Imamat Uram 5

Ninyi aryi, “Imtamnyi biryi nun malyi kun dinyi kilibsurur,” tenen ati dama deirin dinyi si Korban Penghapus Dosa deyok

5:1-13

1Ura, sun Israel ninyi aryi teneboka kum kurongingiryi, Er Iya Erebdobnyi biryi, “Ukuna mem,” eboka yan memebdeianyi dinyi asi yan dakyanibingnyi ura, sunci, “Imtamnyi biryi nun malyi kun dinyi kilibsurur,” tenen dama deirin si Korban Penghapus Dosa dama deibkwandarur. Ara, ato, “Ura, sangkuna ninyi tentok aryi ninyi sumnimaci asi tonyi biryi eiboka a sumnimaci to kekebmarur. Ura, a kekebmarinyi bira sun malyi kubmangnyi to liliboka ikin kareraming nang dam bobinkwanung. Sirya bobingnyi ura, ‘Kan eiboka kekebmomwe to lak ebdum,’ ebkwanung. Uca, sun dam asi lak kum ebci ura, a submarinyi malyi kun dinyi ara a lak kum ebmarinyi ikin takubdobkwandur. 2Ani, tonda duknasito dinyi asi bolibmamunyi ura, sunda duknasito nang kibkwandum. Ara, ninyi aryi winin maka dibdoba lun bolibmandarur kum, bai kurande maka dibdoba lun bolibmandarur kum, taram deib yibarande dibdoba lun bolibmandarur kum ura, sunda malyi kuamunci nining ato nang kubkwandarur. 3Ani, tonda sangkuna teneboka kum kurongmunyi uca, sun kwit yabwe duknasito dinyi bolibmamunyi asi sirya bikdamunyi ura, sirya duknasito nang kubkwandum. 4Tonda, sunci sangkuna erongmunci dib en uram aryi ato ebkwamandarur. ‘Niryi diba ati malyi kun dinyi kum, teleb dinyi kum asi ato kuboka ukubkwan,’ ebkwamandarur. Ato kuboka ebmamuncok, aminda tam aryi bikdamunci, ‘Nai e, ni sirya malyito kuboka ebmonwe,’ tenebkwamandarur. 5Akiryi sunci ato kuboka malyi kubmamunyi ura, sunci ato ebkwandarur. ‘Nunci sirya malyi kun dinyi kunubmobwe,’ eboka lak ebkwandarur. 6Ato kuboka sirya lak ebmunyi ura, sun a malyi kubmamunyi dinyi kilisina ati Er Iya Erebdobnyi bisi bisam domba ner kum, bisam kambing ner kum bobinkwandarur. Ba, sun imam nang aryi sun ninyi ab Er Imtamnyi antanirdana ati dama deiboka molobliknibkwansunung. Ba, Er Imtamnyi biryi sun malyi kun dinyi kilinkwansurur.

7Bok, asi, sunda bona talen kum nang kuramingnyi ura, Er Iya Erebdobnyi bisi maka tekukur mi bitinyi kum, maka emnanyi mi bitinyi kum asi dama boyankwandarur. Ba, ton maka ara, ‘Er Imtamnyi biryi nun malyi kun dinyi kilibsute,’ tenen oboka uk dan dama deibkwandarur. Ba, ton maka ara Er Imtamnyi biti oboka nong nirya yalin dama deibkwandarur. 8Anda maka ara sun imam nang dam bobinkwandarur. Bobimunyi ura, sun malyi kun dinyi kilisina ati dama deirin maka ara sun imam nang aryi minob dama deiboka molobkwansunung. Ba, a maka ngang ara bubatikoka kotokwandarur bok, er kisok ara dangkana kum kunkwandarur. 9Ba, sun imam nang aryi sun malyi kun dinyi kilisina ati deibmamunyi dama ining aryi mitikanun doboka dama deirin keil lamna dangdang kubkub-kubkub asi dikoka akdeibnin yibinkwanung. Bok, a dama er ining nirya ara dama deirin keil lamna amwetam asi dikdongobde yibinkwanung. Ara, sun malyi kun dinyi kilisina ati dama deirin dinyi ara ato kunkwandarur. 10Ura, ton maka ara sun imam nang aryi tubto dama deirin keil lamna dub dama deiboka uk daramingnyi to kuboka dabkwanung. Sun imam nang aryi sun malyi kun nang ab Er Imtamnyi ab antanirdana ati ato kunkwanung. Ba, Er Imtamnyi biryi sun malyi kun nang malyi kun dinyi kiliboka lemnikwandur.

