Imamat Uram 16

Ninyi malyi kun dinyi kiliboka Imtamnyi ab, ninyi ab antanirdeirina weik uki tum si Hari Raya Pendamaian deyok

16:1-34

1Ura, sun Harun mabwe bitinyi aryi talyi uk kalum deibdongoboka kirdongon dinyi douboka Er Iya Erebdobnyi urasintam damtoto yanmarei deyok aryi dibmarei. Ba, sun sirya dibmarei talak aryi Er Iya Erebdobnyi biryi Musa bisi ato ebmou. 2#Ibr. 6:19“Kan du Harun bisi ato ebdum. ‘Talyi uki tum aryi ai wilimna kaluna dangabkaboka malyi dinyi iya beterdongona mem ai si Ruang Mahakudus ai wengbici asi dibcei. Ara, Ni ai Kemah Suci ai wilimna kaluna dongtam bana mem. Ba, Ni Imtamnyi akai umbura dam aryi, “Ukubdarur-ukuna mem,” en uram deirin co sangkol bublan dam asi, duwa bum deici dub aryi tingyanganun ati malyi dinyi beterdongona mem. Bok, Harun biryi a uram asi kum kunubci ura, dibkwandur. 3#Ibr. 9:7Ati, Harun biryi iya beterdongona mem ai wengbinkwanci ura, ato kuboka wengbinkwandur. Ara, erci bisam sapi yim ukuryok nenmaci bisam asi er malyi kun dinyi kilina ati, dama deirin keil lamna dam bobindoka Korban Penghapus Dosa ati uk dabkwandur. Tonda, bisam domba yim asi obci ura, Korban Bakaran ati, bisam nong nirya dama deiboka uk dabkwandur. Ukuboka sirya uk dabci ura, iya beterdongona mem ai ur wengbinkwandur. 4Tonda, Harun biryi ato kubkwandur. Er nong nirya ara me kekdobci ura, Ni ai wa in nang imam nang ongon aling kait aling ab, dertam ongon aling ab, sabya ab, kisok kalun aling ab nirya ongoboka wengbinkwandur. 5Ura, sun Israel nang aryi Korban Penghapus Dosa ati karebkwamaci ura, bisam kambing yim bitinyi karebingnyi ba, bowengbinkwandur. Ba, Korban Bakaran uk dabkwamaci ati bisam domba yim tentok Harun bisi karebingnyi ura, bowengbinkwandur. 6Ba, Harun er nong kobdob aryi Korban Penghapus Dosa ati uk dabkwamaci ura, bisam sapi yim bobindoka dama deibmaci deyok aryi, er malyi kun dinyi babyi, er nermabwe malyi kun dinyi babyi kilibkwan. 7Ba, yim bisam kambing bitinyi Israel ninyi asi dobmaci dinyi ara Er Iya Erebdobnyi urasin dam Kemah Suci ai bisik bublan dam deirirbinkwandur. 8Sirya deibci ura, erci a bisam bitinyi deibmaci karin noutam asi sekna yamin deibdenkwandur. Ara, Er Imtamnyi biti tenen dinyi ab, yunyi si Azazel biti tenen dinyi ab ati, sekni yamin bitinyi deibkwandur. 9Ura, a bisam kambing yim asi Er Iya Erebdobnyi dinyi eboka lak kibci bisam ara Harun biryi sun Israel ninyi malyi kun dinyi kilina ati oboka uk dabkwandur. 