Habakuk Uram 1
1
Deyok
1:1
1Er Iya Erebdobnyi biryi Er uram ermurunanyi si nabi Habakuk biriman aryi kunumna deib kuboka uram ebdeibmou uram deyok.
“Er Iya Erebdobnyi biryi malyi kun nang aryi kuramingnyi to mundu lordeirirur se,” Imtamnyi bisi mundu sukun uram ebmou uram deyok
1:2-4
2Ara, nabi si Habakuk biryi ato eboka molobmou, “Nai Iya Erebdobnyi, Niryi Kansi, ‘Nun lebdobsurum,’ eboka namkunun bok, Kanci unato ati ni molona kum kekenurum do? Yu kanya bon nang aryi nunsi mambul kimsunung ati, niryi Kansi, ‘Yu dinyi bisik seksiniboka nun lebdeibsurum,’ eboka molokunun. Namkunun bok, Kanci ni molona kum kekenurum. Ati, liki unabaryi aryi niryi talyi ati tuba eboka molobkwankin do? Kanci nunda mambul doramib nang asi kum lebdeibkwansirim do? 3Sun malyi dinyi kun nang aryi nun teleb kun nang asi mambul kimdeisunung bok, Kanci unato ati, ‘A mambul donmanung,’ tenen mundu lordeirirum do? Yu nang aryi malyi dinyi kunung asi niryi unato ati, asing tuba eirinun do? Ara, malyi kun nang aryi teleb kun nang asi tatab-tatab eboka kereraming. Tonda, kulab-kulab eboka oraming. Tonda, yuk nang asi oboka kum daneiriraming. Ato dinyi asing eirinun ara Kanda Imtamnyi biryi unato ati eiboka deirlorongsurum do? 4Akiryi kuboka Er Imtamnyi biryi, ‘Sun malyi kun nang asi wenebdarur,’ en uram ebdeibmou bok, a uram ara ninyi urasintam aryi mikib kum kurur. Tonda, Er Imtamnyi biryi, ‘Sun teleb kun nang deyok asi libdarur,’ eansou bok, ninyi ilinto aryi kum kunuraming. Eda, yan yaniraming. Sun malyi dinyi kun nang ara mikib kunungci, sun teleb dinyi kun nang asi tatab-tatab eboka malyi kiminingnaming. Uca, ninyi deyok lilin dinyi ara malyito kiminingnamingci, diboka kum kunuraming,” ato eboka Habakuk biryi Er Imtamnyi bisi ebmou.
Er Iya Erebdobnyi biryi nabi Habakuk bisi dekeibmou uram deyok
1:5-11
5Ura, Er Iya Erebdobnyi biryi Habakuk bisi ato ebmou, “Kanbabyi yuk nang ababyi dirandarur. Niryi sun yuk atei nang-yuk atei nang kankan asi ilil weik tenen dinyi kiknibkwan ati sun dirandarur. Ara, kanbabyi ton yuk nang ababyi kam tuba kuramunyi bok, Niryi ilil tenen dinyi yuk atei nang dam asi kunubdeibkwan. Ba, ninyi aryi, ‘Er Imtamnyi biryi sun yuk atei nang-yuk atei nang kankan dam asi ato-ato kuboka ilil weik dinyi kikniboka mambul dinyi karebmar,’ eboka nukingnyi asi sun kekebmunyi ura, sunci, ‘Nai e, ukubman kum dinyi kiknibmar ara diba kiknibmar do?’ tenebkwandum. 6Ara, diba ati, Nira Imtamnyi biryi sun era mutuk Kasdim atei nang asi mikib ting ebdeiboka mar bon atei nang kibdeibkwan. Akatei nang ara yu sik ilinto ab, ninyi mar bona bingna atei nang ab asi mikib ting ebdeibkwan. Ba, akatei nang aryi anaboka im kubkub wiliba mutuk nirya asi wengbindoka sun talen mutuk kibingiryi, sun mutuk kuma ababyi araboka sun mutuk kibdobkwaming. 7Sun Kasdim atei nang ara yu weik kunung deyok aryi sun dantam-dantam mutuk kuramingnyi nang nirya ara ilil weik kubkwande. Ba, sun Kasdim atei nang ara wingdan asa aryi yuk atei nang ninyi deyok lilin dinyi nirya ati, ‘Nun li,’ tenen yan yanisitabkwaming. Ato kubkwaming cok, sunci sun kanya teleb tenebmangnyi to asi sun yuk atei nang-yuk atei nang ati, ‘Ato-ato kubde bindarur,’ eboka wenebkwaming. 8Sun Kasdim atei nang ara mikib weik nang kunung. Sun bukoka cung yibaraming bisam kuda ara cungna ola weik yibarande. Bol otong kourkikibna kam si macan tutul ara cungna ola weik yibarande bok, sun Kasdim atei nang buraming kuda ara bisibkaboka iya ola weik cungbaraming. Ani, bura kam si serigala lukunda talak aryi yu sik tingnande bok, sun Kasdim nang bobaraming kuda ara bisiboka yu ilinto kunung. Ba, sun kuda deici bukoka mar iyankwansing nang ara yuk mutuk dam kum mutuk aryi iyankwansing. Sun yankwaming ara maka bib aryi lena obkwamaci ati, yuk mutuk aryi kuboka ola yandoka iyangarande to kubkwaming. 