Imamat Uram 4
4
Er Imtamnyi biryi, “Nun malyi kun dinyi kilibsurur,” tenen dama deirina si Korban Penghapus Dosa deyok
4:1-35
1Ura, Er Iya Erebdobnyi biryi Musa bisi sun Israel ninyi ati ato ebdeibmou. 2“Sun Israel ninyi aryi teneboka kuma, eda talyi ukunmangnyi uca, Er Iya Erebdobnyi biryi, ‘Ukuna mem,’ eboka yan memebdeianyi dinyi asi yan dakyanibingnyi ura, sunci ato kubde binkwanung. 3Ara, sangkuna Er Imtamnyi biti dama deirin nang sienyi, imam besar Harun biryi malyi kuranci deyok aryi sun Israel ninyi nirya ababyi a malyi kun ikin takubkwanung. Ato kuamingnyi ura, imam besar Harun biryi Er Iya Erebdobnyi biti bisam lembu yim ukuryok nerlonmaci bisam nong bol tungdena kum kubmaci bisam asi dama deiboka molorbinkwandur. Ara, er malyi kun dinyi kilina ati ato kubkwandur. 4A bisam lembu ara Er Imtamnyi ai Kemah Suci ai bisik dam Er Iya Erebdobnyi biti bobinkwandur. Bobici ura, a bisam kisok deici asi er taruk deibkwandur. Deibci ura, anyi biryi Er Iya Erebdobnyi urasintam aryi a bisam ya ngang sekwandur. 5Ura, er a kunmaci imam aryi a bisam lembu ining doboka bobci ura, Kemah Suci ai bowengbinkwandur. 6Bowengbici ura, er taruk du aryi a bisam sapi ining burukoka mitikanun dobkwandur. Dobokabdiryi, Er Iya Erebdobnyi urasintam asi liki tabaryi lubting akwandur. Ara, Er Imtamnyi kun ai weik ai ati yuk wilirdeirin dinyi tabir dam tam asi lubting akwandur. 7Ani, a bisam ining ara imam besar biryi Kemah Suci ai yuma ai dam asi tong teleb co yung uk dan dama deirin keil lamna er kisok yang dumbaryi belebdeiamingnyi urub-urub asi lubting akwandur. Ba, kablobci bisam ining ara Kemah Suci keta weik dama deirin keil lamna amwetam asi dikoka aknabkwandur 8Imam besar biryi a bisam lembu er kob nirya ara doboka yuk wibdeibkwandur. Ara, a bisam er mundu ai borande kob nirya doboka yuk wibdeinkwandur. 9Ani, a bisam sapi er kiliruk dina-dina ab, kiliruk alina ab, boukwe ab nirya ara Er Imtamnyi biti yuk wiboka dordeirinkwandur. 10A nirya ara Er Imtamnyi biryi, ‘Lebkwansir,’ tenen ati bisam domba oboka dama deiboka uk daraming to kuboka dama deiboka uk dankwandur. 11-12Ba, a bisam lembu teleb dinyi sirya wibmaci aryi, malyi dinyi wiboka uk darban dikum darbinkwandur. A darbinkwamaci ati wibdeibmaci dinyi nirya ara Er Imtamnyi ai dam aryi bosakweteboka uk sici donongbana ati minob yuk kiknibdeiamingnyi dikum asi bobinkwandur. Ara, a bisam lembu kala ab, kablobmaci tub ab, kisok ab, biryok ab, deisu ab nirya ara uk sici donongban dikum bobinkwandur. Bobici ura, co deici deiboka uk dabmaci ba, nirya sici kimkwandur.
