Imamat Uram 6

“Yuk nang bona bobloamunyi asi Er Imtamnyi biryi kilibsute,” tenen dengna si Korban Penebus Salah uram deyok

6:1-7

1Ura, Er Iya Erebdobnyi biryi Musa bisi ato ebdeibmou. 2“Unanyi biryi sun yuk nang bona bobloandur kum? Yuk nang bona ukula doandur kum? Yuk nang aryi, bona tiya karebmangnyi asi iya deiboka darabdandur kum? Er kwit yabwe si ablakoka doranci bona kum? 3Sun bona wanikmangnya asi doanci bona kum? Tola uram ebdeiboka doranci bona kum? 4Anyi ato kuranci ura, erda malyi dinyi kunurandiryi kurandur. A deyok aryi, erci a kuranci dinyi nirya ara sun dam nang asi tamubkarebkwandur. 5Tonda, anda doanci to kikliboka tamubkarebmariryok, bona olong amubaryi kiboka deibkwandur. Ba, bona koubni olong tentok tabakdongoboka sun dam nang ati karebkwandur. Ara, domba bisam oboka, ‘Ni malyi kun dinyi kilibnurur,’ tenen Ni Imtamnyi biti dama deibkwamamunyi tum aryi sun dam nang asi tabakdongoboka karebkwandur. 6Er malyi kun dinyi ati, Er Iya Erebdobnyi biti dama deibkwamaci ura, yim bisam domba nong bol tungdena kum bisam asi boyankwandur. Ara, Er Imtamnyi dama deirina ati kikiman bisam asi sun imam nang dam boyankwandur. 7Ba, sun imam nang aryi dama deiboka molobliknibkwanung. Ba, Er Imtamnyi biryi anyi er malyi kun dinyi libdobkwandur.” Musa biryi sun Israel ninyi asi ato kunkwandarur ebmou.

Er Imtamnyi biti domba bisam oboka nong nirya uk dana deyok

6:8-13

8Ura, Er Iya Erebdobnyi biryi Musa bisi ato ebmou. 9“Niti dama deirin nang Harun ab, er mabwe ab asi ato ebdum. ‘Uk daboka Niti dama deibkwanurum dinyi ara ato kubkwandarur. Niti dama deiboka uk dabkwamunyi dinyi ara Ni dama deirin keil lamna deici asi a dablobmamunyi tok asi inibmaci ani berekwandur. Ba, Niti dama deirin keil lamna dub dabmamunyi uk ara iya angmurunkwamarur. 10Ba, Niti dama deirin nang ara kait bol ongon aling si lenan aryi wiamingnyi ongon aling ongonkwanung. Ba, dertam ongon aling ababyi lenan aryi wiamingnyi dinyi akwe ongonkwanung. Ani, Niti dama deiboka uk danmangnyi ani, uk sirya yibkolobci ura, sici ara luboka Niti dama deirin dungna kubkub dinatam asi tiya ati a deirirbinkwanung. 11Ani, kait ongon aling ongobmangnya kwiribdeibingnyi ura, yuk ongon aling ongobkwanung. Sirya ongobdobingnyi ura, a uk sici Ni ai dam aryi bosakweteboka, uk sici donongbaramingnyi dikum asi boboka donongbankwanung. 12Ba, Er Imtamnyi dama deiboka uk dan keil dungna dub asi, Er Imtamnyi biti dama deiboka uk danmangiryi, sekmangnyi uk ara diboka kalingkwandarur ba, tuba angmurunkwamarur. Ani, dama deirin keil lamna dub uk ara sun imam nang aryi kalingnikwanung. Ba, tangardena kum uca, tuba angmurunkwandur. Ba, Er Imtamnyi biti bisam domba nong nirya ab, sun malyi kun dinyi lebsute,’ tenen boyanmangnyi bisam kob ab ara belekuna aryi neika lelebdeiboka uk dabkwanung. 13Ba, Er Imtamnyi dama deirin keil lamna dub uk ara sun imam nang aryi tuba co dongoboka kalingnikwanung. Ba, a uk ara tangardena kum uca, tuba angmurunkwandur.” Musa biryi sun Israel ninyi asi ato ebmou.

