Mikha Uram 5
5
Ninyi Lemna Weik Sienyi yankwamwe deyok ati uram eboka kunubdeibmou uram deyok
5:1-14
1Er Imtamnyi biryi ato ebmou,
“Ba, Betlehem Efrata, kanda Yehuda mutuk donung atei nirya ara kanda mitikto atei donung.
Bok, Betlehem atei dam aryi Niryi sun Israel nang talebkwandanyi tentok anabdeibkwan.
Anyi bira minob yuma kobdob im tukwe kikninmou talak aryi kuramunyi bisi anabdeibkwan.#Mat. 2:6; Yoh. 7:42
2Ara, Er Iya Erebdobnyi biryi sun Israel nang ara sun mar ordana nang amwetam tuba kuramingnyi talak aryi,
a mi deibkwanci ner aryi mi mundu boboka deibkwande.
Ura, sun atei nang yuk mutuk boboka deilorbinamingnyi nang ara tamuboka sun ab, sun Israel sun mutuk dam kuroramingnyi nang ab tonkwa bulubdobkwaming.
3Ba, a mutuk talenanyi yaci ura, Erci Er Iya Erebdobnyi mikib aryi sun Israel nang asi kalikwande.
Ani, Erci nun Nai Imtamnyi, Iya Erebdobnyi si mikib aryi talebkwande.
Ba, im dangna tukwe dangna mutuk nang nirya aryi Er si asi si weik ererdeiramingnyi deyok aryi
sun Israel nang ara sun mutuk dam iya mangkau akwe kubmurubdobkwaming.
4Erda ninyi mangkau kun dinyi boyangananyi kibkwande deyok aryi mangkau kubdobkwaming.
Sun Asyur mutuk nang aryi nun Israel nang mutuk wengyankwaming ara nunbabyi mar dobkwayeb.
Ani, nun mutuk tukwe asi yan yanibdenkwaming ara nunbabyi,
nun mutuk nang tabaryi atei kalingna nang ab inbaryi atei kalingna nang ab asi arukdandoka mar bobkwayeb.
5Ba, a ninyi kalingna nang aryi Asyur mutuk nang asi ninyi on ya aryi obkwaming ara ku turaming to kubkabokwaming.
Sunci Nimrod mutuk nang ati, ninyi on ya doubtaleboka ibukwaming.
Asyur mutuk nang aryi nun Israel nang mutuk wengyankwaming ab,
nun mutuk tukwe dam asi yan yanibdenkwaming ara sunci nunsi lebdeibkwansing.
6Ura, Yakub deibdoba nang asi kabdongoamingnyi nang ara
yuk mutuk nang-yuk mutuk nang ilinto kankan kubkwaming.
A kubkwaming nang aryi yuk atei nang ati,
Er Iya Erebdobnyi biryi kisal dakoka belekuna mo doum-douma karerande ato nang kibkwaming.
Ani, Er Imtamnyi biryok yuk mutuk nang kisal dangna dinyi karebkwande ara Yakub deibdoba nang biriman aryi karebkwande.
7Tonda, sun Yakub deibdoba nang asi kabdongoamingnyi nang ara yuk atei nang-yuk atei nang ilinto kankan kubkwaming.
Ba, sunda bai kam si singa aryi yuk-yuk dinyi baitam kurande dinyi kankan kurande ato nang kubkwaming.
Ani, nerkalkalirlon bai kam singa aryi ninyi winin dinyi kambing ab domba ab mol kwabmangnyi kankan wengbarande ato nang kubkwaming.
Ara, bai kam singa aryi kambing domba kankan wengbindokabdiryi dobkirikoka talebci ura,
obde yirande ba, ninyi lemdeirina ton kum kuraming ato nang kubkwaming.
8Israel nang sun taruk aryi ereboka sun mar ordana nang asi mar bobkwandum.
Ba, sunsi yu boboka mar irdeiransingnyi ara nirya kum daneibkwandum,” ebmou.
9Ura, tonda ato Er Iya Erebdobnyi biryi ato ebmou,
“Ni Imtamnyi biryi a tum aryi sun bukoka ninyi mar ibaramunyi bisam kuda kum daneibkwan.
Ani, mar ordana nang boyiban ai ara bublikoka sici kibukwan.
10Niryi sun mutuk atei nirya kum daneibkwan.
Ani, sun ninyi mar iyangasina ati, kaliki bun ai nirya dalubsinibkwan.
11Ani, Niryi sun ninyi kir oramunyi mirei dinyi nirya sun taruk dam aryi kum daneibkwan.
Ani, sunci tola uram eboka, ‘Kunumna deib aryi ato kubkwansir,’ eramingnyi nang ara
sun kankan dam nirya kum daneibkwan.
12Niryi sun kwemdeina moloramunyi dinyi keil co aryi kikniboka moloramunyi dinyi ara kum daneibkwan.
Tonda sun kwemdeina molona ati, isa kinkin dam dongorbaramunyi ara
sun kankan aryi kum daneibkwan.
Ba, sunci ninyi taruk aryi kiknin dinyi ara tubto kum molobkwandum.
13Niryi sun kwemdeina moloramunyi dinyi abyokomna ingwelena ara
sun kankan dam aryi kwinibkabokwan.
Ba, sun kwemdeina dinyi ara kum daneibkwan.
14Ni uram asi kekena kum atei nang ara Ni yu asa ab,
Ni mundu kubmanici dinyi ab aryi sunbabyi tamuboka labasibkwan,” ebmou.
Currently Selected:
Mikha Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
