Hakim-hakim Uram 1
1
Kanaan nang asi Israel nang aryi orkiriramnyi ani, kabloamnyi nang asi tubto mar bobmai deyok
1:1-15
1Yosua sirya dibmou ura, Israel nang aryi Er Iya Erebdobnyi bisi ato eboka asibmai, “Unanyi biryi menekoka Kanaan nang asi mar bobinkwande do?” ebmai. 2Ba, Er Iya Erebdobnyi biryi ato ebmou, “Yehuda yala nang asi menekoka mar ibinkwanung. Diba ati, Kanaan mutuk ara Niryi sun Yehuda yala nang taruk dam sirya karebse,” ebmou. 3Ato ebmou ura, Yehuda yala nang ara Er Imtamnyi uram diboka kum kunuramnyi deyok aryi er du Simeon yala nang asi ato ebmou, “Ni ab, kan ab tonkwa Iya Erebdobnyi biryi ebmasir to menekoka Kanaan nang asi mar ibinkwanim,” ebmou. 4Ba, Yehuda yala nang anaboka Kanaan nang asi mar tonkwa ibinmai. Ba, Er Iya Erebdobnyi biryi Kanaan nang ab, Feris nang ab asi sun taruk dam dobkarebmou. Ba, Bezek mutuk dam aryi ninyi yubwa 10.000 baryi obmai. 5Ura, sun Israel nang ab, Bezek sienyi si Adoni-Bezek ab bisik dam ebdanmaici, anyi bisi obmai. Ukuboka Kanaan mutuk ninyi ab, Feris ninyi ab asi obmai. 6Uca, Adoni-Bezek bira cungdorbanmou asi dombinmai ani, talebmaci er yan amwe ab, te amwe ab sekmai. 7Ura, Adoni-Bezek biryi ato ebmou, “Sien nang yubwa 70 baryi nirya niryi talebokabsiryi, sun yan amwe ab, te amwe ab sekanse. Ani, ni yina deirina amwetam asi mablikde yinmandarur eranse to akwe Er Iya Erebdobnyi biryi nisi deknir,” ebmou. Ura, anyi ersi boboka Yerusalem atei bobinmai ba, Yerusalem dam aryi dibmou.
8Ukubmai ura, Yehuda yala nang aryi Yerusalem nang asi mar bobmaici ninyi on ya aryi obkiriboka akatei uk daboka kum dandeibmai. 9Ani, Yehuda yala nang aryi tubto Kanaan nang asi mutuk Negeb kon dam kuramnyi ninyi ab, mitik mutuk kon kuramnyi nang ab asi mar bobmai.
10Ani, tubto Yehuda yala nang aryi Kanaan nang akwe asi Hebron mutuk kuramnyi nang asi mar bobmai. Hebron si minob eramnyi si ara, “Kiryat-Arba,” eramnyi. A mutuk nang obmai nang sun si ara Sesai ab, Ahiman ab, Talmai ab asi ukuboka obmai. 11Ani, akiryi kuboka Debir nang asi mar bobmai. Weik atei Debir minob eramnyi si ara, “Kiryat-Sefer,” eramnyi. 12Ura, Kaleb biryi ato ebmou, “Unanyi biryi Kiryat-Sefer nang mar boboka obkiribci ura, ni nebnyi Akhsa bira anyi bisi kabdeibnyi ba, dobkwande,” ebmou. 13Ba, Kaleb weit Kenas mi Otniel biryi akatei nang asi mar bobmou. Ba, Kaleb biryi er nebnyi si Akhsa kabdeibmou ba, dobmou. 14A ner er akenyi ai yanmou ba, dobmou. Ura, er akenyi Otniel biryi, “Kan nai wa ton eterebsurur,” eboka bula yukmou. Ba, a ner bisam keledai deici bukoka, er nai bisi binmou. Sirya binmou ura, bisam keledai deici aryi sakweteboka tingbau asi er nai Kaleb biryi ato ebmou, “A nebnyi kan dan do?” ebmou. 15Uca, a ner aryi er nai bisi ato ebmou, “Kanci nisi oron mutuk eterebmanirim ati, sul mutuk ton eterebnurum tenen yanman,” ebmou. Ba, Kaleb biryi er nebnyi ati, a mutuk me u eitam ton me u outam ton karebmou.
