Imamat Uram 25
25
Kwalina uki tabaryi si Sabat kwalina deyok
25:1-7
1Ura, Sinai mutuk kon dam aryi Er Iya Erebdobnyi biryi Musa bisi, “Sun Israel nang asi ato ebdum!” ebmou. 2“Sangkuna sunci Er Imtamnyi biryi karebkwansir mutuk si Kanaan dam wengbimunyi ura, Sabat kwalina sirya dobci ura, sunci ato kubde binkwandarur. Ara, Sabat kwalina berekde binkwande nirya ara sunci a mutuk tukwe asi wa irdena kum kubkwandarur. Eda, sunci sun mutuk tukwe louboka ur kubde binkwandarur. 3Ba, kwalina uki nabaryi nirya ara sunci wa iboka koubmunci, sun co anggur cang taruk ara sekoka dola kwebde binkwandarur. Ba, co anggur du teleb akwe dakoka bulubde binkwandarur. 4Ba, kwalina uki tabaryi berengkwande tum nirya ara sunci wa ton kum ibdenkwandarur. Eda, sun mutuk tukwe louboka ur kubde binkwandarur! Ara, sunci sun gandum wa kum koubkwandarur. Tonda, sun anggur co te cang kum ababyi ton kum sekwandarur. 5A tabaryi berekwande kwalina nirya ara sunci yuk wa-yuk wa nirya kum ibdenkwandarur. Eda, Er Imtamnyi uki tum kibdeiboka sun wa in tukwe ababyi loubkwandarur. Ara, a kwalina uki tum ara sunci dangna kum kuamunyi anggur du babyi, te cang sengna kum co du wa babyi nirya dakoka, dola kwerdena kum kubkwandarur. 6Ani, sunci gandum wa iamunci, kouamunyi kankan aryi er yuk ardaranci dinyi ara sun ab kuramunyi nang ab tonkwa talyi bokoka yiboka kubde binkwandarur. Ara, sun ai wa irmilisin nang babyi, wa irmilisin nerabwe babyi, tingyangan nang babyi nirya ab tonkwa yibde binkwandarur. 7Ani, sun winin kamyoa babyi, sun mutuk dam kunkwaming winina kum kamyoa babyi nirya ara a mutuk tukwe aryi abkwande dinyi doboka yibde binkwandarur.
Tamubkarebdan weik kwalina si Tahun Yobel deyok
25:8-22
8Ato kuboka sirya kubmunyi ura, sunci tubto kwalina nungna Sabat tum nabaryi nukde baramunyi asi kwalina Sabat tabaryi kimbici ura, sunci a kuamunyi to kuboka kubde bankwandarur. Ara, sun Israel ninyi aryi nungdamunyi asi kwalina 49 baryi kimbici ura, sun wa ibde yirandum tukwe ara sunci lourinkwandarur. 9Ba, inbaryi wala tanggal 10 tum sun ninyi malyi kun dinyi kilisin tum berekci ura, sun atei nirya ara buu ena si trompet aryi buu ebkirikwandarur. 10Ba, kwalina 50 baryi tum ara sunci yuk wibdeiboka lek uki tum kirdeirinkwandarur. Ato kubmunyi ura, sun atei nang aryi sun yuk nang asi, ‘Nun deksindarur,’ eamunyi ba, dekansingnyi tukwe ara sunbiramnyi tamuboka dobdobkwandarur. Ba, sun Israel nang bok, sun yuk mutuk nang aryi, ‘Nun wa inkwansurum,’ eboka dekansingnyi nang ara tubto sun ai ninyi asi tamubkarebkwandarur. Ani, a kwalina berekmaci tum aryok sun kwit yabwe wa tukwe asi wa ibde yiramunyi ababyi sunbiramnyi tamubkarebkwandarur. 11Ani, sun yuk nang bona tamurkaren uki berekanci tum ara sunci sun wa iboka kouna mem! Ani, sunci gandum wa iamunci, kouamunyi kankan aryi er yuk ardaranci dinyi ara sunci sekoka neiktoto kibdeibkwandarur! Ani, tonda sun anggur co te cang dinyi ara sekabkwandarur ba, co du weikanun moubdankwandur. 12A berekmaci uki kwalina ara sun yuk wibdeiboka lek kwalina uki berengkwandur. Ati, a uki kwalina berekanci tum ara sun wa dam aryi kiamunyi kwaning babyi, co du babyi akwe yibkwandarur. 13Ani, a uki kwalina berekanci talak nirya ara sun wa nong dikum akwe bindoka kibmunci doyibde kubkwandarur.
