Mikha Uram 7
7
“Sun Israel nang sun kanya teleb boramingnyi dinyi ara wanikwaming,” eboka eterebmou uram deyok
7:1-6
1Ura, Mikha biryi ato ebmou, “Nai e, Ni mambul donun aryok se.
Ba, ni nong ara, doua li berekanci ba, kwaning atan-atan co du bulurbaraming ato kubnou.
Ani, co anggur du mouanci ba, dakoka nirya yibdamingiryi, kum dandanci talak buraming to kubnou.
Co anggur du kum, co si ara du kum asi yibmanto dinyi ton mouna kum kurande talak kuraming ato kubnou.
Ba, nira wenen dinyi mambul mitik kum bonun.
2Sun Er Imtamnyi uram asi diboka talernurun nang ara a mutuk dam aryi kum dansekyi.
Ani, sun kunusa dongna kum nang ara ninyi kununga kankan aryi tunim ebsekyi.
Sun mamun, ton nang aryi yuk nang asi, ‘Obkwayeb,’ teneramingnyi nang ara iboka kalingdanung.
Sun yuk-yuk sun mamun beneboka, ‘Obtibyi,’ tenen kwaning amtong kuna deirirdanung.
3Sunda yu dinyi ukuna ara taruk caknam birirur.
Ba, akatei sien nang ab, akatei nang malyi kun dinyi lilin nang ab ara dengna molobde yinung.
Akatei si sin nang ara yu dinyi ara ur kunun dinyi kibdeibokingnyi ura, kununa teleb dinyi ara yu dinyi kibdeiboka dangurminingnung.
4A nang nirya ara yu dinyi kunun nang akwe kunung. Sun kankan aryi ninyi tentoknyi biryi namin dinyi kununmaci ura, erbabyi tiling-tiling ingnintonyi kurur.
Ukuryok ara Er Imtamnyi biryi Er uram ermurun nang deici eboka kunubdeiamwe to kuboka ato malyi kun nang asi wenebkwande talak dam kubmar.
Er Imtamnyi biryi sunsi wenebkwande deyok ati sun ilil aryi sirim talebkwande talak dam kubmar.
5A mutuk nang nirya ara yu nang akwe kunung ati, sun kwit yabwe asi diba tenena mem.
Ani, sun kwit yabwe asi kanya deirina mem.
Sunci sun mining nerabwe kekenmasingnyi ai ababyi sun si akoka uram talyi sisikde yibana mem.
6Ara, ato ati ebmasin. Er mining mi aryi er nai bisi ina ngilingdur.
Ba, er mining nebnyi aryi er kwin bisi mar irdeirirur.
Ba, er mining kaibwa ner aryi yoka ner asi mar irdeirirur.
Sun mining ai ninyi asi mar ordana nang mar bordanung ati, kalikdandobdarur,” eboka eterebmou.#Mat. 10:35-36; Luk. 12:53
Sun Sion dub atei kuramnyi nang aryi, “Er Imtamnyi biryi lemna dinyi karebkwansir,” tenen dibde buramnyi uram deyok
7:7-13
7Sunda ato kurdanung bok, nunda kanya kankana kusina kum uca,
Er Imtamnyi bisi diba teneboka Er Iya Erebdobnyi biryi lemdeisina ati dibde bukwayeb.
Nun Nai Imtamnyi biryi nun molona kekeboka Erci lebdeibkwansir.
8We, nun mar bosindarur atei nang e, sunda kekerandarur.
Nunda sakoka tukwe ai maryurbinmabyi ababyi tubto bukalabokwamabibirya.
Ati, sun nun mar ordana nang ara sun kanya kilkil kusina mem.
Nunda kunuk kankan kuramibyi ababyi Er Iya Erebdobnyi bira nun berengna mililnyi kurur.
Ati, Erci nunsi berekeibkwamasirirya ati, sun kanya kilkil kusina mem.
9Nunda Er Iya Erebdobnyi urasintam asi malyi kunub.
A deyok aryi Erci nunsi yu boboka weneransici ani,
aminda ara Erci nun deyok ati mar doboka lilibdeibkwansir.
Sirya lilibdeibsici ura, Erci nunsi bobindoka berengna milil ai deirirbinkwansir.
Ba, nunda Erci lebmasici dinyi lak eibkwayeb.
10Ba, sun minob talak aryi nunti, “Sun Molondarurnyi, Iya Erebdobnyi bira dantam kurur do?” eboka ina ngilingnansingnyi atei nang ara
Er Imtamnyi biryi nunti mar dobkwansir dinyi sun asing eibkwaming.
