Imamat Uram 26

Kisal dangna dinyi doron deyok

26:1-13

1Ura, Er Iya Erebdobnyi biryi Musa deici ato ebmou, “Ura, sunci keil kum, co kum aryi sun kwemdeina kibdeiboka molona mem! Ani, sunci kat keil si logam aryi uk nunuboka sun kwemdeina kiknibdeiboka ababyi molona mem! Eda, Ni Iya Erebdobnyi sun molonindarurnyi bikwe molobkwanindarur. 2Sunci Niti si weik eboka molon ai ab, Ni uki tum si Sabat tum nirya asi diboka dibniliboka kalikwandarur! Nira Iya Erebdobnyi kunun.

3-4Ni Imtamnyi biryi sunsi, ‘Ato-ato kubdarur,’ eboka yan memebdeibsise asi talebnuruboka kunubde bimunyi ura, sun wa sirya iboka koubdobmunyi talak ara Niryi mo li kibdeiboka karebkwansin. Ba, sun kouryina nirya ara nong maboka du moubdankwansir. 5Sun kouryina kibkwandum tam ara weik aboka moubde baransici tok asi kibkwamamunyi talak ababyi tuba aboka moubtabakde binkwansir. Ani, yumkuna gandum wa iboka koun talak dobci ababyi, anggur du tuba kinmamuncok, gandum wa ibde binkwandum. Ba, sun kuboka yibde binkwandum mutuk dam aryi iya teleb asa akwe kubde binkwandum. Ani, sun kwaning ton kum atabkwansir aryi iya mangkau asa akwe kubde binkwandum. 6Ba, sun teleb asa kubkwandum mutuk dam aryi Ni sun molonindarurnyi biryi sunci iya kalikmurubkwansin. Ba, sunda yuk dinyi-yuk dinyi aryi ton kum dubdenkwansir. Eda, iya teleb asa akwe kuboka mabde binkwandum. Sun teleb asa akwe kubkwandum mutuk dam aryi kubkwande yu kamyoa nirya ara Ni Imtamnyi biryi oboka kum danabdeibkwan. Ani, sun mar ordana nang aryi sunsi mar tubto ton kum bobdenkwansing. 7Ani, sun mar ordana nang asi mar bobmunci, dombindoka nirya obsekwandum ba, sun urasintam a dibsekwaming. 8Ara, sun ninyi amubaryi nang aryok aryi sun mar ordana nang sun ninyi 100 baryi nang nirya asi obsekwandum. Ani, sun ninyi 100 baryi nang aryok aryi sun mar ordana nang sun ninyi 10.000 baryi nang nirya asi muna kibdongobkwandum. 9Ni sun Molonindarurnyi biryi sunsi iya dibniliboka kalikmurubde binkwansin. Ani, sun mabwe nermabwe yaldakde binkwandum ba, sun mutuk ninyi weik kibkwansir. Ba, Ni sun Molonindarurnyi biryi, ‘Ato kuboka karebkwansin,’ eansise to kuboka kunubdeibnin binkwansin. 10Ba, sunci minob kiamunyi gandum aryi deiboka uki weik yibde binkwandum. Ani, minob kiboka deiamunci iya yiramunyi gandum bai donongmunyi ura, ukuryok gandum kiboka deibmunci, yibde binkwandum. 11Ba, Ni sun Molonindarurnyi biryi sun kankan asi Ni kun ai si Kemah Suci ai dobniryi, Ni kanya ara akai iya kubkwande. Ba, Ni Imtamnyi kanya aryi sunsi li tenena kum kubkwansunun. 12Bok asi, Ni Imtamnyi bira sun kankan dam iya kubokabniryi, sun molonindarurnyi kibkwan. Ba, sunda iya Ni Imtamnyi mabwe nermabwe kibkwansin. 13Nira Iya Erebdobnyi sun molonindarurnyi kunun. Akiryi sunsi Mesir mutuk aryi il wa iboka malyito kurandau asi bobdakde yanansise. Ara, sunci Mesir mutuk nang il wa akwe ibde kuna kum kunkwandau ati bobdakde yanansise. Ani, Mesir mutuk nang aryi sunsi il wa akwe dimnansei dinyi ara Ni sun molonindarurnyi biryi lebdobsise ura, Ni mabwe nermabwe kibdobsisiryi, teleb asa akwe kun nang kibdeibsise.” Ara, Musa biryi sun Israel ninyi asi, “Er Imtamnyi biryi ato kuboka ebdeibdum,” ebmou to kuboka ebkarebmou.