14Ba, sun Israel nang mamun aryi sangkuna tukwe dektamubdandoka yirdaroramunyi ura, ton nang aryi ton nang dinyi asi mininga kungsinirdana mem! 15Eda, sangkuna sun kwit yabwe asi tukwe dekdobkwamunyi ara er yuma dekanci kwalina aryi nukde yanmamunyi ani, sun dekwamamunyi kwalina nungyamunyi ura, ‘Ukubaryi deknurum,’ ebingnyi ura, dekwandarur. Ani, a tukwe dekdobmunyi ura, wa iboka kibmunci, yibde baramunyi kwalina a nirya nukdeboka dekdankwandarur. Ato kuboka sirya dekmunyi ura, er tukwe damnyi bisi tamubkarebkwandarur. 16Ba, sun tukwe dekdamunci, kwalina weikanun yibde binkwamunyi ura, a tukwe dengna ababyi weikanun dekdankwandarur. Bok, a tukwe dekoka ibmunci, yibde binkwamunyi kwalina ara mitikanun ura, dengna ababyi mitikanun dekdankwandarur. 17Sun Israel nang mamun dinyi asi mininga kungdana mem! Eda, sunci Er Imtamnyi bisi ilil tenebmunci kuboka yibdorobinkwandarur. Ni tentok ara Iya Erebdobnyi sun molonindarurnyi kunun.
18Sun Israel ninyi aryi Ni Imtamnyi biryi sunsi, ‘Ato kubde binkwandarur,’ eboka sirya iya kibdeiboka ebdeibsise to asi talebnuruboka kunubde binkwandarur. Ato kubde bimunyi ura, sun mutuk dam aryi diboka kubde binkwandarur. 19Ba, sun a kubde binkwandum tukwe dam ara yina diboka yibmunci telebto akwe kubde binkwandum. 20Bok asi, sun kanyatam ara ato tenebkwandum. ‘Kwalina tabaryi tum berekwanda nirya ara sun Israel ninyi sun kouryirandum dinyi ara ton kiboka yina kum kubkwandum,’ ebsou. ‘Ati, a talak ara unatoa asi yiboka kubde binkwayeb do?’ ebkwandum. 21Bok, kwalina tabaryi wengbana kabul talak ara Nira Imtamnyi biryi sun wa irorandum dinyi asi kisal dakwansin. Ba, sun kwaning weik aboka mabkwansir ba, kwalina winiryi nirya yiboka kubkwandum. 22Ba, kwalina inbaryi wengbankwandum talak ara sunci wa iboka koubkwandum. Bok, minob deiamunyi kwaning aryi yibde iramunyi asi kwalina toubnibaryi wengbankwandum.” Musa biryi sun Israel nang asi ato kubde binkwandum ebmou.
Dekamunyi tukwe asi sunbiramnyi tamurkaren deyok
25:23-28
23Ura, Er Iya Erebdobnyi biryi Musa bisi, “Sun Israel nang asi ato ebdum!” ebmou. “Sunci, ‘A tukwe ara iya Er Imtamnyi tukwe kibkwande,’ tenebkwandarur. Er sun molonindarurnyi bira a tukwe damnyi kurur. Ba, sunda tingyangan nang bok asi, Ni Imtamnyi biryi, ‘Ur a tukwe taleboka wa ibde yiramunci, kurandarur,’ ebsou. 24Ba, sangkuna sunci tukwe dekwamamunyi ura, tukwe damnyi bisi molobmunci, dekdobkwandarur. 25Sun Israel nang kankan dam aryi sangkuna sun kwit tentoknyi ukutotoa nirya kum danabte. Ura, anyi biryi minob uca, er tukwe yuk nang asi dekaunte tukwe ara er bona kum aryi tubto dekturyi, tamuboka dorona kum kubte. Ura, sun ab tonkwa kurandaute yala nang aryi sun kwit bisi miliboka dekwandarur. Ba, sun kwit er tukwe erbiramnyi tamuboka dobdobkwandur. 26-27Ba, sun atei nang kankan aryi sun tukwe dam nang dengsinanyi ton kum kubingiryi, sunbiramnyi ababyi bona weik talebmunyi ura, sunbiramnyi dekdandobkwandarur. Ara, sun tukwe dam nang aryi yuk nang asi, ‘Nun tukwe deksurum,’ eamunyi ba, dekoka yirandinyi bisi sunci ersi tubto tamuboka dekmunyi ura, sunbiramnyi kibdobkwandarur. Ara, sun bona boblobdanamingnya ati tamurkarerdan tum aryi ato kuboka dekmunyi ura, a tukwe sunbiramnyi kibdobkwandarur. 28Bok asi tukwe damnyi biryi a tukwe dengna yianci to asi kum tamubkarebci ura, a tukwe ara a dekandinyi tuba ibde yiranci asi sun bona tamurkarerdan li tum dobkwandur. A li dobci tum ara a tukwe loubkwandarur. Ba, sun a tukwe dam nang ara sun tukwe sunbiramnyi kibdobkwanung.” Ara, Musa biryi sun Israel ninyi asi Er Imtamnyi biryi ebdeiamwe to kuboka ebkarebmou.