Er Imtamnyi biti yina-yina dama deirin dinyi si Korban Sajian uram deyok

6:14-23

14Ara, Er Iya Erebdobnyi biti yina-yina dama si Korban Sajian deirinkwandum ara ato kuboka deirinkwandarur. “Ara, sun imam nang Harun mabwe aryi dama deirin keil lamna dam bingnyi ura, dama deiboka molonkwanung. 15Ura, sun Harun mabwe aryi a bobinmamunyi tepung teleb ab, zaitun du yung me ab asi te ongomna tentok aryi dobkwanung. Tonda, sun bobinmamunyi telebto tong co si kemenyan nirya asi dobkwanung. Ura, a dobmangnyi dinyi ara sun imam nang aryi dama deirin keil lamna dub deiboka uk dankwanung. Ba, a uk dabmangnyi ara mitikanun doboka dabmangnyi bok, Er Imtamnyi biryi eibokabdiryi teneibkwamaca ara, ‘Sunci weikanun karebmaning,’ tenenkwande. Ba, uk dabingnyi siltong teleb yubnyi ura, Niryi sun bobinmangnyi nang asi kanya deibkwansin. 16Ba, a dama kablobingnyi dinyi nirya ara sun Harun mabwe imam nang dinyi kimnikwandur. Ba, sun imam nang aryi a tepung teleb asi roti bungbung erande keica dongona kum roti kibdeiboka beterdongona mem dikum asi deiboka yinkwanung. Ara, sun ninyi ab Er Imtamnyi ab erdan dikum asi bobdeiboka yinkwanung. 17A kamlonkwaming dama nirya ara Er Imtamnyi biryi sun imam nang ati karenkwande dinyi kimnikwande. A dama ara iya lek dinyi kimnikwande. Ara, Er Imtamnyi biryi nun malyi kun dinyi kilibsute teneboka deirinkwandum dama ab Korban Penebus Salah ab aryi lek dama kimnande to kunkwandur. 18Ba, anda kamlonkwaming dama nirya ara sun Harun mabwe imam nang yinkwanung. Ara, odei-odei ukubde binkwaming to ati Er Imtamnyi biryi, ‘Ukubde binkwandarur,’ eboka iya kibdeibsou. Ba, sun yuk nang aryi a dama asi bolibmangnyi ninyi ara a lek mikib aryi sun tenebman kum dinyi doronkwaming,” ebmou.

19Ura, Er Iya Erebdobnyi biryi Musa bisi ato ebdeibmou. 20“Ara, Harun ab, er mabwe ab asi kisal dakoka me asok likeiboka imam tingdeirinmangnyi tum aryi, Er Iya Erebdobnyi biti ato kuboka dama deibingiryi, molobde bankwanung. Ara, yina-yina dama deiboka uk dan dinyi bok, sunci iya ukunkwanung dinyi ara tepung teleb satu kilogram deibingiryi, uk daboka molonkwanung. Ara, meica kukoka dinatam ara belekuna dama deiboka uk dankwanung. Ba, ton meica kukoka dinatam ara sintam aryi dama deiboka dankwanung. 21Ba, a tepung teleb ara minyak zaitun ab tonkwa tabtabukoka kiknibmunyi ura, touboka-touboka yina-yina dama deirinkwandarur. Ba, a dama siltong teleb aryi, Er Iya Erebdobnyi kanya deirinkwandur. 22Ba, sun Harun mabwe imam nang ukuryok me kisok likeiboka kisal dakmangnyi ba, unubmangnyi imam aryi a tepung teleb dama doboka dama deiboka molonkwanung. Ani, a dama nirya ara Er Iya Erebdobnyi biti dama deibmunci, uk daboka molonkwandarur. Ara, Er Imtamnyi biryi, ‘Ato kubde bankwandarur,’ eboka iya kibdeibwe to kuboka kunubde bankwandarur! 23Ba, sun imam nang aryi nun malyi kun dinyi kilibsute tenen ati yina-yina dama deibmangnyi dama ara yina kum kunkwanung. Eda, a dama nirya ara Er Imtamnyi biti dama deiboka uk dankwanung.” Musa biryi sun Israel ninyi asi ato kuboka yina-yina dama deirinkwandarur ebmou.

Imtamnyi biryi, “Nun malyi kun dinyi kilibsurur,” tenen dama deirin si Korban Penghapus Dosa deyok

6:24-30

24Ura, Er Iya Erebdobnyi biryi Musa bisi ato ebmou. 25“Sun Harun mabwe imam nang asi ato ebdum. ‘Ara, sun ninyi malyi kun dinyi asi kilisina ati ebdeibsou. Sun ninyi malyi kun dinyi kilisin dama si Korban Penghapus Dosa ara minob uca, Er Imtamnyi biti bisam domba dama deiboka uk daramunyi dikum akwe bobimunyi ura, Er Iya Erebdobnyi urasintam aryi a dama bisam domba ya ngang sekwandarur. A dama ara iya lek dama deirinkwandarur. 26Ba, a lek dama asi kablobingnyi dama ara sun imam nang yinkwanung. Ara, Kemah Suci ai dam baitam keta asi bobindoka yibkwanung. 27Ba, a dama er ining lubting ara sirya lek dinyi kibkwamarur. Akiryi, sun a dama er ining lubting akmaci nang ara er a lek mikib aryi sunsi aminda obminikwandur. Ani, sun imam nang aryi a dama er ining sun ninyi ongon aling asi a bisam dama ining lubting akmasici ura, beterdongona mem dikum asi bindoka me ilingdongonkwandarur. 28Ani, tonda a dama yuna ara tukwe aryi kikniamingnyi ura, a yuna ara telebkabkwandarur. Ani, a yuna ara logam aryi kikniamingnyi ura, a yuna ara cuboka me aryi ilikwandarur. 29Ba, a lek dama kablobingnyi dinyi nirya ara sun imam sal nang aryi ur yibkwanung. 30Bok, a lek dama er ining dinatam ara sun imam nang aryi, Iya Erebdobnyi ai dam yuma ai umbura bobinkwanung. Bobingnyi ura, sun malyi kun nang ab Er Imtamnyi ab antanirdana ati sun imam nang aryi dama deiboka uk dabingiryi, molorlikninkwanung. Ba, a lek dama ining ara sun ninyi aryi ton yirdena kum kubkwanung,’ sun Harun mabwe imam nang asi ebdum.” Er Iya Erebdobnyi biryi Musa bisi ebmou.

Currently Selected:

Imamat Uram 6: MTG

Highlight

Copy

Compare