Imamat Uram 7
7
“Er Imtamnyi biryi nun malyi kun dinyi kilibsute,” tenen bisam domba oboka uk dana si Korban Penebus Salah deyok
7:1-10
1Ura, Er Iya Erebdobnyi biryi Musa bisi ato ebmou, “Ara, ‘Er Imtamnyi biryi nun malyi kun dinyi kilibsute,’ tenen bisam domba oboka uk dana deyok ara ato kuboka dama deibmunci, uk dankwandarur. A dama ara iya lek dama ati ato deiboka uk dabkwandarur. 2A, ‘Nun malyi kun dinyi kilibsute,’ tenen deirin dama ara bisam domba oboka uk daramingnyi dikum asi dama deiboka uk dankwandarur. Ba, a bisam domba er ining ara dama deirin keil lamna amwetam asi dikoka aknankwanung. 3Ba, a bisam domba er mita nirya ara dama deiboka uk dankwanung. Ara, amwe ai borande mita nirya ab, mundu ai borande mita nirya ab ara dama deiboka uk dankwanung. 4Ani, kiliruka bitinyi nirya ab, a kiliruka ai borande mita nirya ab, mirikna ai borande mita nirya ab, boukwe bok to eranda dinyi nirya ab ara dama wibdeiboka uk dankwanung. 5A nirya ara sun imam nang aryi dama deirin keil lamna dub deiboka, Er Iya Erebdobnyi biti uk dankwanung. Ara, ‘Ninyi malyi kun dinyi asi kilibsute,’ tenen ati bisam domba oboka uk dan dama ara ato kunkwanung. 6Ba, anda dama deibmangnya kablobingnyi dinyi ara sun sal imam nang yinkwanung. A yinkwamingnyi dikum ara beterdongona mem dikum akwe deiboka yinkwanung. Anda deibmangnyi dama ara sirya lek dinyi kibmaci deyok aryi beterdongona mem dikum akwe deiboka yinkwanung.
7Ba, sun malyi kun dinyi lemsina ati deirin dama kuramunyi to kuboka sun malyi kun dinyi kilisina ati deirin dama babyi ato kunkwandarur. A bitinyi dama deirina ati, ‘Ato kunkwandarur,’ a tentoka uram ebdeibsou. Ba, a deibmamunyi dama kablobmunyi dinyi ara sun Er Imtamnyi biti a dama deiboka molorlikninmasingnyi imam nang dinyi kimnikwandur. 8Ani, a deirirbankwandum dama bisam kala ara sun a bobinmamunyi dama deiboka molorlikninmasingnyi imam nang dinyi kimnikwande. 9Tonda, yina-yina bita uk daboka yuna kum kubmamunci, deirirbinmamunyi dama ababyi sun a inmangnyi imam nang dinyi kimnikwandur. 10Bok, sunci kum yubmamunci deirirbinmamunyi yuk-yuk dama ara sun Harun mabwe imam nang a nirya neiktoto kuboka bongdonkwanung. Ara, minyak aryi tabtabukmamunyi yina-yina babyi, kum tabtabukmamunyi yina-yina babyi neiktoto bongdonkwanung.” Musa biryi sun Israel ninyi asi ato ebmou.
