Mikha Uram 6
6
Er Iya Erebdobnyi biryi lilibdeiboka, “Sun malyi kun dinyi ara ato kundarur ati wenebkwansin,” ebdeibmou uram deyok
6:1-16
1We, sun Israel nang a, Er Iya Erebdobnyi biryi ebdeibmasou uram asi diboka kekebdobdarur.
Sun tikokabmunci, mutuk konkon urasintam asi,
“Nunti ato kubdeibsurum,” eboka uram minibdongobdarur.
Ba, sun uram ara yimyim mutuk aryi ur kekebsunung.
2Er Iya Erebdobnyi biryi Er uram keken nang ati,
uram ton eboka minibdongobkwamar.
Erci sun Israel nang asi deyok ton lilibkwamar.
A deyok aryi, konkon mutuk ara Er Iya Erebdobnyi biryi,
“Ato kubdeibnindarur,” eboka minibdongobkwamar uram ara diboka kekebdarur.
Ba, tukwetam bukwe mutuk dika deibwe mutuk ara amol tang ebdeiboka Erci, eboka minibdongobkwamar uram asi diboka kekebdarur.
3Ara, ato, “Ni uram kekendarur nang a, Niryi sunsi una kusunun do?
Niryi sunsi una kubokabsiniryi, mambul kimdeirisunun do?
Sunci Nisi, ‘Ato kusurum,’ ebdenindarur.
4Sunda Mesir mutuk kurandau asi Niryi boyanmasise. Ara, ato kuboka boyanmasise.
A mutuk dam aryi sunsi bomenekwansei nang ara Niryi sun weit yabwe silib Musa ab Harun ab Miryam ab wibmase.
Ura, sunda mambul dorandau ai aryi Niryi lebdeibmasise.
5Ni mabwe nermabwe ara diboka kanya teneibdendarur.
Ara, minob talak aryi Moab mutuk weik sienyi si Balak biryi sunsi oryankwamasouci, kiknirminingmou.
Bok, kum oryanmasou, eda, Ni Imtamnyi biryi Beor mi si Bileam bisi liknibdongoboka kisal dakmasise dinyi asi kanya teneibdenkwandarur.
Ani, tonda Sitim mutuk aryi Gilgal mutuk yangarandau noutam aryi Niryi teleb kuboka lemdeiriransise dinyi asi kanya teneibdenkwandarur.
Ba, sunci Er Iya Erebdobnyi biryi diboka diblilibdeboka ukubde yanamwe asi bikokabmunci,
‘E, a ukuamwe dinyi ara ilil tenento dinyi diboka ukuamwe,’ teneibkwandum ati, diboka kanya teneibdendarur,” ebmou.
6Ton nang aryi ato eboka asibdenmang,
“A mabwa, niryi Er Iya Erebdobnyi nun Molonubnyi bisi bindoka Erti dama deiboka molobkwamanyi ura, unatoa deibdongoboka molobkwanun do?
Niryi Ersi molorbinkwamanyi ura, bisam lembu ukuryok nerkalkalirlon bisam kwalina tentok kubmaci bisam asi boboka uk dabniryok molobkwanun do?
7Er Iya Erebdobnyi bira Niryi bisam domba yim yubwa ilinto oboka uk darbitinyi asi, ‘Telebto kubmar,’ tenebkwamanute do?
Ato kum tenebnute.
Ani, co zaitun du yung meyok yubwa-yubwa ilinto bobitinyi ati teleb tenebkwamanute do?
Ani, niryi Er Imtamnyi uram dangbisin deyok ati, ni mining mi dunyi boboka Erti dama deirbinkwamatinyi asi teleb tenebkwamanute do?
Kum, ni malyi kun dinyi kilinina ati, ni ining kobdoba asi kira dobkwamatinyi ati teleb tenebkwamanute do?” eboka asibdenmang.
8Uca, niryi sunsi ato ebman, “Ato kuma. Eda, nun ninyi ati Erci teleb dinyi asi lak kimdeirisurur.
Ura, Er Iya Erebdobnyi bira nun ninyi asi unatoa molosurur do?
Erci nunsi utotoa ton kum molosurur.
Erda, Erci nun ninyi asi molosurur dinyi ara ato dinyi asi molosurur.
Ara, Er Iya Erebdobnyi urasin dam asi nun ninyi mamun asi kikimanto dinyi kununa asi molosurur.
Ani, tonda iya busul kuboka Er Imtamnyi ab ninyi mamun ab boukwe kimna dinyi ab asi arungsurur.
Ani, Er urasintam asi namin kanya aryi luknubdongoboka u dikum dinyi kununa asi Erci molosurur,”
ato eboka Mikha biryi ato ebmou.
9“Kekerandarur. Er Iya Erebdobnyi biryi weik atei asi namdur.
Er si asi ilil tenenanyi biryi uram dorur ati, sunci Er wenena uram asi kekeboka etekdobto dinyi kununa teleb.
10Ati, Erci sun weik atei nang asi ato erur. Niryi sun tola uram deib aryi bona talena dondarur ara Ni sirya eirisunun.
Ani, sunci malyi timbangan aryi kikliboka yuk nang co bok luluboka dorandum ara Niryi eiboka kum taklobsitinyi.
Sun ato kuramunyi nang ara Niryi sunsi wenebkwansin.
11Niryi sun malyi timbangan deirin nang asi eiboka kum taktinyi. Eda, Niryi sunsi wenebkwan.
12Akatei bona bon nang ara utotoa kum nang bimsa yarenung nang akwe kunung.
Akatei dam kunung nang nirya sun si bambul dam aryi tola uram akwe anarur.
13A deyok aryi ukuryok ara Nibabyi deyok kouboka sunsi kulabkalibmasin.
Sun mining malyi kun dinyi aryi sunsi kum daneibkwansin.
14Sunda kwaning ara yironmamunyi bok, bouna kum kunkwansir, eda iya atarmurunkwansir.
Utotoa boboka buluramunyi bok, diboka dukde deirina ara kum kunkwandum.
Ba, sunci utotoa boboka dukdeibdobkwandum dinyi ara Niryi sun mar ordana nang asi dobkarebkwan.
15Sunda yala kwengna ara kwengnamunyi bok, nong kin tam ara sun kum kibkwandum.
Ani, co zaitun du yung ara sunci urubkwandum bok,
sunci a co yung ara sunda yiboka, luboka kum kibkwandum.
Ani, anggur du yung ara sunci urubkwandum bok,
yina ara sun kum yibkwandum.
16A nirya kunubkwansir deyok ara sun damnyi ukun deyok aryi mambul dinyi bobkwandum.
Ara, sun damnyi aryi weik sienyi si Omri biryi erdeirin uram asi talebnuruboka kunundarur.
Ani, yu kasak biribdob weik sienyi Ahab ai ninyi ukuramnyi to dinyi asi milindarur.
A nangamse milibokabmunci sunci, ‘Ukubkwandarur,’ eandei to kunundarur.
A deyok aryi Niryi sunsi ninyi kum atei nang ato kibdeibkwansin.
Ba, akatei kundarur nang asi yuk atei nang aryi, ‘A bitabdarya,’ ebkwansing atei nang kibdeibkwansin.
Ato kuboka sunci yuk atei-yuk atei nang aryi ina ngilingna dinyi dobdobkwandum,”
ato eboka Mikha biryi kunumna uram ebdeibmou.
Currently Selected:
Mikha Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
