Yosua Uram 24
24
Sikhem atei dam aryi Yosua biryi Israel nang asi, “Er Imtamnyi bikwe si weik ebdarur,” eboka ebdarabdeibmou deyok
24:1-28
1Ura, Yosua biryi sun Israel nang yala nirya Sikhem atei dam bulubdeibmou. Ura, Israel nang wisi yoka nang ab, sun sien nang ab, sun malyi dinyi lilirdeirin nang ab, sun yin doun nang bomenengna nang ab buluboka Er Imtamnyi urasintam tingyanmai. 2Ura, Yosua biryi sun Israel nang nirya asi ato ebmou, “Israel nang sun Nai Imtamnyi, Er Iya Erebdobnyi biryi ato ebmasir, ‘Minob talak sun abwe yabwe me Efrat kouboka otam kuramnyi. Ara, sun abwe Abraham ab, er weit Nahor ab, sun nai Terah ab ara yuk kwemdeina moloramnyi. 3Bok, Efrat kouboka otam aryi sun abwe Abraham bisi Ni dobdobmasiryi ato ebmase, “Kanaan mutuk tingbirum,” eboka arukansiryi boboka kamkiringdanse. Ba, a mutuk yanmou ura, er mi yuma mi Ishak karebmase. Akiryi kuboka mabwe ilinto odei-odei yaldakde binmai. 4Ba, Ishak bisi mabwe bitinyi karebmase ara Yakub ab Esau ab karebmase. Ba, sun nebdobmarei ura, Esau bira Seir konkon er mutuk eterebmase ura, erda a mutuk iya kuramwe. Ba, aminda ara sun yina kum deyok aryi Yakub ab er mabwe ab ara Mesir mutuk tingdorbinamnyi. 5Ani, Niryi Musa ab Harun ab asi Firaun bisi bokdonokoka sun taruk aryi Mesir mutuk ilila mambul dinyi liki takubaryi kunubdeianse. Ukuboka Israel nang asi Mesir aryi boboka a mutuk Kanaan dam tamuboyanansise. 6Sun abwe yabwe sirya Mesir aryi boboka, ilila me kwan dam boyangase ura, Mesir nang aminda kongkong ena deici ab, kuda bisam deici ab bukoka weik me kwan si Teberau kwan dam Mesir nang aryi aminda domyanmai. 7Ba, Israel nang aryi Nisi, “Lebdobsurum e,” eboka molonmanei. Ba, Niryi Mesir nang kan Israel nang kan asi kunuk daksinibokabsiryi, Mesir nang asi me lu tamuboka siklibdeibokmase ba, me isin daksekmai. Sirya ato kubdeibmase ura, uki ilinto yini mutuk dam yandoka kurandau. Ato kuboka Mesir nang asi ukubse dinyi ara sun sirya bikdau,’ Er Iya Erebdobnyi biryi ebmar,” ebmou. 8Ebmou ura, “Er Iya Erebdobnyi biryi ton ato ebmar, ‘Niryi sunsi Amori nang kuramnyi mutuk me Yordan kouboka yaletam asi bobinansise. Asi, sunci mar boransei bok, Niryi a nang asi sun taruk dam dobkarebmasise. Niryi minob a mutuk kuramnyi nang asi obkiriboka kum dandeibmase ba, sunci a kuramnyi mutuk asi arabdobmandau. 9Moab sienyi Zipor mi si Balak biryi, “Israel nang asi obkwaman,” tenebmou. Ato tenebmou ura, ninyi si Beor mi Bileam bisi nabmou. Nabmou ura, ersi ato ebmou, “Israel nang asi obkwaman ati, sunsi subdum,” eboka arukmou. 10Bok, Niryi Bileam bisi kum kekebmasiryi, er submou to kum kunubmase. Eda, Niryi er kanya tamubdeibmase ba, sunsi Israel nang asi kisal dakmasou. Ukuboka Niryi sunsi Balak biryi obmasin bok asi lebdobmasise. 11Ani, sunci Yordan kouboka Yerikho dam wengbindoka Yerikho nang asi mar bobmandau. Ara, Amori yala nang ab, Feris yala nang ab, Kanaan yala nang ab, Het yala nang ab, Girgasi yala nang ab, Hewi yala nang ab, Yebus yala nang ab asi mar bobmandau. Uca, Niryi a mutuk nang asi sun Israel taruk dam karebmasise. 12Sun ninyi on ya ab sun yin bisik ena aryi kum obmandau. Eda, Niryi yukto keica nun dobkwetebmase ba, asing eibmaici, Amori sien nang sun ilil aryi kwarakoka binmarei. 13Sun teleb-teleb kundarur mutuk ara sunci il doboka wa indarur mutuk kundarura kuma. Eda, teleb-teleb asa kun mutuk asi Niryi sunsi karebsise ba, a mutuk dam kundarur. Ani, weik atei dondarur ara sunci kum dondarur. Ani, a mutuk kuboka anggur me yiranduma ab, zaitun du yiranduma ab ara sunci kouboka kum yindarur. Eda, Niryi sunsi atei dobdeiboka yina karebsise ba, kundarur,’ Imtamnyi biryi ato ebmasir,” ebmou.
