Imamat Uram 24
24
Uk ubna diboka kalingna deyok
24:1-4
(Kel. 25:31-40)
1Ura, Er Iya Erebdobnyi biryi Musa bisi ato ebmou. 2“Sun Israel ninyi asi a yan memen uram ebminyi ba, sunci a yan memen uram asi talebnuruboka kunubde bikwanung. Ara, sunci Er Imtamnyi ai Kemah Suci ai ardeirin uk ubna ati yukto tabtabingna kum zaitun du yung demang asi boyankwanung. Ba, a uk ubna ara kikniboka abdibingnyi ura, lukunda nirya ara armurunkwandur. 3A uk ubna ara Er Imtamnyi kun ai yuma lek ai asi Harun biryi kalikoka ardeirinkwandur. Ara, iya lek ai Ruang Kudus asi ardeirinkwandur. Ara, sintam aryi kuboka lukunda nirya armurunkwandur. A ebdeibman yan memen dinyi uram ara sun Israel ninyi a kunmarum ninyi aryi kuboka sunci yaldakde binkwandum? nermabwe mabwe nirya aryi iya kunubde binkwanung 4Ba, Harun biryi a uk ubna diboka lilibokabdiryi, a uk ubna yabla tentok deici asi uk ubna tabaryi nirya ardeirinkwandur. A uk ubna er yan ara tabtabingna kum emas aryi kikniboka Er Iya Erebdobnyi kun ai wilimna dikum asi deiboka ardeirinkwandur,” ebmou.
Er Imtamnyi biti roti kwaning kikniboka dama deirin deyok
24:5-9
5Ura, Er Iya Erebdobnyi biryi Musa bisi ato ebmou. “Roti kwaning kiknin keica tepung teleb dobminyi ura, ikin neiktoto satu kilogram tepung aryi roti kwaning amolbaryi kiknibkwandum. 6Ato kuboka sirya kiknibminyi ura, bokoka olong bitinyi deibkwandum. Ara, ton olong roti nabaryi deirinkwandum. Ba, ton olong ababyi roti kwaning nabaryi deibkwandum. A deirinkwandim dikum ara Er Iya Erebdobnyi ai um asi tabtabingna kum emas aryi deneboka kiknibyi co lamna deici asi deirinkwandum. 7Ba, a tong teleb co yung si kemenyan ara roti kwaning deibmaminyi to kuboka alib deibdongobnin yibinkwandum. Ba, a deibde uk dankwandim dama ara Er Iya Erebdobnyi dinyi kimnikwande. 8Ba, uki si Sabat berengkwande tum nirya ara Er Iya Erebdobnyi urasintam asi imam Harun biryi yina-yina dama diboka liliboka deibde bankwandur. Ara, sun Israel ninyi aryi tuba-tuba kunubde binkwaming dinyi ati ebdeibman. 9A roti kwaning ara Harun ab, er deibdoba nang ab sun dinyi kimkwande. Ba, a dama ara lek dama kimkwande aryi beterdongona mem dikum demang deiboka yibde bankwaming. Ara, sun iya kunubde binkwandum dinyi ati ebdeibmasin,” ebmou. Ara, Musa biryi sun Israel ninyi asi Er Imtamnyi biryi ebdeibmou to kuboka sunsi ebkarebmou.
Er Iya Erebdobnyi si talyi ena ati ikin dinyi karen deyok
24:10-23
10-11Ura, uki tentok tum ara sal tentok aryi sun Israel ninyi keis ol ai yanmou. Yandoka Israel atei yokanyi tentok ab ordanmarei. Ordanmarei noutam aryi er a yanmounyi biryi Er Iya Erebdobnyi si talyi si sibokaburyi, submou. Ura, sun Israel ninyi aryi anyi boboka Musa dam bobinmai. Anyi er kwin si ara Dan yalanyi Dibri nebnyi Selomit kuramwe. Ba, er nai bira Mesir mutuknyi kuramwe. 12Sirya Musa dam bobinmai ura, Er Imtamnyi si malyi kibminikmounyi bisi malyi kun dinyi kunubingnyi ba, dongorban ai dongobmai. Ara, anyi bisi Er Iya Erebdobnyi biryi, “Ato ikin asi karebdarur,” ebkwamou ati ato kuboka dongobmai. 13Ura, Er Iya Erebdobnyi biryi Musa bisi, “Anyi bira ato ikin asi karebdarur,” ebdeibmou. 14“Sun Israel nang keis ol ai dam aryi anyi boboka yuk dikum bobindarur! Bobimunyi ura, sun Israel nang aryi anyi biryi Er Iya Erebdobnyi si talyi si sibokaburyi, submou ba, kekebmai. Sun a submou uram kekebmai ninyi taruk ara anyi kisok deici deibkwanung. Ato kuboka deibingnyi ura, ‘Anyi bira diba ati ato-ato kunmou,’ eboka obingnyi ura, dibkwandur. 15Ato kuboka obingnyi ura, sun Israel ninyi nirya asi ato ebkwandum, ‘Sun Israel ninyi kankan dam aryi unanyi biryi Er Iya Erebdobnyi si asi talya sibyal dakingnyi nang sun malyi kun dinyi ara sunbiramnyi ikin takubdobkwaming. 16Ani, unanyi-unaner aryi Er Iya Erebdobnyi si asi talya sibyal dakwaming nang kum ner kum ara ato kuboka onkwanung. Ara, sun Israel atei yoka nang babyi, tingyangan nang babyi nirya aryi Er Iya Erebdobnyi si asi talya sibyal dakci sal kum ara ato kuboka keil aryi donokoka obingyi ba, dibkwandur. 17Ani, sun yuk nang asi talya obkwaming nang ababyi ato kuboka obingnyi ba, dinkwanung. 18Bok, sunci sun yuk nang winin kamyoa asi obingnyi nang ara sunbabyi sun winiroramingnyi kamyoa atonun asi ununkwanung. 19Ba, sun kwit yabwe aryi sangkuna sun yan kum, taruk kum, asing kum, kisok kum asi dilaka sakeibingnyi ura, sunbabyi sun kubdeibmasingnyi to kubkwanung. 20#Mat. 5:38Ara, sun yan ab, taruk ab kum, sun asing kum, sun si kum asi ato kuboka malyi kubdeibingnyi ura, sunbabyi ato kubdeibkwanung. 21Ani, unanyi biryi sun winin bisam obsingnyi ba, dibci ura, sunbabyi sun winin bisam obkwandarur. Bok, unanyi biryi ninyi asi obdinyi bira ersi obmunyi ba, dibkwandur. 22A yan memebdeibmasin dinyi ara sun Israel yoka ninyi babyi, Israel mutuk tingyangan ninyi babyi nirya aryi talebnuruboka kunubde binkwandum dinyi ati ebdeibmasin. Ni tentok ara Iya Erebdobnyi sun molonindarurnyi kunun,’ ebkwandum,” ebmou. 23Ato kuboka Musa biryi sun Israel ninyi asi Er Imtamnyi ebdeibmou to ebkarebmou. Ura, sun Israel ninyi aryi Er Imtamnyi si asi talyi si dabla dabmounyi bisi sun keis ol ia dam aryi boboka yuk dikum bobinmaici, keil aryi donokoka obmai ba, dibmou. Sun Israel nang nirya aryi Musa deici asi Er Iya Erebdobnyi biryi, “Ato kubde bankwanung,” ebdeibmou to kuboka kunubmai.
Currently Selected:
Imamat Uram 24: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
