Nahum Uram 3

Er Imtamnyi biryi sun Niniwe atei nang asi wenebkwande uram deyok

3:1-19

1Akatei nang ara ninyi ilinto orandau ati wenen dinyi dobkwandum.

Akatei nang sun nirya ara tola uram akwe endarur detok aryi Er Imtamnyi biryi sunsi weik wenen dinyi karebkwansir.

Tonda, yuk nang dinyi araboka dondarur deyok ab, yuk nang dinyi ilinto asi malyi kimdarur deyok ab ati,

Er Imtamnyi biryi sunsi weik wenen dinyi karebkwansir.

2Sun mar ordana nang aryi sunsi mar iyanganmasingci tabwe litukna lituk-lituk ena lilim enmar ara sun ton kekebdendarur.

Ani, kongkong ena korob-korob ena lilim ab asi sun ton kekebdendarur.

Ani, bisam kuda cungyangana bulbulung yaryatub ena lilim kekebdendarur.

Ani, kereta yan dirib-dirib eryangana lilim asi ton kekebdendarur.

3Bisam kuda deici bukoka mar boyanganmasing nang aryi doubmang ninyi on ya ara uk buk angninto kunmar.

Ba, sun doubmang te balang ara mil dangdur te balang asi doubmangci iyangamasing.

Ninyi orbanung ba, dimnunga tukwi ara nukman kum aryi neik deici-neik deici asi lamangdeirinung.

Asi ninyi tilib mandibna aryi ninyi kam kuramingnyi nang ara kablibisibman kum ba, sirkwariboka ninyi dibdoba tukwi deici marbanung.

4Ato kurur nirya ara ato deyok aryi ukurur.

Niniwe atei ara talyi yortamni ner ato kururci, ninyi ilinto bowaningminingdur deyok aryi sun Niniwe atei nang ara wenen dinyi dobkwaming.

Niniwe atei ara talyi yortamni ner ato kururci, “Ni yobniting nang asi tabwe deboka bowanikminikwan,” tenerur.

Akatei ara ninyi kir don sien ner ato kuboka ninyi yuk atei-yuk atei nang asi orminingdur.

Ani, erci yuk mutuk-yuk mutuk nang asi sun kanya tangdeirur deyok ab, yuk mutuk-yuk mutuk nang asi kir dorur deyok ab aryi Niniwe atei ara wenen dinyi dobdobkwande.

5Er Iya Erebdobnyi biryi ato ebmou, “Niniwe atei nang e, diranindarur.

Ni imtam yin doun nang sienyi bira sun mar bosinanyi kibkwan.

Niryi sunsi alyi kibdeibkwansin.

Ara, sun ongon aling bilul talebdongoboka langaktale-bowelenmasinyi ani, urasin ai deirirwelebinkwansin.

Ato kuboka ninyi yuk mutuk nang-yuk mutuk nang urasintam baning dem tikeibsinyi asi asing eibkwansing.

Ba, sun alyi aia dinyi ara weik sien nang talen mutuk nang urasintam aryi lak kibdeibsinyi ba, sun alyi aia dinyi asing eibkwansing.

Ba, sun dam lilibdanman kum kubkwansir.

6Ani, Niryi sunsi duknasi kurande dinyi ato kibdeibkwansin.

Ani, Niryi sunsi malyi kibdeibokabsiniryi,

ninyi yuk nang aryi wekoka ngalungsin atei nang kibdeibkwansin.

7Ba, ninyi yuk nang aryi sun nong dibdesingiryi, asing eibsingnyi ura,

ninyi nirya aryi sunsi deibloboka binsekdobkwaming.

Ba, barsengdonmangiryi, sunci ato ebkwansing, ‘Niniwe atei ara sirya malyi kiboka dakiribmai.

Ati, unanyi biryi akatei ati engebdobkwamote do?

Ato atei nang ati unanyi biryi tonkwa uruna kuboka kanya teleb kimdeirin nang ingkiringbinkwande da?’ eboka ina ngilikwaming.

8Minob ura, Mesir mutuk weik atei si ara Tebe eboka doramnyi atei nang ara kwemdeina si Amon moloramnyi.

Akatei nang ara mikib weik atei nang kuraming bok asi, sun mar ordana nang aryi iyandoka akatei nirya dakiribmai.

Bok, sun Niniwe nang aryi, ‘Nun atei Niniwe ara bisibkaboka iya mikib atei nang kunub ati, da kum dakiribanung,’ tenerdandarur do?

Minob Tebe atei doramnyi ara weik me si Nil katum dam asi doramnyi.

Ba, akatei ara eryuka aryi weik me kwan aryi lika doninto kuboka aknabdongoamwe.

Ba, sun akatei nang aryi, ‘Nun mar ordana nang ara a me kwan ilil ati me kouboka kum iyankwansing,’ teneramnyi.

Bok, sun mar ordana nang aryi weik me Nil koubkaboka Tebe atei asi kum daneibmai.

9Sun Etiopia mutuk atei nang ab, Mesir mutuk atei nang ab ara sun Tebe atei tam kun nang kuramnyi.

Ba, Put mutuk atei nang ab Libia mutuk atei nang babyi ara sun Tebe atei nang miliramnyi.