14Ato ebmou ura, Yosua biryi ton tabakdongoboka ato ebmou, “Imtamnyi bisi malyi kimna mem! Eda, Ersi kanya namin asa aryi busul kuboka er eanci to akwe kunubdarur! Sun abwe yabwe aryi Efrat kouboka outam mutuk si Mesopotamia dam ab, Mesir dam ab aryi yuk kwemdeina moloramnyi to kuna mem. Eda, Allah Er Iya Erebdobnyi bikwe moloboka si weik enkwandarur. 15Iya Kam Kururnyi bisi si weik eboka kum molonkwamunyi ura, arub aryi, ‘Nun a kwemdeina asi moloboka si weik enkwayeb,’ ebdarur. Sun abwe yabwe Mesopotamia dam moloboka si weik eramnyi kwemdeina asi molonkwandum do? Sun kundarur mutuk Amori nang moloboka si weik enung kwemdeina asi molonkwandum do? Ati sunci wibdobdarur. Bok, nira, ni ab ni ai ninyi ab ara Imtamnyi Er Iya Erebdobnyi bikwe moloboka si weik enkwayeb,” Yosua biryi sun Israel nang asi ato ebmou.
16Ba, sun Israel nang aryi ato ebmai, “Nunda Er Iya Erebdobnyi bisi takloboka yuk kwemdeina kum molonkwayeb. Eda, Er Imtamnyi bikwe moloboka si weik enkwayeb. 17Nun Nai Er Iya Erebdobnyi biryi nun abwe yabwe ab nun ab asi lebdeiansou. Ani, nunbabyi Mesir dam mambul doramoubwe mutuk aryi lebdeibsou. Nun asing aryi ilil tenen dinyi kikniramwe dinyi asi eirinub. Nun mar ordana nang mutuk yangaramoubwe noutam nirya Imtamnyi biryi boukwe dam dongoansou ba, teleb kuboka a mutuk dam yandoboubwe. 18A mutuk Amori dam wengyabwe ura, minob a mutuk nang asi, Er Iya Erebdobnyi biryi yakdonokoka nunsi karebsou. A deyok aryi Er Iya Erebdobnyi ebdeibwe to akwe kunuboka wa inkwayeb,” sun Israel weik sien nang aryi ato ebmai.
