Ezra Uram 10

Ezra biryi, “Nerabwe talyi talbaliboka dordandarur ara takdarur,” eboka wenebmou uram deyok

10:1-17

1Ezra biryi Er Imtamnyi ai dam aryi kutam ikdongoboka engeboka Imtamnyi bisi moloboka, sun malyi kun dinyi lak enmou talak aryi sun Israel nang ninyi ilinto er dam buluryanmai. Ara sal nang babyi, nerabwe babyi, mitik mabwe nermabwe babyi buluryanmai ura, engena weik engeboka engebmilibdanmai. 2Ura, ninyi si Elam deibdobanyi si Yehiel mi si Sekhanya biryi Ezra bisi ato ebmou, “Nunci yuk atei nerabwe doboka nun Nai Imtamnyi urasin dam asi iya malyi kun dinyi kunub. Malyi dinyi kunub bok, arub ababyi nunci, ‘Er Imtamnyi biryi nun malyi kun dinyi kilibsute,’ tenen dibde bunmab. 3Ati, nunci nun Nai Imtamnyi urasin dam aryi si darabdeiboka, ‘Kanaan mutuk nerabwe donuba ab, sun mabwe nermabwe deibdoba ab asi, “Sun atei yuk-yuk bindobdarur,” eboka yakdonokwayeb,’ ebkwayeb. Ara, kan Ezra biryi, ‘Ato-ato kubkwayeb,’ ebmasirim to ab, Er Imtamnyi uram asi ilil tenenung nang aryi, ‘Ato-ato kubkwayeb,’ ebmasing to ab kunubde binkwayeb. Ara, Er Imtamnyi biryi Musa biriman aryi, ‘Ato kubdarur-ato kuna mem,’ ebdeibmasou to kunubde binkwayeb. 4Ati, nai Ezra, kanda tikokminyi ura, deyok kouboka, ‘Ato-ato kubdarur,’ eboka eterebsurum. Ati, kan kanya katabdongobdandobminci, nunsi eterebsiminyi ba, nunci kan dam tikdongoboka milibkwayeb,” ebmou.

5Yehiel mi Sekhanya biryi ato ebmou ura, Ezra biryi tikokaburyi, sun ninyi dama deirin nang sien nang ab, Lewi yala nang ab, yuk Israel nang ab asi ato ebmou, “Sunci Er Imtamnyi urasin dam aryi si darei uram ebdarur. Ara, ‘Kanaan mutuk nerabwe doboubwe ab, a nerabwe aryi deibdob mabwe nermabwe ab ara sun atei yuk-yuk yakdonokwayeb,’ eboka kunubdarur.” Ato eboka Ezra biryi arukmou ba, sun Israel nang aryi kunubmai. 6A sirya ebmai ura, Ezra bira tikokaburyi, Er Imtamnyi ai dam aryi anaboka Elyasib mi Yohanan ai wengbinmou. A bindoka mabmou ura, kwaning ab, me ab yina kum uca si teboka bukmou. Ara, “Nunda Israel nang ara Kanaan mutuk tamuryanamoubwe nang ara Er Imtamnyi urasintam asi iya malyi kun dinyi kunubde banub se,” tenen Ezra biryi engen kanya boboka yina si teboka bukmou.