9Sun Kasdim nang ara iyandoka sun yuk atei yuk atei nang nirya asi kulab-kulab eboka obkwansing ati yankwaming. Ba, sun yin doun nang mer yuk-yuk ara yaletam kumwe aryi ola nun ublingnande to mikib kuboka iyankwaming. Ura, sunci sun yuk atei yuk atei nang asi talebingiryi, tabwe debkwaming. Ara, me dala wininga nukman kum kurande to kuboka ninyi ilinto asi tabwe debkwaming. 10Ba, sunci sun yuk atei nang-yuk atei kalingnaming weik sien nang muna kibdongobingiryi, ina ngilikwaming. Tonda, sunci sun mutuk dam talen nang yuk-yuk asi tabwe debingiryi, ina ngilikwaming. Ba, sun yuk atei nang-yuk atei nang aryi, ‘Kasdim nang mar iyangana ati libdandobkwayeb,’ tenen atei lika ab kalikoka iboka bun ai ab doamnyi bok, sun Kasdim atei nang aryi akata kuboka sun atei wengbinkwaming. Ara, sunci akwe tuboka, ‘Atei umtam wengbinkwayeb,’ tenen atei lika dam tukwe boboka tilibdeibingiryi, atei wengbinkwaming. 11Ura, sun cung yibinkwaming ara kumwe aryi tuba ling eryibarande to kuboka cungbindoka yibinkirikwaming. Ato kubokabingiryi, sun Kasdim nang aryi sun mining damnyi mikib asa erebdandoka, ‘Nun mikib ara Er Imtamnyi mikib ato kurur,’ tenen ukubkwaming. Ato kuboka sunda Er Imtamnyi urasintam aryi malyito kubkwaming,” ato eboka Er Imtamnyi biryi Habakuk bisi uram dekeibmou.
Habakuk biryi mambul tuba kirikdanmouci, Er Imtamnyi bisi tubto, “Se,” tenen uram ebmou uram deyok
1:12-17
12Ura, Habakuk biryi Er Iya Erebdobnyi bisi ato ebmou, “Nai, Iya Erebdobnyi, Kanda minob talak aryi kuboka ukuryok talak ababyi nun Israel nang aryi ilil weik kuboka Ererdeirikunubnyi kurum. Kanda nun Molokunubnyi, malyi dinyi Kan dam ton kum kururnyi kurum. Ati, sun Kasdim nang aryi nun Kan mabwe nermabwe asi iya kum obkwansing. Nai Iya Erebdobnyi, Kanci sun Kasdim atei nang asi nun wenesin atei nang kibdeibumwe bok, sunci nunsi iya kum obkwansing. Kanda nun kalingsinanyi kurum ati, Kanci sun Babel nang asi nun kulab-kulab esin atei nang kibdeibumwe bok, sunci nunsi iya kum obkwansing. 13Nai, Kan asing ara iya malyi dinyi, yu dinyi dirdena kikiman kumnyi kurum. Tonda, Kanda, ‘Malyi kun dinyi ara Ni li,’ tenerumnyi kurum. Sun Kasdim nang ara sun yuk atei nang asi kikinung nang kunung. Ati Kanci unato ati a nang asi eiboka tanglorongdum do? Tonda, sun Kasdim nang ara yu weik nang kunungci, teleb kun nang asi kum daneiriraming. Ati, Kanci unatoa ati uram kilikoka a nang asi, ‘Sun yu kuramunyi dinyi takdarur,’ kum erandim do? 14Kanda Imtamnyi biryi nunsi unato ati, mekinaia weik me kwan umbura dam kurande dinyi ato kimdeirisurum do? Nunda sukalya ato kuboka mikib kum kunub. Nun bobde menengna nang ton kum kalingsunung bok, nun ordana nang iyangasunung ara mekinaia don nang ato kuboka nunsi dortalesunung se. 15Kasdim nang aryi nun yuk atei nang asi mekinaia youbtaleboka tukwe kib ai dordeiraming to kusunung. Ani, nun atei nang nirya ara kwisib umbura dongobdongobingnyi ura, sun doboka minikmangnyi dinyi ilinto kurur deyok aryi, sun kanya kilkil aryi mot semnung. 16A deyok aryi sun Kasdim nang aryi sun ya ab yin ab ati, ‘Nun molon dinyi,’ tenen bisam oboka uk daraming. Sun mining mikib biriman aryi sunci bona bon dinyi ilinto ton yina yin dinyi iya teleb dinyi arabde donung. Ati sunci sun mining ya yin ati, ‘Nun Nai,’ tenen kisal dangdaming. Ara, sun kwisib biriman aryi mekinaia iya teleb yina dobde yiraming deyok aryi, sun kanya teleb kuboka sun kwisib ati, ‘Nun kwemdeina,’ tenen kisal dakoka moloraming. 17Ati, sun Kasdim atei nang aryi tanglona kum uca ato kuboka malyi dinyi ukunung bok, Kanda Imtamnyi biryi eiboka tanglonkwandim do? A nang aryi ninyi on ya doubtaleboka ninyi boukwe kum asa aryi nun yuk atei nang-yuk atei nang nirya asi ur talyi orkirinkwansing darib?” ato eboka Habakuk biryi mambul kirikoka Er Imtamnyi bisi molobmou.
Currently Selected:
Habakuk Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