Sumna deyok

26:14-46

14Ura, Er Iya Erebdobnyi biryi ato ebmou. “Sun Israel ninyi aryi Ni sun Molonindarurnyi bisi diboka dibniliboka, Ni ebdeiansinyi uram nirya asi diboka kum kunubde bimunyi ura, Niryi sunsi ikin dinyi kareboka obkwansin. 15Ani, sunci Ni sun Molonindarurnyi biryi arungsin uram ab, ‘Ato kubdarur,’ eboka uram ab, yan memen uram ab asi kum dobdobmunci, diboka dibniliboka kum kunubde bimunyi ura, 16Niryi sun Israel nang asi wenebkwansin. Ara, Niryi sunsi uk aruma youn ab, koltokna youn ab karebkwansinyi ba, sun asing diboka eina kum dinyi ab, engena weik kanya ab kibdeibkwansin. Ani, sun wa iboka yala kwekde binkwanduma nirya ara talyi kwekde binkwandum. A iboka kwekwandum ba, moubkwande dinyi ara sunbiramnyi aryi kum kiboka yibkwandum. Eda, sun mar ordana nang aryi kiboka yibde binkwaming. 17Niryi sunsi ikin dinyi karebkwansin. Ba, sun mar ordana nang aryi sunsi oboka muna kibdongobkwansing. Ani, sun mar ordana nang aryi sunsi ina ngilikwansing. Ato kuboka ina ngilikwansing ba, sun mar ordana nang aryi ton kum idomasingnyi bok asi, ilil ati cukdobkwandum.

18A mambul dinyi nirya sun dam kunubci ba, eibmunyi ura, Ni sun Molonindarurnyi biryi yan memesin dinyi ababyi diboka kum talebnuruboka kalikwandum! Ato kubmunyi ura, Niryi sunsi ikin dinyi weikanun tabakoka karebkwansin. 19Ani, sun ererdandarur dinyi ababyi Niryi luknubdeibkwansin. Ani, Niryi sunsi mo ton kum karebkwansin ba, sun wa iryin tukwe nirya ara ilim sebokabdiryi, logam kat ato biribkwande. 20Ba, sunci mikib doboka wa irderamunyi ababyi ukutotoa ton kum dobdobkwandum. Ara, sun wa ibkwandum tukwe aryi yina-yina kouamunya abokabdiryi, nong maboka du kum moubkwansir.

21Sun Israel ninyi aryi Ni sun Molonindarurnyi bisi tuba yu bobnumunci, Ni erdeirisin uram kum kekebnumunyi ura, sunti wenesin ikin ara weikanun tabakdongoboka karebkwansin. 22Ara, ninyi oboka yin kamyoa arukdongobkwansin ba, sun mabwe nermabwe ab sun bisam mi yaldangnanduma ab nirya asi oboka yibsekwande. Ani, sun atei nang nirya kum dandeibkwande ba, sun atei nang mitik kiboka ninyi singsing ton kum kubkwansir.

