Imamat Uram 17
17
Bisam domba oboka Er Imtamnyi biti uk dana dikum deyok
17:1-9
1Ura, Er Iya Erebdobnyi biryi Musa bisi ato ebdeibmou. 2“Harun ab, er mabwe ab, sun Israel ninyi nirya ab asi, ‘Er Iya Erebdobnyi bira ato ebmasir,’ ebdum! 3-4‘Sun Israel ninyi nirya aryi Er Imtamnyi biti bisam lembu kum, domba kum, kambing kum oboka dama deibkwandum ara Er Imtamnyi ai Kemah Suci ai bisik wengban dam akwe dama deiboka molonkwandarur. Bok asi, yuk dikum aryi dama deiboka molobmamunyi ura, “Anda dama ining kweboka dikdongobmang,” tenebkwansing. Ura, sun a yuk dikum dama deibmamunyi nang ara sun Israel nang kankan dam aryi obkabkwansunung. 5Ato ebmasin ara sun Israel nang aryi, “Nun malyi kun dinyi kiliboka lebdeibsute,” tenen baitam yuk dikum asi dama deiboka molorandum dinyi ara taklobdarur! Yuk dikum ara takloboka, sun imam nang asi Er Imtamnyi ai bisik bublan dam akwe dama deiboka moloryankwandarur. 6Ba, Er Iya Erebdobnyi ai bublan dam bobimunyi ura, sun imam nang aryi a dama ining doboka dama deirin keil lamna kubkub nirya diknin yibinkwanung. Ba, a dama kob ara uk dabingnyi ba, teleb siltong aryi Er Iya Erebdobnyi kanyi deibkwansurur. 7Sun Israel ninyi aryi bisam kambing ato tikwanci kwemdeina asi kiknibdeibokabmunci, dama deiboka molorbana mem! Sun a kwemdeina asi dama deiboka moloramunyi ninyi ara Er Iya Erebdobnyi biryi ebdeiansici dinyi asi diboka kunun kum nang kunkwandarur. Akiryi a ebdeibmasin dinyi ara sunci kuboka sun deibdoba nirya ababyi ukubde binkwandarur. 8Sun Israel yoka ninyi babyi, sun tingyangan nang babyi nirya aryi Er Imtamnyi biti bisam domba dama deiboka uk dabkwandum kum, yuk dinyi dama deibkwamamunyi ura, Er Imtamnyi ai Kemah Suci ai dam asi boyankwandarur. 9Asi, sunci yuk dikum asi bobindoka dama deiboka molobmangnyi nang ara obkabkwandarur,’ ebdum,” ebmou.
“Kamyoa ining ab, talyi dibmaci kamyoa ab ara yina mem!” ebdeibsou deyok
17:10-16
10Ura, Er Iya Erebdobnyi biryi sun Israel nang ati Musa deici aryi ato ebdeibmou. “Sun Israel nang babyi, tingyangan nang babyi aryi kamyoa ining yina mem! Asi sunci yibmunyi ura, Ni Imtamnyi nong aryi sun a yibmamunyi nang asi sun atei nang kankan aryi obkwansin. 11#Ibr. 9:22Sun kamyoa mer sun kam kun dinyi ara ining umbura kurur. Sunci kamyoa obmunyi ura, ining ara Niti dama deirin keil lamna dub boyandoka dikmunyi ba, ‘Sun malyi kun dinyi kilibkwansin,’ esunun ara ato kurur deyok ati esunun. 12A deyok aryi Ni Imtamnyi biryi sun Israel ninyi babyi, tingyangan nang babyi nirya asi, ‘Kamyoa ining kibmaning yina mem!’ esunun. 13Sun Israel nang babyi, tingyangan nang babyi aryi bisam kum, weinya kum, maka kum dorbinmamunci, ninyi yiraming kamyoa obdobmamunyi ura, ining kwebdeiboka dikokmun cok yibkwandarur! 14Sun kamyoa kam kun dinyi nirya ara sun ining umbura kurande. A deyok aryi Er Imtamnyi biryi, ‘Sun Israel nang ara kamyoa ining yina mem!’ ebsou. Sun anda kamyoa ining yibingnyi nang ara sun Israel nang kankan aryi obkabkwandarur! 15Ani, sun Israel nang babyi, tingyangan nang babyi aryi er yuk dibmaci kamyoa ab, bai kam aryi oblobmaci kamyoa asi doboka yibmamunyi ura, sun ongon aling ab, sun nong nirya ab ara me ilikoka kekdongobkwandarur! Ato kuboka sirya me ilikoka kekdobmamunyi ababyi nining ato tenen nang kunmamunyi tok asi sintam kibkwandur. 16Bok, sunci anda dibdob kamyoa ab, bai kam aryi oblobmaci kamyoa ab asi yibmamuncok me ilikoka kengdona kum kubmamunyi ura, a malyi kun dinyi ara sunbiramnyi ikin bobdobkwandum ebsou,” ebmou.
Currently Selected:
Imamat Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