Dekamunyi ai asi sunbiramnyi tamurkaren deyok
25:29-34
29“Ba, ton yuk dinyi ara sangkuna keil aryi lika doboka aknabdongoamingiryi, weik atei noutam doamunyi ai ara yuk nang asi dekandarur. Sangkuna ato kuamunyi ai ara kwalina tentok kimbaci ura, tubto tamuboka sunbiramnyi dobdobkwandarur. 30Bok asi, akai damnyi biryi a kwalina tentok aryi erbiramnyi tubto tamuboka kum dekdobci ura, sun akai dekamingnyi nang sun ai kiboka sun deibdoba ai kibdobkwandur. Ba, sun bona boblobdanamingnyi tamurkarerdan kwalina li dobci tum ababyi er ai damnyi bisi tamurkarena kum kukwandur. 31Ba, mitik-mitik atei bok asi noutam doamunyi ai ara sun ai dam nang aryi tubto tamuboka dekwandarur. Ani, sun bona boblobdanamingnya tamurkarerdan kwalina li tum kwalina Yobel aryi sun ai dam nang asi tamuboka karebkwandarur. Ara, sun kwaning dobde yiron wa tukwe tamuboka karebkwandum to, mitik-mitik atei noutam doamunyi ai asi sun ai dam nang asi tamuboka karebkwandarur. 32Ba, sun Lewi yala nang kun dikum asi doraming ai ara sun Lewi yala nang dinyi kimkwandur. Akiryi sun kwit er ninyi tentoknyi biryi er bona kum ati akai asi dekoka yiandur. A yianci dinyi tamurkarena ara er kwit yabwe sun Lewi yala nang bona kubmarinyi biryi tamuboka dengkwanung. Ba, akai ara sun Lewi yala nang aryi tamuboka doronkwanung. 33Sun Lewi yala nang kuramingnyi dikum doramingnyi ai nirya ara iya sun yala nang dinyi kimkwandur. Ara, sun Lewi yala nang aryi atei noutam doamingnyi ai ara yuk nang dekdanung. Ato kuboka yuk nang aryi dekamingnyi bok asi, sunbiramnyi kum tamubkarebingnyi ura, sun bona boblobdanamingnya tamurkarerdan uki tum aryi tamubkarebkwandarur. 34Bok, sun Lewi yala nang kuramingnyi dikum tukwe otong ara yuk nang asi dengna mem! Ara, iya ati sun Lewi yala nang dinyi kimkwandur.” Musa biryi sun Israel ninyi asi ato ebmou.
Sun bona talena kum nang asi malyi kurminingdaming deyok
25:35-55
35“Ura, sun Israel ninyi kankan aryi sangkuna ninyi tentok er taleranci bona nirya kum danabdiryi, er kuntam diboka kubdobman kum kubci ura, sunci ersi miliboka bona karebkwandarur. Ara, sun tingyangan nang asi boukwe kimnandum to kuboka boukwe kibkwandarur ba, erbabyi sun bona talenmamunci, kunmamunyi to kuboka talebdiryi kubde binkwandur. Ba, sun kwit yabwe babyi, sun weit yabwe babyi ara teleb asa aryi sun ab tonkwa kubde binkwandarur. 36-37Sun Israel nang mamun kankan dam aryi ukutotoa tula kirikde bon nang kimna mem! Ara, sun kwit yabwe co bok kareamunyi bisik kum, kwaning dengni bisik kum aryi, ‘Tabakdongoboka tamubkarebnurum,’ eboka tula kiringni nang kimna mem! Eda, nun molonanyi bisi ilil tenebmunci, sun mamun kankan dam nirya ara teleb asa akwe kubde binkwandarur. 38Ni tentok ara Iya Erebdobnyi sun molonindarurnyi kunun. Niryi sunsi Mesir mutuk dam aryi bobdakde yanansise. Ara, Niryi sun Israel nang asi Kanaan mutuk karebsiniryi, ‘Sun molonanyi kibkwansununa,’ tenen ati bobde yanansise.