Yehuda yala nang ab Benyamin yala nang ab aryi mar bobmai deyok
1:16-36
16Musa er yamal deibdoba Keni nang ara Hobab deibdoba ab, Yehuda yala nang ab antaniboka co korma kuramwe weik atei Yerikho atei dam yinimwe dam, Yehuda nang mutuk Arad dam Negeb mutuk bindoka iya kuramnyi. 17Ura, Yehuda yala nang ab, er du Simeon yala nang ab tonkwa antaniboka, Kanaan nang asi Zefat atei kuramnyi nang asi obkiribmai. Obkiribmaici, a weik atei si ara Horma eboka si dobmai. 18Ani, Yehuda yala nang aryok weik atei Gaza ab, anda atei nirya ab, Askelon atei mutuk nirya ab, Ekron atei mutuk nirya ab asi mar bobmaici, obkiribmai. 19Ara, Er Iya Erebdobnyi biryi sun Yehuda yin doun nang asi milibmou ba, a mutuk konkon nirya araboka sun dinyi iya kibdobmai. Bok, a mutuk bakan kuramnyi nang ara kat dinyi aryi kiknin kongkong ena si kereta kikniboka boramnyi deyok aryi kum yakdonokmai. 20Ura, Musa biryi eamwe to kuboka Hebron mutuk ara Kaleb biti eterebmai. Ani, Enak mabwe winiryi ababyi Kaleb biryi yakdonokmou.
21Sun Benyamin yala nang aryi Yebus yala nang asi yakdonokman kum kubmai akiryi Yebus yala nang ara Yerusalem dam ukubabyi tuba kunung.
22Yusuf yala ababyi Betel atei nang mar bobmai. Ba, Er Iya Erebdobnyi biryi sunsi milibmou. 23Betel minob si ara Lus eramnyi mutuk asi Yusuf yala aryi, “Dirmeimbindarur,” eboka bokdonokmai. 24Bokdonokmai ba, bindoka diramnyi uca, ninyi tentok a weik atei aryi anaboka yangau asi ato ebmai, “Kanci nunsi eterebsurum, una kuboka nunci akatei wektibyi do? Wengbibyi ura, kanda nun kwit kibdobkwankib,” ebmai. 25Ebmai ba, “Ato kuboka wengbinkwandarur,” eboka eterebmou. Ura, sun wengbindoka ninyi on ya aryi lukoka obkiribmai. Bok, sunti eterebmounyi ab er ai ninyi ab ara, “Ur bindobdarur,” eboka bokdonokmai. 26Anyi bira bokdonokmai ba, Het mutuk dam bindobmouci, weik atei kiboka dobmou. Ura, akatei si Lus eboka si dobmou. Ukuboka dobmou atei si ara uku talak ababyi, “Lus,” enung.
27Manasye yala nang aryi, Bet-Sean nang ab mitik-mitik atei kuramnyi nang ab, Taanakh nang ab mitik-mitik atei kuramnyi nang ab, Dor nang ab mitik-mitik atei kuramnyi nang ab, Yibleam nang ab mitik-mitik atei kuramnyi nang ab, Megido nang ab, mitik-mitik atei kuramnyi nang ab asi kum yakdonokmai. Ara Kanaan mutuk a nang aryi, “Yangdonongsin kum, nun iya a kuronkwayeb,” eboka taba deibmai aryi sunsi kum yakdonokmai. 28Ba, kuramnyi ani, Israel nang mikib kubde bau ura, a kabloamnyi Kanaan ninyi asi, sun il dimna nang kibdeibmaici, iya yakdonokman kum kubmai.
29Sun Efraim nang aryi Kanaan nang Gezer atei kuramnyi nang ara kum yakdonokmai. Eda, sun ab tonkwa Gezer atei tuba kuramnyi.
30Zebulon yala nang ababyi Kitron atei ab Nahalol atei nang asi kum yakdonokmai. Eda, Kanaan nang sun il dimna nang kiboka sun dam iya kuramnyi.
31Ani, Ako atei nang ab, Sidon nang ab, Ahlab nang ab, Akhzib nang ab, Helba nang ab, Afek nang ab, Rehob nang ab ababyi Asyer nang aryi kum yakdonokmai. 32Ukuboka kum yakdonokmai deyok aryi Kanaan ninyi yoka ara Asyer yala nang aryi kum yakdonokmai eda sun ab tonkwa tuba kunung.
33Ani, Naftali yala nang aryi Bet-Semes nang ab, Bet-Anat nang ab ababyi kum yakdonokmai. Eda, Kanaan nang kankan dam tuba kuramnyi ba, sun Naftali yala nang sun il arungna nang kibdeibmai.
34Ani, Dan yala nang asi Amori nang aryi, “Bakan mutuk dam ara bana mem eda, mutuk konkon dam asi bindobdarur!” eboka titikokmai. 35Uca, Amori nang ara taba deiboka, Har-Heres ab, Ayalon ab, Saalbim ab dam iya kuroramnyi. Yusuf mabwe Efraim ab Manasye ab yala nang aryi uram wis kareramnyi ababyi kum bingnamnyi. Ara, sun il dimna nang kiamnyi deyok aryi ato eramnyi. 36Ba, sun Amori nang mutuk ara Akrabim aryi diniboka, eitam Sela sekoka kibdamiryi kuramnyi.
Currently Selected:
Hakim-hakim Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