7Ura, sun Israel nang sien nang aryi ato eboka uram dobkwetebmai, “Sun Babel mutuk aryi kuboka Yehuda mutuk ab Yerusalem atei tamuboka yandau nang nirya ara Yerusalem atei buluboka wekdarur,” eboka uram dobkwetebmai. 8“Unanyi-unaner aryi uki winiryi talak akiryi kum buluryamingnyi nang ara sun bona bon dinyi nirya dobdobkwayeb. A nang ara nun Israel nang kankan aryi yakwetebibyi ba, yuk mutuk tingbinkwamung. Ara, nunda sien nang ab, nun wa irmilin nang ab aryi uram doboka deiboubwe to takubdeibkwayeb,” eboka uram dobkwetebmai. 9Ura, uki bitinyi kunmai ani, uki winiryi tum berekwe ura, Yehuda mutuk nang ab, Benyamin mutuk nang ab sal nirya ara Yerusalem atei bulubmai. A buluboka wekmai wala ara toubni wala tanggal 20 aryi bulubmai. Ura, a bulubmai nang nirya ara Er Imtamnyi ai dam keta weklobmaici, bukmai. Sunda Kanaan mutuk nerabwe doramnyi deyok aryi mambul kanya bobmaici, bukmai. Tonda, mo weik ton cebmou deyok ababyi, sirim talebmou bok, mambul kanya bobmaici, bukmai. 10Ato kuboka buluboka wekmai asi, Ezra bira ninyi dama deirinanyi biryi tikokaburyi, sun buluboka wekmai nang asi ato ebmou, “Sunci nun Nai Imtamnyi bisi takloboka Kanaan mutuk nerabwe dondarur ara iya malyi kun dinyi kundarur se. Nunda Israel nang ara malyi kun dinyi ilinto kuramoubwe ani, sunci tabakoka iya malyi kun dinyi kurandau ani, tuba kundarur. 11Ato kundarur bok, ukuryok akiryi sunci Nun Nai Iya Erebdobnyi bira nun abwe yabwe moloraminyi urasin dam aryi, ‘Nunda Er Iya Erebdobnyi urasintam asi iya malyi kununub aryok se,’ eboka lak ebdarur. Sirya lak ebmunyi ura, sunci Er Iya Erebdobnyi bisi kanya teleb kimdeirin dinyi asi kunubdarur. Ato kubmunyi ura, sunci Kanaan mutuk nang ab ninyi bun ururdana takloboka, sun nermabwe doramunyi ara taklobdarur,” eboka arukmou. 12Ato ebmou ura, sun Israel nang a buluboka wekmai nang nirya aryi uram weikanun aryi ato ebmai, “Kan ebmarim uram ara dib en uram ebmarim ati, nunci diboka kunubkwayeb,” ebmai. 13Ebmai cok, sunci ato ebmai, “A buluboka wekmab nang ara ninyi yubwa ilinto wekmab ani, mo ababyi weik cemar ati uram sisingna ara takokwayeb ati molobmab. Tonda, nun kankan aryi ninyi ilinto aryi manmaliboka Kanaan nerabwe doamoubwe deyok aryi uram sisingna ara weik kubkwande. Ara, uram sisingna ara uki tentok kum, bitinyi kum sirya kum sisiktibyi. 14Ati, nun nai yabwe sien nang ab malyi deyok lilin nang ab aryi nunda Israel nang si deib aryi a deyok yuk-yuk lilibdeibkwandum ati molobmab. Sunda Yerusalem atei kurandum sien nang ab, yuk atei-yuk atei kurandum sien nang ab ara nun Israel nang kankan aryi Kanaan mutuk nerabwe doamingnyi nang yuk-yuk nabkwandarur. Nabmunyi ba, a nang ara Yerusalem atei yangnyi ura, sunci sun deyok lilibdarur. Ara, sunci eboka uki yuk-yuk wibminikmunyi tok, a nang deyok yuk-yuk lilibdeibdarur. Ura, a deyok nirya sirya lilibdeibmunyi ura, Er Imtamnyi biryi nunsi yu boboka, ‘Wenebkwan,’ tenesurur dinyi asi takwansurur ati, sunci nun ebmab to kubdarur,” ebmai.

15Sun bulubmai nang nirya aryi neik kanya boboka, “Ato kubkwayeb,” ebmai bok, ninyi si Asael mi Yonatan ab, Tikwa mi Yahzeya ab aryi tikokabdeici, “Ato kubibyei,” ebmarei. Tonda, Lewi yala nang si Mesulam ab Sabetai ababyi, “Ato kubibyei,” ebmarei. 16-17Ninyi mitikanun aryi, “Ato kubibyei,” ebmai bok, sun Babel mutuk aryi kuboka tamuboka yanamnyi nang yuk nang ara, “Ato kubkwayeb,” ebmaici, kunubmai. Ura, Ezra ninyi dama deirinanyi biryi, “Malyi deyok lilibkwanung,” tenen ninyi mikbaryi wibdeiboka tikeibmou. Ara, ninyi yala yuk-yuk kankan aryi erci malyi deyok lilin nang ton wibdeibmou. Tonda, sun ninyi ai deyok nang kankan aryi erci malyi deyok lilin nang ton wibdeibmou. A wibdeiboka tikeibmou nang ara erci si siboka wibdeibmou. Ura, sun sien nang ab malyi deyok lilin nang ab bulubmai ura, sunci a kwalina takwe wala aryi deyok kouboka Kanaan nerabwe doamnyi nang deyok yuk-yuk nirya lilibde baramnyi. Lilibde baramnyi ani, o kwalina yuma wala tanggal satu aryi sirya lilibdeibmai.

Kanaan mutuk nerabwe asi doramnyi nang sun si kerek sengna uram deyok

10:18-44

18Er Imtamnyi biti ninyi dama deirin nang kankan aryi Kanaan mutuk nerabwe doamnyi nang sun si kerek sekmai. Ara, Yozadak mi Yesua deibdoba nang ab er du weit yabwe deibdoba nang kankan aryi ninyi dumbaryi Kanaan nerabwe doamnyi. Ara, Maaseya biryi ton doamwe, tonda Eliezer biryi ton doamwe, tonda Yarib biryi ton doamwe ura, tonda Gedalya biryi ton doamwe. 19Bok, a nang aryi, “Dib sirik,” eboka, “Nunci Kanaan mutuk nerabwe doboubwe ara diba ati taklobkwayeb,” eboka si darei ebmai. Sirya si darei ebmai ura, sun yuk-yuk aryi, “Er Imtamnyi biryi nun malyi kun dinyi kilibsute,” tenen sun winin bisam mer kankan aryi bisam domba yim tentok oboka uk dabmai. 20Ba, Er Imtamnyi biti ninyi dama deirinanyi si Imer deibdoba nang ara Hanani ab, Zebaja ab ton Kanaan mutuk nerabwe doandei. 21Ba, Er Imtamnyi biti ninyi dama deirinanyi si Harim deibdoba nang si Maaseya ab, Elia ab, Semaya ab, Yehiel ab, Uzia ab aryi Kanaan mutuk nerabwe doamnyi. 22Ba, Er Imtamnyi biti ninyi dama deirinanyi si Pasyhur deibdoba nang si Elyoenai ab, Maaseya ab, Ismael ab, Netaneel ab, Yozabad ab, Elasa ab aryi Kanaan mutuk nerabwe doamnyi.