Ba, sun alyi ati urasin taruk lilibdandobkwaming.
Ura, nunci dinmabyi ba, nun mar ordan atei nang asi muna kibdongoboka yan yanisitabkwaming.
Ara, bisik ai mintal yan yaniboka iliraming to kunmangnyi asi asing eibkwayeb.
11Uki tentok berekwande tum aryi Yerusalem atei lika tubto tamuboka dobdobkwayeb.
Ba, a tum aryi nun mutuk wiliba ara weiktoto tebdeiboka dobdobkwayeb.
12Ura, akatei nang asi yuk atei-yuk atei bindoka kuramingnyi nang nirya Yerusalem atei dam tamuryandoka bulubdobkwaming.
Ara, Asyur mutuk dam kuramingnyi nang ab,
Mesir mutuk dam kuramingnyi nang ab,
Efrat mutuk kuramingnyi nang ab,
weik me kwan kouboka dina katum-dina katum kuramingnyi nang ab,
mutuk kon dub ai kuramingnyi nang ab nirya bulubdobkwaming.
13Ato kubdobkwaming bok, im dangna tukwe dangna mutuk kuramingnyi nang malyi kun deyok aryi
tukwetam ara keil yok dem deiblobkwande.
Tonda, ninyi yu dinyi akwe kun deyok aryi utotoa kum dankwande ba,
mutuk yoka dem buklobkwande.
Mikha biryi, “Er Imtamnyi biryi sun Israel nang asi boukwe kiboka lebdeibte,” tenen uram sisikoka molobliknibmou uram deyok
7:14-20
14Mikha biryi ato eboka molobliknibmou,
“Nai, Imtamnyi, Kanci Kan uram keken nang asi kalikdum.
Kanci bisam domba kalingna kama doubdobminci Kan domba mer Kanbiramnyi kalikdum.
Kan bisam mer ara sun yuk baitam, co du wa in dam kunung asi kalikdum.
Ba, sunda minob talak Basan mutuk ab, Gilead mutuk ab kuramnyi nang aryi kuramnyi to asi sungsunga ur a yibde kuroranung.
15Minob talak aryi Kanci nunsi Mesir mutuk dam aryi boyangaransoumwe uca,
ilil tenen dinyi-ilil tenen dinyi ukuramoumwe to ukuryok ababyi tubto nun dam asi lak kibdeibsurum.
16Ba, sun im dangna tukwe dangna nang aryi a dinyi asing eibkwaming ati, Kanci ilil tenen dinyi tubto ukubderum.
Ba, sun mikib yaboka nunsi mar boransingnyi atei nang ara, ‘Nun mikib ara sirya malyi kibmasir,’ tenen sun alyi kubkwande.
Tonda, sun kanya ilil kubci ba, sun uram ebman kum aryi sun mining taruk aryi si bama moubtalebdandoka amol kinikdandobkwaming.
Ati, kanci ilil tenen dinyi kiknibderum.
17Ura, sunci sun kuramingnyi ai aryi Iya Erebdobnyi, nun Molokunubnyi, Kan dam yankwamangnyi ura,
sun ilil aryi sirim asa yangana teleb.
Ba, kwatima aryi amnyok dukoka tukwe borbosa yibde yibarande to kuboka yangana teleb.
Ani, tukwe deici balikde yibaraming keica ato kuboka Kan dam yangana teleb.
18Nai Imtamnyi Kan tentok asi nun malyi kun dinyi kilisurumnyi kurum.
Yuk nang ara Kan a kurum ato nang ton kunung.
Ani, Kanci wibmoumwe atei nang asi kablobdob nang sunci dangbisinung dinyi asi
luba kimdongdumnyi bitonyi bira unanyi kurur do?
Kanci, Kan mabwe asi yu borandim ara iya yu kum bormururandim.
Eda, Kanci iya busul kuboka boukwe weik kimnandim.
19Ati, Kanci nunsi tubto tamuboka boukwe kimdosina teleb.
Kanci nun malyi kun dinyi kilibsiminyi ura,
nun malyi kuramib dinyi nirya ara weik me kwan iya umbong ai asi donongdongna teleb.
20Ura, Kanci minob talak aryi nun abwe yabwe asi
iya busul kuboka boukwe kimnamoumwe to nunbabyi boukwe kimsina teleb.
Ara, Kanci nun abwe Yakub ab Abraham ab asi
uram ebkatabum ebdeiboka kunubdeiamoumwe dinyi asi
kanya teneibdeminyi ura, nunsi boukwe kimsina teleb,”
eboka uram sisikoka molobmou.
Currently Selected:
Mikha Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
