Imamat Uram 18

“Ner sal talyi yordana mem,” eboka lilibdeibmou uram deyok

18:1-30

1Ura, Er Iya Erebdobnyi biryi Musa bisi ato eboka lilirdeirin uram ebdeibmou. 2“Sun Israel nang nirya asi Nira Iya Erebdobnyi, sun Molonunungnyi biryi ebdeibman asi ebdum. 3‘Sun Israel ninyi aryi sun bindoka kurandau mutuk Mesir nang aryi iya malyito dinyi kunuramnyi to kuboka dilibmunyei! Ani, Ni Imtamnyi biryi boboka wengbinkwansin mutuk si Kanaan dam sun minob a kunung nang aryi malyito kunung dinyi ara sunci dilina mem! 4Eda, Ni Imtamnyi biryi, “A dinyi asi kunubde binkwandarur,” ebokabsisiryi iya kibdeibse dinyi asi talebnuruboka kunubde binkwandarur! Nira Iya Erebdobnyi sun molonindarurnyi biryi dib ati ebdeibmasin. 5#Luk. 10:28; Rom. 10:5; Gal. 3:12Sunci Ni Iya Erebdobnyi biryi yan memebdeibsise dinyi asi talebnuruboka kunubde binkwandarur. Sunci ato kuboka kunubde baramunyi ura, a kunuramunyi dinyi aryi lebdandobkwandum. Nira Iya Erebdobnyi sun molonindarurnyi biryi dib ati ebmasin.

6Nira Iya Erebdobnyi biryi sun molonindarurnyi biryi sunsi yan memebdeibkwinsin. Ara, sun ai ninyi mamun ab, sun ab tonkwa dam a kuramunyi nang babyi yana mutuk kuramingnyi nang babyi ara talyi yordana mem! 7Sun nai yabwe nerabwe ababyi sunci talyi yona mem! Sun nai yabwe aryi a ukuryok tanun ner ara sun nai yabwe sun nerabwe kunkwanung. Ani, sun a ukuryok tanun nerabwe ara sun kwin yabwe kunkwanung ati sunci talyi yona mem! 8Sun nai yabwe nerabwe ukuryok tanubmangnyi nerabwe ara sun nai yabwe dinyi. Ati, sunci sun nai yabwe nerabwe asi talyi yona mem! 9Sun malnerabwe nong kobdoba kum, sun malnerabwe aryi deibdoba nermabwe kum tonkwa mana mem! 10Ani, sun mabwe nermabwe aryi deiamingnyi mabwe nermabwe yaldakdoba ab tonkwa mana mem! Asi tonkwa mabmunyi ura, sunbiramnyi alyi dakeibdankwandarur. 11Ani, sun nai kum, sun kwin kum aryi dobtabakanci ner kum, sal kum aryi deianci nermabwe mabwe ab tonkwa mana mem! 12-13Ani, sun naiyong kum, sun kwin er du weit ner kum tonkwa mana mem! Ara, sun nai ai ninyi ab, sun kwin ai ninyi ab kunkwanung. 14Ani, sun nai du weit yabwe doamnyi nerabwe ab mana mem! Eda, sun tat yabwe kunkwanung. 15Ani, sun mabwe nerabwe ab tonkwa mana mem! Ara, sun mabwe nerabwe kunkwanung. 16Ani, sun du yabwe nerabwe ab kum, sun weit yabwe nerabwe ab kum mana mem! 17Sunci er kwin ab sirya marandurumnyi ura, tubto er nebnyi kum, er mi kum, er nebnyi kum aryi deibdoba nebnyi kum ara mana mem! Sunda minob sun ab mabdenamunyi ner ai ninyi kunkwanung. Ani, ato kun dinyi ara duknasito dinyi kurur. 18Sun ner kam tuba kuranci bok, er weit dona mem! 19Sun bunga ining yibanmaci ner ab mana mem! A kunmaci talak ara erda nining tenen ner kunkwamarur. 20Ani, sun yuk nang nerabwe ab mana mem! Sun yuk nang nerabwe ab mabmamunyi ura, nining ato tenen nang kibdeibkwansurur.

21Ni Iya Erebdobnyi bira Ni tentok kunun aryi ebkwinsin. Ara, sun nermabwe mabwe asi kwemdeina si Molokh ati dama deiboka molobkwamangnyi ati karena mem! Ato kubkwandum dinyi ara sunci Ni Iya Erebdobnyi sun molonindarurnyi bisi ina ngilikwanurum. 22Sun sal mamun yordana mem! Ara, Er Imtamnyi urasintam aryi duknasito kurur. 23Ani, nerabwe babyi sal babyi aryi kamyoa ab yordana mem! Ato kun dinyi ara iya nining ato tenen ninyi kibdeibkwansurur.

24Andato kun dinyi aryi Kanaan minob a kunung nang kunung to kuboka sunbiramnyi malyi dinyi bobdongobdamunyei. Sun Kanaan a minob kunung nang nirya ara Ni Imtamnyi biryi yakdonokwan ba, Kanaan ara sun Israel nang kubdobkwandum. 25Kanaan mutuk ara a yakdonokwan nang malyi kun dinyi aryi sirya iya duknasito mutuk kibdeibyi. Ato kubdeibyi deyok aryi, Niryi sunsi ikin dinyi kareboka yakdonokwan. Ba, ninyi aryi duknasito yina yibmangiryi dungdonongdaming to kuboka dukdonokwan. 26-27Bok, sun Israel yoka ninyi babyi, tingyangan ninyi babyi ara Ni Imtamnyi biryi, “Ukubdarur,” ebdeibsise uram asi diboka talebnurubmunci, kunubde binkwandarur! Sun Kanaan mutuk a minob kunung ninyi aryi iya duknasito kunung dinyi ara sunci kununa mem! A duknasito dinyi kunungci, Kanaan mutuk malyi kubdongobyi deyok aryi sunsi ikin dinyi kareboka yakdonokwan. 28Sunbabyi Er Iya Erebdobnyi biryi ikin dinyi kareboka sun Kanaan minob kuramnyi nang asi yakdonokwande to kuboka yakdonoksicei. 29Sun Israel nang kankan dam aryi, “Duknasito dinyi kunubkwaming nang ara obkabokwan,” ebsise ara sunci sirya bikdau. 30Ati, Nira Iya Erebdobnyi, sun molonindarurnyi biryi ebmasin. Sunci duknasito dinyi asi kunuboka sun nong betebminikdamunyei. Ato dinyi ara sun minob a mutuk dam kuramnyi nang aryi duknasito dinyi asi kunuboka beterminingdaramnyi to sunbabyi ukuna mem. Ani, a ebman dinyi nirya kunubokabmunci, sun nong betebminikdamunyei. Ati, sunda ato kuboka sunci talebnurubdobmanto dinyi nirya ebmasin asi diboka-diboka talebnuruboka Ni urasin dam aryi diboka kunubde bindarur,’ sun Israel ninyi asi ebdeibdum,” ebmou.

Currently Selected:

Imamat Uram 18: MTG

Highlight

Copy

Compare