23Ba, Lewi yala nang aryi Kanaan mutuk nerabwe doamnyi nang si ara: Yozabad ab, Simei ab, Kelaya yuk si ara Kelita eraminyi ab, Petahya ab, Yuda ab, ton yuknyi si Eliezer ab aryi doamnyi.

24Ba, Er Imtamnyi ai mot semna nang aryi Kanaan mutuk ner doamunyi si ara: Elyasib biryi doamwe. Ba, Er Imtamnyi ai dam bisik bublan dam kalingna nang aryi Kanaan mutuk nerabwe doamnyi nang si ara: Salum ab, Telem ab, Uri ab aryi doamnyi.

25Ba, yuk Israel nang aryi Kanaan mutuk nerabwe doamnyi nang sun si ara ato: Paros deibdoba nang kankan aryi ninyi si Ramya ab, Yezia ab, Malkia ab, yuknyi si Malkia ab, Miyamin ab, Eleazar ab, Benaya ab aryi Kanaan mutuk nerabwe doamnyi. 26Ba, ninyi si Elam deibdoba nang kankan aryi Kanaan mutuk nerabwe doamnyi nang si ara: Matanya ab, Zakharia ab, Yehiel ab, Abdi ab, Yeremot ab, Elia ab aryi doamnyi. 27Ba, ninyi si Zatu deibdoba nang kankan aryi Kanaan mutuk nerabwe doamnyi nang si ara: Elyoenai ab, Elyasib ab, Matanya ab, Yeremot ab, Zabad ab, Aziza ab aryi doamnyi. 28Ba, ninyi si Bebai deibdoba nang kankan aryi Kanaan mutuk nerabwe doamnyi nang si ara: Yohanan ab, Hananya ab, Zabai ab, Altai ab aryi doamnyi. 29Ba, ninyi si Bani deibdoba nang kankan aryi Kanaan mutuk nerabwe doamnyi nang si ara: Mesulam ab, Malukh ab, Adaya ab, Yasub ab, Seal ab, ton Yeramot ab aryi doamnyi. 30Ba, ninyi si Pahat-Moab deibdoba nang kankan aryi Kanaan mutuk nerabwe doamnyi nang si ara: Adna ab, Kelal ab, Benaya ab, Maaseya ab, Matanya ab, Bezaleel ab, Binui ab, Manasye ab aryi doamnyi. 31-32Ba, ninyi si Harim deibdoba nang kankan aryi Kanaan nerabwe doamnyi nang si ara: Eliezer ab, Yisia ab, Malkia ab, Semaya ab, Simeon ab, Benyamin ab, Malukh ab, Semarya ab aryi doamnyi. 33Ba, ninyi si Hasum deibdoba nang kankan aryi Kanaan nerabwe doamnyi nang si ara: Matnai ab, Matata ab, Zabad ab, Elifelet ab, Yeremai ab, Manasye ab, Simei ab aryi doamnyi. 34-37Ba, ninyi si Bani deibdoba nang kankan aryi Kanaan mutuk nerabwe doamnyi nang si ara: Maadai ab, Amram ab, Uel ab, Benaya ab, Bedeya ab, Keluhu ab, Wanya ab, Meremot ab, Elyasib ab, Matanya ab, Matnai ab, Yaasai ab aryi doamnyi. 38-42Ba, ninyi si Binui deibdoba nang kankan aryi Kanaan mutuk nerabwe doamnyi nang si ara: Simei ab, Selemya ab, Natan ab, Adaya ab, Makhnadbai ab, Sasai ab, Sarai ab, Azareel ab, Selemya ab, Semarya ab, Salum ab, Amarya ab, Yusuf ab aryi doamnyi. 43Ba, ninyi si Nebo deibdoba nang kankan aryi Kanaan mutuk nerabwe doamnyi nang si ara: Yeiel ab, Matica ab, Zabad ab, Zebina ab, Yadai ab, Yoel ab, Benaya ab aryi doamnyi. 44A nang nirya ara Kanaan mutuk nerabwe asi doboka sun nerabwe kibdamnyi. Ato kuamnyi bok, sunci, “Sun atei bimunyi ura, tubto tamuryangan kum kubkwandum,” eboka sun nerabwe ab sun mabwe nermabwe ab yakdonokmai. Sun ato kubmai nang si ara ukuboka a kunum sirya kerek sekmab.

Currently Selected:

Ezra Uram 10: MTG

Highlight

Copy

Compare