39Sun Israel nang kankan dam aryi sangkuna ninyi tentok er bona kum danabci ba, er nong dekdankuci ura, sunci ersi il wa dobde iraming nang aryi iraming to wa ara dimna mem! 40Eda, sun ab tonkwa kuramunci, sun dengna wa in nang kiboka sun wa inkwasunung ba, ersi dengnikwandarur. Ani, tingyangananyi kibdeiamunyi ba, sun wa irmilisinanyi kianci ani, sun bona boblobdanamunya tamurkarerdan li tum kimbinkwandur. 41Ato kubde iranci asi bona boblobdanamingnya tamurkarerdan li tum ara, ‘Kan mutuk tukwe dam bindobdum,’ ebkwanung. Ba, er ai ninyi nirya a kuramingnyi ai aryi anaboka sun atei bindobkwanung. 42Sun Israel nang ara Ni Imtamnyi wa don nang asi Mesir mutuk dam aryi bobde yananse. Ati sunda, sun talyi il wa don nang aryi dengnaming to kuboka dengna mem! 43Ani, sunci sun Israel nang asi il weik don wa dimna mem! Eda, sunci Imtamnyi bisi ilil tenebmuncok sun Israel nang asi namin kanya bobmunci, sunsi il wa dibkwandarur. 44Sunci sun weik il wa don nang dekdobkwamunyi ura, yuk mutuk-yuk mutuk nang akwe asi dekoka dibdobkwandarur. 45Ani, sun atei tingyandoka kuraming nang ab, sun mabwe ab ababyi asi ur dekoka sun weik il wa don mabwe kibdobkwandarur. 46A dekamunyi aryok sun mabwe nermabwe sun il wa don nang iya kibdobkwanung. Bok, sun Israel nang mamun ara ato kurdana mem!
47Ba, sun tingyangan nang aryi bona weik taleranung. A taleramingnyi kankan kuramunyi noutam aryi sun Israel nang bona kum dasici ba, sun a tingyangan nang asi ato ebkundarur, ‘Ni kum, ni ai ninyi kum asi kan il wa in nang kibkwankib ati dekdobsurum,’ ebkwandarur. 48-49Ato ebmunyi ura, sun tingyangan nang aryi sunsi ur dekwansunung. Ara, sun du weit kum, sun nai du weit kum, sun nai du weit mabwe kum, er ai dam nang yuk nang kum asi karebdamunyi ba, dekwansunung. Ato kuboka dekdanamunyi ba, sun yuk nang wa irmiliramunyi ani, sun bona weik talebmunci, sunbiramnyi dekdobmanto kubsici ura, dekdandobkwandarur. 50Sirya deksingnyi ura, a bona taleandinyi ab, sun ab aryi, ‘Ato kuboka dekde bankwankin,’ eboka sisikwandarur. Ara, er a karebdanmaci ba, dekmaci tum aryi kuboka il wa ibde binkwanci kwalina nirya nukdeboka, ‘Ato kubde dengnikwanirim,’ eboka sisikwandarur. Ato kuboka dengdaniminyi asi, bona boblobdanamingnya tamurkarerdan li tum ara sirya dengbinkwanurum eboka sisikwandarur. Ani, sun yuk dengna wa iraming nang ati dengdaming to kuboka, ‘Dengnikwanurum,’ eboka sisikwandarur. 51-52Sun Israel nang aryi sun yuk nang wa il don nang kiandarur. Sun a kiamunyi nang ara sun a il wa iramunyi ba, dengnansingnyi to kuboka sunbiramnyi dekdankwandarur. Ara, a yuma iramunyi kwalina aryi kuboka a ibde baramunyi tok asi sun bona boblobdanamunyi ati tamurkarerdan kwalina dobci talak aryi sun doramunyi to kuboka dekdankwandarur. 53Ba, sun a il wa iramunyi nang ara wa iramunyi er ai a kunkwandarur. Ba, sun a er dengna wa iramunyi biryi sunsi Israel nang urasin dam ara kanyi namin asa aryi wa dimnikwansurur. 54Bok asi, sun er il wa doramunyi biryi ato kuboka kum dekci ura, a il wa doramunyi biryi sunsi lobdeibsici ba, sun ai bindobkwandarur. Ara, sun bona boblobdanamingnyi ani, tamurkarerdan tum berekci tum aryi sun ab sun mabwe ab nirya asi lobdeibkwansurur. 55Sun Israel nang ara Ni sun molonindarurnyi wa in nang kibkwanindarur. Sunda Ni Imtamnyi biryi Mesir mutuk weik il wa dorandau bok asi bobdakde yanansise. Ni tentok Iya Erebdobnyi sun molonindarurnyi kunun.” Ara, Musa biryi sun Israel ninyi asi Er Imtamnyi biryi ebdeiamwe to kuboka ebdeibmou.
Currently Selected:
Imamat Uram 25: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