10Bok, yim bisam kambing Azazel dinyi eboka lak kibmaci bisam ara kam kibmaning Imtamnyi dam deibkwandur. Sirya deibci ura, a bisam ara yini mutuk Azazel biti yakdonokwandur. Ba, sun Israel ninyi malyi kunung dinyi kilibkwanun. 11Ba, Harun er nong kobdob aryi malyi kun dinyi kilina ati sapi yim tentok sirya bobinmaci asi obkwandur. Sirya obci ura, Ni Iya Erebdobnyi biti Korban Penghapus Dosa ati dama deiboka uk dabkwanurur. Ato kubmaci deyok aryi, er malyi kun dinyi babyi, er nermabwe malyi kun dinyi babyi kilibkwan. 12Sirya dama deiboka uk dabci ura, uk tuba angmaci kalum deirin dinyi Imtamnyi biti dama deiboka uk dan keil dungna dam aryi dobkwandur. Dobci ura, uk kalum ab, kunkun tong teleb en dinyi teikmangnyi ba, telebto kubmaci dinyi ab dobkwandur. Dobci ura, neik umbura dongobokabdiryi, Er Imtamnyi beterdongona iya mem ai umbura bowengbinkwandur. 13Ura, kunkun tong teleb en dinyi taikmangnyi ara, “Ukubdarur-ukuna mem,” en uram kibdongoboka deirin co sangkol dam asi douboka tingbinkwandur. Ba, a keica siltong tulum aryi, “Ukubdarur-ukuna mem,” en uram co sangkol nirya asi obliboka libdobkwandur. Bok, Harun a co sangkol eibdiryi dibcei ati a tulum aryi a co sangkol libdobkwandur. 14Ura, a obmaci bisam sapi yim ining asi er taruk du aryi dobci ura, “Ukubdarur-ukuna mem,” en uram deirin co sangkol bublan alibtam asi liki tabaryi akdeibkwandur. Ba, erci liki tabaryi a co sangkol taramtam barwetam asi liki tabaryi akdeibkwandur. 15Sirya akdeibci ura, Harun biryi sun Israel ninyi malyi kun dinyi kilibkwanci ati a bisam domba yim ngang dam asi toubdongoboka ining kwebkwandur. Ura, Er Iya Erebdobnyi dam malyi dinyi beterdongona iya mem ai boboka wengbinkwandur. Sirya bowengbici ura, bisam domba ining aryi, “Ukubdarur-ukuna mem,” en uram kiboka deirin co sangkol alib bublan ab, taramtam barwe ab asi liki tabaryi akdeibnin yibinkwandur. 16Tonda, Harun ato kubkwande ara sun Israel ninyi aryi Er Imtamnyi ai asi malyi dinyi betebdongobyi bok asi Harun biryi tubto beterdongona iya mem ai kibdeibkwande. Tonda, sun Israel ninyi bol asi duknasito bol bonung dinyi asi kilibkwande. Ato kuboka kilibmaci deyok aryi Kemah Suci ai ara sun Israel ninyi kankan dam a iya kubkwande. 17Harun biryi beterdongona iya mem ai wengbindoka sun Israel ninyi malyi kun dinyi ab, Harun er malyi kun dinyi ab, er nermabwe malyi kun dinyi ab asi kilibkwamaci ati a bisam ining bowengbindoka angbinmaci talak ara talyi nang aryi Kemah Suci ai wengbardena mem!