23Anda karebkwansin ikin dinyi aryi Ni sun Molonindarurnyi dam tamuboka kum yandobmunyi ura, sunci Nisi tuba yu bobkwanurum. 24Ba, Nibabyi sunsi yu bobsiniryi, mar bobkwansin. Ani, sun malyi kun dinyi ati Niryi sun orminingsin ikin ara tuba-tuba tabakdongoboka karebkwansin. 25Ani, Niryi sun mar ordana nang tam kibkwan ba, muna kibdongobkwansing. Ara, Niryi sunsi, ‘Ukubdarur,’ eboka yan memebdeibsise dinyi asi yan yanindarur deyok aryi sunsi ato kubkwansin. Ani, mitik-mitik atei bindobmunyi ababyi Niryi sunsi dirminingsin youn karebkwansin ba, ninyi weik dibsekwandum. Ani, tonda Niryi sunsi sun mar ordana nang taruk dam dobkarebkwansin. 26Ani, Niryi sunsi yina ton kum karebkwansin! Ba, sun roti kiknin keica tepung ababyi mitikanun kibdeibkwansin. Ani, tentok roti kwaning deiboka uk dana atikwe nerabwe takubaryi cabdandoka roti kwaning mitikanun dabkwaming. Ato kuboka dabingiryi, karebsingnyi ba, yibkwandum bok, kum boubkwansir.

27Anda ikin dinyi karebsinyi ati, ‘Nai e, nun ilil,’ ebokabmunci, Ni dam tamuboka kum yandobmunyi ura, sunci Nisi tuba yu bobkwanurum. 28Sunci ato kuboka tuba yu bobnumunyi ura, Nibabyi sunsi yu bobkwansin. Ani, sun malyi kun dinyi ati Niryi sunsi iya ikin dinyi tabakdongoboka karebkwansin. 29Sun kankan dam aryi kwaning utana eibkwansir. Ba, sun mining mabwe nermabwe asi oboka yibde binkwandum. 30Niryi sun bisam dama deibmunci, oboka uk darandum mutuk konkon nirya asi daluboka kum danabdeibkwansin. Ani, tong teleb en dinyi dupa dama deiboka uk darandum dikum nirya ara Niryi dakoka kum danabsinibkwansin. Ani, sun ninyi din nang yok ara sun molorandum kwemdeina urasintam asi donokwan. Ba, andato dinyi ara duknasito dinyi akiryi dibdenman kumto kubkwanir. 31Ani, sun atei nirya ab, kwemdeina molondarur dikum nirya ab ara daluboka sici kibminikwansin. Ani, sunci Ni Imtamnyi biti siltong dinyi dama deibkwanurum dinyi ara kum dobkwansin. 32Ni sun Molonindarurnyi biryi sun mutuk nirya asi daluboka sici kibminikwansin. Ato kuboka sun atei nirya daluboka sici kibminiksinyi ilil aryi sun mar bordana nang ara ilil dobdobkwaming. 33Niryi sunsi yuk atei-yuk atei nang taruk dam dobkarebkwansin ba, mar bobkwansing. Ani, Niryi sun mutuk tukwe ara kelkel ebdeibokabsiniryi sun atei nirya ara dalubkaboka sici kibminikwansin. 34-35Sun atei a kuramunyi talak aryi Ni sun Molonindarurnyi biryi tukwe lourin kwalina si kwalina Sabat ara, ‘Ato kubkwandarur,’ eboka iya kibdeianyi to asi kum kunuramunyi deyok aryi sun wa irandum tukwe ara kelkel ebdeibkwansin. Ani, sunda sun mar ordana nang mutuk donoknin yibinkwansin ba, sun wa tuba ibde yirandum tukwe ara loubkwandum. 36Ba, sun mar ordana nang atei tuba kurandum nang ara Ni sun Molonindarurnyi biryi sun kanyatam ilil kun dinyi karebkwansin. Ba, kumwe aryi co te-te deici uu-uu eboka lingna atikwe, ‘Nun mar ordana nang aryi domasinga,’ tenen cukoka binsekwandum. Sun mar ordana nang aryi kum domnimasingnyi bok, a kumwe lilim ati cungmamunci uca, obkwansir. 37Ani, sun mar ordana nang aryi ton kum domasingnyi bok asi, a kumwe lingmaca lilim ilil ati cukoka bindobkwandum. Ura, cukoka baronmamunci, kwebtulubdandoka obdeibdankwandum. Ba, mitang dandokabsiriryi, sun mar ordana nang ab obdanman kumto kubkwansir. 38Ba, sunda sun yuk nang atei kankan da bindoka dibsekwandum. Ani, sun mar ordana nang atei da wanikwansing. 39Sun mar ordana nang atei mitikanun a tuba kunmarum Israel nang ara sun malyi kun dinyi aryi sun mar ordana nang atei a obminikwansir. Ani, sun abwe sun mining malyi kun dinyi aryi obminikamwe ba, dibsekamnyi to kuboka sunbabyi ato kubkwandum.