Er Imtamnyi bisi, “Nun babya,” eboka bisam domba oboka yina tonkwa yin dinyi si Korban Keselamatan uram deyok
7:11-21
11“Ara, sun Israel ninyi aryi Korban Keselamatan aryi, Ni Iya Erebdobnyi biti dama deibkwanumunyi ura, ato kubkwandarur. 12Ara, sunci Niti, ‘Nun babya,’ eboka kiron dinyi ati dama deibkwanumunyi ura, bisam lembu kum, bisam domba kum asi oboka uk dabkwandarur. Tonda, sunci bungbung ena dongona kum roti kwaning amuma asi boyankwandarur. Ara, kisok roti asi tepung ab, minyak zaitun ab aryi dongoboka kiknibmangnyi roti asi boyankwandarur. Tonda, ila roti asi minyak zaitun aryi lubmangnyi roti ab, telebto tepung ab minyak zaitun aryi tabtabukoka kiknibmangnyi kisok roti ab asi, Niti dama deibkwanindarur. 13Tonda, a talak aryi roti bungbung ena si ragi dongobmamunyi kisok roti ababyi Niti, ‘Nun babya,’ eboka kiron dinyi ati boyankwanindarur. 14Anda boyanmamunyi roti kwaning nirya aryi, tentok-tentok yuk wiboka, Er Iya Erebdobnyi biti deibkwandarur. Ba, a wibdeibmamunyi roti kwaning ara sun lemsina ati dama deibmamunyi bisam ining asi, sun imam nang aryi doboka dikdongobinyi ura, sun dinyi kibkwande. 15Ba, Imtamnyi bisi, ‘Ei ni Nai,’ eboka dama deibmamunyi bisam tub ara yuk wibdeiboka, er a boyanmarinyi ab, er ai ninyi ab dinyi kibkwande. Sunci a bisam tub yinmamunyi asi, kwel deibde yina mem. Eda, a dama deinmamunyi tum aryok nirya yibkwandarur.
16Bok, ‘Ukubkwankin,’ eanci dinyi ab, er kanya mundu loboka dama deirin dinyi ab ati, bisam domba Niti dama deibmamunyi ura, ur kwel deiboka uki bitinyi aryi yibkwandarur. Bok, uki winiryi bisibci ura, yina mem! 17Eda, a kablobmamunyi bisam tub ara nirya uk dabkwandarur. 18Bok, a bisam tub asi uki winiryi bisibmaci bok, tuba deibde yiramunyi ura, a dama deiriryanmarinyi bisi, Ni Iya Erebdobnyi biryi kanyi deirina kum kubkwanun. Tonda, a dama deibmaci dama ara kunuboka ersi kum lebdeibkwanun. A dama deibmaci dama ara Niryi dina ara duknasi kubkwanurur. Unanyi biryi a bisam dama asi, uki winiryi bisibmar bok, yibmaci ura, ikin dinyi er dam yankwande. 19Ba, a dama bisam tub ara Er Imtamnyi urasintam aryi duknasito dinyi dubmaci ura, yina mem! Eda, a nirya uk dabkwandarur. Niryi lek kibdeianyi nang nirya aryi, ‘Imtamnyi biryi lebkwansir,’ tenen dama deibmanumunyi bisam tub ur yibkwanung. 20Bok, Ni urasin aryi duknasi bol boramingnyi nang aryi, a dama asi yibmangnyi ura, anyi bira obkabkwandarur. 21Ba, unanyi biryi duknasito dinyi asi bolianci ura, erdamnyi ababyi duknasito bol bobkwandur. Ara, dimni nang bolianci kum, nerabwe bunga ining bolianci kum, yina mem kamyoa kum yirandiryok asi, Niti dama deibmaningnyi bisam yibmaci ura, duknasito dinyi kunubmaci deyok aryi, anyi bira obkabkwandarur,” ebmou.
“Bisam domba mita ab, ining ab asi yina mem,” ebmou deyok
7:22-27
22Ura, Er Iya Erebdobnyi biryi Musa bisi ato ebmou. 23Sun Israel ninyi asi bindoka ato ebdum, “Bisam lembu kob ab, domba kob ab, kambing kob ab ara sunci yina mem. 24Ani, er yuk dibmaci kamyoa kob kum, sun kamyoa mamun aryi obdanmangiryi dibmaci kamyoa kob kum ababyi sunci yina mem! Eda, uk ubna uk ardeirina kum, nong bol lurdan dinyi kum asi ur da ukubkwandarur. 25Ba, Er Iya Erebdobnyi biti dama deiboka uk dabmangnyi winin bisam kob asi yibmamunyi ura, sun kankan dam aryi, sun a yibmangnyi nang asi obkabkwandarur. 26Ani, sun Israel ninyi kurandum dam nirya aryi maka ining babyi, bisam ining babyi, kamyoa ining nirya ara yina mem. 27Niryi sunsi, ‘Kamyoa ining ara yina mem,’ eanyi dinyi asi yibmangnyi nang ara sunci obkabkwandarur,” ebmou.