13Ba, sun Israel ninyi nirya aryi teneboka kuma, eda sun utotoa asi ukurongingnyi uca, Er Iya Erebdobnyi biryi yan memebdeibwe dinyi asi dakbisibkwanung. 14Ba, yuk nang aryi sirya bikmangnyi ura, Israel ninyi nirya aryi bisam lembu yim ukuryok nerlonmaca bisam asi sun malyi kun dinyi kilina ati, Er Imtamnyi biti boyankwanung. Ara, Kemah Suci ai bisik bublan dam asi boyankwanung. 15Ato kuboka sirya boyamunyi ura, Er Iya Erebdobnyi urasintam asi sun Israel ninyi wisi yoka nang aryi sun taruk a bisam lembu kisok deici deibkwanung. Ura, a bisam lembu ya ngang sengkwanung. 16Ba, imam nang sun sienyi si imam besar biryi a bisam lembu ining boboka Kemah Suci ai bowengbinkwandur. 17Bowengbici ura, er taruk du aryi a bisam lembu ining dobokabdiryi Er Imtamnyi kun ai kobdob ati wilimna si tabir asi liki tabaryi lubting akwandur. 18Ani, a bisam ining ara imam besar biryi Kemah Suci ai dam yuma ai dam aryi tong teleb co yung uk dan dama deirin keil lamna dina-dina yang dumbaryi belebdeiamingnyi urub nirya asi lubdeibnin yibinkwandur. Ura, kablobci bisam ining ara Imtamnyi ai dam dama deirin keil lamna weik dinyi amwetam asi dikoka kinkanikwandur. 19Ura, a bisam kob nirya ara yuk wiboka dama deirin keil lamna dub dama deiboka uk dankwandur. 20A bisam lembu yim ukuryok nerlonmaci bisam ara ato kubde bankwandur. Ara, ninyi malyi kun dinyi kilina ati dama deirinkwandum bisam lembu aryi kubde yanmamunyi to kuboka a bisam lembu ababyi neiktoto ato kubde bankwandur. Ato kuboka imam besar biryi Er Imtamnyi ab, sun Israel ninyi ab antanirdana ati imam besar biryi ato dama deiboka molorlikninkwansurur. Ba, sun Israel ninyi nirya malyi kun dinyi ara Er Imtamnyi biryi kilinkwansir. 21Ura, a bisam lembu yim ara Kemah Suci ai dam aryi bosakweteboka uk sici donongbana ati minob yuk kiknibdeiamingnyi dikum asi bobinkwandur. Bobici ura, co deici deiboka uk dabci ba, uk yiboka nirya sici kimkwandur. Ara, sun Israel ninyi aryi sangkuna teneboka kuma, eda talyi ukurongmunyi uca, Er Imtamnyi yan memebdeibsou dinyi asi dakbisibmunyi ura, ato kuboka dama deirinkwandarur.
22Ba, sun a mutuk weik nang kiamingnyi aryi teneboka kuma, eda talyi kurongingnyi uca, Er Iya Erebdobnyi biryi, ‘Ukuna mem,’ eboka yan memebdeibsou dinyi asi dakbisiramingnyi ura, sunda malyi dinyi kununa nang kibkwanung. 23Sun a malyi kuramingnyi dinyi asi yuk nang aryi, ‘Sunda malyi kundarur,’ ebingnyi ba, sirya bikingnyi ura, Er Imtamnyi biryi sun malyi kun dinyi kilibkwanci ati, bisam kambing yim er nong bol tungdena kum kubmaci bisam asi boyangankwanung. 24Sirya boyangnyi ura, sun taruk nirya a bisam er kisok deici deibkwanung. Deibingnyi ura, a bisam ya ngang sengkwanung. Ara, bisam ya ngang sengna dikum ati minob uca, sirya yuk wibdeiamingnyi dikum dama deirin keil lamna dam bok, me utam kuboka akwe bobindoka ngang sengkwanung. 25Ato kuboka sirya ngang sekingnyi ura, imam besar biryi er taruk du aryi a bisam ining mitikanun likoka dobkwandur. Dobci ura, dama deirin keil lamna er yang dumbaryi nirya asi likdeibde yibinkwandur. Ba, a kablobci bisam ining nirya ara dama deirin keil lamna weik dinyi deyok asi dikoka aknabkwandur. 26Bok, a bisam kob nirya ara dama deirin keil lamna dub dama deiboka uk dabkwandur. Ara, imam besar biryi Er Imtamnyi biti sun ninyi lemdarona ati dama deiboka moloramunyi to kuboka dama deiboka molobde bankwandur. Ato kuboka imam besar biryi sun ninyi ab, Er Imtamnyi ab antanirdana ati dama deiboka molorliknibde bankwandur. Ba, Er Iya Erebdobnyi biryi sun a malyi kun nang malyi kun dinyi kiliboka Er mabwe nermabwe kibde bankwandur,” ebmou.