11Bok, sun a malyi kuamunyi nang aryi a maka mi bitinyi dobmanto kum kubsici ura, sun malyi kun dinyi kilisina ati telebto tepung satu kilogram baryi boyandoka dama deibkwandarur. A telebto tepung ara sun malyi kun dinyi kilisina ati dama deibkwamandarur. Ati a telebto tepung deici ara minyak zaitun kum, to teleb co yung kum deirirdena mem. 12Ura, sun imam nang dam bobinkwandarur. Bobimunyi ura, sun imam nang aryi te ongomna tentok aryi dobkwanung. Dobingnyi ura, dama deirin keil lamna dub deiboka Er Iya Erebdobnyi biti dama deiboka uk dabkwanung. Sun ninyi malyi kun dinyi kilisina ara ato kuboka dama deirinkwandarur. 13Ato kuboka sun imam nang aryi sun ninyi malyi kun dinyi asi kiliboka Er Imtamnyi ab antanirdeirisina ati dama deiboka molorlikninkwansunung. Ba, Er Imtamnyi biryi sun ninyi malyi kun dinyi lemkwansurur. Ba, a deirinkwandum dama karlonkwandum dinyi ara sun imam nang dinyi kimnikwandur. Ara, korban yina-yina deirin dama aryi kuramunyi to kubkwandarur.” Musa biryi sun Israel ninyi asi ato kuboka dama deirinkwandarur ebmou.

“Er Imtamnyi biryi ni malyi kun dinyi kilibkwanir,” tenen bisam oboka dengna si Korban Penebus Salah uram deyok

5:14-19

14Ura, Er Iya Erebdobnyi biryi Musa bisi ato ebdeibmou. 15“Sangkuna unanyi biryi Er Iya Erebdobnyi biti dama deiboka karebkwan tenen ati yuk wibdeianci dama asi kum kareryananci ura, ato kubkwandarur. Ara, Ni Iya Erebdobnyi biti yim bisam domba nong bol tungdena kum bisam domba asi, er malyi kun dinyi kilibkwamanya ati boyankwandur. Ara, Imtamnyi ai dam aryi, ‘Ikin do? Caknam do?’ tenen kiklirderaming keil perak kibdongoboka kikliraming to kikiman asi boyankwandarur. 16Ura, anyi bira minob, ‘Dama deirirbinkwan,’ tenen kiknibmariryok dama kum deiriryanmaci ura, Ni uram sirya dakbisibmariryi. Ati, a malyi kun dinyi, ‘Kilibnurur,’ tenen ati tubto dama deiriryankuci ura, domba bisam dengna asi olong amubaryi kiboka deibkwandur. Ba, co bok koubni olong tentok dekmanto co bok tabakdongoboka Niti boyankwandur. Ura, sun imam nang asi, a bobinmaci bisam ab, co bok ab karebkwandur. Ba, er malyi kun dinyi kilina ati, Niti dama deibningnyi ura, Niryi anyi er luba kiboka kum boyananci dinyi libdobkwanun.

17Ani, Ni Iya Erebdobnyi biryi, ‘Ukuna mem,’ eanyi dinyi asi teneirdena kum uca kunubmaci ura, erci Ni uram sirya dakbisibmariryi. Ati, er malyi kun dinyi ara ikin erbiramnyi takubdobkwande. 18Ura, anyi bira bisam domba yim nong bol tungdena kum bisam asi wiboka bobci ura, er malyi kun dinyi asi, ‘Libdobnute,’ tenen ati Nisi boboka dengyankwanurur. A bisam boboka sun imam nang dam boyaci ura, imam nang aryi Niti dama deirinkwanunung. Ba, Niryi anyi er malyi kun dinyi asi kiliboka Ni ab antanibdankwanunum. Ara, teneirdena kum uca, mem en dinyi dakbisibmaci deyok aryi, er malyi kun dinyi libdobkwan. 19Ara, Ni Iya Erebdobnyi biryi, ‘Ukuna mem,’ ebdeianyi uram dakbisianci dinyi asi, ‘Er Imtamnyi biryi kilibnute,’ tenen dama ara ato kuboka deirinkwandarur,” ebmou.

Currently Selected:

Imamat Uram 5: MTG

Highlight

Copy

Compare