Imamat Uram 8
8
Musa biryi Harun ab, er mabwe ab asi imam nang tikeibkwamwe deyok
8:1-36
(Kel. 29:1-34)
1Ura, Er Iya Erebdobnyi biryi Musa bisi ato ebdeibmou. 2“Harun ab, er mabwe ab asi me kisok likeiboka imam nang tikeibkwamaminyi ati sunsi nabkwandum. Ani, tonda sun imam nang ongon aling ab, sun kisok lingdeirin me yung ab, malyi kun dinyi kilina ati bisam lembu yim ab, bisam domba yim bitinyi ab, roti kwaning bungbung ena dongona kum roti tower aling tentok ab kiknibminikwandum. 3Ani, sun Israel ninyi nirya asi, ‘Er Imtamnyi ai si Kemah Suci ai bisik bublan dam buluryandarur,’ eboka nabkwandum,” ebmou. 4Ba, Musa biryi Er Iya Erebdobnyi ebmou to kuboka sun Israel ninyi asi nabmou. Ba, Harun ab, er mabwe ab, sun Israel ninyi nirya ab ara Kemah Suci ai bisik bublan dam buluryanmai. 5Ura, Musa biryi sun Israel ninyi asi ato ebmou. “Er Iya Erebdobnyi biryi, ‘Imam nang asi ato kuboka tikeibdum,’ arukmanir ba, sunsi nabmasin,” ebmou. 6Ura, Musa biryi tubto ato ebmou, “Harun ab, er mabwe ab asi ni damtoto yandarur!” ebmou. Ba, Musa dam tingbinmai. Ba, sun nong deici asi me dikoka akmou. 7Sirya me dikoka akdeibmou ura, Musa biryi Harun bisi tebumna aling ab, akaling der aringna ab, alib ongon aling ab ongobdeibmou. Tonda, sun imam nang akwe ongoraming taram limni si efod ab, akaling sabya ab ersi ongobdeibmou. 8Ani, er Harun taram limni ongon aling karakeiboka eitam-outam yuk dukdongobmou. Ura, a ongobdeibmai taram ongon aling umbura asi yamin deirin dinyi si Urim ab Tumim ab kibdongoboka ongobdeibmou. 9Ani, Musa biryi Harun er kisok aringdan aling si serban kibdeibmou. A serban deici ara emas kweirya deibdongobmou. A serban deici emas deibdongobmou ara Er Iya Erebdobnyi biryi ebdeiamwe to kuboka, “Anyi bira Imtamnyi dinyi kibmar,” deibdongobmou. 10Sirya ato kuboka kibdeibmou ura, lingdeirin me yung dobmouci, Kemah Suci ab, Kemah Suci kuramwe bona nirya ab asi likeibnin yibinmou. Anda bona asi ato kubmou ara Er Iya Erebdobnyi dinyi ati kubmou. 11Ani, Musa biryi Er Imtamnyi biti dama deirin keil lamna ab, Er Imtamnyi biti dama deiriraming keica nirya asi a lingdeirin me yung aryi liki tabaryi dikoka akdeibnin yibinmou. A dama deiriraming keica ara baskom ab, uk sici don sekop ab, bisam tub deibdongoboka uk dan souna ab asi dikoka akdeibnin yibinmou. Tonda, taruk me ilingna sangkol baskom kat keil si tembaga aryi kikniamnyi sangkol ab, er yangamna ab ababyi likeibmou. Ato kubmou ara, “Er Iya Erebdobnyi dinyi kibdur,” tenen kubmou. 12Musa biryi ato sirya kubmou ura, Harun bisi sun imam besar wa doboka ibde binkwanci ati lingdeiraming me yung aryi mitikanun doboka kisok likeibmou. Harun bisi ato kubdeibmou ara, “Er Iya Erebdobnyi wa inanyi,” tenen kubdeibmou.