19Ura, Yosua biryi ato ebmou, “Ato ebmarum bok, Iya Erebdobnyi uram kununa ara caknam dinyi kuma. Ara, Er Iya Erebdobnyi bira malyito dinyi kununa kum kurandanyi kurur. Ani, yuk kwemdeina molobmunyi ura, tulum bobkwansururnyi kurur. Ani, Er uram dangbisiraming dinyi ab, sun malyito kurandum dinyi ab kum libdobkwansurur. Eda, sun malyi dinyi kunuramunyi dinyi asi liliboka wenebkwansir. 20Er Iya Erebdobnyi ebwe to kunuramunyi ura, Erci teleb-teleb kimdansici ani, sunci yuk kwemdeina kanyi deiboka er wa irmiliramunyi ura, Erci mambul dinyi kibdeibokabsiriryi, obdeibkwansurur,” Yosua biryi ebmou. 21Uca, Israel nang aryi tubto ato ebmai, “Kum, Nun Allah Er Iya Erebdobnyi uram akwe kunuboka wa inkwayeb,” ebmai. 22Ba, Yosua biryi sun Israel nang asi ato ebmou, “Er Iya Erebdobnyi uram akwe kunuboka wa inkwayeb ebmarum ati sun dam nang bikdanandarur,” ebmou. Ba, sunci, “Nun bikdankwayeb,” ebmai. 23Ura, Yosua biryi sunsi ato ebmou, “Sunci ato ebmarum ura, yuk kwemdeina sun kankan dam kurur dinyi nirya takloboka yakdonokdarur. Taklobmunyi ura, Er Iya Erebdobnyi nun Israel ninyi molonubnyi bisi sun nong kanya nirya kareboka, ‘Er kikwe kanya deibkwayeb,’ ebdarur,” ebmou. 24Ba, Israel nang aryi Yosua bisi ato ebmai, “Dib sirik, nun Nai Er Iya Erebdobnyi bikwe kanya deiboka, Er uram akwe kununkwayeb,” ebmai.
25A tum aryi Yosua biryi sun dib en uram aryi ebmai dinyi Sikhem mutuk dam kerek sekeibmou. Sekeibmou ura, erci, “A dinyi ara kununa mem, a dinyi asi kunubdarur,” en dinyi wibdeibmou. 26Ura, Yosua biryi a ukubdarur-ukuna mem en dinyi ara Er Iya Erebdobnyi biryi yan memen uram kerek sengna umbura sekeibmou. Sekeibmou ura, tuba-tuba teneirdenkwamnyi keil doboka Imtamnyi si moloramnyi ai dam aryi weik co deyok dam tikeibmou. 27Sirya tikeibmou ura, Yosua biryi sun Israel nang asi ato ebmou, “A keil eibmunyi ura, ato teneirdenkwandum, ‘Ni ab sun ab nun tonkwa Imtamnyi biryi a keil dam nunsi ebdeibmasir.’ Akiryi a keil ara teneirden dinyi kubmar ba, Iya Erebdobnyi bisi tanglona kum uca iya Ersi si weik enkwandarur,” ebmou. 28Ato ebmou ura, Yosua biryi sun Israel nang asi, “Ur bindarur,” ebmou ura, Er Iya Erebdobnyi biryi mutuk yuk-yuk karebmou to, sun mutuk dam atei yuk-yuk bindobmai.
Yosua ab Eleazer ab dibmarei deyok
24:29-33
29Yosua bira Er Iya Erebdobnyi wa irmilinanyi ninyi si Nun mi kwalina 110 baryi kwalibmou ura, dibmou. 30Dibmou ura, er mutuk kobdoba si Timnat-Serah, Efraim nang mutuk konkon ilinto burdaramwe dikum asi tentok mutuk kon si Gaas kon eitam kuboka tukwe dongobmai.
31Sun Israel nang ara Yosua kam kuramwe talak aryi Iya Erebdobnyi bikwe si weik eboka moloramyi. Ani, sien nang wisi nang ababyi, Iya Erebdobnyi biryi ilil tenen dinyi kikniramwe dinyi tuba bingdamnyi nang kam kuramnyi talak ara sun Israel nang aryi Er Iya Erebdobnyi bikwe moloramnyi.
32Minob talak ara sun Israel nang sun abwe Yusuf, Mesir dam diamwe. Ba, er kisok yangkol yok Mesir aryi kuboka boyanamnyi. Sirya boyanmai ura, er yok ara Sikhem mutuk dam tukwe dongoamnyi. A mutuk ara Yusuf er nai Yakub biryi Sikhem nang sun nai Hemor mabwe aryi keil uang perak kikniamnyi dinyi 100 baryi aryi a mutuk dekmou. Ura, a mutuk ara Yusuf yaldangna mabwe ati sun iya kunkwamnyi mutuk eterebmai.
33Ninyi si Harun mi si Eleazar bibabyi dibmou. Dibmou ba, er mi Pinehas biti etereamnyi mutuk kon si Gibea ara Efraim kon dam tukwe dongobmai.
Currently Selected:
Yosua Uram 24: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