27Ura, Er Iya Erebdobnyi biryi Musa bisi tubto ato ebmou. “Unanyi biryi wa ton dona kum ninyi aryi, Er Iya Erebdobnyi biryi, ‘Mem,’ eanci dinyi asi teneboka kuma, eda talyi kurongci uca malyi dinyi kunubmaci ura, erci sirya yan dakbisibmariryi. 28A malyi kubmarinyi bisi ton nang aryi, ‘Malyi dinyi kunubmarim,’ ebingnyi ba, er kanya aryi, ‘Ara, malyi dinyi kunubman,’ tenebci ura, er malyi kun dinyi kilibkwanci ati bisam kambing ner nong bol tungdena kum bisam asi, Niti dama boyankwandur. 29Ura, anyi biryi Niti bisam oboka dama deirin dikum boyaci ura, a bisam kisok deici asi, er taruk deibdongoboka ngang sekwandur. 30Ura, Niti dama deirin nang sienyi imam besar biryi a bisam kambing ining asi er te dumwe aryi toubdongoboka Niti dama deirin keil lamna kubkub dina-dina dumbaryi belebdeibyi yang asi, likeibnin yibinkwandur. Ura, a bisam ining weika nirya ara Niti dama deirin keil lamna amwetam asi, dikoka aknabkwandur. 31Bok, malyi dinyi lemdarona ati dama deibmamunyi a bisam kob aryi wibdeibmamunyi to, sun malyi kun dinyi kilisina ati, bobinmamunyi bisam kob ababyi ato kubkwanung. Ba, imam besar biryi a bisam kob asi, Niti dama deirin keil lamna deici deiboka uk dabkwandur. Ba, a uk dabmaci siltong teleb yubnyi ura, Ni kanya teleb kubnici ura, a malyi kubmarinyi er malyi kun dinyi kilibkwan,” ebmou.
32“Ba, anyi biryi, ‘Imtamnyi biryi er malyi kun dinyi asi kilibnute,’ tenen ati, kilin dinyi dama boyankwamaci ura, domba bisam asi boyankwandur. Ara, nong bol tungdena kum kubmaci domba bisam, ner bisam asi boyankwandur. 33Ura, dama deiboka uk dan dikum boyaci ura, a bisam kisok deici asi, er taruk deibdongoboka obkwandur. 34Ura, imam besar biryi a domba bisam ining asi, er te dumwe aryi toubdongoboka Niti dama deirin keil lamna kubkub dina-dina dumbaryi belebdeibyi yang asi, likeibnin yibinkwandur. Ba, a bisam ining weika nirya ara Niti dama deirin keil lamna amwetam asi, dikoka kinkanikwandur. 35Bok, a bisam domba er kob nirya ara wiboka yuk deibkwandur. Ara, Ni Imtamnyi biryi, ‘Lebkwansir,’ tenen ati dama deirin dinyi aryi ukubkwandum to akwe, a dinyi ababyi neiktoto kob yuk wibdeibkwandur. Ura, imam besar biryi Niti dama deirin keil lamna deici deiboka uk dabkwandur. Ba, a uk dabmaci siltong teleb yubniryi kanya deibnyi ura, sun malyi kun dinyi kilibde binkwansin,” ebmou.
Currently Selected:
Imamat Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