13Ura, Harun mabwe asi, “Ni dam yandarur!” ebmou ba, er dam binmai. Ura, Er Iya Erebdobnyi biryi ebdeibmou to kuboka Musa biryi Harun mabwe asi sun imam nang ongoraming aling nirya ongobdeibmou. Ara, tebumna aling ab, der kourdongon tabwe ab ongobdeibmou. Ani, kisok kaluna aling ababyi koubdeibmou.
14Ato kuboka sirya ongoboka kibdeibmou ura, sunsi ato eboka arukmou. Sun malyi kun dinyi kilisina ati bisam lembu yim boyandarur! Ebmou ba, sirya boyanmai ura, Harun ab er mabwe ab aryi a boyanmai bisam yim kisok deici sun taruk deibmai. 15Ura, a bisam ngang sekmai. Ba, a bisam ining asi Musa biryi mitikanun er taruk du aryi dobtaleboka Er Imtamnyi biti dama deirin keil lamna dub yang belebdeibnin yibinamnyi sun urub nirya asi lubdeibnin yibinmou. Ato kuboka beterdongoramnyi asi me ilikmou. Ba, a bisam lembu ining weika nirya ara a Er Imtamnyi biti dama deirin keil lamna deyok dam asi dikoka aknabdongobmou. Ato kuboka me ilikmouci, yuk wiboka Er Imtamnyi dinyi kibdeibmou. 16Ani, Musa biryi a bisam lembu yim mundu ai alirande kob ab, boukwe ab, kiliruk bitinyi nirya ab, kob nirya ab doboka Er Imtamnyi biti dama deirin keil lamna dub uk dabmou. 17Bok, a bisam lembu yim er kala ab, tub ab, deisu nirya ab ara Er Imtamnyi ai dam aryi sakweteboka yuk dikum asi darbinmai. Ara, Er Iya Erebdobnyi biryi Musa bisi, “Ato kubkwandur,” ebdeiamwe to kuboka kunubmou.
18Ura, Musa biryi tubto, Harun ab er mabwe ab asi, “Er Imtamnyi biti oboka uk dabkwaman bisam domba yim kisok deici sun taruk deibdarur,” ebmou. 19Ura, Musa biryi a bisam domba yim ngang sekmouci, Er Imtamnyi biti dama deirin keil lamna deyok asi a bisam ining dikoka aknabdongobmou. 20Ba, a bisam domba ara a dama deirin dinyi kuamwe to alya yuk-yuk kuboka touboka deibmai. Ura, Musa biryi a bisam kisok ab, a touboka deibnin yibinmai tub ab, kob ab nirya a dama deirin keil lamna deici deiboka uk dabmou. 21Bok, deisu ab, biryok ab ara me ilikoka a bisam domba yim nirya dama deirin keil lamna deici deiboka nong uk dabmou. Ato kuboka Er Imtamnyi biti bisam domba oboka uk dabmou. Ba, Er Iya Erebdobnyi a bisam siltong teleb yubmouci, kanyi deibmou. Ato kuboka Musa biryi Er Iya Erebdobnyi ebdeiamwe to kunubmou.
