerabwe dobmou ati, Er Imtamnyi urasintam aryi malyi kuramwe. Tonda, Er Imtamnyi biryi Salomo bisi iya boukwe kimnamuryi, ersi tikeiboka Israel weik sienyi kibmou bok, Salomo bira yuk yala yuk yala nerabwe doramwe deyok aryi malyi kun dinyi ukuramwe. Sunci ato en uram ara kum bingdarur do? 27Sunda unato ati neik malyi kun dinyi kundarur do? Ara, sunbabyi Er Imtamnyi bisi taklobmunyi ura, Er Imtamnyi uram kekena kum nang nerabwe dondarur ara unato ato ati kundarur do? ‘Ato kubde banung,’ esunung ara sun alyi kum do?” eboka erekdobmase.

28Ura, niryi kekenmase uca, ninyi dama deirinanyi si Yoyada er mi ara Bet-Horon ateinyi si Sanbalat er nebnyi dobwe ebmai asi kekebmase. Ura, a deyok aryi niryi Yoyada mi asi ni urasin dam aryi yakdonokmase.

29Ura, niryi Er Imtamnyi bisi ato eboka molobmase, “Nai Imtamnyi kurumnyi, Kanci sirya bingdum. Nai, a nang ara ninyi dama deirin nang kunung bok, sunci nining kanya boboka yuk yala nerabwe dobyi deyok aryi Kan urasintam asi malyi dinyi ara Kan sirya bingdum. Ara, Imtamnyi Kanci sun ninyi dama deirin nang ab Lewi yala nang ab asi, ‘Yuk yala nerabwe dona mem,’ ebdeiamoumwe bok, a nang aryi Kan uram asi dangbisinung ati, Kanci a nang asi wenebdum tenen ati molobmakin,” ebmase.

30Ura, niryi sun Israel nang asi, “Yuk yala nerabwe dobmunyei,” eboka kwit deibdeibmase ura, niryi sun ninyi dama deirin nang ab, Lewi yala nang ab sun wa yuk-yuk inkwamnyi to yuk-yuk karebnin yibinmase. 31Ura, tonda co boboka deiamunyi aryi Er Imtamnyi biti dama deirin dinyi uk tum dankwamnyi to ara, “Ato-ato kunkwandarur,” eboka lilibdeibmase. Ani, koubdoba yuma kin dinyi Er Imtamnyi biti dama deibkwamamunyi ababyi, “Ato-ato kubkwandarur,” eboka lilibdeibmase.

Ura, niryi Er Imtamnyi bisi ato eboka molobmase, “Nai Imtamnyi, Kanci ni kanya teneibdeniminyi ura, ni kuron tam asi kisal daknurum,” eboka molobdobmase.

Currently Selected:

Nehemia Uram 13: MTG

Highlight

Copy

Compare