Nahum Uram 2

Niniwe atei asi sun mar ordana nang aryi dakwamnyi uram deyok

2:1-13

1“Niniwe atei nang a kekendarur, sun atei dakwamasing atei nang ara mar iyanganmasing.

Ati, sunci kiknibdeibmunci, mar ibtalebmunci, dibde bun ai diboka kalikoka bukdarur.

Ani, bisik wengyangan ai ababyi diboka mouboka kalikdarur. Ura, ‘Mar obdankwayeb,’ tenen kiknibdeiboka bukdarur.

Kiknibdeiboka bukmamunyi bok, sun mar iyanganmasing nang aryi sunsi muna obdongoboka sun atei dakwamasing.

2Diba ati, Er Iya Erebdobnyi bira sun Yakub deibdoba nang asi tamuboka erebdeibkwande.

Ara, sun Israel nang kuron atei ara minob iya erebdob atei doramnyi to,

Erci tamuboka iya erebdob atei kibdeibkwande. Sun mar ordana nang aryi iyandoka sun Israel nang atei dakoka ninyi obsiniamingnyi asi Er Iya Erebdobnyi biryi tamuboka erebdeibkwande.

Ba, utotoa nirya kum daneiamingnyi nang aryi sun Israel nang aryi kouroramingnyi dinyi teleb dinyi nirya kum daneiamingnyi

bok, Er Imtamnyi biryi sunsi tamuboka teleb dinyi karebkwande.

3Ba, sun Niniwe atei iyanganmasing nang ara mikib weik nang kunung.

A mar bon nang aryi dounung mar lilina ara bi bol mar lilina dounung

ba, sun ongon aling ara kuruta bol aling ongonung nang aryi iyanganmasing.

Sun kuda aryi libtaleboka kongkong eryiban dinyi bobaraming ara ninyi ordana ati, bocungyibaraming dinyi asi boyanganmang.

A kongkong ena boban nang ara, ‘Ninyi mar bobkwayeb,’ tenen kiknibdeibyi ba, sun kongkong eryiban dinyi besi milil ara uk ubna milil ararande to kurur.

Ba, sun mar ordana nang dounung te balang ara kat co aryi lubyi balang asi douboka iyanganmasing.

4Kongkong ena yubwa boboka bisik ai bobaraming ara ola cukoka lebisirdaraming.

Ani, mutuk lu bisik ab, atei keta bisik ababyi yangnyi ura, sun nirya aryi akata kanya bobingiryi, ‘Ni menekbisibkun do? Er menekbisibkur do?’ tenen sun mamun limkusungdaraming.

Ato kuboka iyanganmangnyi ura, sunda uk ubna milil ararande to kurur,

ani, bebe milil ling eryibarande to kurur.

5Ba, Niniwe atei nang weik sienyi biryi, ‘Nun iyanganmasing nang ara nun atei Niniwe atei wengyasingnyei,’ tenen er milin nang yin doun nang asi nabokabdiryi,

‘Nun ordana nang asi bisik sekoka yakdonokdarur,’ eboka arukwande.

Arukwande bok, sun Niniwe atei yin doun nang ara mikib kum danmaci aryi, yan dum sorsorong eboka marbinsekwaming.

Ani, isin kangkang eboka atei lika bublan dam cungbindoka, ‘Yakdonokwayeb,’ tenen bangnyi asi, sun mar iyangan nang ara minob atei lika dam sirya wengyandoka sun mar u yanganmaca limdon ai sirya deibdongobkwaming.

6Sun Niniwe atei iyangan nang ara weik me anamyangana u dam irdongona bublan asi nirya kukdongobingnyi ba, me oboka Niniwe atei nirya siklibkwande.

Ara, Niniwe atei ab weik sienyi atei ababyi nirya asi me oboka siklibkwande.

7Ara, Niniwe atei ara ordana nang aryi muna kibdongoboka talebkwaming.

Ura, sun iyankwaming nang aryi, ‘Akatei nang nirya boboka yuk mutuk tanglorbinkwayeb,’ eboka uram dobdeibkwaming.