22Ura, Musa biryi Harun ab er mabwe ab asi ato eboka arukmou, “Sun imam nang tingdeirina ati dama deirin bisam domba yim ton boyandarur!” Boyanmai ura, “Sun taruk a bisam domba yim kisok deici deibdarur!” ebmou ba, sun taruk a bisam deici deibmai. 23Ba, a bisam domba yim asi Musa biryi ya ngang sekmou. Ura, a bisam ining mitikanun doboka Harun er siriktam amol dolona asi likeibmou. Ani, Harun er siriktam taruk amwe ab, er siriktam yan amwe ab asi a bisam ining aryi likeibmou. 24Ura, Musa biryi tubto Harun mabwe asi, “Ni dam yandarur!” ebmou ba, er dam binmai. Ura, sun siriktam amol dolona asi a bisam ining aryi mitikanun doboka likeibnin yibinmou. Ani, a mabwe sun siriktam taruk amwe ab, sun siriktam yan amwe ab asi a bisam ining aryi likeibnin yibinmou. Ba, a kablobmai bisam ining nirya ara Musa biryi dama deirin keil lamna deyok dam nirya asi dikoka aknabdongobmou. 25Ba, a bisam domba er kob ab, er amwe borande mita ab, mundu akurande kob nirya ab dobmou. Ani, a bisam er boukwe ab, er kiliruk dam kob ab, er yan borande mita nirya ab dobmou. 26Ani, tower aling umbura aryi roti bungbung ena dongoboka kiknina kum roti kisok, Er Iya Erebdobnyi dama deibmai kwaning asi tokol tentok dobmou. Ani, roti tokol zaitun me yung aryi likdongoboka kiknibmai roti tentok ab, mitik ilil roti ab dobmou. Ura, anda dobmou roti ara a bisam domba kob ab, a bisam siriktam yan mita deici ab asi deibmou. 27Ura, anda nirya ara Harun ab, er mabwe ab taruk tatang deici deibmou. Deibdongobmouci, Er Iya Erebdobnyi urasin dam asi taruk erebtaleboka amuboka dama deibmai. 28Sirya ato kubmai ura, Musa biryi a bisam mita ab, roti ab sun taruk tatang deici aryi dobmou. Dobmouci, a nirya ara Er Imtamnyi biti dama deirin keil lamna dub Er Imtamnyi biti dama deiboka uk dabmou. Ato kuboka sun imam nang tingdeirina ati dama deirin dinyi uk dabmou. Ba, Er Iya Erebdobnyi biryi siltong teleb yubmouci, er kanya kubmou. 29Musa biryi ato kuboka sirya dabmou ura, tubto a bisam domba taram dobmouci, Er Iya Erebdobnyi urasin dam asi douboka amubmouci, molobmou. Ara, sun imam nang tingdeirina dengna ati Musa biryi a bisam taram ara er dobdobmou. Ara, Er Iya Erebdobnyi biryi Musa bisi ebdeiamwe to kuboka kunubmou. 30Ani, Musa biryi tubto lingdeirin me yung ab, dama deirin keil lamna deici likeibmou bisam ining ab mitikanun dobmouci, Harun ab, er mabwe ab ongon aling deici asi dikoka akdeibmou. Musa biryi Harun ab, er mabwe ab sun ongon aling asi Er Iya Erebdobnyi biti dama deirina ati kikiman kibdeibmou.
31Ura, Musa biryi Harun ab, er mabwe ab asi ato ebmou. “Er Iya Erebdobnyi biryi, ‘Harun ab, er mabwe ab aryi a bisam tub ab, dama deibmangnyi tower aling umbura roti kwaning ab yibkwanung,’ ebdeibsou. Ati, sunci a dama ara, ‘Kemah Suci ai dam asi yuboka yibde bankwandarur,’ ebdeibsou to kuboka yirbindarur! 32Yinmamunyi ani, boubsiriba, taklobmunyi bisam tub ab, roti kwaning ab ara uk dabmamunyi ba, nirya uk yiboka sici kibkwandur. 33Sun imam nang tikeibmasinyi uk talak ara uki tabaryi nirya Er Imtamnyi ai Kemah Suci ai dam a kunkwandarur. Bana mem. 34Er Iya Erebdobnyi biryi ebdeibsou ba, arub a kunmab to kuboka iya kubde bankwayeb. Ba, Er Iya Erebdobnyi biryi nun malyi kun dinyi kilibkwansir. 35Ati, kitingtam lukunda uki tabaryi nirya ara Kemah Suci dam yibde kubkwandum. Er Iya Erebdobnyi biryi, ‘Ato kubkwandarur!’ ebdeibsou to kuboka diboka-diboka kunubkwandarur! Asi diboka-diboka kum kunubmunyi ura, dibkwandum,” ebdeibsou ebmou.
36Ba, Harun ab er mabwe ab aryi Er Iya Erebdobnyi biryi Musa deici asi, “Ato kubkwanung,” ebdeiamwe to kuboka kunubmai.
Currently Selected:
Imamat Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