“Imtamnyi biryi lebdeibkwansir,” tenen dama deibmangnyi dinyi asi boboka imam nang ton karen dinyi deyok
7:28-38
28Er Iya Erebdobnyi biryi Musa bisi ato ebmou. 29“Sun Israel ninyi asi ato ebdum. Ara, ‘Ni Erebdobnyi biryi lebkwansir,’ tenen ati bisam oboka dama deibkwamamunyi ura, sunci ato kuboka dama deibkwandarur. Ara, a deirin dama aryi, ‘Iya Erebdobnyi biti dama deibkwayeb,’ tenen dinyi yuk wiboka deibkwanindarur. 30Ani, lemdeirisina ati, Niti dama boyandoka uk dabkwamamunyi ura, yuk nang deici deirina mem. Eda, sun damnyi taruk aryi, Er Iya Erebdobnyi urasin dam boyamunci ereboka amubmunyi ura, deibkwanindarur. Ara, bisam mita babyi, bisam taram alya babyi bobinkwanung. Ba, bisam mita ara dama deiboka uk dabkwanung. Ba, bisam taram alya ara doubtalebingnyi ura, boboka kinkanikwanung. Ato sirya kubingnyi ura, sun imam nang asi karebkwanung. 31Ba, sun imam nang aryi a boyanmamunyi bisam kob asi, Niti dama deirin keil lamna dub deiboka uk dankwanung. Bok, bisam taram langakmamunya ara Ni Iya Erebdobnyi urasin dam ereboka amubmunci, sun imam nang Harun ab, er mabwe ab sun yin dinyi ati karebkwandarur. 32Ba, ‘Imtamnyi biryi lebkwansir,’ tenen deibmamunyi bisam aryi, siriktam yan alya ababyi, sun imam nang ati karenkwandarur. 33Ara, a bisam mita asi Harun mabwe bok mi tentok aryi Er Imtamnyi biti a bisam ining asi dama deirin keil lamna dam dingmarinyi biryi a bisam alya siriktam yan ara er dinyi kimnikwandur. 34Ara, sun Israel nang aryi, lemna dinyi ati dama deibmamunyi bisam nirya aryi taram alya ab, siriktam yan alya ab ara, ‘Harun ab, er mabwe ab ati sengdeirinkwandum,’ eboka iya kibdeibman. Ba, ato kuboka sun Israel ninyi aryi ukubmurubde bankwandum. 35Ara, sun imam nang Harun ab, er mabwe ab tingdeirinman tum ababyi bisam alya bitinyi doramnyi. Ara, bisam taram alya babyi, yan alya babyi doramnyi. 36Ara, Harun ab, er mabwe ab tikeibmamunyi tum aryi, sun Israel nang aryi a bisam alya bitinyi boyandoka sunsi karenkwandarur. Ni Iya Erebdobnyi biryi Israel ninyi ati a ebman to kuboka, odei-odei nirya kunubde binkwaming.
37Ara, Ni Imtamnyi biti bisam domba nong nirya dama deiboka uk dan dinyi ab, yina-yina dama deirin dinyi ab, ‘Nun malyi kun dinyi kilibsute,’ tenen bisam oboka uk dan dinyi ab, ‘Er Iya Erebdobnyi biryi nun malyi kun dinyi aryi lebdeibsute,’ tenen dama deirin dinyi ab, sun imam nang tingdeirina ati dama deirin dinyi ab, Er Imtamnyi bisi, ‘Nun babya,’ eboka bisam domba oboka yina tonkwa dama deirin dinyi ab ara ato ebman.” 38“Sun Israel nang aryi, ato-ato kuboka Niti dama deibkwanindarur,” eboka Er Iya Erebdobnyi biryi Musa bisi mutuk Sinai kon dam aryi ato ebdeibmou.
Currently Selected:
Imamat Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