10Miliramnyi bok, sun mar ordana nang aryi iyandoka sun Tebe atei nang asi eda mutuk boboka tanglorbinmai.

Sun ordana nang aryi akatei alok nermabwe mabwe ababyi bisik iririkna dam deirdongorbindoka kulanmai ba, dibsekmai.

Ba, sunci akatei weik nang asi taleboka, ‘Unanyi bisi wa irmilin nang kibkwaming do?’ eboka keil ebsukmai. Ba, sun atei sien nang nirya ara besi tabwe deboka deibyi.

11Ati, sunda Niniwe atei nang ababyi neiktoto kubkwandum.

Sunda wanok walina talebsinibkwansir ani, mikib iya ton kum kubkwansir.

Ani, sun mar ordana nang iyangasina ilil ati, sun inibdandobmanto ai ingkirik-kirikwandum.

12Sun atei kalingdaron ai mikib ai ab sun atei lika ab ara sun mar ordana nang aryi iyandoka dakabokwaming.

Ara co si ara du eng diba obmaci asi ninyi aryi, ‘Doyibdobkwanuba,’ tenen co te lontongdongongnyi uca, co ara du ara kuluboka sun si bambul dam dangsangnande.

Ato kuboka, sun Niniwe atei nang ababyi neiktoto kubkwandum. Sunda sun mar ordana nang aryi iyandoka sunsi ola oboka kum daneibkwansing.

13Sun Niniwe atei yin doun nang ara nerabwe mitang ato nang kibkwansir.

Sun atei nang ara mar ordana nang mar bobana ara iya mikib ton kum kubkwansir.

Sun atei wengyangan bisik lika darardongon co balang ara nirya uk yiboka kum dandeibkwande.

Ba, sun atei wengyangan bisik lika bublan ara sun mar ordana nang wengyangana ati iya kuklobkwande.

14Sun mar ordana nang iyanganmasing ati, kiknibminikdobdarur.

Sun mar ibukamunyi talak aryi yinkwandum me minob kweboka kiknibminikdobdarur.

Ani, sun mar iboka kalikoka bun ai ara daraboka dobdobdarur.

Mintal tukwe ab ngat tukwe ab

asi yan yanibdarab-yanibdarab eboka ai don keil iniboka bisik boton bis libdongobdobdarur.

15Ato kuboka kiknibdamunyi bok, sun atei dam ara uk yaleboka yibsekwansir.

Sun kiknirminingdoramunyi dinyi ara kikiman kum kubkwansir.

Eda, ninyi on ya aryi ku turaming to, sun ordana nang aryi ya der sekbukwansing.

Sun Niniwe atei nang ara kwising yubwa ilinto kurande ato kuramunyi bok, sun mar ordana nang aryi sunsi obminikwansing.

Ba, sunda ninyi wa in dam koubdoba asi kwising yubwa aryi yibsekoka kum danardeiriraming kubkwansing.

16Sun Niniwe atei bona talena dengna nang ara

kurya yubwa ilinto imtam kurande dinyi bisiboka yubwa ilinto kunung.

Bok, sun mar ordana nang aryi Niniwe atei bona talena nang kum daneiboka sun bona talena ara boboka bindobkwaming.

Ba, sunda kwising yubwa aryi ol lakoka biriring eboka binsekdobingnyi ba kum danarorande to kubkwaming.

17Sun atei bisik wengyangan ai kalingna nang ilinto ara biriring eboka yibarande kwising yubwa ato kunung se.

Tonda, sun atei wa in nang ababyi ara kwising mer ato kuboka tiya akwe kubkwaming.

Arum kunmaci tum aryi kwising mer yubwa ilinto biriring eboka atei lika dubdub buryanganmang.

Ani, kiting deirdongoci ura, kwising mer ara biriring eboka binsengdoraming.

Ba, ‘Kwising mer ara dantam binmar do?’ tenen ninyi tentok ababyi kum bingdur.

18We, Asyur mutuk Niniwe atei weik sienyi a. Kan mutuk dam kalingna nang nirya ara dibsekwaming.

Kan talebumwe atei Niniwe atei kalingnung sien nang nirya ara iya ati mablobkwaming.

Ba, kan atei yin doun nang ara bokoka mutuk dub bindoka bokwalwalabdansekyi

ara sunsi naboka tubto bulubdeibkwandanyi ton kum kubkwande.

19Sun Niniwe atei nang asi dilaka ilinto dorande ato nang kundarur.

Sun obkwansir ba, dilaka doansici dinyi ara nibdobman kum kubkwansir.

Ba, sun yuk atei yuk atei nang nirya aryi a uram kekebingnyi uca, sunci kilkil kanya boboka taruk bokbok ebkwaming.

Ati sunci, ‘Sun Niniwe nang yu weik kuramiryi, ninyi yuk nang nirya asi tanglona kum uca iya mambul bordeiriransei bok, ukuryok ara iya wenen dinyi sirya dobyi,’ tenebkwaming. Ura, ‘Ha ha bita,’ eboka betek-betek ebingiryi, taruk bokbok ebkwaming,” ebmou.

Currently Selected:

Nahum Uram 3: MTG

Highlight

Copy

Compare