18Ura, Harun Er Imtamnyi ai aryi sirya sakweteboka Er Imtamnyi biti dama deiboka uk dan keil dungna dam yankwandur. Ura, a bisam lembu yim ining ab, domba yim ining ab aryi, Imtamnyi biti dama deirin keil lamna kubkub dina-dina yang belebdeibyi dumbaryi nirya asi lubdeibnin yibinkwandur. Ba, sun Israel ninyi aryi, a keil dungna asi beterdongoramingnyi dinyi ara lek kibdeibkwande. 19Sirya kubci ura, a keil dungna deici asi a bisam ining asi Harun taruk du dumwe aryi toubdongoboka akdeibnin yibinkwandur. Ba, a keil dungna asi sun Israel ninyi aryi malyi kimdongoramingnyi dinyi ara lek kibdeibkwande.

20Ura, Harun biryi a malyi dinyi beterdongona mem ai ab, Kemah Suci ai nirya ab, Imtamnyi biti dama deiboka bisam uk dan keil dungna ab nirya asi, a bisam ining lubdeibnin yibici ura, kam kunmaci bisam kambing yim ara Harun biryi Ni Imtamnyi biti dama deibkwandur. 21Ato kuboka Niti dama deibkwandur. Ara, Harun taruk bitinyi aryi a bisam kambing kisok talebdongoboka, sun Israel ninyi malyi kun dinyi ab, Imtamnyi biryi ebdeibmou to kum kunuramingnyi dinyi ab, nirya lak ebkwandur. Ura, a bisam ara sun Israel ninyi malyi kun dinyi ab, yan dangbisin dinyi ab nirya bobkwande. Ba, a bisam ara ninyi tentok wibdeibmarinyi biryi yini mutuk boboka yakdonokwandur. 22Ba, a bisam kambing yim aryi sun Israel ninyi malyi kun dinyi nirya asi bobci ura, yini mutuk bobindoka taklobkwandur. 23Sirya lobdongobci ura, Harun tamuboka Imtamnyi ai Kemah Suci ai wengbinkwandur. Ura, Harun biryi iya lek ai Ruang Mahakudus wengbinmariryi, kait ongon aling ongobmaci ara kwiriboka akai umbura deibci ura, er ur ongoron aling ongobdobkwandur. 24Ara, Harun bira beterdongona mem dikum me kekdobci ura, ur tum ongobde kun ongon aling ongobkwandur. Sirya ongobci ura, atei dam sakweteboka Er Imtamnyi ab, sun Israel ninyi ab antanirdana ati bisam sapi yim dama deiboka uk dabkwandur. Ani, Harun er malyi kun dinyi kiliboka Er Imtamnyi ab antanirdana ati bisam sapi yim asi dama deiboka uk dabkwandur. Ato kubmaci deyok aryi, Ni Imtamnyi ab, sun Israel ninyi ab ara antanibdankwanub. 25Ura, Harun biryi bisam nong domba kob doboka sun Israel ninyi Korban Penghapus Dosa ati dama deiboka uk dan keil dungna deici aryi uk dabkwandur. 26Ba, yini mutuk dam Azazel biti bisam kambing yim bobinmarinyi atei yandobkuci ura, ato kubkwandur. Ara, er ongobinmaci ongon aling ara me ilikabokci ura, er nong ababyi me kekdobdiryok atei yankwandur. 27#Ibr. 13:11Ba, bisam sapi yim ab, bisam kambing yim ab ara sun Israel ninyi malyi kun dinyi kilina ati dama deibkwanung. Ba, a bisam tub ab kala ab deisu ab yuk deisu nirya ara bai kankan yuk dikum asi bobindoka uk dabkwandur. 28A bisam uk darbinmarinyi bira er ongobinmaci ongon aling ara me ilikabokci ura, er nong ababyi me kekdobdiryok atei yankwandur,’ ebdum,” ebmou.

29Ura, Er Iya Erebdobnyi biryi Musa bisi tubto ato ebmou, “A ebkun uram asi sun Israel ninyi aryi iya kunubde bankwandum. Ara, tabaryi wala wengbimunci, uki nungna takubaryi kibci ura, a berekmaci uki tum aryi sun kanya, ‘Se, malyito kuramoubwe,’ tenen luknubdongoboka ukutotoa yina nirya si teboka bukwandarur. Tonda, mitikto wa ababyi irdena mem! Ara, sun Israel ninyi babyi, yuk atei ninyi sun kankan yandoka kurandinyi bibabyi nirya a uki tum asi wa ina mem. 30Ara, a uki tum ara sun Israel ninyi malyi kun dinyi aryi, Ni Imtamnyi ab, sun ab tonkwa kum kuramoubwe. Bok, a tum aryi sunci Nisi dama deibnumunyi ba, Niryi sun malyi kun dinyi kilibsinyi ura, antanibdankwayeb. 31Ba, a berekmaci uki tum ara Niryi sun malyi kun dinyi kilisin uki tum ati sunci taruk louboka bukwandarur. Ani, sunci luknubdob kanya boboka yina si teboka bukwandarur. Ara, ukubmurubde binkwandum dinyi ati iya ebdeibman. 32Tonda, imam besar Harun dibci talak ara er mi asi unuboka imam besar tikeibmarinyi biryok, Ni ab, sun ab antanirdeirin dinyi kubkwandur. Ba, a imam besar tikeibkwamarinyi bira ersi kisal dakokabmunci, imam nang ongon aling ongobdeibkwandarur. 33Ura, a tikeibmangnyi Imam Besar biryi malyi dinyi iya beterdongona mem ai ab, Ni ai Kemah Suci ai ab, dama deiboka uk dan keil dungna ab asi lek kibdeibkwandur. Tonda, sun Ni Imtamnyi ai wa in nang imam nang ab, sun Israel ninyi malyi kun dinyi kilina ati dama deiboka antanibdeibkwandur. 34Ba, a ebdeibmanto kuboka sun Israel ninyi malyi kuna ati, kwalina tentok ara liki tentok bowengbindoka, dengkwandur. A ebdeibman dinyi ara iya kunubde bankwandum,” ebmou. Ba, Er Iya Erebdobnyi biryi Musa deici ebdeiamwe to kunuboka, Harun biryi kwalina tentok kwalibtok ara liki tentok sun Israel ninyi malyi kun dinyi ati boboka dengbaramwe.

Currently Selected:

Imamat Uram 16: MTG

Highlight

Copy

Compare