Ba, Niniwe atei sien nerabwe ara wa irmilin nerabwe mer ara ngolokoka engebde kubkwaming.

Ara, ‘Nun atei Niniwe talebmang, se,’ tenen sunci maka emnanyi bambam ebde kwemnande to sun mining koukwe asi darak-darak eboka kulabdankwaming.

8Niniwe atei ara weik atei doramingnyi bok, akatei nang aryi, ‘Lebdandobkwayeb,’ tenen yuk mutuk-yuk mutuk bindoka inirdarorbinsekwaming.

Ara, weik me kwan deianci asi botobdongobingnyi ba, me uruk-uruk eboka anarande to kuboka cukoka inirdarorbinsekwaming.

Ba, ton nang aryi, ‘Se, a mabwe, nun atei tamuboka yandarur o, tamuboka yandarur o,’ eboka uram donmangnyi bok asi,

ninyi ton kekeboka tamuboka yangana kum kubkwaming.

9Niniwe atei deirinung dengna weik dinyi si emas araboka dobsekdobdarur.

Ba, sun ordana nang aryi atei wengyandoka, ‘Dengna weik dinyi si perak araboka dobsekwayeb o,’ nabdankwaming. ‘Akatei bona talena deirinung ara langkiboka deirinung asi nirya arabdobkwayeb o,’ nabdankwaming.

Ukutoto dinyi nirya ara teleb-teleb dinyi akwe nukmanto kum dinyi deirinung asi ur araboka dobsekdobdarur.

10Niniwe atei ara mar ordana nang aryi dakoka akeiamnyi atei. Akatei ara ninyi kum daneibdob atei kibmar.

Akatei ara ninyi singsing iya kum dansekyi ba, atei doramnyi olong dem buklobwe.

Sun Niniwe atei nang akata kanya boamnyi ani, ukuryok ara ilil kanya bonung.

Sun kutam mikib tuba kum kurur. Sun nong nirya ara sirim talerur.

Sun urasin ara baboua kwemdur.

11Minob Niniwe atei doamnyi talak ara mikib weik atei doamnyi.

Akatei ara bai kam singa ai dorande to kuboka mangkau asa kuramnyi.

Tonda, akatei ara yu kam singa nerkarkalirlon kam kurande keil siling um ato kuboka doramnyi ai.

Ara, bai kam singa ab bai kam singa ner ab sun mabwe ab ilil kuna kum uca mangkau kuraming ai ato kuramnyi.

Mangkou kuramnyi bok, sun mar ordana nang aryi wengyandoka akatei nirya asi dakoka akeibmai.

12Niniwe atei ara bai kam singa kurande to atei kuramwe. Ara, er mabwe yina kula boboka deiriryangarande ato kuramwe.

Ner kam aryi yuk-yuk kamyoa obkirikokabdiryi kula boboka er kuranci keil siling umbura bobde deiriryangarande

ani, er inirorande ai ababyi kula tobdobmariryok inirdarorande.

Sun Niniwe atei nang ara minob ura ato kuboka yu weik kuramnyi

bok, ordana nang aryi wengyandoka er atei nirya daksekmang.

13Kekenmandarur! Ni Iya Erebdobnyi, im ton tukwe ton kiknibmasinyi bira sun Niniwe nang mar bosinanyi kibmasin.

Ura, Niryi sun kongkong ebde ban dinyi ara uk dongobnyi ura, tulum yarurum ebdeibkwan.

Ba, sun Niniwe atei kam nang nirya asi ninyi ordan ya aryi obminikwan.

Sunci yuk atei nang bona dobdamunyi dinyi nirya ara tukwetam akiryi bunbun we ebdeibkwan.

Sun Niniwe uram ebdeiboka bokeibmamunyi nang aryi yuk atei-yuk atei nang dam bindoka, ‘Nun Niniwe atei nang aryi iyandoka sunsi obkwayeb,’ tuba kum kubkwaming,” ato eboka Er Iya Erebdobnyi biryi ebmou.

Currently Selected:

Nahum Uram 2: MTG

Highlight

Copy

Compare