40Bok, sun deibdoba ninyi yuk mutuk dam tuba kunung ninyi ara sun malyi kuboka, Ni kikwe molonina kum kuranei dinyi ab, sun abwe yabwe aryi malyi kuramnyi dinyi ab asi lak eboka, Nisi molona kum kuranei. 41Ato kuranei deyok aryi Nibabyi sun abwe yabwe asi yu boboka mar irdeiriranse. Ani, Niryi sunsi boboka sun mar ordana nang taruk dam kareranse. Akiryi, sun yuk nang mutuk bok asi, a tuba kam kunmang nang aryi sun malyi kun dinyi ab, sun abwe yabwe malyi kun dinyi ab lak ebkwanung. 42Sirya lak ebmunyi ura, sun kanya kat biriansici dinyi ara luknubdongoboka sun malyi kun dinyi kilibdobkwandarur. A sirya ura, sun abwe yabwe Yakub ab, Ishak ab, Abraham ab asi, ‘Ukubkwansin,’ eanse dinyi ab, ‘Kanaan mutuk iya karebkwansin,’ eanse dinyi ab kunubdeibkwansin.

43A deyok aryi, sun Kanaan mutuk dam minob a kuramingnyi ninyi ara a tukwe deibloboka bindobkwanung. Ba, a tukwe ara loubkwanung. Ba, sunbabyi sun malyi kun dinyi aryi ikin dinyi takubdobkwandum. A takubdobkwandum ara Ni sun molonindarurnyi biryi sunsi, ‘Ato kubkwandarur,’ ebdeiansise dinyi asi nun li eanindau deyok aryi ato kuboka takubdobkwandum. 44Bok sunci, sangkuna sun mar ordana nang mutuk bindoka kubmunyi ura, Ni sun Molonindarurnyi biryi sunsi kum taklobkwansin. Ani, Niryi sunsi kum obminikwansin. Ani, sun ab Ni ab aryi, ‘Ato ukubdankwayeb,’ eboka uram talak ebdeibdanamoubwe dinyi to kuboka kunubdankwayeb. Ni tentok ara Iya Erebdobnyi sun Molonindarurnyi kunun. 45Sun teleb kun dinyi aryi, Ni ab sun abwe yabwe ab aryi, ‘Ukubdankwayeb,’ ebdanamoubwe dinyi ara luba kum kibkwan. Ara, Niryi sunsi Mesir mutuk aryi bobdakde yananse. A bobdakde yananse ara Niryi sunsi kalikoka dirnilin dinyi sun urasintam lak kibdeianse. Ato kuanse ara, ‘Ni Iya Erebdobnyi Ni tentok aryi sun molonindarurnyi kibkwanuna,’ tenen ato kuanse.”

46Ara, sun Israel ninyi ati Er Iya Erebdobnyi biryi, “Ato-ato kubde binkwandarur,” eboka uram ab, yan memen uram ab, arungna uram ab Sinai kon aryi Musa deici asi ebdeiamwe. A ebdeiamwe dinyi asi sun Israel ninyi aryi kunubde baramnyi dinyi asi liliboka sekeibwe.

Currently Selected:

Imamat Uram 26: MTG

Highlight

Copy

Compare